Tagged: 紫薯

0

【抹茶控注意!食住雪糕遊世界】Kafulin Gallery

你喜歡旅行嗎?想逃離香港嗎?相信大家無時無刻都會有去旅行嘅打算。小編喺灣仔見到一間以旅行為主題嘅雪糕店,店舖內外都有店主周遊列國嘅相片和擺設。小編見到之後,十分羨慕店主有咁多咁美好嘅回憶。據說成日去旅行嘅店主仲親身到日本拜師學藝,所以店內主打日本雪糕,雪糕味道比坊間更加正宗! 單單喺店舖外就已經知店主熱愛旅行,玻璃窗貼上世界大地圖,非常搶眼。每個人都好想去曬地球上每一個地方,小編都唔例外,依間店舖真係望梅止渴,充滿旅行感覺。 牆上掛滿店主喺唔同國家影過嘅照片,顧客嚟到可以置身於唔同國家感覺之中,慢慢享受美味嘅雪糕。佢地仲會不時轉下主題,而家呢期係日本軍艦島,嚟到就可以睇下軍艦島有咩靚相啦! 日本京都宇治抹茶阿法奇朵(HKD36) 首先,抹茶雪糕嘅質感細滑。要做到依種效果,相信需要下唔少嘅苦功,再倒上熱嘅抹茶Latte,冷熱同時喺口腔交織。抹茶豐層次感,味道更為突出。 宇治抹茶軟雪糕筒 Premium Cone (HKD43) 雪糕用咗日本京都宇治抹茶做成,加上日本白玉丸子、十勝紅豆、蕨餅及自家製的抹茶曲奇,配上香脆窩夫雪糕筒。抹茶雪糕香濃軟滑,紅豆香稔加上煙韌白玉丸子,口感非常豐富。 草泥馬芭菲(HKD42) 以秘魯草泥馬為主題,牛奶軟雪糕雪糕上加上一塊草泥馬造型藜麥曲奇,可愛得嚟又非常健康。自家製黑糖蛋糕粒同楓糖焗南美藜麥,口味獨特之餘帶點異國風情。蛋糕嘅綿密、雪糕嘅軟滑同藜麥嘅香脆,入口後真係點食都唔夠喉。 京都宇治焙茶拿鐵 (HKD30/Hot) 香濃日本焙茶加上奶泡,細滑之餘又保留到濃郁嘅茶味,絕對係雪糕之外又一好選擇。 紫薯拿鐵(HKD30/熱) 未飲已經聞到紫薯香味四散,入口之後濃濃紫薯香氣更留於口腔縈繞,紫薯控應該會好鍾意! Kafulin Gallery 地址:灣仔巴路士街17-21號樂景大樓地下4號舖 電話:3709 8434 營業時間:星期一至五:12:30-22:00;星期六、日及公眾假期:12:00-22:00

0

【動漫珍藏陪住食 天后特色爐端燒!】玩具屋

每個人有自己嘅專屬童年,感覺深刻而令人無法忘懷。小編作為90後,童年都係睇住數碼暴龍同比卡超長大,呢間店舖嘅擺設就以大家童年動漫回憶為主打,啱晒70後80後嘅朋友!門口飾櫃擺滿模型,包括:叮噹、小雲及龍珠等等,仲有星矢、黃金戰士、鐵甲萬能俠、巨靈神等等懷舊超合金同多種模型,令顧客彷如置身於玩具世界之中,回想起童年時嘅回憶。 店內食嘅係傳統爐端燒,格局以傳統酒屋為基礎。店內食物都由日本各地直送,保證新鮮。大家可以喺枱吧前慢慢揀自己鐘意嘅食物,揀完之後再交由廚師即場燒烤,原汁原味!而且呢度仲會按照爐端燒餐廳傳統,料理師傅會用木漿(掘返べら)將燒好咗菜式遞比客人,真係好有特色! 餐廳內仲有一個自成一角嘅小型個室(掘りごたつ),免卻咗其他人嘅騷擾。人客可以一邊食野,一邊飲酒傾計,度過一個開心嘅晚上。 粒貝壺焼(HKD190)內有日本粒貝,十分鮮甜。製造過程相當複雜,要先起肉去內臟,再放回貝殼內加湯燒。食嘅時候,建議先吃肉然後再飲湯,湯水吸收咗貝柱嘅味道,鮮味無窮。 甲羅焼(HKD138)先將松葉蟹肉放喺蟹蓋上面燒,再加上日本生蛋同蟹籽,最後配上法包。日本生蛋不但突出蟹嘅鮮味,而且令到整個口感更為嫩滑。法包經過烘焗,香脆可口,同蟹肉配搭的確天衣無縫。甜蕃薯配抹茶忌廉(HKD52)用料十分講究,選用日本紫心蕃薯配上自家製抹茶忌廉,係大熱之選!一凍一熱,衝擊味覺。甜度適中,食落唔膩,啱晒女仔! 玩具屋 地址:天后銀幕街16號地舖 電話:2348 7800 營業時間:星期一至日: 18:00-01:00

