Tagged: 相機食先

0

【純素法式甜點網店開門市 主打低糖馬卡龍+法式撻】moono

法式甜品就食得多,但純素版你又試過未呢?專賣純素甜點嘅moono由網店起家,最近終於喺深水埗開實體店喇,除咗招牌嘅純素馬卡龍、純素法式撻、手製曲奇外,更有店舖限定嘅件裝卷蛋糕添!呢間小店嘅甜點出品無論係賣相定味道配搭都係由店主主理,甜點外型設計簡約得嚟又小清新,而且味道同製法方面都有唔少嘅突破,希望俾人知道原來純素甜品都可以好好味。新店嘅甜點每日都會轉換唔同嘅限定口味推出,咁就Keep住有新鮮感啦! moono嘅實體門市開喺深水埗嘅「合舍」內,室內木系裝潢貫徹小店簡約風格,有幾個堂食位置,但都係以外賣生意為主。合舍內亦有售賣唔同嘅文學雜誌、書本,絕對係文青們嘅好去處。 店主想純素甜點無論喺賣相同味道都吸引到人,佢哋嘅迷你法式撻就係其中一個好例子喇。左邊嘅橙花水開心果撻(HKD32)底層有濃厚嘅開心果醬,中間唧入加有橙皮嘅橙花水Cream,鋪平後再唧上自家製嘅豆乳忌廉,灑上開心果碎做點綴。而右邊嘅蘋果金寶撻(HKD32)就係小店嘅熱賣之選,內餡有自家焗製嘅焦糖蘋果,喺出面未必搵得到㗎!值得一提嘅係,佢哋嘅撻皮每日都喺自家工作室新鮮焗製,保證撻皮鬆脆。  而件裝卷蛋糕係店舖限定嘅甜品,款式會不定期轉換。當日就食到柚子焦糖純素卷蛋糕(HKD49/塊;HKD185/卷),佢嘅內餡用咗自家製豆奶忌廉,中間加入黑糖豆乳做點綴,質感軟綿綿,味道清新又唔膩。而最近卷蛋糕更出咗新Menu,將會有新口味陸續推出,大家就要期待吓喇! 當然唔少得moono招牌嘅純素馬卡龍(HKD30/塊;HKD175/6塊)啦!當日精選有海鹽黑朱古力、紅桑子玫瑰、伯爵茶、開心果、黑芝麻五款,盒裝口味可以隨意配搭,咁精緻買嚟送俾朋友都好喎! 各款曲奇(HKD58/包)都係用咗自家製嘅植物牛油,確保曲奇入面嘅材料盡量無添加。而且呢度嘅曲奇口味獨特,冇乜地方食到㗎。 曲奇總共有6款口味,包括:京都宇治抹茶曲奇、花生焦糖曲奇、無麩質嘅豆乳雪球、紫蘇曲奇配紅莓醬夾心、味噌曲奇同粟米曲奇。   Moono 地址:深水埗大南街186號地下(合舍內) 電話:從缺 營業時間:星期三至日:12:00-19:00

