Tagged: 用心

0

【北海道帶子紫薯意大利飯】JC Room

位於元朗嘅JC Room,大廚曾於新加坡主理西餐一段時間,經驗十分豐富。餐廳非常關注食物質素,除咗選材講究,用心於細節同埋菜式上之外,更加會體貼客人需要度身烹調食物,好似老人家同小朋友去到,佢地會特登將啲飯煮腍啲啲!非常貼心! 鍾意食Risotto嘅朋友一定要試下北海道帶子紫薯意大利飯(HKD148)!餐廳選用北海道刺身帶子,本身可以當刺身食,肉質好鮮嫩!餐廳特登煎至六、七成熟,令到外層香脆、內裡保持鮮甜鮮嫩!紫薯意大利飯用新鮮紫薯打成蓉,紫薯味道好清新,入面再混啲菇,再加埋法邊豆增加口感層次。 香煎鵝肝多士(HKD88)選用匈牙利鵝肝,食落感覺唔油膩,仲散發陣陣甘香,加埋多士同醬汁仲多咗重香脆同濃香!鍾意食鵝肝嘅朋友一定要試下啦。 酒汁慢火燴澳洲和牛面頰(HKD188)選用牛面頰,比起一般牛肉更腍更鮮嫩,脂肪比例平均而且膠質豐富。牛肉燴足12小時,入口有即溶嘅感覺! 提拉米素伴野莓(HKD45)選用杏仁酒製作,食起上嚟滲有淡淡酒香。另外,選用手指餅作夾層,入口非常鬆化,比起一般tiramisu多咗一重鬆脆感覺。每一啖混和忌廉、咖啡香味同淡淡酒香,令人欲罷不能!作為餐後甜品更顯餘韻動人。 JC Room 地址:元朗鳯攸南街3號好順景大廈地下44號舖 電話:2385 5168 營業時間:星期一至五: 18:00-23:00 星期六、日及公眾假期: 11:00-16:00; 18:00-23:00 星期二: 休息

0

【安格斯牛小排鍋飯】Castle Wine & Restaurant

有時小編發下白日夢,都會夢下自己喺城堡入面大魚大肉,做個貴族都咪話唔梳乎!但係香港地邊度有城堡呢?一齊跟住小編打開隨意門啦,就係位於葵涌嘅Castle Wine & Restaurant喇!即管入去睇下係唔係貴族級享受先! 餐廳坐落大馬路旁邊,但係入到去十分寧靜,燈光柔和。黑色同木檯櫈嘅組合,令人覺得別有格調,坐落悠閒舒適,有種低調雅致嘅感覺。 城堡入面又點可以無用心煮食嘅廚師呢?小編試咗香炸雞中翼配墨西哥辣汁(HKD68),雞翼嘅皮非常酥脆,入口感覺好輕盈,完全唔會有好肥好黏稠嘅感覺,啱晒怕肥怕油嘅朋友。自家調製嘅墨西哥辣汁亦唔辣,兼且好滑,配合灑上紅椒粉嘅巴西雞翼香濃鬆脆,食落即刻感受到廚師嘅心思! 想食海鮮不妨試試蟹皇汁蟹肉意粉(HKD168)。入面雖然混合咗蟹膏、蟹肉同忌廉,但食落去完全唔會好黏好滯,反而入口軟滑,每條意粉滑溜之餘,啖啖都食到蟹嘅鮮味。加上筍、菇,洋蔥都非常鮮嫩,真係越食越想食呀! 鍾意食飯焦嘅朋友可以試試安格斯牛小排鍋飯(HKD238)。未上到檯,已經聞到超香!碳燒嘅牛肉,食落實肉得嚟唔韌,細細咀嚼仲會有肉汁滲出。米飯方面選用嘅係珍珠米,先用牛肉同牛骨熬湯,再放入生嘅珍珠米煮,食落粒粒珍珠米都好飽滿彈牙煙韌,滲入肉味而不失米飯嘅香甜味。加上個鍋熱力十足,軟熟嘅飯底有唔少飯焦,又香又脆,食落口感豐富又香口!蔬菜亦吸收咗豐富牛肉汁,食落唔止鮮甜,仲有牛肉味慢慢滲出嚟,好正呀! 如果想悠閒飲酒歎下,仲可以試下Sangria Jug(HKD258)。以西班牙紅酒、果汁、水果同基酒調和,飲落酒精味雖然濃,但係唔會嗆喉,容易入口,就算平時唔係好飲酒都適合㗎!一支大約750ml,大約斟到5杯紅酒杯咁多,可以約埋朋友去試下喎!順便提提大家,餐廳後面有停車場,駕駛人士去都好方便㗎! Castle Wine & Restaurant 地址:葵涌石文徑1號葵英大廈地下G10號舖 電話:3708 8265 營業時間:星期一至日:12:00-23:00