Tagged: 睇波

0

【2018世界盃你ready未? 精選3大睇波蒲點】RED MR、PONG、Centre Street Bar

世界盃聽日就開鑼喇,各位球迷ready好未呢?4年一度嘅盛事就梗係要約埋班最佳損友一齊high爆佢啦,小編依家就為大家介紹以下3間可以舒舒服服睇波嘅熱點啦! 星級睇波派對 RED MR 講起RED MR可能大家淨係會諗起唱K,但其實K場睇波一啲都唔失禮㗎,你睇吓灣仔RED MR嘅TONNO DELUXE,成個場大到可以踢埋波咁滯呀!另外佢個超大LED電視真係超啱睇波,有冇越位邊個球員詐死都睇得一清二楚呀! 除咗有超大銀幕之外,場內仲有波枱同埋長bar枱俾大家消磨睇開場嘅時間,個場咁大,搞個50-60人party都冇問題呀! 6月15號RED MR仲有個星級嘅直播睇波派對,主持有阿Bob同大埔Lulu等等,氣氛應該唔錯喎!入場費HKD180,包2支啤酒,小編覺得價錢算幾合理嘅!有波睇有酒飲又有星睇! 另外喺世界盃賽事進行期間,RED MR有個睇波套餐(HKD98),包指定啤酒或無酒精飲品2杯,或者指定啤油或無酒精飲品1杯+一份小食。呢個offer ok喎,平平哋有得同班波友睇吓波吹吓水,得閒仲可以唱返2首歌,好似唔錯喎。都係嗰句,快啲book定喇,尤其係決賽周呀,好快冇位㗎! RED MR紅人派對(灣仔分店) 地址:灣仔杜老誌道5號2樓 電話:3125 3333 營業時間:星期一至日:12:00-06:00   掃埋紀念品 PONG 如果大家鍾意玩Beer pong嘅話應該對PONG唔陌生,佢係銅鑼灣耀華街嘅樓上BAR,個場亦夠闊落,一路睇波仲可以玩吓波,過吓手癮。 一大班男人話去睇波呢,多數都係落吧睇㗎喇,氣氛同喺屋企睇完全唔一樣嘅。PONG喺6月15日亦為世界盃開鑼準備咗活動同埋紀念品,同時佢哋亦推出咗世界盃期間限定嘅menu,分別有代表德國嘅鹹豬手、英國嘅 Fish and Chips、墨西哥脆片、同埋法國嘅French Fries!一路食住異國風情嘅小食飲住酒睇波係爽嘅,同埋15號係Happy Friday嚟㗎!玩幾夜都唔驚啦!  世界盃期間喺PONG嘅任何消費都可以得到紋身貼紙同埋膠手帶,仲可以再參加遊戲贏其他豐富獎品,想知詳情記住留意PONG嘅官方專頁喇! PONG 地址:銅鑼灣耀華街38號 Zing!...

0

【睇住波玩足球機 7000呎酒吧豪食美國菜】The Stadium

想同成班friend吹水、睇波又有得玩?喺觀塘嘅The Stadium就啱晒你啦!睇個名都知佢地以體育為主題,去到有好多部電視都播緊體育賽事,仲有足球機、鏢機同桌球玩,甚至連露天位抖氣位都有埋,目測都有成7000呎咁大!一齊睇下有咩好食啦! 餐廳內單單係啤酒已經有50種,仲未計cocktail同其他酒類選擇!實有種酒啱你啦,唔知有無人成功挑戰晒佢咁多種酒呢? 餐廳仲有室外座位,大家睇波睇到咁上下,可以出去抖啖氣,感覺都幾chill! 嚟到想飲酒配返份小食,可以試下巴馬火腿配無花果(HKD88),個樣夠晒得意趣緻!用巴馬火腿卷住無花果,食落既有火腿鹹香,又有無花果嘅鮮甜。上面嘅醬係特製嘅蒜蓉沙律醬,味道好特別,啱晒飲酒果陣食。 話明係美國菜又點可以唔食Burger呢?安格斯牛肉漢堡(HKD138)牛肉帶有炭燒香味,牛肉味濃郁又多汁,入面仲夾住勁多配料,好似煙肉、芝士同portobello蘑菇,食落口感超級豐富!跟住個漢堡仲會有埋一份厚切薯條,啖啖薯肉夠晒香口又豐富! 10oz美國極黑毛豬(HKD168) 配莎莎,呢個極黑毛豬煮到大約7成熟,食落鮮嫩又有濃香豬肉味。加埋香草、茄汁同芝士,真係好惹味呀!如果大家怕佢唔夠熟,仲可以落單嘅時候講明要全熟,都一樣好食! 意式香菇手搓粉(HKD138) 手搓粉形狀夠晒可愛,細細條好似螺絲仔咁,扭紋形狀可以輕易沾滿濃香醬汁,食落啖啖都係菇同粉嘅完美結合,就算唔係素食者都會愛上! 適逢The Stadium一週年,呢排都有好多唔同優惠比大家!詳情就要留意佢地Facebook啦! https://www.facebook.com/thestadiumhk/ The Stadium 電話:9311 9939/2509 3388 地址:觀塘興業街4號The Wave 4樓 營業時間:星期日至四:11:00-00:00 星期五至六:11:00-02:00