0

【西灣河重量級酒吧餐廳 爆汁醬燒牛肋骨×芝味牛堡】The Blind Pig

如果一間酒吧餐廳嘅食物重量級大大份,又有得睇運動比賽,同朋友喺度食嘢係咪更relax呢?西灣河海旁嘅The Blind Pig就集齊呢啲元素,餐廳菜式參考咗美國、英國、加拿大等地嘅特色;而呢度嘅大電唔係只播球賽,會有唔同類型嘅運動㗎,無論味覺定視覺都有多重享受。 餐廳環境開揚,陣中有陣陣海風吹過,帶埋寵物嚟嘅朋友都可以坐近門口位置。 呢個Whole Roasted Cauliflower 烤原個芝士椰菜花(HKD118)佈滿芝士,睇落極度邪惡?!其實椰菜花入口非常juicy多汁,反而中和咗芝士嘅鹹膩又不失香口。 而另一款邪惡小菜就係Crispy Pork Knuckle Finger 招牌豬手脆條(HKD128)!豬手起咗骨食得方便之外,亦醃得好入味,炸到皮脆肉彈口感唔錯,想開胃啲又可以蘸埋甜辣醬。雖然睇落細細碗,不過食吓一條,食吓一條都唔可以好快清咗佢。 Classic Patty Melt芝士牛堡三文治配薯條(HKD160)分量都算多,烘過嘅多士夾上嫩滑嘅牛肉同雙層熱溶咗嘅芝士,惹味又唔會過鹹。現埋大量炸薯條,男士自己食一份都夠飽㗎。 Pan Seared Sea Bass Fillet 香煎海鱸魚(HKD178/half,HKD298/whole)清甜鮮味嘅湯汁令你入口好舒服,加上大量爽口嘅蜆肉同大蝦,加埋煎香咗都依然嫩清嘅鱸魚一齊食,口感幾豐富喎。 如果你係食肉獸就唔可以錯過Slow Cooked BBQ Beef Short Rib慢煮醬燒牛肋骨(HKD238)!面頭有少少檸皮中和醬燒嘅肥膩感,而慢煮過嘅牛肋骨肉質非常軟腍,切一大嚿咬仲有爆肉汁嘅感覺添。 唔想煩揀咩又可以開心share呢份Roast Beef Family Style 烤肉分享拼盤(HKD428/週末限定),有齊烤肉、芝士椰菜花、烤薯、甘筍同麵包,當Tea Set咁食都夠晒豐富。...

0

【蘇豪區文青酒吧餐廳 脆皮鴨髀酥×燒芝士蛋糕】Doubleshot by Cupping Room

蘇豪區嘅酒吧餐廳Doubleshot by Cupping Room,因為呢個金色嘅特大玻璃窗而成為文青嘅新蒲點,但係呢度唔止「打得」,仲有唔少主菜同輕食都一樣食得㗎。餐廳以環保為概念,將Cupping Room嘅烘焙咖啡結合二次創作嘅杏仁牛角包浸酒,令食物可以多元化地運用。而一系列嘅西班牙菜俾大家嚟飲杯嘢又得,同朋友聚餐亦得。 呢個特大玻璃窗吧檯特在太受歡迎喇,想坐到呢個位最好先預約。 Crispy Duck Leg Confit(HKD198)嘅鴨髀比平時嘅大隻!而且外皮香脆,肉嫩入味;就連配菜紅蔥頭都煮到好軟腍,配埋鴨肉一齊食會更香甜惹味。加埋招牌嘅Spent Martini(HKD118),可以同時品嚐以Expresso Anasora Samii、自製咖啡粉、杏仁牛角包浸酒混合而成嘅咖啡酒,甘香同酒香加埋一齊令味道層次更豐富。 Wagyu Bavette(HKD298)都幾大份,仲可以自選和牛嘅熟度。和牛煎香後灑上鹽同鋪上蔬菜,就咁食會light啲;想濃味啲可以蘸碟內嘅醬汁,或者另上帶點酸爽嘅香草醬。 平時食嘅炒蝦意粉,蝦嘅分量都會好多,但呢碟DOUBLE Prawn Pasta(HKD268)唔止蝦嘅分量多,仲有西班牙紅蝦同大Size甜蝦兩款呀!嗦晒蝦汁嘅意粉,配上啖啖爽口嘅蝦肉真係令人好滿足呀! 如果只需要輕食,Avocado on toast 2.0(HKD118)係呢度招牌菜之一。大量牛油果粒加上唐辛子芒果、蛋黃、水牛芝士同西班牙Chorizo香腸俾你自由配搭充滿橄欖香嘅麵包,實啱晒鍾意健康飲食嘅你。 Katsu Sando(HKD98)嘅三文治先塗牛油再烤,令佢外脆內軟,再夾住吉列西班牙黑毛豬唔止惹味啲,咬落仲有肉汁㗎。 甜品一定要試Burnt Cheese Cake(HKD68)!面層燒到有微微嘅焦糖香,入口軟滑香綿,仲充滿芝士同奶香添。   Doubleshot by Cupping Room 地址:中環蘇豪荷李活道49 號鴻豐商業中心1...

