Tagged: 立食

0

【潮玩立食分子料理】Three Dice Kitchen

分子料理聽就聽得多,唔知大家有無接觸過呢?分子料理透過物理或者化學變化,將食材味道、口感、質地、樣貌完全改變,再重新「組合」成一道新菜。一嚟可以打破大家對食物既有固定嘅框架,二嚟又可以將食物味道昇華到極致。你以為喺實驗室先食到?咁又未必嘅,其實平時周街買得到嘅棉花糖,都係分子料理一種,佢透過高溫加法同離心力,將原屬蔗糖晶體演變成糖絲,就整到成舊雲咁啦!小編都知道好難打破大家對分子料理嘅謎思㗎啦,所以今次介紹嘅就係一間親民分子料理Three Dice Kitchen,等大家可以輕鬆試一試! 鋪面位置有限,所以不設座位,只限立食。立食其實喺外國非常盛行,務求顧客付出嘅金錢可以用喺原材料成本身上。每個立食位置都設有一個鈎,比大家擺自己隨身物品,好貼心㗎。餐廳希望保持到食物質素,所以除咗甜品同飲品,所有食物基本上都指定咗,去到每一道菜式都會有專人解釋原理同即場示範㗎!提提你,餐應劃分咗時段,每個時段都有限定人數,所以必需提前訂枱!最好梗係一班朋友自己包場,好似睇化學實驗表演一樣睇返場騷再慢慢食。講左咁耐,事不宜遲,Show Start! 首先有藍碟椰子特飲 (HKD25),係咪無諗過椰子特飲會係藍色!視覺上真係好大衝激。入口之後淡淡椰子味首先湧出,然後花香味道再喺口中娓娓道來。而佢地餐具也相當講究,每種餐具都玩味十足,配合埋每種菜式使用,令顧客得到最大享受。 到主菜正式開始,Signature Tasting Menu (HKD230),一共有指定六道菜式,當時第一下感覺,究竟會唔會食唔飽?餓住咁走呢?首先第一樣菜式係哈蜜瓜分子晶球配西班牙黑毛豬火腿,將哈密瓜溶利用晶球化作用,將佢瞬間變成固體。 然後再加上45個月純種橡果西班牙黑毛豬火腿同薄荷結晶體,店主解釋用45個月而唔用48個月黑毛豬火腿,係因為咁樣黑毛豬嘅味道唔會太濃而蓋過哈蜜瓜嘅甜味。整匙食落去,哈蜜瓜即刻爆開,仲有流心感覺!味道縈繞整個口腔,再加上其他兩樣野配合中和甜味,作為第一道菜式,絕對係佳品! 之後嘅菜式係「食用膠袋」櫻花蝦肉鬆雲吞配日式高湯,高湯由鰹魚片同昆布通過咖啡壺蒸餾而成,味道更為濃郁。 雲吞嘅外皮係「食用膠袋」,內裡包住櫻花蝦同肉鬆。口感新奇,味道有層次感。 第三道菜式柚子醋粉沫配櫻桃蘿蔔、三文魚子、針魚刺身。主廚即席示範將柚子忌廉利用零下190度液態氮凝結然後打碎,即刻好似魔術咁冒出大量煙霧,非常魔幻,呃like推介! 經過咗魔幻出煙過程之後,就可以將粉狀柚子醋連埋其他材料一齊食。針魚薄薄一片,口感不錯,味道酸酸甜甜,好似日本和風沙律嘅感覺。不過提提你,粉狀柚子醋好快溶,要盡快食呀!仲有一個小驚喜,就係好似蛋黃咁嘅橙黃色半固體圓形,係由芬達橙汁汽水製成。 仲有一道菜係煲仔鮑汁神戶牛面頰西班牙飯配分子蒜香忌廉泡。未落忌廉泡泡之前,飯比一般煲仔飯軟綿,原本多數放入印度菜裡面嘅鷹嘴豆,放落飯度,又健康又可以增加口感。不過,牛面頰先係主角,因為佢係和牛嚟!除咗牛味香濃,仲會入口即融! 煲仔飯最重要當然係飯焦,雖然係分子料理,但仍然保留到傳統煲仔飯焦香味,再加埋忌廉泡泡,味道香口得嚟又唔會太乾。 仲有一個驚喜加分位,就係意大利蛋白餅,製造時間足足兩日。聽聞好多人會特登問當日有無依個蛋白餅,係餐廳招牌菜。成件擺入口之後,一直咬,鼻同口都會有煙噴出,好好玩!味道仲係大家熟悉嘅維他檸檬茶味添!如果想遇到依個驚喜,就真係要睇下自己運氣夠唔夠啦。 到真正甜品環節,水信玄餅 (HKD35) 依個味道係薄荷製成嘅魚子加上朱古力醬,本身玄餅食落去口感似大菜糕,混合埋兩樣配料,特別滋味,令成個餐有一個完滿結局。 Three Dice Kitchen 地址:銅鑼灣禮頓道136號希雲閣地下2號舖 電話:98111880