Tagged: 瑜伽

0

【酸鹼性食物邊樣好? 裙帶菜鹼性濃度爆晒燈】懶健康貼士

上集My Fitness嘅瑜伽教練Bowie提到喺瑜伽飲食理論入面,酸性食物對身體冇益,鹼性食物就可以食多啲,想重溫就入傳送門啦:【瑜伽教練力推兩大恩物 堅持食淮山飲清補涼】 究竟食邊啲酸鹼性食物先好?其實一直都有唔同嘅研究,雖然酸性食物大多被視為對身體冇益,甚至有人話鹼性食物可以防癌添,好似中醫就有學說指鹼性食物可以補充腎氣。香港防癌會提出喺飲食上多食新鮮蔬果同五穀、少食肉類同油鹽糖防癌,而咁啱鹼性食物通常都概括蔬果同五穀類。不過酸性食物都有營養價值嘅,所以又唔使話戒晒。好似Bowie咁講:「食多咗酸性食物,咪食返多啲鹼性食物平衡返囉!」。既然係咁,小編搵咗日本西崎弘太郎博士嘅研究,喺100款抽樣測試食物之中,小編再各抽二十款大家比較常食到嘅食物出嚟,等大家睇真啲自己食咩多啦。 喺100款食物之中,海鮮同肉類都冇出現喺鹼性食物之中,唔怪得練瑜伽嘅人好多都食素啦!Bowie話食完牛肉之後拉筋會痛啲,但原來雞肉比牛肉酸性更高呀!雖然有營養師指出過多嘅酸性會經尿液排走,但十個有九個人都水腫,亦飲唔夠水,咁點排走呢?所以痛風人士都唔食得酸性高嘅食物,如果身邊有親友患痛風就要留意吓啦!最令小編驚訝嘅係裙帶菜鹼性濃度極高,咁佢有咩營養價值?齊齊睇吓先! 裙帶菜係海草嘅一種,譽為海中蔬菜,喺日本仲有「天然螺旋藻」嘅美譽。裙帶菜含有大量碘,係甲狀腺合成嘅主要物質,如果缺乏碘就會有俗稱嘅「大頸泡」。裙帶菜仲含有大量甘露醇,可以利尿消腫,調養腎功能;而甘露醇同碘、鉀、煙酸等有協同作用,可以防治動脈硬化、高血壓、慢性肝炎同貧血等症狀。咁多好處唔係叫你狂食,因為食咩都唔可以過量,但知多啲好處就一定冇衰啦!

0

【瑜伽教練食素多過食肉 三大分類有「毒」唔好食】懶健康貼士

瑜伽係一個講求身心平衡嘅運動,上集My Fitness嘅瑜伽教練 Bowie就話食完牛肉,第二日拉筋會痛啲,咁係咪玩瑜伽就要戒牛肉?Bowie笑住話:「考牌嘅時候,咖啡都唔飲得㗎,我哋玩瑜伽講有毒嘅物質即係煎炸嘢、薯片、雪糕等等,一般好味嘅嘢都係唔健康嘅。但唔好用個戒字囉,生活要開心㗎嘛,呢樣又戒、嗰樣又戒,咁樣會好唔開心囉!所以我仲有食牛,但食少咗嘅。玩瑜伽之後我係慢慢轉變飲食習慣,依家係食素多過食肉。我都會食零食,但以前食薯片,依家食堅果囉。有時會好想食肉,即係身體缺乏蛋白質,咁我就買魚食,或者同Fitness教練一樣,好鍾意食雞蛋囉!」。 Bowie講到咁,小編再研究吓瑜伽嘅飲食同平常人有咩唔同。喺印度嘅傳統瑜伽理論,宇宙受三種力量影響,所以食物都分咗三類:悅性食物、變性食物同惰性食物。呢三類食物嘅分類唔係一成不變,會因應氣候、個人體質而轉變,例如氣候寒冷嘅地方,變性食物會轉為悅性食物,惰性食物就轉為變性食物。依家就睇吓呢三類食物有咩啦! 悅性食物 練瑜伽嘅人多數食呢類食物,包括水果、堅果、穀類、豆製品(例如豆漿)、牛奶和乳類製品、穀類製品、大部分嘅蔬菜(有啲蔬菜屬於惰性食品,例如洋蔥)同溫和嘅香料等等。悅性食物可以令肌肉同精神系統更精緻同敏銳,情緒穩定同頭腦清醒,所以愈長時間練瑜伽嘅人就愈傾向素食。 變性食物 喺瑜伽飲食之中,各種刺激性強嘅調味製品、醃製食品、加工烹煮嘅食物(例如咖啡、濃茶、朱克力同碳酸飲料等等)、各種烘烤食品(例如奶油蛋糕、冬甩、即食麵同罐頭等等),就歸納為變性食物。呢啲食物雖然帶嚟能量,但對心靈冇益,長期食會變得思維緩慢同缺乏耐心,如果長期食就等於食惰性食物。 惰性食物 惰性食物包括所有肉類同辛辣食物,例如豬肉、牛肉、內臟、煙、酒、辣椒、洋蔥同芥末等等。惰性食物容易令身體變得僵硬,引起疾病同心靈遲鈍。長時間食會令性情容易暴躁;呢啲食物中,最冇益就係肉類,因為屠宰動物之後,無論點處理都冇辦法徹底驅除生命死亡後嘅「屍毒」。   好在練瑜伽唔會要求你即刻改變飲食習慣,而係你會自然咁慢慢轉變。咁Bowie嘅轉變係點?留意下一集嘅懶健康貼士,佢會分享養生恩物俾你知㗎!