0

【母親節堂食或外賣推介 5間精選甜品配大餐】母親節

諗好今個母親節點慶祝未呢?困咗喺屋企咁耐,想出去食又有啲活動玩吓?有即繪畫肖像同SPA可以做。就算想外賣返屋企,甚至自己下廚炮製都冇問題,睇吓呢幾間高質餐廳嘅出品啱唔啱你啦!   世界著名甜品店 想媽媽今個母親節甜入心,不給去世界著名甜品店當文歷餅店買件cake返屋企慢慢歎啦!新推出嘅士多啤梨軟心朱古力(HKD198/上)外型同新鮮士多啤梨一樣,其實入面係軟心朱古力,以頂級Valrhona白朱古力同法國士多啤梨果蓉整成軟滑嘅內餡;外層再包上Valrhona士多啤梨朱古力,夠晒香甜。而紅桑子玫瑰蛋糕(HKD580/下)以絲滑雲呢拿朱古力醬包住輕盈嘅蜜糖海綿蛋糕、自家製紅桑子玫瑰啫喱、香脆開心果脆片餅乾,味道同口感都層次豐富。面頭仲有新鮮紅桑子同埋以色列食用玫瑰花花瓣,係咪好似一個蛋糕花呢?!   當文歷餅店by Dominique Ansel 地址:尖沙咀海港城海運大廈地下63A號舖 電話:2613 8618 營業時間:即日至4月30日 | 11:00-21:00 (5月時間請留意官網更新)   寶盒下午茶×珠光SPA 如果想有得食又有得歎,Alibi嘅「海洋寶盒下午茶」配上「川」水療中心嘅「閃亮時刻水療之旅」就滿足到你喇。因為喺5月10日享用呢個五月推出嘅「閃亮時刻水療之旅」(HKD1,080/位),除咗有45分鐘珍珠光采面部,以Intraceuticals抗衰老精華、人參精華同珍珠粉等組成嘅面膜美白滋潤肌膚,再以玫瑰草精油身體按摩45分鐘,歎杯用玫瑰汽酒同葡萄柚汁調成嘅粉紅雞尾酒之外,仲可以用優惠價(HKD388/兩位)享用「海洋寶盒下午茶」!呢個母親節特色下午茶有豐富嘅鹹甜點,包括清酒鮑魚伴藜麥、櫻桃鵝肝、燕窩蛋撻同白桃意大利奶凍等,仲會送上施華洛世奇水晶鏈墜及項鍊一份俾每位媽媽添。   「海洋寶盒下午茶」 供應時間:2020年5月10日 供應時間:15:00-17:30 價錢:HKD498/兩位 Alibi – Wine Dine Be Social 地址:旺角上海街555號香港康得思酒店5樓 電話:35523028 營業時間:星期日至四:10:00-01:00,星期六、日:10:00-02:00 「川」水療中心 地址:旺角上海街555號香港康得思酒店41樓...

0

【大廚奇招抗疫】《太飽喇!》網上雜誌

大家留喺屋企遠離人群,或者唔再一大班人聚餐對餐飲業嘅打擊有幾大?就係嚴重到令大廚們出奇招轉型囉!好似壽司Omakase變成上門即製、火鍋店唔賣火鍋、餐廳大推抗疫餐等等。講多無謂,即管睇吓大廚同餐廳點樣「疫」市求生,繼續俾大家食到好嘢啦!

