Tagged: #祛濕

0

【祛濕薏米水加料先有效? 分清寒濕型定濕熱型】懶健康貼士

除咗天氣環境嘅濕氣令你覺得四肢又攰又重,鍾意食生冷嘢同凍飲都會更易令你變成「濕重人」,身體會產生內濕。如果鍾意甜食或煎炸肥膩食物都會加重脾胃負荷,令人變得更濕。身體點止四肢又攰又重咁簡單,仲會口淡淡、面油或頭油增加、毛孔容易閉塞、眼面比較浮腫、大便粘連去唔清等等。 好多人會飲薏米水祛濕,但你又知唔知點飲先啱你體質呢?薏米有生有熟,生可以祛濕、熟就健脾為主,所以有啲人煲祛濕薏米水會加入熟薏米,仲可以分唔同體質而加料㗎! 寒濕型:怕冷、少出汗、冇胃口等症狀,通常係鍾意食生冷嘢人士 [可以加3片生薑一齊煲薏米水,有袪寒暖身作用] 濕熱型:面紅怕熱、體溫較高、容易出汗等症狀,通常係鍾意食熱氣或辣嘢,夜瞓人士 [可以加綠豆一齊煲薏米水,幫助清熱解毒] 平性:冇特別怕冷或怕熱 [可以直接煲薏米水或參考下面嘅檸檬薏米水] 下集仲會教大家將煲完水嘅薏米煮餸,食晒落肚唔會嘥嘢。   檸檬薏米水 材料: 薏米 80克 水 1500毫升 檸檬 1個 蜂蜜 1 茶匙 1. 將薏米洗淨後用熱水浸開,將薏米同水加入鍋,大火滾起後轉中火煲1小時。 2. 熄火放入檸檬片焗10分鐘,飲用時按喜好加入適量蜂蜜。 小貼士 將薏米炒過可以縮短煲嘅時間。

0

【瞓極唔夠好易攰點算?9大食物祛濕好重要】懶健康貼士

春天濕度上升,容易出現四肢沉重、容易疲勞嘅感覺。除咗環境潮濕,鍾意飲凍嘢都有影響。中醫會將濕重大致分為寒濕或濕熱,寒濕會出現胃口差、怕凍、口淡淡同大便稀爛嘅情況;濕熱就會怕熱、口乾、小便黃啲亦難啲排便。所以要祛濕,健脾就好重要,快啲睇吓食咩啱啦! 紅豆煲湯整甜品都得,可以化濕健脾,所含嘅鉀同外皮所含嘅皂角苷都有好強嘅利尿作用。 薏米健脾益胃,補肺清熱,祛濕效果好好,仲可以降血脂,春夏用嚟煲水可以消暑。佢嘅主要成分係蛋白質、維他命B1、B2,可以令皮膚光滑啲。 冬瓜有清熱利水同消腫解毒,可煲袪濕湯。但冬瓜性涼,適合濕熱人士食用多啲。 青瓜可以促進食慾、調節消化系統同利尿,佢仲有豐富膳食纖維、維他命A、維他命C、鉀、鈣同鐵等營養㗎。 芹菜可以利尿,消除身體發腫情況,特別適合身體浮腫嘅人食用。芹菜仲有豐厚嘅鐵,可以養血,對於缺鐵性貧血嘅人有益。 山藥多用於治療脾胃虛弱,佢含有澱粉酶、多酚氧化酶,幫助脾胃消化同吸收。山藥性質溫和,不論脾陽虧或胃陰虛都啱食。 洋蔥具有和胃下氣,化濕祛痰嘅功效,有高血壓、動脈硬化等心血管疾病嘅人更加適合食用,有胃病嘅朋友就食少啲好。洋蔥仲有提神作用,佢幫助細胞更好咁利用葡萄糖,降低血糖。 鯽魚可以利水消腫、益氣健脾,啱脾胃虛弱、易嘔吐或腹瀉嘅人食用,不過感冒發熱嘅人忌食。 鴨肉係大補嘅食物,可以滋潤五臟、清熱虛勞、養胃生津。佢比較適合體內有熱、易上火、食慾不振、大便乾燥同水腫嘅的人食用;但體質虛寒、胃寒、易腹瀉嘅人就少食為妙。