Tagged: 罷食

0

【十字冰室導盲犬風波 網民重溫罷食名單】食焦

呢幾日網友最熱門嘅話題,相信都係講緊西環十字冰室單嘢啦!就喺聖誕嗰日,有人帶住隻受訓緊嘅導盲犬去冰室,問侍應得唔得,侍應再問經理,經理話「絕對唔歡迎」跟住仲黑面閂門!事主將呢段不禮貌對待po咗上群組,網友群起鬧爆十字冰室,雖然餐廳喺傍晚時分喺專頁道晒歉,一樣惹嚟網友罷食行動! 睇返個道歉po下面嘅留言,有人就盲撐餐廳做得啱,當然即刻俾人話係餐廳「安排」網軍唱好啦!其實心水清嘅都已經講出重點,唔講係咪俾唔俾導盲犬入嘅問題,而係今時今日咁嘅服務態度就梗係唔掂啦! 出咗道歉po都一樣平息唔到民憤,十字冰室連日嚟仲將餐廳電話長掛,直頭唔俾人聯絡,費時煩喎!呢單導盲犬風波,網友大鬧,但有人就話十字冰室今次唔使落廣告,都有晒宣傳效果,依家係人都知佢哋呢間餐廳!又啱喎,呢次真係衝出香港,搞到連台灣傳媒都有大肆報道,不過呢啲「宣傳效果」,真係唔要好過啦! 雖然嗰位餐廳經理事後有回應過傳媒,話冇講過「絕對唔歡迎」呢5隻字,而網民最關心嘅係佢下場究竟如何啦,係咪好似道歉聲明咁講「予以遣責」,定係會被炒魷?呢個真係冇人答到喎!但係骨牌效應就出現咗喇,網友揪出一系列罷食名單,溫馨提示吓大家,除咗十字冰室,仲有支持過反佔中嘅銀龍茶餐廳、同埋藍絲嘅喜記避風塘辣蟹,提吓大家要溫故知新先得喎!

0

【網民發起罷食行動 雲桂香:有人想搞大件事】食焦

事緣係上星期連登有個po寫住「連登仔齊心罷食雲桂香」,搞到要罷食咁激?原来係因為之前,喺大埔廣場間雲桂香發生失火事件,有事發在場嘅食客事後喺網上講返,嗰晚店內廚房冒煙,食客驚有危險,準備逃生之際,店員竟然鎖上玻璃門,叫客人「埋咗張單先」!就係咁,引嚟網上熱烈討論,雲桂香被圍插,俾網友鬧「火燭都掛住做生意」、「收錢緊要過途生」等等留言,於是乎,就出現咗呢個「罷食po」! 網友仲嬲到話唔止罷食大埔廣場嗰間,係要全線罷食雲桂香先得!一場「火」愈燒愈勁,變埋場公關災難,事發三日後,到咗上星期二夜晚,雲桂香先喺公司fb專頁「雲桂香米線專門店」出po道歉,「本公司向當晚的食客及公眾道歉」,仲話當晚係由於插頭短路發生冒煙,員工喺危機處理確係有不足咁話。網友當然唔收貨,繼續留言鬧返夠本! 道埋歉都似乎得唔到原諒,小編打咗去出事嗰間雲桂香,店長黃小姐話:「冇火燭,只係有個插頭燒咗,短路跟住冒煙啫,唔係火燭!消防員嚟到檢查完處理咗就走啦,一定冇火燭!」係咪有店員鎖門叫人埋咗單先好走?「冇鎖門!係個樓面冇乜經驗,佢唔識點樣處理。有客人見到廚房冒煙,驚有事想走,咁個樓面就同佢講『你食完就埋單先』跟住有個客就話『火燭都掛住收錢』」 店長話嗰晚冇火燭亦都冇鎖門,「其實係發生喺一、兩分鐘之間嘅事,我喺廚房出嚟已經見到佢哋走,嗰晚枱枱客都冇俾到錢就走!」問佢有冇諗過引嚟咁大反應,佢話:「係一、兩個人想搞大件事啫!」知唔知網友發起罷食雲桂香行動,店長話:「我哋依家日日都咁爆場,冇得呃人㗎!」 連日嚟咁多網友鬧爆,問佢有冇諗過向網友道歉,佢話:「我唔識呢啲嘢(網上)、我冇睇!咁我哋公司都道咗歉,已經放咗上網啦!」搞到咁大劑,再問佢驚唔驚呢個罷食行動,店長話:「我哋做熟客生意多!」