Tagged: 生牛河

0

【過江龍老字號定街坊店? 精選四大人氣越式生牛河】蔡瀾Pho、錦麗、香河越南餐廳、越軒牛肉粉專門店

泰國菜招牌係冬蔭功湯、新加坡係肉骨茶、台灣就係魯肉飯,咁越南菜招牌又係咩?梗係一碗令人回味嘅生牛河啦!最近一窩蜂咁開咗唔少越南菜餐廳,要試到餐廳嘅真功夫掂唔掂,生牛河自然係最好測試喇!要做到一碗好味嘅生牛肉河,湯底除咗要鮮甜濃味,牛肉更加要做到粉嫩幼滑,肉、湯、河、香料,每樣配合得天衣無縫先令人清晒成碗!點先食到一碗高質生牛肉河粉?今次小編集合咗四間唔同風格嘅越南餐廳,有新有舊、每間各有真功夫! 明星效應   蔡瀾Pho 蔡瀾曾經講過:「天下間喜歡吃東西的人,最終都會愛上一碗越南牛肉粉。」,所以佢行勻全球,喺墨爾本嘅勇記揾到最好食嘅越南粉帶俾大家。有勇記秘方,又有自家研發嘅河粉機,加上八成食材由越南同澳洲進口,蔡瀾Pho門面寫住「一生難忘的越南粉」,真係對自家出品好有信心咁喎! 生牛肉湯河粉(HKD88)有6-7片肉左右,湯好熱,影多幾張相就浸熟咗啲肉,想食到嫩啲嘅質感就要快手喇! 河粉機每日新鮮製作薄薄嘅越南河粉。由浸米、石磨磨成米漿再蒸熟、切割都係自家製作。河粉係小編食過之中最薄嘅,少少易斷啦,但真係幾爽滑㗎;而湯底就非常清澈同鮮甜,係有少少油嘅,如果加上附有嘅青檸汁同辣椒,味道會變得醒神,但要小心咬到辣椒會想噴火呀!另外仲有一杯芽菜同香菜都係俾你隨心加料,想食重味啲又得啫。 蔡瀾Pho 地址:中環威靈頓街15-25號UG樓 電話:2325 9117 營業時間:星期一至日:10:00-22:00   越南過江龍   錦麗 本身有接近50年歷史嘅錦麗喺越南好出名,最高紀錄試過一日賣出過三千碗牛肉粉,深受當地客人同遊客歡迎,更被《華爾街日報》評為「胡志明市最好吃牛肉粉」,唔怪得上年登陸香港開分店之後,經常都要大排長龍,仲有唔少星級名人食過都讚口不絕,係咪真係咁好食?等小編試吓啦! 錦麗生牛肉粉(HKD60),枱面印有一張越南粉食法嘅教學貼紙,依照指示嚟食,先飲一啖充滿濃郁牛味嘅熱湯,再將九層塔及香葉撕碎放入湯中,之後再加青檸汁、辣椒同芽菜拌勻,最後將粉同湯一齊放入口中,每一啖都充滿住濃郁嘅牛湯味,又真係幾正喎!湯底濃郁鮮甜,生牛肉軟腍幼滑,重牛味之餘亦鮮味十足。攻港短短一年時間,先後喺港九新界開足六間店,犀利呀! 錦麗(銅鑼灣店) 地址:銅鑼灣告士打道280號世貿中心3樓P311號舖 電話:2777 5388 營業時間:星期一至日:11:30-22:00   40年老字號   香河越南餐廳 港島區朋友仔,實知老字號香河越南餐廳。創辦人係越南華僑,因為一直鍾情越南粉,咁啱拍擋又曾經喺越南做過生牛河,所以就引用咗佢嘅配方,嚟到香港開越南餐廳,一開就開咗接近40年,因為味道較為傳統,除咗多香港人食,亦係唔少越南華僑嘅開飯食堂。 生牛肉河粉(HKD50),一碗生牛河會附上青檸同辣椒粒,想加薄荷葉、生芽菜同九層塔,就要問店員先有得加喇,唔使加錢嘅!生牛河一放上枱,已聞到陣好香嘅牛湯味,飲落口諗住會好濃郁,較為重口味,點知味道完全相反。負責人Rita話,原來係因為老闆娘本身唔鍾意重口味,希望啲湯以清甜為主,所以湯底只係用洋蔥、香料同牛骨嚟熬煮,所以湯底清甜又帶有淡淡嘅牛味,一啲都唔油膩! 牛肉真係超級大塊!差唔多有成半個碗咁大,生牛肉再浸一浸熱湯之後,肉質變到好粉嫩,一啲都唔會過老,配埋啖湯一齊飲真係牛味十足!Rita仲話其實加半嚿青檸汁同幾粒辣椒落去,已經好夠味,香葉唔需要加晒落去,只要加少少,調吓味咁先係最好食!每一條河粉都沾滿晒湯汁,變得更滑溜! 香河越南餐廳 地址:銅鑼灣波斯富街89號 電話:2576 2240 營業時間:星期一至日:12:00-23:00   親民價益街坊 ...

0

【網友狂踩蓮.越坊劣食 小編實測伏味生牛河】伏務台

小編最近見到灣仔呢間蓮.越坊負皮多過正評,為咗證實吓係咪真係伏到個個嬲嬲呢,小編一於親身試伏! 小編去食嗰日咁啱落大雨,餐廳位置同招牌顯得……格外唔起眼,小編來回咗兩、三次先搵到佢。 餐廳個場都幾大嘅,不過店員態度就正如網民所言,唔多友善囉!落單嗰陣啲語氣都要呼呼喝喝咁,今時今日咁嘅服務態度? 既然係越式餐廳,生牛肉河應該係最代表到餐廳水準嘅,招牌菜應該ok啩?小編點咗呢個河內生牛肉河(HKD40/連凍飲),留意返呢個係下午茶價錢,正價盛惠69蚊。 望落個樣覺得怪怪哋,但又噏唔出邊度怪……終於發現,點解啲牛肉熟到咁嘅?同想像中新鮮熱辣仲見到啲牛肉半熟咁浸喺湯上面嘅生牛河差得遠喎!如果咬落係熟得剛剛好都算,點知肉質同賣相完全成正比,老到可以做小編媽咪喇!肉韌都算,食咗兩條粉覺得淡如白烚咁……飲咗一小啖湯,嘩,成碗白烚水咁冇厘味道喎! 一碗靚嘅生牛河基本上係可以唔使加任何調味嘅,食撈檬就話啫!不過小編呢碗生牛河個湯真係淡到難以引起食慾,正想加少少魚露醋調吓味啦,望住樽魚露醋、又諗起網友話仲衰過怪味檸檬,咁……小編放棄了!   小編伏氣:食嘢最怕冇味道呀!今次連招牌嘅生牛肉河都咁樣,真係令人失望呀!雖則話下午茶價錢算ok,但味道可以更ok就最好啦! 入伏點:蓮.越坊(灣仔店) 入伏價:河內生牛肉河(HKD40/連凍飲)   中伏by #肥仔文 美術by #車雲 攝影by #肥仔文 《伏務台》星期一伏務大眾,歡迎各界報料。