Tagged: #粵菜

0

【米芝蓮粵菜食府明閣進駐灣仔 新設酒吧配輕食午餐】明閣

米芝蓮粵菜食府明閣啱啱進駐灣仔開首間分店,今次仲加入唔少西式元素,好似酒吧、Chef Table都係粵菜少見,但廚藝總監曾超敬師傅就話「無論點變,都會堅守粵菜煮法,同時又俾到新鮮感大家。」。唔講咁多,即刻帶大家睇新店環境同呢度特設嘅菜式! 一行入餐廳就係吧枱位置,可以喺度飲杯Cocktail,再試唔同嘅佐酒輕食。新店特別加重用清酒嘅元素,大家想試可以問吓有咩重點推介。 酒吧以西式擺盤呈獻中式小食,例如鮮香嘅薑蔥茸煎元貝(HKD168[上])同惹味脆口嘅鵝肝醬百花乳豬件(HKD238[下]),喺口感同味道上好啱配酒一齊食。 如果想試lunch set亦有明閣酒吧輕食午餐(HKD198)俾你揀。湯同主菜都係二選一,小編就揀咗清甜嘅茶壺松茸竹笙湯、濃味有鑊氣嘅油雞樅菌彩椒百合澳洲牛柳粒伴鮮蝦荷葉飯;再以清溜潤喉嘅黑糖桃膠薑汁3.6牛乳奶凍收尾,喺附近返工嘅朋友可以嚟食好啲喎。 呢度有一間房設置Chef Table(HKD2,888位/8人起),可以見到大廚點樣炮製美食㗎。你可以揀廚師發辦,亦可以要求餐牌上冇嘅菜式,大約有8道菜,最終視乎菜式而定。呢道前菜醉人三弄就以三款蝦整成唔同口味嘅爽口冷盤,而且廚師會先用玻璃蓋儲起乾冰嘅煙,不過開蓋唔止可以打卡,仲會聞到陣陣酒香添。 如果坐舒適光猛嘅大廳或以茶葉名命名嘅獨立房(4至16人),亦可以點各款主餐牌菜式同點心。 嚟到當然要試總廚推介啦,呢道蔥香鵝肝和牛窩燒飯(HKD208)雖然用咗鵝肝、和牛同日本醬油炒成,但依然係粵菜煮法。味道香口濃郁。 嚟到當然要試總廚推介嘅新菜啦,呢道鮮蘆筍油泡大虎蝦片(HKD338)以油泡方式令大虎蝦片保持爽口肉嫩嘅口感,加上蘆筍平衡油膩感,係一道清爽鮮味嘅菜式。 而珊瑚百花蒸釀鮮元貝(HKD428)就有一口大啖肉嘅嘅滿足感。 想要啲飯氣?梗係試用鵝肝、和牛同日本醬油炒成嘅蔥香鵝肝和牛窩燒飯(HKD208)。西式材料配粵菜煮法,味道幾濃郁香口。   明閣  地址:灣仔港灣道23號鷹君中心2樓 電話:2878 1212 營業時間:星期一至五:11:30-14:30,17:30-22:00,星期六、日及公眾假期:11:00-15:00,17:30-22:00

0

【《新加坡米芝蓮指南2019》首現三星 兩間法國餐廳包辦殊榮】新加坡米芝蓮2019

《新加坡米芝蓮指南2019》新出爐,依家又開始多假期,如果去開新加坡不妨試吓指南介紹嘅餐廳。其中兩間法國餐廳包辦自2016年新加坡首屆米芝蓮之後,第一次出現嘅三星殊榮添。另外,介紹多五間兩星餐廳,有埋中、日、歐陸菜,等你有多啲選擇啦。 三星餐廳 Odette2015年開業,環境簡約有現代感,主打精緻嘅現代法國菜,擺盤仲好似畫咁靚。但其實呢間餐廳係主廚Julien Royer向祖母致敬,教佢點用純正嘅食材烹調菜餚。Julien Royer成日攞獎,而傳家寶甜菜、香熏有機蛋、脆皮鯛魚、檸檬撻等都係呢度嘅熱門菜式。   Odette 地址:1 St Andrew’s Road, #01-04, Singapore 電話:+65 6385 0498 營業時間:星期一:19:00-20:15(最後入座時間),星期二至六:12:00-13:15(最後入座時間),19:00-20:15(最後入座時間)[星期日及公眾假期休息] 人均消費:約SGD151起   另一間三星法國菜餐廳Les Amis,氣派嘅裝潢加上傳統嘅法國菜,自1994年開業就吸引唔少人嚟。喺度可以品嚐時令嘅法國菜式之外,仲有恆溫恆濕控制嘅酒窖,大約收藏到3,000支酒,佢嘅葡萄酒清單亦係亞洲區餐廳之中數一數二添。而魚子醬天使麵、法式豬肉批、近江牛馬鈴薯梳乎厘都係呢度嘅熱門菜式。   Les Amis 地址:1 Scotts Road, #01-16, Shaw Centre, Singapore 電話:+65 6733 2225...

