Tagged: 網友

0

【整衰咗補鑊衰多次 網購翻糖蛋糕一肚氣】食焦

買蛋糕同人賀壽本來係開心事,但結果搞到又嘥錢又要嬲!呢次唔係收到個「生日快乐」殘體字祝賀牌喇,係訂咗個完全貨不對辦嘅蛋糕,仲要係好核突吓!有事主喺網上大控訴,叫人「大家小心,唔好訂呢間既(嘅)蛋糕」!然後po齊有相有字嘅對話出嚟,真係睇見蛋糕個製成品都冇晒胃口呀! 係咁嘅,事主喺間蛋糕網店訂造蛋糕,仲要兩個星期前俾咗原圖佢,講明公仔唔使加㗎喇,但出到嚟嘅翻糖蛋糕係變咗泥膠公仔咁,完全唔似樣,仲要收成760蚊添!事主梗係即刻投訴pm佢啦,結果店主就話係個朋友整嘅,佢自己睇見都O哂嘴喎,又話點都會補鑊整返個新嘅蛋糕俾事主! 好,事主再send多咗張圖俾店主,講一大輪總之係話一定整到啦,電光火石間已經即刻報咗價,又話做漸變色要加錢乜乜乜,最後係$420,唔計嗰$760,即係俾返$340事主,一聽個價,事主就話不如hold一hold,但係店主秒回佢話已經焗緊喇,咁即係焗要啦!結果,補鑊呢個所謂蛋糕都係慘不忍睹囉! 重點係,又有網友說出重點來,「有無可能由預備焗蛋糕材料去到完成一個蛋糕一小時可以起貨?」仲有位自稱係做咗十幾年師傅嘅網友踢爆,話佢「根本係用後備蛋糕!」俾人連番追擊,其實店主都有還吓手嘅,喺ig度po咗段委屈文自己發洩吓,不過眼見個火愈燒愈大,最後fb專頁同ig都收咗檔!咁潛水避吓啱嘅!

0

【買半斤燒腩仔少咗2兩 燒味店疑似呃秤仲發惡】食焦

俾人呃秤仲要受氣,係咪嬲先?好多時買燒味海味,俾足秤你係合理、唔足秤都成日聽聞喇,但去買嘢唔通真係要帶埋個磅出街咩!不過連肉眼睇得到都覺得少嘅,就真係呃秤喎!好似有網友喺馬鞍山石門一間燒味店度,買咗半斤燒腩仔,就咁睇都覺得少喎,咁就返屋企搵個磅磅吓,點知真係少得可憐! 事主喺馬鞍山之友群組度話,「真心嬲……我拎左外賣望左一眼,都覺得有啲少……反(返)到屋企秤,連盒秤得263g,淨重得236g咋!半斤應該有302.4g囉!」事主仲細心到po埋張重量單位換算表出嚟,即係少咗成66.4g,計返斬少咗差唔多成2兩肉喎! 都係嗰句啦,過咗海就神仙,除非當場斷正話佢呃秤又或者真係帶埋個磅出街啫!所以,事主都識趣,只係諗住打返個電話落舖頭,問吓佢係咪俾錯咗例牌嘅,結果「求其答『我地跟中國秤』…… 跟住佢一句 『係咁啦!』cut左我媽線!」事主梗係嬲爆啦,講明冇下次,幾好食都假! 呢間疑似呃秤嘅燒味店就係石門新開嘅「沙田一」,呢間自稱係至尊燒鵝同生滾粥品嘅專門店,賣點係現燒現賣古井燒鵝喎!據事主話佢lunch time嗰陣買咗盒燒腩仔飯覺得好食,於是夜晚諗住再外賣加料,結果變咗俾人減料!其他網友就叫事主報海關啦,又話呢間嘢嘅燒鵝皮又硬又唔好食,最重要係服務態度差!呢個先係最接受唔到囉!

