Tagged: #素學堂

0

【來佬餐館x Green Monday 新推素肉餅煲仔飯色香味】素學堂

冬天點少得食煲仔飯呀!今次素學堂帶大家去到灣仔來佬餐館,以為淨係得鬼佬西餐食?其實來佬一樣有無肉餐單,最近同Green Monday合作,專登為素人設計咗時令煲仔飯餐單,啱晒依家食啦! 首先登場係梅菜素肉餅煲仔飯(HKD88),即係近來好hit嘅全素肉餅潮流喇!用咗新豬肉Omnipork純植物肉碎(Plant-based minced meat)取代豬肉。用素蠔油同梅菜粒醃新豬肉再蒸,用傳統砂鍋連埋生米一齊煲好,最後淋上餐廳自家秘製煲仔飯甜豉油,食落質感同味道,同真嘅肉幾乎冇分別喎,就算肉食者都包你滿意㗎! 另外一味係松露野菌素肉餅煲仔飯(HKD88)!新豬肉裡面有炒過嘅磨菇、雞髀菇同秀珍菇,食落好有層次感,當一開蓋嘅時候,松露香味已經散發出嚟,而且煲仔飯底唔少得出色嘅飯焦,真係好味又暖入心! 選用咗泰國米嘅黑松露炒飯(HKD118)充滿松露香味,再加入翠玉瓜同甘筍粒等,唔只炒嘅時候落黑松露醬,師傅最後仲喺炒飯面頭大手筆加咗成羹黑松露醬,真材實料! 唔知大家平時下午茶會食咩呢?可以試吓呢個素公司三文治配薯條(HKD82)喎!三文治餡料用麵筋做嘅素肉片同素叉燒,而素叉燒係經過餐廳燒味部嘅師傅精心製作,用素醬汁醃製而且仲做到脆皮效果添! 食完煲仔飯,飲返杯嘢潤吓喉啦!呢兩杯飲品都係師傅每日用新鮮材料煲出嚟,限量供應㗎!小編就鍾意呢杯竹庶茅根薏米水(HKD42/跟餐價HKD18),清甜解膩,除咗薏米分量十足,仲真係有兩條竹庶喺度喎,咬返幾啖先。 另一杯雪梨生薑圓肉茶(HKD42/跟餐價HKD18)係餐廳本月推介,凡喺今個月內跟餐價只需加HKD10咋,啱哂冬天補暖,而雪梨同圓肉嘅甜味平衡咗生薑嘅辣味,味道幾夾㗎!   來佬餐館 地址:香港灣仔杜老誌道5號1樓 電話:3125 3000 營業時間 :星期一至日:12:00- 23:00

0

【健康三色蔬菜片好易整 配搭3醬料微波爐搞掂】素學堂

想食多啲蔬菜但又唔想淨係水煮咁dry?今次素學堂同大家走入廚房,教大家用薯仔、紫心番薯同南瓜做呢個健康三色蔬菜片,配上三種唔同嘅簡單醬汁,用微波爐叮一叮就食得啦,喺屋企整真係方便又快捷㗎! 蔬菜片材料與分量 薯仔 – 1個 紫心番薯 – 1個 南瓜 – 1個 糖 – 少許 黑椒 – 少許 油 – 少許 伯爵茶醬材料與分量 牛奶 – 200毫升 淡忌廉 – 200毫升 伯爵茶包 – 3包 糖 – 40克 麵粉...

0

【京川素食料理辣得滿足 麻香水煮豆腐挑戰味蕾】素學堂

京川菜大魚大肉又麻又辣梗係食得過癮,但係京川素食料理又係咩味道呢?今次就帶大家去呢間面譜-京川料理試吓啦! 主打正宗川味嘅素菜,其實好少中式餐廳會有專門為素食者而設嘅素餐牌,呢度嘅素菜款式就選擇多蘿蘿,仲有成本厚嘅menu俾你揀! 環境配合返餐廳名,有唔同嘅面譜裝飾,每個都唔同顏色唔同表情,睇落氣派十足,充滿中國風味。 香煎素鴨片跟烤餅((HKD138),小編最鍾意呢味呀!賣相同真鴨片冇太大分別,其實「鴨」係用豆類製品而製成,口感有啲彈牙,充滿豆香;烤餅外皮夠薄,即叫即蒸熱辣辣,將所有配料包埋一齊食有驚喜喎! 八寶生菜包(HKD98)本身辣辣哋,如果唔食得辣嘅朋友仔記住要「走辣」!配料有豆腐乾、竹筍、紅蘿蔔同花生,師傅刀功了得,每樣食材都切到細細粒,十分工整。入口味道豐富,用爽口嘅生菜包住一齊食,一路食啲辣一路慢慢咁滲出嚟,真係川味十足! 水煮豆腐(HKD158),鮮紅顏色睇見都覺得辣呀,用炸過嘅豆腐浸喺鋪滿花椒同辣椒乾嘅湯底,豆腐吸盡湯底精華,麻得過癮仲充滿川香味。 仲有寬薯粉墊底,口感煙韌彈牙,鍾意食麻辣嘅朋友一定食唔停口喇! 石頭鍋黑椒腸粉 (HKD118),上枱時仲係滾熱辣冒住氣泡,香氣撲鼻!大廚先用黑椒爆炒腸粉,再用菇湯去熬煮,黑椒味重又唔會搶走菇味,腸粉滑溜,再加埋其他配料如大蒜、京蔥同菇菌一齊食,話咁快一啖接一啖,全部食晒冇難度! 紅油素雲吞 (HKD68),雲吞皮簿到透光,再包住白菜同冬菇餡料,粒粒都相當飽滿,沾滿紅油汁同葱花嘅雲吞,味道比平時嘅紅油抄手做得更惹味! 拔絲蕃薯(HKD98),師傅會喺客人面前即場拔絲,幾吓手勢就變出一條條金色嘅幼糖絲,味道充滿蜜糖味 。 最特別係用紫薯代替蕃薯,外脆內軟,食落好香甜,圓滿收場呀!   面譜-京川料理 地址:尖沙咀港鐵尖東站33號舖 電話:2311 9233 營業時間:星期一至五:12:00-15:45;星期六至日:12:00-01:00