0

【翠亨邨逾十款限定龍蝦新菜 六式炮製爽口惹味龍蝦】翠亨邨

生猛鮮味嘅龍蝦可以變出乜嘢新花款?粵菜館翠亨邨最近就用蒸、炸、燴、炒、熬、焗六種粵式烹調手法,將十至十二両重嘅加拿大龍蝦炮製成七款晚市菜式同四款午市點心。呢個鮮嫩彈牙嘅「龍蝦珍味」系列由即日起至9月8日喺港九全線三間分店都食到,鍾意啖啖龍蝦肉嘅朋友一定要試呀! 晚餐梗係要飲啖湯啦!呢個以龍蝦殼同老雞熬成嘅鍋巴龍蝦濃湯(HKD88/位)配埋香脆嘅鍋巴俾你蘸濃湯,香口之餘又冇咁熱氣喎。 唔少人食龍蝦都鍾意食個鉗,呢款君度橙汁酥炸鮮龍蝦鉗(HKD98/件)就啱晒你喇!酥炸麵包絲外層咬落脆卜卜,入面嘅新鮮龍蝦鉗再包上蝦膠,啖啖肉又有雙重彈牙嘅口感。蘸埋用君度酒同檸檬汁調配而成嘅醬汁,酸甜中帶有酒香添。食完炸嘢,整返個木魚龍蝦肉蒸蛋白(HKD68/位)潤吓先,蛋白入面加咗鮮龍蝦肉同特製龍蝦濃湯,好足料㗎! 呢款黃金有米龍蝦(HKD268/隻)將成隻龍蝦浸喺蛋白入面攞去蒸,係咪好似蒸魚咁盞鬼呢?上碟之前,面頭淋上南瓜汁,再灑咗啲自製蛋香脆米,令口感同味道有多重層次。除咗食龍蝦肉,記住食埋啲滑嘟嘟嘅蛋白呀,因為龍蝦嘅鮮味滲晒入去,係呢個菜式嘅精華所在。 龍蝦伊麵食得多,刁草龍蝦伴黑松露醬稻庭烏冬(HKD248/隻)又食過未呢?以特製龍蝦濃湯同刁草燴煮而成嘅開邊龍蝦夠晒入味,而稻庭烏冬就掛滿黑松露醬同龍蝦汁;扁身嘅烏冬口感幼滑,西日fusion嘅配搭又別有一番風味喎。 講到中菜又點少得鑊氣十足嘅爆炒菜式呢?呢個香茅金不換炒年糕龍蝦煲(HKD238/隻)就係系列入面最有鑊氣嘅煲仔菜喇。將龍蝦切件泡油,再加香茅、金不換同沙嗲醬等配料爆炒,仲有煙韌嗦味嘅上海年糕,夠晒香口惹味呀! 芝士焗龍蝦唔止係西餐嘅專利,呢道香檳巴馬臣焗開邊龍蝦(HKD198/隻)喺芝士焗龍蝦嘅基礎下,以微酸嘅秘製香檳忌廉汁調味,可以突出龍蝦嘅鮮味同芝士嘅鹹香。 除咗晚市咁豐富嘅龍蝦主題菜式之外,午市都新推出四款以龍蝦入饌嘅精緻點心㗎,包括金箔魚子龍蝦蒸餃(左上:HKD68)、龍蝦灌湯餃(右上:HKD88)、脆皮龍蝦春卷(左下:HKD68)同埋加咗黑魚子醬嘅翡翠龍蝦燒賣(右下:HKD68)。   翠亨邨 地址:銅鑼灣波斯富街99號利舞臺22樓 電話:2409 4822 營業時間:星期一至五:11:00-15:00,18:00-23:00,星期六、日:11:00-16:00,18:00-23:00

