Tagged: 筲箕灣

0

【愛秩序灣街市正宗印度菜 咖喱雞肉絕配芝士烤餅】街霸

今集街霸向港島出發!喺筲箕灣嘅愛秩序灣街市最出名可能係冬天限定嘅飯焦煲仔飯,小編等凍啲再同大家介紹。今次介紹呢間Little Curry House,食返餐正宗印度菜!   同好多熟食中心一樣,呢度幾間食肆嘅食客係要share一個大嘅area,好似food court咁,不過大家各自嘅「地盤」唔多唔少都有分別嘅!呢間印度菜餐廳嘅老闆同員工全部都係印籍人,但係唔使驚難溝通喎,當日店員一見我坐低即刻話:「今日想食啲咩呀?」超流利廣東話,勁呀!即刻有返晒親切感啦!   食得咖喱就梗係要配薄餅,小編首先叫咗呢個咖喱雞肉(HKD62)同埋芝士烤餅(HKD25)。可能你會話70幾蚊街市價都幾貴喎,但其實佢都真係幾大兜吓,滿到瀉,而且真係有好多雞!幾個人一齊食share可以嗌多兩、三個餸其實都抵㗎!咖喱係有少少辣嘅,好惹味,配烤餅一流喇!芝士烤餅咬落有啲啲芝士餡喺入面,雖然做唔到牽絲嘅效果,但口感唔錯,外皮有少少煙韌,幾有咬口,正呀! 另外老闆娘極力推薦呢個印度香燒雞肉(HKD78),一場嚟到即管試吓啦!用鐵板上嘅,上碟時候「咋咋聲」,香味四溢。食落口有微微辣味,伴碟嘅洋蔥爆得超香,老闆娘果然冇介紹錯呀! 通常食印度菜永遠只會見到橙色、紅色、黃色甚至青色嘅咖喱,真係好少見到綠色㗎喎!原來係菠菜燴牛肉(HKD72)呀!菠菜汁食落唔辣,但香料味就好足,不過菠菜味就唔係好食得到喇!對於唔食辣嘅朋友嚟講係一個好選擇,因為呢個菠菜汁配埋薄餅食真係一絕㗎!   街霸最愛:如果我話我最鍾意佢個芝士烤餅……哈哈,唔好話我冇志氣住!薄餅喺印度人眼中係好重要嘅主食,同我哋廣東人嘅白飯一樣!個個都識煮,但真正煮得好味真係冇乜邊個㗎咋!我鍾意佢呢度嘅薄餅有少少厚度,點落咖喱汁度會有少少「索」咗啲汁入去,咬落去時超有咬口,令人忍唔住係咁搣、係咁點醬、係咁食唔停口呀!你話喇,成餐飯薄餅係咪先係靈魂呢? Little Curry house 地址:筲箕灣愛秩序灣道15號愛秩序灣街市熟食中心CF4號舖 電話:6901 3406 營業時間:星期一至日:11:00-23:00