0

【西九文化區無敵海景餐廳 名人Tasting Menu色香味全】PANO

喺西九文化區新開法國菜餐廳Pano食嘢,可以睇到近乎全維港海景,而且唔係得景靚,食物都好高質。行政總廚Ken招待過唔少名人,依家餐廳嘅「名人Tasting Menu」就集合咗佢26年嘅功力,10道菜款款都味道突出,其中招牌麻辣蜆意粉、香茅椰汁鮑魚花膠雞湯、慢煮和牛肋肉及和牛面額肉、燒法國血鴿、自家製腐竹薏米雞蛋糖水雪糕等等都係代表作,即刻去片睇吓有幾正啦! 餐廳嘅景色無論日夜都咁靚! 入面嘅裝潢氣派得嚟幾摩登。 名人Tasting Menu(HKD888/7道菜,HKD1,188/10道菜)話明係試Ken嘅功力,當然每道都味道突出啦!前菜Amuse Bouche(左)賣相美艷「出色」,以紅菜頭整成圓錐脆筒裝住泰式調味嘅北海道元貝他他同mascarpone芝士泡沫,酸酸哋好開胃;配上用墨魚汁自家製脆片同日本螢光魷魚一齊食,口感好豐富。意式炒雜菜配意大利烏魚及18年陳醋茄子(右)喺菊苣面放上用菇菌、西蘭花、蘆筍同椰菜花整嘅意式炒雜菜,混入意大利出產嘅烏魚籽同埋用18年陳醋煮過嘅茄子,味道非常清爽醒胃。 清酒煮貴妃蛑配法國魚子醬及香蒜泡沫選用本地貴妃蛑,以牛油、日本清酒、貴妃蚌滲出嘅汁水煮成肉湯汁,鮮味而清甜。面層嘅香蒜泡沫、魚子醬同用18年陳醋煮過嘅洋蔥令鮮嫩爽口嘅貴妃蚌更加提味。 椰子味道濃厚嘅香茅椰汁鮑魚花膠雞湯,靈感嚟自Ken細個成日飲嫲嫲煲嘅鮑魚雞湯,依家就用竹絲雞熬製3小時,再加入香茅、椰子同花膠。湯汁充滿精華嘅味道,香濃而唔會互搶雞湯同食材之間嘅味道。 蘋果木煙燻西蘭花燉蛋配馬糞海膽以玻璃蓋住蘋果木煙燻,令鹹香嘅海膽沾上煙燻嘅蘋果木香。連同底層嘅西蘭花同燉蛋一齊食,可以中和海膽嘅鹹味,而口感滑嫩之中更有層次添。 酥脆魚鱗香煎馬頭魚配海鮮番茄醬係將本地海域和魚市場街常見嘅馬頭魚變成法式料理。以滾油淋喺魚皮上,令幼薄嘅魚鱗「炸」到一瓣瓣豎起,整成一層酥脆香口嘅外層。滑得嚟結實嘅魚肉配上自家熬製海鮮湯煮成嘅鮮甜番茄醬同香蒜泡沫,反而有種濃縮嘅法式龍蝦湯感覺。 招牌麻辣蜆意粉係Tasting Menu之中,唯一可以單點嘅菜式!將川椒浸喺意大利橄欖油一日,再低溫慢煮令味道慢慢地融合喺橄欖油之中。加埋蟹湯、蜆肉一齊煮,味道麻辣又唔會油,仲連怕辣嘅朋友都食到㗎。 食主菜之前先食熱情果雪葩配腰芒肉清一清口腔嘅味道啦。自家製熱情果雪葩唔會太酸,加上特別香甜嘅腰芒同椰子泡沫就加更清爽。 主菜可以二選一,呢道慢煮48小時和牛肋肉及和牛面額肉先將牛肋肉用香料慢煮,再用備長炭炭爐燒香嚟添加炭火香味。而三角形嘅當然唔係咖喱角啦,入面包住用陳醋同砵酒慢火炆煮過嘅和牛面額入口唔肥膩,仲保留到少少膠質。蘸埋印尼蕃薯蓉同埋用牛骨熬製成嘅黑松露汁,試齊清甜同濃味嘅配搭。 另一道就係高級法國料理菜式之一嘅燒法國血鴿!挑走血鴿腿內嘅根部,再用鹽、胡椒、蒜頭同香草調味,連同鴨油一齊慢煮後再喺火爐上燒香。改用混入7種香料嘅本地麥芽糖,令香脆嘅鴿皮面層帶少少甜味。 最後嘅自家製腐竹薏米雞蛋糖水雪糕係混入本土風情嘅法式創意甜品,上菜時侍應會將液態氮mascarpone芝士雪糕灑喺上面,會有層白霧籠罩好夢幻㗎! Ken將佢鍾意食嘅腐竹薏米雞蛋糖水製成一粒米白色雪糕,味道超迫真!再用腐皮油炸製成脆片,搽上糖粉同牛油再烘焗,薄脆但唔覺油。加埋沾上士多啤梨濃漿嘅大粒日本士多啤梨,清甜中帶陣微酸好解膩。   PANO 地址:西九文化區博物館道22號一樓1號舖及天台 電話:2361 9600 營業時間:星期二至日:12:00-17:30,18:30-23:00,星期六、日及公眾假期:12:00-22:00(星期一休息) *Happy Hour時段14:30-17:30只開放露天雅座