0

【連登仔投訴找少錢唔俾返 收銀姐回應:規矩等埋數】食焦

遇到收銀找少咗錢,但係都冇得攞返,應該點做先好?有連登仔開po話有日lunch去咗調景嶺間翠河餐廳食晏,叫咗個三色蒸水蛋有蛋殼喺入面都算喇,仲要埋單發現收銀找少咗錢,「個餐$43 我怕太多散銀比左$55,跟住個收銀望都唔望就以為我比$50,直接找左$7比我,咁我本身另轉身諗住走,但feel到唔對路……」 呢位巴打仲將自己同收銀姐嘅對話打晒出嚟,簡單啲講,個餐43蚊,巴打俾55蚊,係要找返12蚊嘅,但係收銀找咗7蚊啫,佢擰返轉頭同收銀講,點知俾人話「總知你另(擰)轉左身就當走嫁啦,走左就唔會比返你」、「 總知宜家冇得比返你啦,如果我地今晚真係多左錢,咁你聽日黎拎返」! 結果巴打嬲到連嗰7蚊都冇要到嘅!巴打話po上網唔係想公審間餐廳同個收銀喎,只係想大家唔好貼錢買難受咁話!當然有唔少人回應佢,話佢做乜唔當場報警呀、食43蚊點解要俾人55蚊,更多人係話翠河根本就係難食,一早唔應該去喇! 小編打咗去調景嶺間翠河,接電話位員工原来就係當日位收銀姐,佢話:「如果個個擰轉背先話找少咗錢,個個係咁,我哋唔使出糧啦!我做收銀咁多年,遇過太多呢啲情況,嗰日嗰位係後生仔嚟嘅,我冇話係邊個錯,點都要等嗰晚埋數睇吓係咪真係多咗先,呢個係規矩!」 收銀姐就話當晚埋數,係多咗15蚊!「我只係話唔可以即場俾佢,要埋咗數先得!嗰晚係多咗15蚊,佢嗰7蚊係佢自己唔要俾返我嘅!(咁係咪有12蚊多咗會俾返佢?)我都話佢第二日嚟,我咪俾返佢囉!」巴打仲去唔去呢?

0

【大學學會訂咗嘢食「失蹤」 小店老闆:要有交帶!】食焦

不要浪費食物!做人仲要有交帶同責任心㗎!話說公開大學學會同一間喺何文田嘅小店訂咗盒130蚊嘅煎炸嘢食,有炸餃子、春卷同咖喱角嘅大拼盤,約好晒會五點半去攞,結果到八點收舖都唔見人,小店老闆又電話又WhatsApp都冇回音!於是老闆只好將盒嘢食放咗喺舖頭旁邊嘅小枱度喇! 小店老闆將呢件事po咗上網,話「到8:00收舖都唔來?連一個電話也沒有?第三世界上真係有好多人是正在饑荒……你哋都130蚊都俾左啦!點解你唔來?對你無著數,真係講多次非常浪費……」 第二朝學生會先WhatsApp老闆道歉,話原来係因為尋晚有就職典禮好忙,又冇帶到電話,所以先完全冇回音囉!到咗凌晨兩點先醒起唔記得叫人去拎嘢食喎!「我們已立即到貴餐廳領回食物……避免浪費食物……亦不想浪費貴餐廳心血……」仲話已經將盒嘢食食晒咁話! 網友點睇?有人話學生唔啱又話埋依家啲九十後梗係唔掂、有人就覺得既然都俾咗錢唔記得去拎啫,咁樣公審唔係咁好囉!老闆點睇?有來有往,人哋都道咗謙,老闆都公開咁話「我只係要有交帶!該學會已有回覆,亦講凌晨兩點找人來拎去食晒,我由始至終主要係有交帶!人要有承擔!責任!不浪費!」 文字上道咗謙都未夠,原来為表誠意仲當面賠罪添!老闆再po文講返「今日整個學生會主要成員一起來道歉,這種共同進退!共同承擔責任!呢點真係唔係人人做到……」老闆啖氣落晒,班學生又唔使俾網友再話廢青冇責任心,總算大和解,應該食返多盤炸嘢慶祝吓啦!

