Tagged: 糯米糍

0

【大角咀平價包店抗通脹 $3爆餡糯米糍軟熟煙韌】平霸

行經大角咀,突然聞到好大陣麵包出爐嘅香味,唔係誇張,陣麵包香仲愈聞愈濃烈,傳出香味嘅源頭就係呢間香麥屋。入面啲麵包唔止香仲夠晒平,吸引咗唔少街坊入去幫襯。平霸梗係唔執輸,即刻入去睇睇啦! 全部麵包都係新鮮即製,舖頭後面有自家麵包工場,師傅會間唔中出舖面睇吓邊款麵包就嚟賣晒就即刻補貨起勢整喇。平霸短短逗留幾分鐘,已經見到有兩、三款麵包陸續出爐上架,唔怪得成條街都充滿麵包香啦。 以麵包店嚟講,舖面算幾闊落,一入去就有成列麵包櫃,驟眼睇都有三、四十款俾客人揀,選擇多;而且大部分麵包只係賣5、6蚊,相比出面好多麵包店都平一大截啦,款款都咁平唔知點樣揀好呀!另外仲有賣一啲平價西餅蛋糕,不過通常下午先會出,想食嘅朋友仔就要留意吓喇。 玻璃櫃入面見到糯米糍賣3蚊一大粒,仲分別有芒果、紅豆同奶黃三隻味揀,點可以唔試吓呢? 成粒咁鮮黃嘅芒果糯米糍(HKD3),面頭佈滿椰絲,個皮夠軟熟又煙韌,搣開入面真係有新鮮芒果㗎,芒果分量唔算多,有一、兩粒果肉咁,但係都食得出新鮮芒果嘅鮮甜,又冇酸味,正喎!加上啲椰絲都幾多吓,食落椰子味幾出,同芒果味match得到,但因為有好多椰絲喺粒糯米糍面頭,會食得有少少麻煩。 就咁睇外表唔會估到佢就係奶黃糯米糍(HKD3),呢粒糯米糍拎上手都幾「聚手」,個皮一樣咁腍,一咬開入面原來都包咗幾多餡。入面啲餡就係淡黃色嘅,食落幾creamy,啲奶黃又夠滑,比芒果嗰款更重椰奶味。 呢粒紫色就係紅豆糯米糍(HKD3)喇!啲紅豆蓉真係多到成口都係,幾濃紅豆味,仲食到紅豆粒添。其實三款口味都冇得輸,但平霸最鍾意食紅豆味,因為紅豆同椰奶味又係好夾,連埋個皮食唔會覺得好甜,食到好香嘅豆沙味。值得一讚個糯米糍皮真係好軟熟,唔會有好似雪咗好耐嗰種硬身。除咗本身夠大粒,入面個餡都好足料,兩者比例啱啱好,3蚊真係物超所值! 除咗糯米糍,平霸仲俾佢個朱古力流心包吸引到。 只係賣$5.5係咪真係有流心呢? 朱古力流心包(HKD5.5)可以話係旁邊個墨西哥包嘅朱古力版,面頭有塊薄薄哋嘅啡色脆皮,仲有啲朱古力粒喺上面。買嘅時候呢個包有啲微溫,應該出咗爐一段時間,搣開個包竟然仲見到少少流心,冇凝固晒,但略嫌朱古力漿唔夠多,令到流心效果唔夠明顯。一啖咬落去,軟綿綿嘅包夾住朱古力漿,仲有脆皮口感,味道唔錯喎,朱古力味唔係話好濃,但都對得住呢個價錢啦!   平霸小評:依家啲麵包店嘅麵包好多都係喺其他地方整好再運過嚟,愈來愈少食到新鮮出爐嘅麵包。呢間香麥屋係大角咀嘅恩物,麵包每日新鮮即整,價錢仲咁大眾化,真係好難得㗎。除咗麵包,3蚊一大粒嘅糯米糍亦係舖頭師傅每日自己搓粉整嘅,個皮軟熟又煙韌,啲餡又多,試晒三隻味都唔使10蚊! 香麥屋麵包西餅地址:大角咀大角咀道115號地下4號舖電話:2333 2383營業時間:06:00-20:30  

