【端午節巡禮五月糭精選 鮮味鮑餡×像真素糭】端午節
今年驟眼一睇就有唔少糭都以鮑魚入饌，既然係咁，不如買好啲獎勵親朋好友同自己。不過素友放心，小編都會介紹埋像真嘅素糭俾你哋㗎，依家先睇爆餡嘅鮑魚糭啦！ 尚鮑 既然講鮑魚糭，梗係要提鮑魚專門店尚鮑啦！佢哋同本地馳名老店老三陽再度合作，推出特大原隻南非鮑魚瑤柱上海糭(HKD598/400g)，限量500隻啫。同樣配搭金華火腿、日本瑤柱等矜貴餡料，咁同其他糭有咩分別？當然係南非慢煮鮑魚嘅重量啦，接近60g㗎，比平時15-20g嘅大好多，仲可以配搭俄羅斯Premium Osetra魚子醬10g套裝(HKD1,188)添。如果揀輕量少少嘅原隻南非鮑魚瑤柱上海糉(HKD298/350g)，就會用大約30g南非慢煮鮑魚，同樣可以配搭俄羅斯Premium Osetra魚子醬10克套裝(HKD888)。不過配唔配魚子醬都好，老三陽嘅師傅將鮑魚骨膠原精華醬汁混入糯米中醃浸，令佢裡裡外外都充滿鮑魚嘅鮮味。 尚鮑 地點：梳士巴利道18 號K11 MUSEA, B2樓層Unit 18 B201舖 電話：3468 5188 營業時間：星期一至日：11:00-21:00 領取日期：即日至6月22日 逸東軒 米芝蓮一星食府逸東軒推出至尊鮑魚瑤柱裹蒸糭(HKD198/600g)，將原隻鮑魚、原粒鹹蛋黃、頂級瑤柱、金華火腿同埋爽滑嘅花菇用荷葉包住，令你食嘅時候有清香同啖啖肉嘅滋味。 逸東軒 地點：九龍彌敦道380號Eaton HK B2樓層 電話：2710 1093 營業時間：星期一至日：11:00-15:00，18:00-23:00 領取日期：即日至6月25日(需2日前預訂) 明閣 同樣都係米芝蓮星級粵菜食府嘅明閣，今年可以網上訂購全新手工精製嘅原隻鮑魚裹蒸粽(HKD308)，選用原隻12頭南非鮑魚、日本瑤柱、天白花菇、燒鴨肉、鹹蛋黃同金華火腿等肉餡，用料非常豐富。想惹味啲可以揀套裝(HKD498/套)，咁就會連埋一樽佢哋自家製嘅XO醬。 ...