0

【爐頭生銹雪櫃臭晒 前員工控訴灣仔扒房】食焦

又有員工爆料喇,不過今次係前員工!上個星期,喺飲食群組「中伏飲食報料區」度,有網友自稱曾經喺灣仔克街一間西餐廳做過,因為睇唔過眼餐廳廚房嘅衛生同食物安全,一於將真實情況,影晒相po埋上網,打足成段字po咗9張相出嚟(不過原po之後刪咗嘅!)。 呢位前員工有圖有字,數足餐廳九宗罪咁多㗎!有乜呢?包括話餐廳俾客人飲嘅係水喉水啦、熱水得95度冇殺菌啦、冰櫃半年都唔洗一次、過期食物同其他食物放埋一齊、個雪櫃臭晒無人理、發晒霉都無人理、爐頭生晒銹等等…… 喺個po嘅文尾仲寫埋(冇tag到!)灣仔Carlo Riva呢幾隻字,咁呢間食扒嘅西餐廳Carlo Riva又係喺克街,咁好難唔令人聯埋一齊諗囉!有相又有名,自然上埋報,餐廳負責人回應傳媒嗰時,就無否認到啲相,只係話相信係一名前「炒散」員工同公司不歡而散,可能玩報復放上網喎! 網友反應又點?分咗兩派,有人話冇諗過真係咁唔衛生,「未見過咁惡劣嘅衛生環境」、有人又話其實好多餐廳嘅廚房都係咁,大家「眼唔見為乾淨啦」!不過更令網友好奇嘅係,之前原po樓主仲話會有料爆,點解最後刪埋po兼潛晒水?冇料再爆,搞到網友冇得再剝花生呀!

0

【$300包早午晚宵夜 連登仔開箱法國軍糧】食焦

軍糧有乜食?仲要係法國軍糧喎!同法國大餐分別幾大呢?有網友就親身解開咗呢個傳說中嘅謎喇!有連登仔最近嘅開箱文,唔係零食,係開箱法國軍糧,一大箱有齊全日早午晚餐,仲連埋下午茶添!都幾大分量㗎,其他網友睇完都話想食添! 一大盒法國軍糧要幾錢?呢位連登仔就話用咗三百蚊港銀買返嚟喇!先由早餐開始,一包朱古力味燕麥片,一沖開水即食得,試食報告係「好香好濃朱古力味,但係太甜,幾漏下(吓),加埋啲好滯既(嘅)燕麥,一包夠頂成個上晝!」 午餐又係點?就係一罐雞肉蝦仁意粉,有埋迷你金屬爐具俾你,網友話同其他國家軍糧係無火煮食有所不同喇!呢個意粉做午餐嘅試食報告係「好香蝦油味、味道真心唔差,有意粉屋水準!」其他網友見到都留言話食得過喎! 午餐有意粉食,以為晚餐仲豐富?錯晒!晚餐原来只係得幾包餅乾仔同埋啲墨西哥卷餡料,餅乾分咗甜味同鹹味,大部分網友都話齋睇就覺呢個晚餐好唔吸引,分量咁少點會夠飽!嗰幾塊餅乾再配埋啲餡料嘅試食報告就係「口感極差,好硬,完全唔脆!」就咁睇,午餐贏啦! 唔夠飽咩?仲有小食㗎!有茉莉花茶啦、能量飲品,仲有啲水果啫喱條,其實可以當宵夜咁食啦!網友仲話傳說中嘅法國軍糧,係要用六箱美軍單兵野戰口糧先換到一箱返嚟㗎!網友留言又問喇,咁中國軍糧又點呢?有人回應話難食到一個點、有人就話以軍糧嚟講算係咁,尤其係個羊肉飯配個香辣醬先係精華喎!