0

【少女心爆發!旺角樓上Cafe抓緊小確幸】吃吧 Chiba

在繁華鬧市旺角區內,樓上Cafe係一個遠離繁囂唔錯嘅選擇。今次小編搵到間隱藏係僑建大廈2樓嘅CHIBA ,無論你係想Hea,定係想填肚飽,呢間Cafe都可以滿足到你。 以「吃吧」命名,想唔諗起食都唔得啦。環境夠曬清靜,可以盡情relax下,食物雖然選擇不多,但都係廚師精選落足心機嫁。一於就帶埋親朋好友一齊吃吧! 賣相非常之吸睛嘅蘋果木煙薰西班牙豬扒(HKD168),上檯時蘋果木煙慢慢散出,如仙境般夢幻,令人迫不及待想品嘗。採用咗西班牙黑毛豬,豬扒煮到八成熟之後再加蘋果木煙薰,食落肉質更鮮嫩多汁又頗有口感。豬扒底下紫薯蓉都有下心思,幼滑薯蓉內加咗薯粒,有口感之餘令豬扒煮得更嫩滑。 香煎上級盲槽魚柳(HKD128)油炸過嘅羅勒陣陣清香,加埋炸薯仔絲香脆可口。 金黃色槽魚柳肉質嫩滑,本身怕魚腥味嘅小編,今次竟然食得津津有味。下面嘅紫薯蓉微甜又口感順滑,同魚柳相輔相成產生另一種味道! Chiba招牌菜點可以唔試?即叫即焗嘅黑松露煙火腿芝士多士(HKD68)多士焗得脆卜卜,陣陣濃郁黑松露香氣不斷撲鼻而來。中間再夾住半溶嘅芝士,芝士咸香豐富,滿滿芝士分量多到可以拉絲。完全係芝士控必食! 薰衣草蜜糖梳打(HKD56)主要以薰衣草精露、梳打水、蜜糖調配而成,加入可食用薰衣草花瓣,散發淡淡薰衣草花味。夢幻紫色即刻點燃起小編嘅少女心。 每位女士都有第二個胃要嚟裝甜品,Dessert Tea Set(HKD198)完全可以一次過滿足曬女士們嘅甜品胃。有Macaron、細葡式蛋撻、雪糕杯、沙律、小漢堡等等,選擇口味多。其中小編對小漢堡包最念念不忘,竹炭漢堡包中間夾住大大塊魚柳,沾埋酸甜沙律醬更開胃。 對比普通啤酒,女仔更容易接受果味啤酒。Coconut Beer(HKD62)椰子味非常清香,入口即刻感覺到椰汁嘅甘甜,口感如奶油般順滑。果酒美味之外,好特別嘅係椰子殼做杯,趣味十足。其實除咗椰子味果酒,仲有好多其他唔同口味嘅手工啤酒,Happy Hour時間同朋友邊傾解邊飲返杯都唔錯嫁!   吃吧 Chiba  地址:旺角彌敦道566-568號僑建大廈2樓2室 電話:6127 7112 營業時間:星期一至日: 15:00-00:00 星期二: 休息

0

【超特別!伯爵茶窩夫】慕茶

提起中國茶,大家都會即刻聯想起同屋企人飲早茶,或者中國茶道茗茶。觀塘有間特色cafe叫做慕茶,由四個女仔合辦,將茶大玩特玩,製作出好多唔同嘅特式茶品。例如中國茶味雪糕、抹茶味意粉等等。鍾意茶嘅你,一定要去慕茶,得閒飲茶! 餐廳環境素雅,燈光柔和,寧願舒適。適合同三五知己享受寫意時光。 茶助抹茶卡邦尼大蝦意大利粉(HKD90)意粉茶味香濃,食落有茶味嘅甘甜,伴有芝士粉、香草同蛋黃,入口有少少鹹味,散發陣陣茶香。趁熬刺穿蛋黃混和,意粉會更顯滑溜。四粒蝦仁爽甜實肉,大蝦則更較為入味,味道相比之下較鹹香。 貴族伯爵茶窩夫繽紛樂園配2款雪糕(HKD80),伯爵茶窩夫好香好鬆軟,食完都散發出茶香,另外兩球雪糕分別係玄米白茶味同玫瑰花茶味。玄米白茶食落好多玄米粒粒,味道清香淡雅。而玫瑰花茶味,入口味道濃郁,玫瑰花味入口即刻散發出嚟! 紫薯湯Affogato配手工玄米茶雪糕(HKD48)暖暖嘅紫薯汁入面有粒粒紫薯,將紫薯汁倒入雪糕,雪糕外層輕輕融化。食嘅時候冷熱交融,體驗獨特。慕茶嘅雪糕根據意大利製法全手工製,口感比一般雪糕綿軟幼滑,較為黏身,而且空氣密度低,雪糕留於口腔時間較長,可以慢慢細味。 除咗茶之外,鮮奶咖啡(HKD36)亦非常香滑,而且每個咖啡杯都有可愛動物頭,飲飲下可能仲會有得意動物同你Say hello添! 慕茶 地址:觀塘開源道55號開聯工業中心A座726室 電話:6257 9982 營業時間:星期一:12:00-19:00 星期二至五:12:00-22:30 星期六:13:00-22:30 星期日:13:00-18:00