0

【維記 x 陳家樂一日店長 限定新口味快閃派雪糕】維記Pop Up Store

最近維記牛奶Pop Up Store好多新搞作,好似上星期四就有陳家樂撐場,做咗一日星級店長之餘,仲喺現場幫手派雪糕,又同fans影晒相一樣冇say no,果然係陽光男神! 今次維記喺中環嘅Pop Up Store夠晒新意,除咗有維記嘅經典雪糕口味之外,特別推出咗22款全新口味,其中「鐵觀音」同「玫瑰鹽焦糖」仲係全港首創添呀! 一路食住雪糕一路喺店內嘅靚位打返個靚卡,又食又影又玩啦! 鐵觀音(HKD20),啱晒港人口味,入口超濃郁鐵觀音味道,甜得嚟帶少少苦澀,呢個配搭新鮮呀! 玫瑰鹽焦糖(HKD20),相當有驚喜嘅一款,入口鹹鹹甜甜仲好好食添!焦糖味亦非常突出,非常推薦大家一試呀! 柚子糯米糍(HKD15),除咗雪糕有柚子味之外,原來糯米糍都有喇! 入口好清新,一啲都唔膩,好啱夏天食呀! 錯過咗男神陳家樂派雪糕?唔緊要,嚟緊維記牛奶Pop Up Store都會不定期舉行「維記雪糕杯免費派發快閃活動」,唔使錢就有得食新口味啦!至於派發日期同時間就要留意維記facebook喇:https://goo.gl/fEHrkJ   維記牛奶Pop Up Store 地址:中環威靈頓街33號地下 日期:即日至8月31日 營業時間:星期日至三:10:00-20:00;星期四至星期六:10:00-22:00

0

【20蚊5件茶果糕點 必試即造Q彈糯米糍】平霸

去開元朗,好多人都會推薦驊記糕點屋嘅茶果同糯米糍,平霸今次一場去到,又點可以錯過呢!平日嘅下午時段都有好多街坊幫襯呢! 茶果/砵仔糕/手粉(HKD20/5個)可以自由組合。小編就揀咗三款茶果配搭:分別係眉豆、花生同蘿蔔。 眉豆:茶果嘅外皮做得非常煙韌,QQ的,口感極好;平時食粽都會食到有眉豆餡,估唔到配落茶果度,食落係偏粉狀,鹹鹹甜甜咁,好食喎! 花生:呢個茶果令我有啲意外,估唔到佢嘅花生係鹹嘅,而唔係糯米糍嗰種甜花生,從來未食過嘅口感呀! 蘿蔔:入面居然仲會有埋臘腸,有新鮮感喎。蘿蔔絲非常之幼細,又好清甜,古早味十足啊! 砵仔糕:正正常常,值得一讚係非常多豆! 手粉:手粉比較少見,其實佢係香港新界圍村嘅傳統小食,出面層皮係溝糯米粉、粘米粉同糖粉,入面再包甜餡(通常係花生碎,亦可以用芝麻同椰絲等),味道夠晒傳統,不妨一試! 糯米糍(HKD12/3粒),重頭戲嚟喇!呢度嘅糯米糍真係好出名,全部都係現場手造,所以口感更Q更好食!小編勁欣賞佢嘅花生餡,超級香脆,食落口真係脆卜卜㗎!必試呀! 平霸小評:今次深入元朗,小編表示非常滿意,除咗食物正、人情味都十足!尤其係呢啲小店買少見少,仲要有咁傳統嘅特色糕點賣,唔怪得平日都咁多人幫襯啦! 驊記糕點屋 地址:元朗元朗安寧路20-24號利群樓地下 營業時間:星期二至日:10:00-19:00(星期一休息) 《平霸》平食四方,歡迎各界報料。

0

【紅透IG糯米糍】Sum Sum Dessert

連名都唔洗打,IG上面Search個”麥”字已經會彈出黎既Sum Sum Dessert,原本做IG Shop賣麥提沙糯米糍起家,激賺50萬係觀塘開實體店!位置都相當方便,位於連接住APM既港貿中心。又唔難去,又咁出名當然要去拜訪一下啦! 一開電梯已經見到好多麥提沙,場面非常壯觀!門口兩邊又貼住好多客人既信叫店主加油同大讚好食。 所有包裝都唔花巧,用最簡單既膠盒,可見店主對自己出品好有信心,完全唔靠包裝。有5種味,全部都係麥提沙夾心糯米糍。有原味(朱古力)、綠茶、焦糖咖啡、香芋同薄荷。Sum Sum Dessert除左自己舖賣之外,其他區都有零售點,但價錢就會貴少少。去觀塘買就維持原價,$20/8粒。 Sum Sum Desserts 觀塘巧明街117號港貿中心1305室 https://www.facebook.com/SumSumDesserts/