Tagged: 瘋傳

0

【杜拜王子請食飯埋單45萬 上海豪門宴食咩要咁貴?】食焦

一餐8個人嘅晚餐可以食到幾貴?最近有張天價帳單喺網上流傳,8個人食咗20道菜,埋單就要40萬人仔,即係差唔多成45萬港銀!呢場富豪宴發生喺上海一間名店「西郊5號」嘅餐廳,率先po喺微博嘅網友,除咗po咗啲鮑魚呀蟹呀嘅食物相,仲po埋張天價帳單出嚟,引來瘋狂討論同轉發! 喺張天價帳單度發現,20道菜清楚列晒出嚟,見到最貴嘅鱷魚尾燉湯要16800人仔,野生大王魚盛惠15800人仔,仲有第三位貴價嘅係清酒凍半頭南非鮑要12800人仔,每人一隻即係8份已經要過10萬人仔喇!雖則話「西郊5號」係名店,但平常去呢度食一餐嘅消費,人均頂晒籠只係二、三千,去到咁誇真係好罕見! 當議論緊究竟張單係真係假嘅時候,「西郊5號」嘅老闆兼明星廚師孫兆國就跳出嚟認晒成件事,仲話當晚嘅8人豪門宴係由杜拜王子請客,食到咁豪咁貴係因為當晚嘅餐單同食材都係私人訂製,平時係食唔到嘅!佢仲話:「杜拜人請中國人吃飯……在杜拜根本不算什麼!」。即係叫大家咪咁大驚小怪啦! 呢位名廚老闆仲強調當晚嘅食材全部都係合法㗎,好似鱷魚尾燉湯用嘅鱷魚係喺廣東、福建人工養殖場提供嘅,並唔係受保護嘅野生動物。至於有份食當晚豪門宴嘅賓客之一、亦係第一個po張天價帳單出嚟嘅嗰位仁兄,原來真身係一位上海好出名嘅富二代,不過當佢知道搞到咁大迴響之後,就將自己個微博全部鏟清,只係留返張中指圖畫,睇嚟好似好嬲咁款! 呢位富二代仲俾人爆料話,當晚雖然係由杜拜王子負責請客,不過富二代都有來有往㗎,知情人士話富二代當晚自備咗成50萬人仔嘅酒水到場㗎!咁其實計埋酒水,呢餐真係百萬豪宴喎!飲飽食醉邊個最開心?梗係間餐廳啦,天價帳單瘋傳之後,日日爆場勁多客去食呀!無端端變咗另類宣傳,掂啦!

0

【瘋傳阿華田雞蛋湯食譜 網民實測老公讚好飲】食焦

喺屋企或者茶記飲返杯阿華田就試得多啫,阿華田都可以用嚟煲湯?唔係啩?就係囉!呢期就有個阿華田雞蛋湯嘅食譜喺網上瘋傳喇!有網友經過書局,見到本家庭湯水食譜,揭揭吓竟然見到有阿華田雞蛋湯,仲要係喺補血養顏篇入面添喎!po咗上網跟住瘋傳,最估唔到嘅係即刻有網友自告奮勇,乜都假、煮咗先講啦! 率先po呢個食譜上網嘅網友,寫埋「依家啲烹飪書,定係我太Out?就係後面嗰本『滋陰補血湯』」,呢個湯就係阿華田雞蛋湯喇,出埋食譜㗎!睇埋功效講啲乜,寫住「阿華田含麥精、牛奶、可可、葡萄糖、維他命及礦物質等,雞蛋含有豐富營養,配合而用,能助人體力充沛,並有養顏潤膚等作用。」 似係唔講得笑咁喎!不過網友一般反應梗係覺得係地獄料理食譜啦,仲話咁都可以出書教人煲湯水有冇兒戲啲呀?正當一人一句嗰時,心口寫咗個勇字嘅網友原来已經即刻坐言起行啦,預備埋材料(其實得三樣啫!),即刻煲啦,仲拍埋片出嚟㗎,有片有真相,雞蛋湯出到嚟,其實係成碗蛋花湯咁,仲要係阿華田色嘅蛋花湯囉! 味道如何?女勇士整完呢碗嘢,係俾咗老公食嘅!試食報告係「好彩我先生掛住睇波冇睇到呢個食譜,佢話好好飲,問我用乜嘢整咁犀利,我話啱啱上網學識整」,竟然係好好飲喎!仲話阿華田同雞蛋撞埋一齊係冇阿華田味嘅!唔知係咪煮開上癮,定係俾老公讚好味又夠飽肚嘅關係啦,呢位人妻跟住再聽埋其他網友嘅意見,阿華田之後輪到好立克雞蛋湯,繼續俾老公試味!睇嚟咁煮法,可以自己出返本地獄湯水食譜喎!