Tagged: 生果

0

【「好好肉」得返2粒仔肉 沙田榴槤黑店多客中招】食焦

呢個時候唔少榴槤控都出動,諗住趁當造嗒返啖又香又濃嘅榴槤肉!不過遇著啲生果檔衰黑心,專入渣貨就真係黑仔喇!好似有網友喺沙田瀝源邨檔生果檔,210蚊買咗兩個榴槤,買嗰陣店員仲話「好好肉」,點知返到屋企一開,五瓣肉有三瓣係冇嘅,另外兩瓣只係得返2粒肉仔,係一毫子咁大嘅肉仔喎!唔嬲就假啦! 嬲還嬲,都要影咗相先,跟手落去檔嘢度嘈啦梗係,點知檔主竟然唔肯退貨!苦主留言「仲話我地(哋)搵佢錢(笨?),因為越來越多街坊圍觀才最後退了$100!」。網友喺群組po咗事發經過同張得2粒肉仔嘅榴槤相,原来有唔少街坊都瀨過嘢喎,呢間生果店個朵已經臭晒喇! 有網友留言話「果間不嬲都係黑店嚟㗎喇!好耐之前幫佢買榴櫣點知揀個生嘅唔熟返到屋企先知呀!然後落去搵佢話佢比(俾)個唔熟嘅榴櫣我,然後老板(闆)好串咁話唔熟咪返屋企蒸熟佢囉!」嘩,咁樣叫個客返去蒸熟佢都得?又真係離譜啲喎! 再睇返黑歷史,其實兩個月前喺另一個群組都有人中招,又係呢間呀!呢位苦主係買咗一個400蚊貓山王,返到屋企一開發現啲肉又黑又灰,仲要出晒水!當然店主又係唔肯換又唔肯退錢啦,只係話下次買就計返平啲喎!試問仲邊有下次呀?睇嚟呢間店真係好唔掂,榴槤似乎仲係中招嘅重災區添,下次仲肯幫襯佢,記得當場開咗榴槤先喇!

0

【PMQ果藝市集 生果瘋狂食買玩!】PMQ 果藝市集 2017

各位生果潮人要留意啦!聽日開始,由3月23日至3月26日PMQ元創方舉辦「春夏限定:PMQ 果藝市集 2017」,以生果為主題,名符其實可以帶住兩梳蕉去行市集!20個攤檔個個都各有特色,除咗有得大歎生果,仲有得玩生果Workshop,大人細路都可以一齊享受春日新氣息! 市集推出多個親子生果Workshop,星期六日鍾意享受Family Day嘅你就啱晒啦!去到佢地有士多啤梨紅玫瑰、水果波板糖、蘋果薯條、同水果心靈繪畫工作坊等等大玩生果創意藝術。大家可以盡情發揮小宇宙,製作各式古靈精怪嘅特色生果料理! 呢個市集仲引入咗超過 20 個有水果元素嘅精選攤位,除咗有得買新鮮生果,生果主題飲食,生果宅配、有機健康產品、護膚品、手作精品同埋調味品樣樣都齊。 好似有「呃 Like 之選」色彩繽紛嘅Minijobs飲品,又解渴又靚。 充滿懷舊風格嘅美樂士多,今次市集佢仲會推出限定咸檸七,嚴選新鮮檸檬製作,延續昔日情懷。 仲有Buttery Factory精緻嘅自家製冬甩,特色水果乾小食同果醬,勁多種口味大家任揀!仲有I SEE I SEE同Heiniken都喺埋市集入面。平時忙到甩轆嘅你可以感受一下小清新,享受春日清爽氣息! PMQ 果藝市集 2017 日期:2017年3月23日至3月26日 時間:3月23日(四)16:00-20:00 3月24日至26日(五至日)12:00-20:00 地點:中環鴨巴甸街35號PMQ元創方地面廣場