0

【40年粵菜老字號開分店 古法點心配鎮店住家菜】生記海鮮酒家

喺灣仔出晒名嘅生記海鮮酒家以傳統粵菜同地道海鮮馳名,連續五年入選米芝蓮食店,40年功力真係唔嘢少。依家佢哋開到去荃灣喇,新店除咗堅持做傳統古法手工粵菜之外,仲特設點心添,灣仔總店都冇得食㗎。 新店大部分位置係開放式設計,裡面有部分係間房。 話明精於古法菜式,懷舊點心一定有得食。出爐鮑魚酥(HKD28/件)嘅鮑魚幾彈牙,用炒香嘅嫩滑雞肉粒墊起,增加香氣同惹味嘅感覺;食落只有少少油膩感,飲啖茶就解咗喇。 懷舊鳳眼餃(HKD30)有大大啖嘅蝦肉,好爽口!配上西芹粒嘅青香、鮮甜嘅魚籽同蟹籽,食完會想追call多件。 新店梗係有新嘅小菜啦,柚子少林骨(HKD98/例)唔係腍到離晒骨嗰種,少少煙韌有咬口,酸酸甜甜幾醒胃。 馳名菜式一樣會喺新店有得食,好似生記住家味道之一魚翅撈飯(HKD128/例)雖然係素翅,但口感十足,湯底清澈唔混濁,好考功夫。炒飯乾身唔會黏埋一嚿嚿,真係夠鑊氣,仲炒到粒粒都俾蛋包住,金鑲銀唔多地方食到喇。仲有金華火腿提味,令成個飯更加滋味。 生記住家味道之二籠仔糯米蒸肉蟹(時價)好清甜,蟹汁滲晒落糯米,令你想一食再食。 生記魚鮮三寶之一玉樹麒麟斑*(時價)嘅魚肉、金華火腿同冬菇厚薄都差不多,魚肉好滑溜亦唔腥,真係好新鮮! 生記鎮店燉品滋補菘茸花膠燉雞*(HKD288/6位用;HKD488/12位用)味道甘香,少少藥膳feel,幾好飲。大大隻菘茸俾你食,夠晒滋補養顏。 *需一天前預訂   生記海鮮酒家 地址:荃灣悅來坊2樓203號舖 電話:2614 1848 / 2614 1884 營業時間:星期一至日:07:00-16:00,17:30-23:00

0

【狂食片皮鴨龍蝦回本 中國八大名菜自助餐】THE PLACE

有時食得西餐多都幾想食返餐豐富嘅中菜,不過淨食一個地方嘅中菜又未必個個鍾意。依家喺旺角香港康得思酒店嘅THE PLACE就破格呈獻「中國八大名菜」主題自助餐,帶你食盡中國大江南北唔同嘅菜式。 THE PLACE開放式嘅空間,色調柔和,用上大量白色、青綠色同橡木陳設,夠晒親切溫和。 中國最具代表性嘅八大菜系包括粤菜、川菜、蘇菜、浙菜、閩菜、湘菜、徽菜同魯菜,佢哋各有代表菜式㗎! 粤菜:點心、鼎湖上素、梅菜扣肉、八珍豆腐、菊花蛇羹。 川菜:魚香肉絲、酸辣薯粉、怪味雞。 蘇菜:香煎小籠包、砂鍋雲吞雞、松子魚、無錫醬排骨。 浙菜:東坡肉、杭州醬鴨、油燜春筍、香炸響鈴。 閩菜:香菇竹筍、香蔥煎薯餅、生煎明蝦。 湘菜:東安子雞、乾燒香辣茶樹菇。 徽菜:黃山燉鴿、雪冬燒鷄。 魯菜:蔥爆羊片、湯爆雙脆。 自助餐有多款特色前菜有花雕醉雞、手撕雞、拍青瓜、麻香菇芹、涼伴黑木耳、涼伴綠豆粉等等,仲有唔少重頭菜式: 肥美嘅即片北京烤鴨啖啖肉,不過係用包唔係用薄餅包住,呢樣就視乎個人喜好喇。 四川辣椒芝士焗龍蝦呢個fusion幾搞鬼,睇樣就唔覺好辣,但好過成日都龍蝦伊麵咁悶吖嘛。 創意「中式」甜品夠晒破格,按中菜造型特別製作多款吉祥甜品,包括「鮑魚」造型嘅朱古力慕絲蛋糕、「海參」造型嘅咖啡蛋糕同烏龍茶布甸。其他精緻嘅傳統甜品有糖不甩、椰汁桂花糕、冰糖湘蓮及紅豆啫喱等等,食味道之餘食埋個樣,又可以打卡啦。 餐廳都照顧鍾意西餐嘅朋友,即開生蠔同即煎鵝肝會繼續供應,回本依然冇難度。   自助晚餐供應時間:即日至2018年3月31日 (18:30-21:45) 星期日至四及公眾假期: 成人:HKD618;小童及長者:HKD438 星期五、六及公眾假期前夕: 成人:HKD658;小童及長者:HKD478 所有價錢另有加一服務費,食物或會因應季節變化及供應而改變。   香港康得思酒店 – THE PLACE 地址:旺角上海街555號香港康得思酒店L樓層 電話:3552 3028...