0

【鬧市秘藏露天餐廳似綠洲 咖喱燜鴨髀「泰」香滑】RUAM

依家出街食嘢都想搵間露天餐廳,主打泰國菜嘅RUAM雖然置身喺灣仔商廈,但大部分座位都係露天㗎,仲有唔少盆景令你感覺更加relax。呢度嘅主食惹味得嚟幾清新,配埋小食、雞尾酒同甜品真係歎到令人唔想走囉。 呢度嘅佈置俾人感覺好似去咗外地旅遊咁,高度通風嘅感覺係香港餐廳少見嘅。 餐廳一到週末就有Brunch(HKD248起)俾大家食得盡興又他條啲,其中呢味Pad Thai Kung泰式大蝦炒金邊粉(單點HKD148)仲好受歡迎添。雖然有三款醬俾大家自己加調味,但本身味道已經酸甜開胃,要加的話都係加辣。大蝦、花生碎豆干同芽菜分量都唔少,撈埋一齊食口感好豐富㗎。 如果散叫,一定要試炸魷魚鬚(HKD98)!大大條魷魚鬚沾上少量炸漿,微脆彈牙嘅口感令人好滿足。本身味道有啲辣,但蘸埋醬汁就更加辣,而且感覺幾juicy喎。 如果有三、四個人齊齊食,不妨試吓烤全鱸魚(HKD338/時價)。搽滿泰式香料嘅鱸魚用錫紙包好就入爐烤,質地嫩滑仲好多肉。配上加入新鮮香料特調嘅醬汁,酸辣之中有種好fresh嘅感覺。想再惹味啲的話,呢道菜亦可以揀炸嘅煮法 食泰國菜一定要有咖喱!紅咖喱荔枝燜鴨髀(HKD188)配上兩塊薄餅,蘸上香辣又滑身嘅紅咖喱汁,加埋帶有香烤味又燜到鹹香軟腍嘅鴨髀肉,係完美嘅配搭呀!而大大粒荔枝肉咬落好多汁,令你難得食咖喱會有種清新嘅感覺。 平時食泰式甜品都會諗起芒果糯米飯,但呢度一定要試椰絲湯圓(HKD68)!湯圓包住製過嘅椰絲,甜中帶鹹有咬口,連埋煮過嘅椰漿汁一齊食好滋味㗎。 想Chill吓又點少得雞尾酒呢?One Night In BKK(HKD88)以芒果、新鮮橙汁、龍舌蘭、薄荷葉等調製,再用辣椒抹杯邊。配上兩片同樣沾有辣椒嘅青芒果,一杯俾你有齊甜、酸、辣嘅味道。   RUAM 地址:灣仔莊士敦道60號J Senses1樓9號舖 電話:3160 8535 營業時間:星期一至五:11:30-15:00,17:00-23:00,星期六:11:30-23:00,星期日:11:30-22:00

