Tagged: 糖水

0

【賣相吸睛打卡甜品店 夢幻少女系玻璃杯心太軟】菓甜品

幾時都話女人有兩個胃,一個食正餐、另一個梗係食甜品啦!最近尖沙咀開咗間西式甜品店菓甜品,除咗味道掂,甜品嘅顏值都好高吓,款款都可以相機食先打卡!菓甜品嘅3位老闆都係做鐘錶行業出身,開店全靠一股衝勁,話做就做,由打算開店到正式開張,只係一個月時間就搞掂!快、狠、準,行動力一流! 不過唔好以為開店好容易,其實三位老闆捱咗唔少苦頭㗎,話晒都係第一次接觸甜品世界,由最初做中式甜品反應唔太好,到依家轉做西式甜品做出少少成績,單係諗餐單同搵食材嘅過程都花咗唔少心機,雖然遇到好多囷難,但係反而愈戰愈勇,堅持親力親為繼續作戰啦! 餐廳開放式設計,睇落冇咁大壓迫感,坐得舒服啲! 芝士粟一燒(HKD58),就咁睇以為係半碌真嘅粟米,望真啲,原來只係粟米造型整成嘅甜品,小編都差啲俾佢呃到呀!作為店內人氣招牌,為咗唔想客人一見到黃色就覺得係芒果味,所以特登整個粟米味嘅甜品,有啲新鮮感! 用芝士、粟米蓉同日本味醂而製成慕絲 ,味道鹹鹹甜甜,帶有淡淡粟米味道,入口甜而不膩。 入面就係自家製嘅蜂蜜海錦蛋糕,食落口味道好夾㗎!蜂蜜海綿蛋糕味道濃郁又鬆軟,好好食! 桂花白酒燉雪梨(HKD56)賣相好華麗。先將桂花寒天雪凍,再手切成條狀放入碗內,遠睇好似有啲金箔襯托住雪梨咁,感覺唔會太單調;雪梨就用片糖、桂花糖同白酒燴最少兩小時,食起上嚟入晒味呀! 味道整體配合得天衣無縫,食到有酒香嘅同時又唔會搶走雪梨清甜嘅味道,有驚喜! 桂花寒天變成條狀後感覺好似食緊「河粉」咁,入口好香桂花味,口感煙韌又Q彈 ,都幾特別! 意式黑松露咖啡奶凍(HKD54),黑松露都可以變成甜品?聽個名好似唔多夾咁,不過當你食咗第一啖之後,就會驚嘆原來加咗黑松露嘅甜品係咁好食嘅!主廚Stephanie之所以諗到呢個idea,都係因為港人鍾意食黑松露乜乜乜,於是忽發奇想,不如試吓將甜品都加入埋黑松露,估唔到又幾成功喎! 將咖啡同黑松露mix埋一齊做成奶凍, 口感滑溜。入口第一啖先食到咖啡味,之後黑松露味道會慢慢滲返出嚟,最正係上面有唔同配料,有爆炸糖、Raspberry、馬卡龍同蘑菇造型嘅蛋白糖霜餅,賣相色彩繽紛,食落口又有唔同層次,好睇又好食! 絲絲入心(HKD64),將心太軟用另一種形式呈現,見到即刻少女心爆發呀!賣相吸睛,亦係最考工夫嘅一樣甜品。面頭塊曲奇要特別製造,造成一個月亮形,將心太軟放喺上面,切落中間嗰時,啲朱古力漿就會流晒出嚟,呃like話咁易啦! 影完相,又應該點食好呢? Stephanie就話將所有嘢推晒落去玻璃杯入面撈勻咁食就得喇!心太軟腍身嘅口感,撈勻後連同曲奇同雪糕嚟食,既可以食到曲奇嘅香脆,又保留到心太軟嘅味道,正呀! 依家喺店內只要打卡加讚好菓甜品嘅Instagram同Facebook,就可以獲得全單95折優惠,快啲約齊甜品迷出動啦! 菓甜品 地址:尖沙咀寶勒巷3號萬事昌廣場地下2-3及5號舖 電話:3590 2088 營業時間:星期一至星期五:12:00-00:00;星期六:15:00-00:00;星期日:18:00-00:00