0

【厚肉燒鵝咬落「嗦嗦」 聲 60年老舖殺入尖沙咀】裕。鵝莊

講到食燒鵝好自然諗起1958年開始紮根喺深井嘅裕記大飯店,嚟到第三代嘅Jason同James就殺入尖沙咀,主攻年輕新一代,新店亦取名裕。鵝莊 ,俾食客全新感覺。 James自細就想推廣粵菜文化,因為好多懷舊菜考功夫之餘亦可以上大枱,仲買少見少添。設計菜單嘅時候,新店雖然有六成同總店嘅菜單唔同,但都係以粵菜為根。 餐廳以英式酒吧餐廳風格為藍本,格調時尚得嚟俾人感覺輕鬆自在。座位幾闊落,又有大圓枱,一家老少嚟都夠晒坐。 嚟呢度主角一定係深井燒鵝,例牌可以揀上庄(HKD150)或下庄(HKD180),夠2-3個人食,4-7個人可以揀半隻(HKD290),8-10個人就原隻(HKD580)喇。新店都有自己嘅烤爐,由醃製到燒都係自己負責。咁有信心梗係因為有由總店請嚟嘅師傅坐鎮啦,佢會因應燒鵝嘅出售速度再燒新鵝,保證隻隻都以最佳狀態俾食客品嘗。 師傅手起刀落唔會連刀,一切啲皮就聽到「嗦嗦」 聲,淨係聽聲就已經引到人流口水。James話好多人以為上庄嚡口又冇肉,但其實靚嘅燒鵝即使胸肉都係啖啖肉,仲軟腍鬆化添。小編都試一試,真係易咬又多汁流出嚟,醃料調味啱啱好,唔會搶走本身嘅鵝肉香味。望到層油脂好勁?厲害嘅就係佢哋燒到啲脂肪入口即融化,甘香又唔漿口,真係罪惡到想食多幾件。 跟住必食嘅係懷舊炸鮮奶[北海道3.6牛乳](HKD78),淨係處理個鮮奶都已經要幾個鐘,絕對係心機之作。薄薄脆皮包住香濃軟滑嘅牛奶,唔食對唔住自己。 枝竹羊腩煲跟生菜[冬季](HKD298)質素極高,羊肉入味兼腍到假牙都食到,連馬蹄都炆到粉晒,可想而知用咗幾多時間啦。 松露鯪魚球(HKD108)一定要趁熱食,上枱已經聞到松露香,彈牙又唔覺溝粉,真材實料。 雪耳鮮奶燉雞(HKD78)係專登為女士設計嘅菜式,開蓋就聞到清香嘅杏仁味,雪耳唔會煲得過腍有咬口。配埋老雞一齊煮,夠晒滋補。 食完咁多一定要飲杯武夾夷大紅袍(HKD48),入口甘香幼滑唔嚡口,可見選用嘅茶葉幾優質。但重點係解!膩!佳!品!   裕。鵝莊  地址:尖沙咀亞士厘道37號九龍中心地下C號舖 電話:2387 1133 營業時間:星期一至日:11:30-23:00

0

【經典川菜半山殺落銅鑼灣 必食水煮魚招牌菜】三希樓

之前想食正宗川菜,一定係上半山科達中心嘅三希樓先過到口癮。自己地方一定要整靚啲,佢古色古香嘅傢俱,唔同嘅窗景仲可以遠晀香港動植物公園同ifc,真係幾寫意。覺得唔多就腳?依家去銅鑼灣就得喇,因為三希樓慶祝開業十週年,揀咗喺時代廣場開分店,地點咁方便又唔使去到半山,食完飯仲可以行吓街。不過新店好多時會爆場,穩陣啲最好就訂位先。 三希樓出名將正宗川菜、家鄉粵菜同巧手點心結合,一路食一路感受到師傅嘅功力。其中最出名嘅水煮魚同麻辣鍋係一定!一定!要食!今次小編都試咗其中一款。 必食前菜蒜泥白肉(HKD98)嘅蒜泥亦磨到好幼滑,腩肉同青瓜片到薄一薄,師傅刀功十足。入口爽、滑、脆,口感層次好豐富! 招牌麻辣口水雞(HKD328/大;HKD198/例)麻辣嘅勁力調得啱啱好,食落有淡淡嘅香氣攻上鼻,雞肉仲好滑嫩添。 主菜干鍋牛肉粒(HKD198)用咗大量辣椒同香料炒成,好有川菜風味。牛肉粒分量都唔少,幾有鑊氣同惹味。 水煮野生魚(HKD438/大;HKD368/例)肉質滑得嚟結實彈牙,仲有粉皮一齊煮,可以當湯粉咁食。 極品流沙包 (HKD34)唔講得笑,皮薄餡靚係基本,但流沙嘅感覺可以做到水溶狀態真係唔多,呢個攞滿分呀!   三希樓 地址:銅鑼灣勿地臣街1號時代廣場食通天11樓1102號舖 電話:2111 9952 營業時間:星期一至日:11:00-23:00