0

【Omakase大廚:坐喺度冇用㗎 轉攻到會上門即製壽司】滝壽司

新嘅抗疫措施之下想食好啲可以點?外賣到會不失為一個好選擇,但大廚都上埋門就真係唔使落廚,坐低等食就得。人稱朱師傅嘅甄啟量係銅鑼灣高級Omakase滝壽司嘅老闆兼主廚,見疫情爆發就即刻推出廚師發辦到會服務(HKD1900位/兩位起),大約15道菜主打高級嘅壽司Omakase,當中都會有刺身同熱湯。咁同堂食有咩分別?等師傅話你知啦! 朱師傅會將用具、醬料、準備好嘅食材包好入保凍箱,當中一定有枝消毒劑! 安坐家中都可以超近距離睇師傅即席握壽司。 「了解清楚客人想食咩,有啲咩唔食得之後,我哋會預先準備好食材,佔嘅空間唔多,俾一張枱我就夠㗎喇。不過本身餐廳做Fine Dining形式,所以有啲菜式嘅整治比較複雜,但去客人屋企就未必整到,例如煙燻嘅效果,但食材一定係用返堂食嘅品質,只係製作方法要改變吓;另外就係熱煮嘅菜式都唔可以好堂食咁隨意整,因為我哋都唔會搞客人嘅廚房,但都會問可唔可以俾我哋熱返個湯呢啲簡單嘅步驟。」依家就介紹幾款可以出現喺廚師發辦到會服務嘅菜式啦! 充滿魚籽嘅白飯魚刺身加入來自日本嘅「太陽蛋」蛋黃同醬汁後味更更甘香,口感仲特別爽喎。 大家都知靚嘅滷味都用「萬年滷水汁」煮先好食,但示來鮑魚汁都可以好似滷水汁咁留起重用㗎!呢味北海道蝦而鮑魚先用鐵盒盛載蒸熟,將當中嘅汁水混入已經留起4年、不斷重用嘅特製鮑魚汁,然後將蒸熟嘅蝦而鮑魚放入去浸泡製成,味道仲帶有海水嘅鹹鮮味添。師傅話呢款鮑魚夠大隻同密度高,可以製作成溏心乾鮑,唔怪得入口有少少溏心黏黏哋嘅質感啦。 平時將紅肉熟成就聽得多,但刺身都可以咁整你又知唔知?寒鰤魚壽司以乾式熟成嘅方法處理,令肉質軟滑又更甜,唔講仲以為係即切嘅新鮮刺身添。 同樣熟成過嘅藍旗大拖羅壽司起埋筋膜,入口爽滑亦唔會太肥膩,不過原來拖羅嘅肥美程度同養殖方法有關。「全養殖方式嘅魚食油脂高啲,因為缺乏運動吖嘛。但半養殖嘅始終喺海游過,肌肉會多啲,不過我哋熟成過又會令肉質軟返,口感又會唔同啲。」 滝壽司用嘅金目鯛都係經日本搵嘅靚貨,熟成過嘅金目鯛壽司火炙後魚皮會脆啲,灑上自家生曬再炒嘅烏魚子粒,香口又不失魚嘅鮮味。   滝壽司 地址:銅鑼灣開平道1號Cubus15樓 電話:2782 0010 營業時間:星期一至日:12:00-15:00,18:00-23:00