0

【今晚啤一啤 長沙灣最好hea掟鏢聖地】Overtime

放工之後帶住輕鬆心情去同朋友飲返杯傾下計就最梳乎!Overtime位於長沙灣,係呢一帶比較少有嘅清吧,嚟到除咗有大電視之外,仲有6部鏢機任你掟、任你飛!想靜靜傾計又得,想點玩都得! 酒吧裝修以木同磚為主,希望有別於一般大家對酒吧「黑媽媽」嘅印象,營造出英倫風。 酒吧除咗要夠大地方傾下計之外,最緊要有埋大電視,嚟到可以睇下波、會下班花生友! 成日都有人講呢邊無乜野玩,唔講唔知呢度有6部鏢機,係附近地區之中最多鏢機玩嘅酒吧之一,都幾多人嚟呢度練鏢㗎! 店主推介Guinness Draught(HKD69/杯)(Happy Hour)苦得嚟帶甘,而且無咁多氣,唔想飲到成肚氣可以試下。 招牌炸魷魚鬚(HKD58)炸得好酥脆,唔會一舊舊粉團,用嚟佐酒一流。成班人你一句我一句,食下食下好快就無晒。 肚餓嚟到都唔怕無好野食!日式燒一口牛(HKD68)醬汁食落甜甜地好得女仔鍾意,加埋芝麻同蔥,口感更多層次,不過最緊要都係味道啱晒送酒,嚟到有得飲有得食有得玩! Overtime 電話:2866 2722 地址:長沙灣順寧道47號嘉寧閣地下B舖 營業時間:星期一至日:17:00-03:00

0

【新奇!酒吧×Cafe】DW Lounge

好多時食開某種食物就會諗起某間餐廳,但係有間餐廳想你無時無刻,幾時都會諗起佢,佢就係DW Lounge啦!餐廳致力全方面發展,無論All Day Breakfast,包場party,飲酒抑或係想同朋友玩下飛標、小遊戲都提供到!無論你今日心情係想食好野、飲野、想hea、想玩都照顧周到!咁多元化,仲唔去睇下有咩啱? 餐廳內裝一半比較似酒吧,一半感覺似cafe,無論你想坐邊都一樣舒適。同朋友一齊想點玩、點食都得! All Day Breakfast(DW Deluxe)(HKD115) 如果鍾意食炒蛋嘅朋友可以一戰!炒蛋唔油,香滑之餘有蛋香,亦唔會好水。配搭都算多種類,啱晒成日揸唔定主意食咩嘅小編。順帶一提,佢仲有薯角呀,鍾意食早餐有薯仔類食物嘅朋友就啱晒啦! 意式卡邦尼意粉(HKD78)香草同芝士完美結合,雖然落咗好多芝士味同香草,但係入口一啲都唔油膩!整體感覺食落鹹鹹地唔會覺得滯,意粉煮到啱啱好,腍得嚟有彈性。 黑松露迷一定要試試!8″黑松露薄餅(HKD188)黑松露十分足料,再加埋芝士,隨便拉一拉即刻有拉絲嘅效果!軟滑芝士再加埋濃香黑松露,味道非常融和,未入口已經聞到濃濃香味!一啖食落去,表層夠滋味,pizza餅底又夠脆,真係好高享受! 薄荷朱古力(HKD32)朱古力味好香濃,上面嘅忌廉令口感更香滑,意大利朱古力粉同薄荷味道亦好夾!整體味道好香醇,入口亦非常滑。 鍾意Tiffany Blue嘅朋友可以試試Tiffany(HKD32)。佢由水蜜桃、橙、soda,忌廉組成,夠晒香滑。飲落味道似波子汽水,女仔一定鍾意! DW Lounge 地址:深水埗長沙灣道42號雙喜大廈地下 電話:6439 3395 營業時間:星期一至日: 12:00-04:00