Tagged: #粉麵

0

【緬甸米線黃薑加料 塘虱魚濃湯鮮味大爆發】緬甸招牌湯米線

香港人好愛米線,酸辣、蕃茄、清湯都各有擁躉,不過小編呢期鍾意何文田嘅緬甸招牌湯米線,冇味精又可以試到新口味吖嘛,拍攝當日仲不斷有人慕名而来添。 舖位細細,小店式經營反而同客人close啲。老闆娘Agnes話緬甸嘅香料同泰國都幾似,但佢哋會特別鍾意用黃薑,除咗香味吸引之外,仲可以增強免疫力同對血管健康有益㗎。唔好以為黃薑會搶晒啲味,Agnes嘅手勢控制得好好㗎!為咗盡力保留緬甸嘅調味,隔一段時間佢就返家鄉入貨,不過要配合香港人口味,麵款就揀返米線同蝦子麵。 老闆娘媽媽係緬甸人,傳授咗唔少心得俾佢,一定要識嘅係Mohinga鮮魚濃湯米線(HKD46),因為喺緬甸冇人唔識,地位好似國麵咁勁!湯底用塘虱魚同雞肉熬真係冇得輸,但每啖湯都有啲魚肉,用料十足勁鮮甜!配菜都好豐富,有勁脆口嘅緬甸特產碗豆餅、豆卜、魚片同緬甸炸脆香料,同湯汁混為一體好滋味!鍾意食辣嘅朋友仲可以加緬甸辣粉。 曼德勒係Agnes媽媽出生嘅城市,所以menu都有當地風味嘅菜色。曼德勒鮮茄滋味撈麵(HKD45)同平時食嘅港式風味比會甜啲,用料一樣落足蕃茄同肉碎,蝦子麵都有兩個㗎,一定食到飽肚走人;配埋緬甸炸脆香料同XO醬,其實幾惹味。 曼德勒紅燒腩肉配飯(HKD52)燜得肉腍而爽口,有啲東坡肉Feel,鹹淡適中,配飯真係一流! 本身以為緬甸特產茶葉沙律(HKD42)係清新口味,但原來係辣嘅,不過都好滋味。主食材有發酵過嘅茶葉、蝦乾、鮮蕃茄、菜同炸脆花生等等,口感層次豐富,天冷天熱都啱食。 新出嘅黃薑脆脆雞翼(HKD42)簡直係超級香脆!勁鍾意食雞翼嘅小編大愛呢款!面頭嘅炸脆做得好幼細,雞翼皮脆肉滑,香口程度令你好想配啤酒,不過呢度好健康,所以叫返杯養生飲品啦。 緬甸羅望子特飲(左:HKD15冷熱同價)味道好似酸梅湯咁,可以清熱排毒。 養生八寶花茶(HKD15)建議大家浸耐啲先飲,咁花香同其他材料嘅味道可以出啲。 總括嚟講緬甸菜雖然會多用香料,但味道唔會好似印度菜咁濃烈,反而一路食一路感受到淡淡嘅香料味滲出嚟;重中之重係呢度唔落味精,汁都撈埋都冇咁罪惡。   緬甸招牌湯米線 地址:何文田勝利道12號地舖 電話:9717 4328 / 9332 8640 營業時間:星期一至日:11:00-22:00

0

【拉麵店格局食潮州粉 秘製鹵水牛三鮮運到】潮丸

齋睇潮丸呢個名以為係賣新式丸類食物?少年,你太年輕了,係潮州粉麵加主打肉丸嘅意思呀!下次嚟尖沙咀都有高質粉麵食喇。 佢哋嘅手打特級牛丸王、特級墨丸王同豬肉丸,每兩日就喺潮州新鮮運到,仲試過賣斷市添,究竟有幾好?睇文啦! 雖然話係食潮州粉麵,但係店內裝修擺設竟然有啲日式拉麵店風味! 自家牛三鮮(HKD55)用秘製鹵水汁煮,金錢肚爽口入味;牛筋腍得嚟有咬口,骨膠原質感都幾強;牛坑腩只要指定部位,絕對唔會「鞋圾圾」。一般叫牛嘅麵都係跟腩汁,但呢度嘅湯底用豬骨加雞骨熬4個鍾,清甜全無味精,亦唔會搶咗牛嘅鮮味。 秘製豬三鮮(HKD55)表現咗老闆嘅細心,湯底同自家牛三鮮同款,唔食牛嘅朋友絕不中伏。而且豬三鮮同牛三鮮嘅鹵水汁係唔同㗎,老闆話唔同嘅肉夾唔同配料,唔怕做得多,最緊要質素好。豬腩肉香口唔肥膩;扎肉爽口又有少少油香;手打豬肉丸彈牙到令小編明白咩叫乒乓波肉丸,唔怪得會賣斷市。14:30-18:00下午茶時段(星期六、日及公眾假期除外)會送冷熱飲品,就算呢杯話梅柚子蘇打水特飲都只係加HKD8,好過去便利店買啦。 生炸雲吞王(HKD65)嘅皮係特製,脆得嚟比平時食嘅鬆化啲。餡料同湯麵嘅雲吞一樣,有原隻鮮蝦肉㗎。 呢度嘅辣椒油係自家製,只係後勁有少少微辣,老闆話潮州人會溝埋魚露一齊食,好似鹽嘅辣汁咁,幾得意。黃燈籠椒雖然最淺色,但係最!辣!嘅!小編夾少少試即刻要飲水,不過唔會辣到無味覺。紅燈籠椒似豆板醬,辣度排中間。兩款燈籠椒醬都喺潮州入貨,真係食地道風味㗎。 老闆覺得拉麵店自己畫紙嘅落單方法好貼心,所以呢度都一樣,走唔走青一目了然。不過全走青嘅單先會走埋唐芹,因為係潮州食法,老闆話咁先夠香。   潮丸 地址:尖沙咀金馬倫道21C號地舖 電話:2511 9238 營業時間:星期一至日: 12:00-23:00