0

【本地蠔民二代開麵店 鮮蠔湯米線配香煎金蠔】第一蠔粉麵

唔使去流浮山都食到本地蠔?!太子最近新開粉麵小店第一蠔粉麵以蠔做主題,仲係由本地蠔民第二代主理,用大大隻嘅鮮蠔同金蠔打造一系列價錢親民嘅主題菜,各位蠔迷出動啦! 餐廳所用嘅本地蠔每日由流浮山新鮮運出嚟,全部即叫即煮,保持蠔嘅新鮮度。而且呢度嘅出品冇加味精,希望以簡單嘅煮法同調味,帶出本地蠔嘅原汁原味! 呢啲鮮蠔喺煮之前要好好清洗,清走啲蠔殼碎等大家放心食用。細細個已經開始處理蠔嘅店主Joey會好細心咁逐隻蠔沖洗,憑手感去檢查每隻蠔。 招牌嘅鮮蠔湯米線(HKD58)梗係蠔迷必食啦!湯底用咗豬筒骨、雞肉等熬煮5個鐘以上,再加入鮮蠔湯調味,淡淡奶白色嘅湯頭非常鮮甜。面頭有6隻脹卜卜嘅鮮蠔,仲成隻匙羹咁大,分量十足又粒粒飽滿,入口好juicy! 呢度嘅鮮蠔粥(HKD58)同平時啲蠔仔粥唔同㗎,加入比較大隻嘅鮮蠔好幾揼本喎!綿滑嘅粥底本身以蠔煮成,就咁食粥已經好夠味,仲要有啖啖肉嘅鮮蠔夠晒滿足,撈埋菜脯就更加鹹香添。 香煎金蠔(HKD98/3隻)係小編大愛呀!平時啲金蠔整好後都會比較細隻,但係呢道菜選用養咗5-7年嘅蠔整成,經生曬、煎香後嘅金蠔依然大大隻!上碟時灑啲砂糖提鮮,令金蠔嘅鮮甜度更突出,食落甘香濃郁。 同樣唔可以錯過香口惹味嘅香脆蠔餅(HKD58),蠔餅即叫即炸,加埋芫荽、香蔥炸到金黃酥脆;入面嘅鮮蠔炸過後依然鮮甜肥美㗎,蘸埋泰式酸甜醬一齊食就夾晒喇!   第一蠔粉麵 地址:旺角西洋菜南街258-260號長寧大廈地下C及D號舖 電話:2628 3937 營業時間:星期一至日:12:00-22:00  

0

【南豐紗廠露天甜品Cafe 雙層下午茶×雲朵氣泡酒】Ladels Cafe+Bar

南豐紗廠一店兩舖嘅Ladels Cafe+Bar同旁邊嘅服裝店,都係由本地時裝設計師Harrison Wong創立。呢度有室內同露天餐座,主打IG-able嘅甜品同酒品㗎。佢哋嘅餐牌有個特色,就係同款食物會分男女士口味,主要分別係女士口味嘅甜品會相對香甜感重啲。 雙層下午茶(HKD198/位)一共有9款鹹甜點,每款賣相吸睛之餘都好易入口。 頂層嘅甜點之中,果撻嘅味道最豐富又夠fresh,而且食晒4款都冇好甜膩嘅感覺。 鹹點就用蝦、蟹、ham、芝士入饡整咗4款食物。口感香滑嘅有,惹味嘅有,脆口嘅亦都有。 鬆餅就配咗牛油同果醬,等你可以一味兩食。 下午茶本身配咗諶飲,亦可以加HKD38升級成呢杯甜甜哋嘅Cotton Candy Sparkling Wine(HKD68)氣泡酒,有Moscato同Procecco兩款味道可以揀。 布朗尼蛋糕配棉花糖雲(HKD78)上枱效果勁神秘,要用加入莓果醬嘅奶淋落大大個棉花球,先可以慢慢見到入面嘅朱古力布朗尼。 心太軟(HKD58)配咗大大球雲呢拿雪糕,切開有滿滿嘅流心朱古力醬,一齊食就有冰熱交融嘅感覺喇! White Allogalo(HKD52)係將熱辣辣嘅Espresso淋落雲呢拿雪糕嘅經典甜品,咖啡香令味道更有層次。 呢度都有少量主食,Plain Hamburger(HKD88)就帶韓式風味。慢煮伊比莉牙梅肉本身煮得好滑嫩入味,加上雞蛋、車打芝士再配香辣薯角,真係超級滋味! 喺cafe總會想歎杯咖啡,啱晒打卡嘅Cotton Candy Coffee(HKD68)可以喺4款咖啡之中自選口味添。   Ladels Cafe+Bar 地址:荃灣白田壩街45號南豐紗廠三樓305-306店 電話:3426 2668 營業時間:星期二至五、日:11:30-20:00,星期六:12:30-21:00