0

【網友狂插食店爆粗告示 腦細認玩嘢:好過冇人知】食焦

上星期二晚有網友喺fb群組po咗張食店告示,內容是咁的:「致各星級食客,咪X咁肉酸,最低消費三條野(嘢)」、「伙記仲惡X過腦細」,又話「收費已經咁X平,你當自己係食神呀?!」爆晒粗好大怨氣喎!網友反應梗係大,有人話一定唔會幫襯為乜要受氣、又有人話呢位腦細講中晒飲食業心聲! 不過更多人反應係,究竟係邊間食店貼張咁嘅告示喺餐牌。結果神通廣大網友們好快已搜尋成功,開估咗原來係荃灣嘅「老巷麻辣燙」呢間小店(不過小編發現咗有唔少po係腦細自己開估㗎喎!) 點都好啦,起碼呢幾日嚟呃咗唔少嬲豬同like,小編都搵咗食店經理Katrina解話,佢話腦細(Don同Arnold)見到網友反應咁熱烈係開心嘅!「冇所謂啦,好過冇人知!依家正負兩邊反應都大,都係帶出咗宣傳效果嘅!」佢話腦細本身係做設計,好多時都會諗啲得意嘢出嚟玩吓,「之前我哋喺舊舖嗰陣已經係咁,餐牌就出『老味日報』、牆身又貼滿好多玩嘢街招咁!」 問佢覺唔覺得今次玩大咗?Katrina話:「又唔會嘅,不過就真係冇諗過會有咁大迴響。」不過佢就話告示入面講嘅「伙記惡過老細」確係真嘅,「開舖早期的確係有客人投訴過,話我哋啲伙記講嘢大聲嘅,不過依家已經冇呢啲情況喇!」佢仲話其實腦細對啲伙記真係好好咁話!至於叫人扮食家就去真米芝蓮,Katrina就話係腦細玩嘢之作,「腦細之前設計咗個『奶滋Lin』喺舖頭,想諷刺吓米芝蓮!其實都係想帶動到自己舖頭啫!」 其實呢個「爆粗告示」夾咗喺個餐牌短短一星期,話咁快就俾網友po上網,有齊宣傳效果啦!仲有冇下一波?Katrina話:「其實今次都係想配合返個menu啫,腦細都諗咗好多唔同嘅餸名去惡搞吓㗎!可能下次都會再度過第二啲㗎!」今次位已出,玩gimmick係緊要,但係啲嘢食掂唔掂先係重點喎!

0

【被屈賣狗肉 壓力大暴瘦 羊腩煲店主:真相大白】食焦

早前網上嘅「動物生命糾察隊」群組,出po話元朗一間羊腩煲店「掛羊頭賣狗肉」,仲話有街坊日日聽到有狗慘叫聲添!即使店主出嚟澄清,一樣俾網友追擊。直到食環喺11月3日出咗化驗報告,證實店內樣本為羊肉,店主幹哥上星期三再接受《東張西望》訪問,期間聲淚俱下話終於還一個公道! 連日嚟幹哥都要接受唔同媒體訪問,又要為舖頭預備,日日踩足十幾粒鐘,佢女兒陳小姐就話總算鬆一口氣,佢同小編講:「依家真相大白!一開始好唔開心,點解會有人亂咁作嘢都得!」佢話爸爸為咗呢件事瘦咗十幾磅,「因為好大壓力,有人經過舖頭都指住佢鬧佢,網上有人仲話要揾人嚟打佢,搞到佢好大壓力,佢好困擾瘦咗十幾磅!」除咗面對網絡欺凌,仲有生意壓力,幹哥女兒話發生「掛羊頭賣狗肉」風波後,生意跌咗七成有多。 依家真相大白,小店生意先有返生機,幹哥女兒話呢個星期,爸爸日日踩足十幾粒鐘。「有時做到天光先收工!依家每日都要兩隻全羊嚟做羊腩煲,又要應付預訂啲客,所以好忙!希望慢慢生意好返!唔好再有人亂講!」 食環化驗報告出咗,還幹哥一個清白,撐幹哥嘅網友仲搵埋「原兇」,就係本土行動成員何來,網友群起要佢道歉!幹哥女兒話依家都氣難平,「我唔識佢(何來),同佢完全冇過節,最嬲係佢哋無中生有,亂咁作故仔,唔知點解佢哋要咁做!」 幹哥女兒仲話,雖然依家真相大白,但係老屈佢哋賣狗肉嘅,一樣死撐,一句道歉都冇!「佢哋依家仲死撐,話係一個局,話平時食環做嘢點會咁快!其實係佢哋每日都打去食環度投訴,食環先咁快有行動即刻化驗咋嘛!」報告出埋,冇得再老屈,希望幹哥快啲收拾心情、快啲回返磅肥返,繼續整多幾煲好味羊腩煲啦!