1

【超夢幻甜點旅程】ZUC.CCH.ERO

好多人對ZUC.CCH.ERO個名都充滿疑惑,就竟係代表啲咩?原來係意大利文sugar嘅意思,好配合餐廳主題!如今解開謎團,等大家唔洗再蒙在鼓裡!藍帶大廚有豐富意大利餐廳工作經驗,以無限創意將各色甜品融入意式元素,大玩份子料理,希望以親民價錢俾大家體驗到酒店級大師級甜品! 餐廳注重同客人要多互動,為左方便近距離將甜品創作於大家眼前,差不多全部用餐位置都喺長bar檯,大大提升整體享受!所以座位唔算好多,建議各位book定先上去會穩陣啲。 或者你已經喺網上見到無數人洗板嘅「拉糖小淚滴」,影相效果超好超吸引,我地都唔再多講,未見過嘅話自己上IG或google搵下啦。原來店主最近宣佈個3 course signature adventure set – total 10 desserts+1 drink(HKD278)黎緊8月頭停出,要轉新menu喇!如果仲未試過或者一直念念不忘好想再食,就要把握機會。 上第1個course之前會有個welcome snack,外表成粒爆谷咁樣。原來係之前用cream浸過爆谷再加入液態氮等佢瞬間急凍,放入口有淡淡爆谷味仲會噴煙,超過癮! 第1個course出場前師傅會先叫你拎起餐巾保護自己,成個藝術品就開始呈現眼前。 以freestyle形式先將士多啤梨jelly同藍莓果jam畫出黎,會彈到出黎,好刺激,所以要用餐巾好好保護衣物。唔好以為得個靚字呀,大廚堅持選用新鮮生果做食材,保證有水準!後面又會有個放映機播放音樂同畫面,滿足你所有感官享受! 之後再加上竹炭蛋糕、急凍紅桑莓、餅碎、荷蘭豆草等等。 成碟甜品連埋朵花都可以食落肚,少少都唔好晒呀! 最後仲有個雪糕,同樣用液態氮整出黎。同一般雪糕口感唔一樣,有陣麥香味,小編深深愛上! 唔好覺得份量望落好似好少,其實每樣少少加埋都好夠食,完全唔會有空虛感。 碟邊有粒黑色珠珠係黑醋,甜品師傅細心解釋意大利人鍾意將士多啤梨配黑醋食,又真係幾正播! 第2個course個名叫”Tasting and Guessing Game”,將份子料理玩至巔峰,師傅先將甜品奉上,等你估下究竟係用咩材料做。6款都用左唔同蔬菜,包你有啲估都估唔到。估中晒6款會送多1款神秘甜品嫁!我就當然唔會開估俾你知道答案啦,想試就去玩啦。 最後個course就係”Tiramisu in 3 styles”,分為過去現在未來3款形態嘅Tiramisu。由最傳統做法去到份子料理都有,一次過滿足晒3個tiramisu願望。 小編覺得中間嗰款現代版最得我歡心,配合左朱古力雪糕,好正啊!~~~ 食完個主打set,喺依個時候當然同場加映全成熱話沖繩紫薯撻(HKD68)。 用上新鮮足料紫薯製作,所以流心程度爆標,一吉開個撻皮就標晒出黎。撻皮好香牛油味,餡料絕對唔會過甜,再加埋則邊個紅豆雪糕,真係天衣無縫。必必必必必試,小編大力推介! *所有甜品個甜度都剛剛好,食完咁多都唔會覺得好漏!真正高水準就係依度。 ZUC.CCH.ERO...

0

【全城紫薯熱】必食水晶湯圓!

灣仔碼頭 – 紫薯水晶湯圓 最近迷上灣仔碼頭紫薯水晶湯圓。餡料足,甜度適中,食完好滿足好幸福!Recent addiction – Wan Chai Ferry brand sweet potato tapioca dumplings. I can eat these all day, it’s just SO GOOD! 各大百佳或惠康有售 售價: HKD18.5/20粒 仲有以下依d口味架! (圖片來自官網)