Tagged: 空中花園

0

【泰正斗 尖咀泰浪漫空中花園】泰斗

去尖沙咀行完街,想食泰式酸酸辣辣嘅味道,又想享受一下寧靜環境?不妨去海防道泰斗試下。除咗有室內座位之外,仲有空中花園可以望到綠油油嘅九龍公園,輕鬆一下。就咁睇泰斗個名已經相當霸氣,小編即刻去試試食物係咪都係泰斗級別先! 空中花園可以望到九龍公園嘅景色,食住辣辣地嘅泰菜,飲下酒,食下雪糕,都幾爽㗎! 相比室外佈置比較閒適,室內佈置比較型格,燈光偏暗,但環境整潔,無論室外室內都一樣坐得好舒服! 食泰國菜點會唔食蝦呢?如果食生蝦食到厭晒可以試下呢個香茅辣拌蝦沙律(HKD148)。香茅味香濃,加上檸檬葉、莞茜、辣椒粒、洋蒽,其他香料混合以成。味道唔太辣,拌爽甜實肉嘅蝦,令人食指大動。爽甜大蝦嘅份量十分足料,沙律幾乎被蝦完全覆蓋! 小編都幾鍾意食生菜包辣肉碎,但係成日都手殘包得唔好。唔止論論盡盡食到成身都係肉碎,仲會流汁流到一手都係,真係好煩呀!呢款泰之丸(特色生菜包)(HKD148)就非常體貼啦,考慮到大家想食得優雅又有儀態,店家特登將肉碎炸成一球,咁再用生菜包住食就唔會論論盡盡啦!炸完之後味道仲加倍惹味香脆,緊緊鎖住肉汁,用生菜包住食果陣,肉汁仲慢慢滲出嚟! 食魚最怕有魚腥味,特別係食酸辣果陣,煮到出嚟先腥簡直係地獄級別!清邁香酥酸辣魚(HKD168)就啱晒怕腥嘅你。魚肉本身炸過,香口鮮甜又實肉,加埋酸辣夠晒開胃。蔥花夠晒新鮮,搭配魚肉提升咗鮮甜惹味嘅層次,直頭啖啖滋味! 如果鍾意泰式香料同海鮮,可以試試清萊香葉蝦酥魚(HKD168),呢道菜式最可以體現海鮮鮮味同泰式香料結合。睇落好似蒜蓉嘅粒粒其實係魚肉,用嘅係本地新鮮盲鰽魚,先將魚拆骨起肉,然後煮熟切碎再混入麵包糠炸,做成香脆鮮甜嘅酥魚。再配埋同樣鮮味滿分嘅爽甜越南大頭蝦,同埋泰式香料同酸辣醬,食落酸酸甜甜,惹味開胃之餘食到海鮮鮮甜味,不妨一試! 想食咖哩不妨試試呢個青咖哩黑墨丸拼薄餅(HKD148),食落薄餅香脆鬆軟,配上香辣青咖哩,清新又唔膩。墨丸爽口鮮味,唔係一般粉團,可以食出墨魚鮮味,彈牙有嚼勁! 食完咁多辣野,食返啲冰凍雪糕(HKD58/兩球)就最好不過啦!碟底放咗芭蕉葉,擺盤好有心思,令雪糕睇落都有泰式風味。士多啤梨味同藍梅味雪糕,配上忌廉入口軟滑,上面再灑上燕麥片,口感仲好豐富! 除咗士多啤梨味同藍梅味之外,大家都可以試試朱古力味同榴槤味雪糕嘅配搭(HKD58/兩球)。榴槤嘅味道唔係人人都接受到,不過呢款雪糕味道清香,清甜嘅感覺令人好易入口,鍾意食榴槤嘅朋友一定要試試!至於朱古力味都好香濃,配上榴槤嘅清香,好夾呀! 飲品方面,餐廳仲有手調Rainbow Cocktail(HKD118),有齊彩虹嘅七種顏色,選擇困難症嘅小編表示好難決擇,唔知你鍾意邊種呢? 泰斗 地址:尖沙咀海防道38-40號中達大廈4樓全層 電話號碼:3565 5446 營業時間:星期一至日: 12:00-00:30