0

【主打日式素食料理 $38歎即製素鰻魚便當】素學堂

舖頭細細嘅知味駅素食隱身喺沙田愉翠苑街市,雖然座位得幾個,但知音人多籮籮,尤其係家長呀,訪問期間眼見好多人嚟買外賣!因為呢度主要售賣日式素食料理,連素刺身都有,俾小朋友食都唔使驚呀!菜式都有唔少選擇,由壽司、刺身、天婦羅、便當樣樣有,全部新鮮即製添!佢哋都有做到會服務,素食朋友想開Party都冇難度啦! 呢度價錢親民,但用料絕對唔馬虎!好似天婦羅,老闆就用咗日本南瓜,用料靚連非素食者都會嚟幫襯㗎。 手撕雞冷麵(HKD38)不論外形同味道都同真嘅極度似,配榨菜絲、青瓜絲、芝麻醬一齊食好香口!白色素麵口感幾清爽彈牙,夏天食就最啱喇。 日式燒汁素鰻魚飯(HKD38)用圓形日式便當盒裝,同餐廳比都唔失色。飯選用珍珠米,壽司醋只係落少少,味道唔會好酸。素鰻魚扒由腐皮卷成,層層疊幾有口感;淋咗燒汁同炒香咗嘅白芝麻好香口。最後食埋黃蘿蔔、酸薑同埋青瓜仲可以消滯添。 香芒吉列卷(HKD26/4件)顏色鮮艷好吸睛。芒果好香甜,壽司卷入面包咗炸素魚塊、子薑同青瓜,入口酸甜清香,都幾開胃。 老闆建議台式燒肉刈包(HKD22/2件)新鮮即食係最好,刈包熱食會軟熟啲,口感同味道似中國嘅饅頭。入面有一塊香脆可口素炸豬扒、開胃酸青瓜、蕃茄同自家製嘅酸甜微辣芥末沙律醬,好豐富呀!   知味駅素食 地址:沙田牛皮沙街2號愉翠苑街市地下2號舖 電話:9458 5190 營業時間:星期一至日:10:00-20:30(老闆隨心放假,記得留意佢哋Facebook呀)

0

【銀杏館旗下全素餐廳 29款素菜美式韓式任揀】素學堂

雖然銀杏館並唔係社會企業,要自負盈虧,但用社會企業嘅理念經營,希望可以對社會作出一啲貢獻,好似聘請長者工作同提倡素食呢兩個大方向,銀杏館一直出心出力!而旗下唯一全素食餐廳華麗耆素就位於火炭工業區,唔經唔覺已經開業兩年幾添。店長Ada好享受喺度工作,除咗會介紹新產品俾客人,亦同客人分享日常開心事㗎! 華麗耆素每日有29款菜式選擇,今日就介紹其中幾款啦!  港式蜜味素叉燒配地道薑粒菜脯炒飯(HKD58)係最受歡迎嘅菜式之一!素叉燒外脆內軟,面頭搽咗蜜糖,酸酸甜甜,味道整到同真嘅一樣,唔睇真係未必分到囉。飯包括糙米、紅米、珍珠米,最特色就係加咗薑米同菜脯粒,增加口感之餘,味道變化出更多層次! 樂活素漢堡(HKD68)麵包烘得好香脆,仲脹卜卜添!夾住兩塊由黃豆打成嘅素漢堡扒,加咗黑胡椒模彷黑椒牛扒嘅味道。中間用菠蘿隔一隔,感覺冇咁飽滯又Juicy啲!另外仲有好多雜菌同香菇,啲菇菌嘅汁滲入素漢堡扒,令味道更香濃。加埋千島醬汁,酸酸甜甜食得好開胃。跟餐嘅薯角炸到金黃香脆,有埋沙律菜平衡吓又健康啲。 蒜香韓風石鍋飯(HKD68)燒到熱辣辣上枱,三色飯底有糙米、紅米同珍珠米,配菜就睇時令有咩新鮮食材,因為農場供應咩菜就會放啲咩,保證係最新鮮同最當做。今次小編就試到肥嘟嘟嘅大豆芽、好清甜嘅油麥菜同好爽口嘅青瓜;而模仿肉燥嘅係用冬菇椗煮成,鹹鹹哋,幫其他蔬菜增加鮮味。當然仲有最重要嘅韓式泡菜啦,少少辣,係石鍋飯嘅靈魂呀! 手作健康三色藜麥紫菜壽司卷(HKD50)簡簡單單用糙米、紅米、珍珠米同藜麥整成,好清甜。配埋壽司醋食,唔會好乾,但幾飽肚。 印尼炒飯(HKD58)用素香腸粒、素叉燒粒同埋少少薑炒成,口感豐富。飯有少少薑味,一啲都唔油!再篤爆太陽蛋蛋黃,撈飯食更香滑㗎! 呢幾個餐本身冇跟飲品,但加HKD5就可以無限飲用湯水同埋咖啡或茶,今次是日餐湯係冬瓜薏米甘筍粟米湯,湯清甜多料冇味精真係好正! 銀杏館有自家農場種植蔬菜,供應俾旗下餐廳,冇化學肥料,保證天然,所以呢度仲有賣自家品牌嘅素食食材㗎!   華麗耆素 地址:火炭桂地街10-14號華麗工業中心4樓406室 電話:3996 8353 營業時間:星期一至六:11:00-15:00(星期日及公眾假期休息)