0

【三多點止炸脾正 嚴選被遺忘嘅三多名物】三多筲箕灣

提到三多淨係識得炸脾?雖然三多炸脾炸到無人不知,但係好食嘅嘢又點止得炸脾!為咗防止大家走漏眼,忽略咗三多其他名物,今次小編就帶大家去到香港區暫時唯一一間分店,亦都係全港唯一有手工啤賣嘅三多筲箕灣,探索下除咗炸脾之外究竟仲有咩好嘢食! 呢間位於筲箕灣嘅三多分店,係由大埔原店老闆同店主共同開設,更加係全港唯一一間有得賣手工啤酒嘅分店!店主話佢開店嘅理念就係「一路食邪惡嘢,一路飲啤酒,最緊要開開心心!」大家見到佢笑得幾開心,就知食得多邪惡嘢嘅佢都ok邪惡。呀,唔係,係開心!呢度店主同店員都幾玩得又吹得,大家嚟到可以同佢地Say個Hi! 三多炸脾固然好好味,但原來佢地仲有一大名物,就係呢個豉油肉碎炒腸粉(HKD34)喇!未上檯就聞到超香喇,熱辣辣立立令賣相好吸引!帶點煙韌口感嘅腸粉,混有濃郁豉油香味,鹹鹹地加上香蔥同肉碎超惹味!記得要趁熱食,腸粉咬落會更加彈牙,更加好味! 唔好以為三多淨係得炸脾屈機,佢地嘅滷水脾同樣都好值得一試!招牌滷水雞脾配卡西西意粉(HKD47),嘩!係肉汁呀!雞脾大過小編隻手,目測有15cm以上。一切落去,啲肉汁爆晒出嚟,貓舌就要小心熱喇。滷水味道帶甜,成隻雞脾都無肥膏,肉質嫩滑。配埋卡西西意粉,秘製嘅意式茄汁,酸酸地又幾開胃! 乾炒雞扒公仔麵(HKD48)熱辣辣一碟奉上,雞扒已經切好,肉汁可以清楚喺啲罅度睇到慢慢滲出嚟,直情有Bling Bling效果。雞皮煎得好香脆,公仔麵炒得乾身彈牙,唔加任何調味嘅話屬於較輕口味,食開少少辣嘅小編就覺得加辣食超正! 椒鹽雞軟骨(HKD48)椒鹽幾時都係煎炸嘢嘅Best Friend,雞軟骨唔會成擔炸粉,咬落去舊舊都脆卜卜,洋蔥夠晒香脆又爽甜。小編食下食下就唔覺唔覺食咗大半碟喇!好危險呀! 食完一輪炸嘢、香口嘢,想爽梗係飲返杯!適逢筲箕灣呢間三多有埋手工啤酒飲,邪惡店主推薦大家試下呢個Kwak琥珀啤酒(HKD48),呢種比利時手工啤帶有濃香麥芽味,層次感豐富,飲完個口仲會留有香味,不過初心者未必適合。店內仲有果香味嘅手工啤可以揀,想有得食有得飲就要嚟呢間試下喇! 三多筲箕灣 電話:3705 2257 地址:筲箕灣筲箕灣東大街28-40A號東興大廈地下12號舖 營業時間:星期一至日:12:00-22:00

0

【的確和味!日式居酒屋小店情懷】Shiba East

小編知道堅尼地城有間Shiba,佢地串燒同清酒都相當不錯。除此之外,港島東區都開咗間Shiba East,座落於筲箕灣地鐵站旁,方便區內居民品嚐,選材上乘講究,全部都係店主特意選購最新鮮食材。 牆上貼滿食物同清酒嘅名,感覺置身於日本居酒屋一樣。 牆上佈滿日本電影海報,種類眾多。除此之外,店主仲會根據當日嘅來貨而有特別推介,好貼心。 所有串燒都係即叫即整,保證熱辣辣。此外,坐Bar枱位嘅客人更可以即場見到串燒製作過程,慢慢睇住佢燒到金黃色,小編睇見都流曬口水! 流曬口水嘅小編最終點咗葱蒜牛肉粒(HKD45) 食落牛仔肉味濃郁,一啲都唔韌,加上蔥花蒜蓉嘅味道,滋味濃郁。 酸汁蘿蔔茸牛肉粒(左2)(HKD45) 雖然同葱蒜牛肉粒一樣,都係選用牛仔肉,但呢個版本配以酸汁蘿蔔,新鮮嘅味道即時爆發,牛肉鮮味滿分。京葱柚子胡椒牛肉粒(HKD45) 淡淡胡椒味並無蓋過本身牛肉嘅鮮味,加上柚子,味道酸酸甜甜,好適合女仔。 墨魚棒(HKD35) 採用新鮮墨魚打成,比坊間嘅更加彈牙鮮甜,再加上明太子嘅味道,十分惹味。 Shiba East 地址:筲箕灣筲箕灣道333號樂融軒地下4號舖 電話:2687 1338 營業時間:星期一至日:12:00-14:30;18:00-23:00