0

【佛誕遊大埔慈山寺 朝聖埋3大人氣食店】陳漢記、華輝餐廳、飲嘢

自從誠哥嘅慈山寺開咗之後,有宗教信仰嘅,當然趁機會去參拜吓啦,無宗教信仰嘅,一樣可以去打吓卡當小旅行都得!嚟緊佛誕,大家可以入去應吓景,不過慈山寺有四「不」,其中一個係不設齋堂,要出返大埔或向大美督方向先有嘢食㗎。唔想食齋咁齋?大埔都有好多正嘢選擇㗎,今次介紹呢3間餐廳,有正餐、下午茶同甜品,行完慈山寺嘅話,一次過食盡佢啦! 正餐 陳漢記雖然自稱係粉麵專家,但係佢嘅腸粉同粥都唔錯㗎。一睇見牛肉腸(HKD23)嘅皮咁薄,功架勁過酒樓已經令小編心心眼喇!入口嫩滑仲幾有肉地,仲有甜豉油提鮮,一碟真係有啲唔夠喉。 小編都幾鍾意蟹,所以就叫花蟹粥(HKD47)啦。本身上枱都冇咩感覺,但一夾起蟹蓋,見到啲鮮嫩嘅蟹膏精華滴返落粥度,真係流晒口水囉!粥底幾軟綿,加埋花蟹嘅鮮甜,小編勁勁勁愛呢碗呀!蟹嘅分量唔知係咪次次一樣,因為竟然有一隻半蟹咁多喎!有冇人食過可以話俾小編知呢? 麵點都要試吓嘅,牛坑腩河(HKD46)嘅肉好軟腍,肉味幾香口。可惜幼河粉碎咗啲,唔係就perfect喇。   陳漢記 地址: 大埔運頭街91B地下 電話:2658 2277 營業時間:星期一至日:11:00-04:00   下午茶 好多人都會去華輝餐廳,除咗因為佢係《那夜凌晨,我坐上了旺角開往大埔的紅VAN》片中嘅餐廳,仲因為佢嘅雞批(HKD14/件)好足料!味道唔會好濃,雞肉又大粒,皮都幾脆,真係唔錯。 蘋果批(HKD14/件)都唔可以睇少!蘋果肉超多又厚身,酸酸哋幾醒胃。 蛋球(HKD9/大)即係沙翁,皮幾脆,但厚咗少少,蛋味都香濃。   華輝餐廳  地址:大埔鄉事會坊17號地舖 電話:2656 6420 營業時間:星期一至日:24小時   甜品 天氣咁熱一定要整啲凍嘢涼一涼,嚟到飲嘢一定要試呢杯爆漿士多啤梨奶緹(HKD46)真係不計成本之作!鹹味奶緹好smooth,仲厚到令你一啖都未飲到士多啤梨,要第二啖先飲到士多啤梨,果蓉真係多到黐咗線!小編懷疑起碼用咗半盒士多啤梨,加埋茶底調製,令酸甜嘅感覺好清新,開胃度爆燈,小編都幾鍾意! 提提大家,奶緹唔係攪勻飲㗎,睇睇教學啦。 令一款大熱飲品黑糖珍珠可可奶(HKD38)都好驚喜,自家秘製將黑糖滲咗入珍珠,一入口就甜甜哋,第二度冇㗎!相對可可反而唔需要太甜,但又夠味唔會水汪汪,真係幾考功夫。 仲未消到暑?純對零度仙草冰(HKD74)一定搞得掂,分量多到2-3個人食都得。大大盤有9種料:珍珠、紅豆、椰果、椰汁糕、芋圓、地瓜圓、花生、紫薯圓同雪糕球2個,大部分仲係自家製,唔怪得好多人嚟食佢嘅芋圓糖水啦。   飲嘢 地址:大埔舊墟直街9號粵發大廈地下4-5號舖 電話:2813 7998 營業時間:星期一至四及日:12:00-00:00;星期五、六:12:00-00:30

0

【突破傳統新搞作 新推震騰騰梳乎里班戟】發記甜品

喺深井做甜品做到衝出嘅市區嘅發記甜品,最近除咗傳統中式糖水之外,仲大玩西式甜品:梳乎里班戟、心太軟,通通齊備!唯一無變嘅係繼續堅持用品質上等食材,keep住每日入呂宋芒、D24榴槤新鮮製作,確保每日大家都可以食到夠晒濃郁,果味香濃同果肉豐富嘅糖水! 餐廳內部特色牆充滿香港味道,檯凳都係走簡單路線而不失整潔,大家可以舒舒服服食碗糖水歎下甜品。 芒果梳乎里班戟(HKD78)圓圓嘅班戟令人睇到都開心!班戟軟綿綿,味道唔會過甜,加埋糖漿同芒果味道好夾,再配埋凍冰冰雪糕更加柔滑,無論男女都一樣鍾意。 嚟到點可以唔試下佢地嘅招牌楊枝甘露(HKD43)呢?之所以係招牌菜,係因為佢地手選新鮮芒果,確保芒果夠晒熟無渣先用!仲有自家芒果茸秘方,食落啖啖都係鮮甜芒果味加西柚肉粒粒,夠晒口感得嚟入口又滑溜! 芒果燸米卷(HKD45)外皮煙煙韌韌灑滿椰絲,內裡芒果餡非常豐富,食落去滿口都係芒果蓉,非常香甜! 呢個外形咁特別嘅榴槤心太軟(HKD63),上層係心太軟,下層係雪糕、Oreo碎同埋食得嘅花花,食果陣可以將Oreo碎同花混合心太軟一齊食,榴槤嘅香味加埋軟滑雪糕真係好正!順帶一提,老闆話佢地榴槤全部都係選用D24,味道夠晒香濃! 發記甜品 電話:2332 8919 地址:旺角豉油街27號地下 營業時間:星期一至日:12:30-03:00