0

【三大平靚正素食店推介 $29抵食三餸打工仔恩物】素學堂

平嘢一樣有好嘢,尤其係食齋呀!今集素學堂就介紹3間平靚正素食店俾大家,除咗價廉物美,食物冇落味精,仲有好多家常菜俾大家選擇,難怪街坊同打工仔都咁buy佢哋啦!   打工仔大愛 HKD30喺中環可以食到飽並唔係傳說,呢間福祿壽健康素食仲找返1蚊俾你添!好多OL同西裝友都嚟幫襯,Lunch必定大排長龍㗎! 外賣飯盒三餸配湯(HKD29),堂食雖然係任選兩款餸(HKD35),但米粉、炒麵、飯同湯都任食㗎!呢度選擇幾多,每日有13款餸自由配搭,今次小編就試咗鮮茄炒蛋焗豆、三菇肉鬆滑豆腐同梅子汁素鴨。好鮮甜嘅蕃茄幾乎有成個咁多,令人好滿足!豆腐唔鹹好健康,有住家味。梅子汁酸酸甜甜,啱晒夏天好開胃。外賣嘅炒麵分量都多,又唔會好油。 跟套餐嘅三色雜豆煲南瓜湯冇味精,清甜足料。   福祿壽健康素食 地址:中環鐵行里8號 電話:2543 9843 營業時間:星期一至六:07:00-15:30   舊式住宅商場小店 舊式住宅商場成日都搵到好嘢,荃灣嘅素食新一代就係其中之一喇。 五餸飯包豆漿或湯(HKD38),款式仲日日唔同。芙蓉煎蛋好香好厚實,調味唔會好濃啱啱好。素蠔油節瓜炆到好腍,如果愛用汁撈飯嘅朋友一定鍾意。鮮茄薯仔嘅薯仔炸過,好香口!漢堡扒用冬菇椗做,好彈牙。薑炒時菜都幾新鮮。除咗白飯可選配粟米粥,免費添加㗎。 跟餐嘅木瓜湯煲到木瓜溶晒,夏天好解渴。 小編推介炸雲吞 (HKD4/粒),外皮香脆可口;仲有好大條嘅腐皮卷(HKD4/條),包住大量粉絲、冬菇絲同木耳絲。   素食新一代 地址:荃灣西樓角路荃昌中心昌安商場1樓52&55號 電話:2411 2407 營業時間:星期一至日:10:00-22:00   街坊老店 講咗咁耐又點少得甜酸齋呢!元朗嘅齋之寶齋菜館已經開業28年,好多老街坊支持㗎! 門口已經有好多甜酸齋俾你揀。 日式素食便當外形嘅四餸套餐跟湯(HKD43),可以配飯、麵或米粉,餸菜款式日日唔同㗎。甜酸齋係懷舊嘅味道,咬落去啲汁爆晒出嚟!翠肉瓜唔會煮到爛晒,炒得好爽脆。炒菜略嫌有啲油,不過都可接受。蕃茄炆雜豆就好有媽媽嘅味道。炒麵分量都幾大,麵質都彈牙。 冬瓜湯足料又解暑,呢日成35度,小編飲得好爽之際,店員仲好窩心咁問要唔要多碗,好有人情味呀! 食埋小食係必須嘅,上面紫菜餅、左邊南瓜餅同右邊素鰻魚仔(各HKD6/件)。小編最推介紫菜餅,好多人都指定食㗎。紫菜拉到一絲絲,有少少海水嘅鹹味;南瓜切絲炸成餅,非常香甜可口;素鰻魚用腐皮卷成,像真度極高呀!   齋之寶齋菜館...