Tagged: 美食

0

【葵廣麻辣串串出位 搞鬼「真漢子」街坊超buy】麻辣真漢子

葵廣多嘢食就係人都知,競爭咁激烈,小店總要施展渾身解數,一係鬥平、一係鬥大份!最近就有間小店以出位造型跑出喎!呢間喺3樓巷仔嘅麻辣真漢子,由老闆Ryan同佢老友大碌開嘅,舖頭幾時都咁熱鬧,大碌仲好主動同路過嘅街坊打招呼,氣氛超融洽! 成間舖頭行「地盤風」,喺商場入面見到佢哋「職安真漢子」嘅打扮,真係充滿違和感,不過又幾eye-catching嘅!除咗衣著,店舖裝修同餐牌都加入咗工程界元素,播嘅歌亦係八、九十年代經典歌,好耐冇喺商場聽到播哥哥嘅《追》喇,係好feel喎!老闆開舖唔係為咗gimmick㗎,佢哋話因為屋企人真係做過職安真漢子,所以想藉住開店向各位辛勞工作嘅真漢子致敬咁話! 除咗造型同埋舖頭氣氛夠晒貼地盞鬼之外,餐牌上嘅每一樣食物都有一個度身訂造嘅名堂!啲名無厘頭到令小編落order嘅時候都大翻白眼,我想要……「幾粒蛋蛋」,點講得出口呀大佬!大碌話佢哋係睇周星馳大嘅,非常鍾意嗰種「無厘頭」嘅幽默感!當小編問佢覺得邊個名改得最好嘅時候,佢話:「其實每個都好有心機改㗎喎,『1條蟹柳』囉,因為佢個名叫『1條蟹柳』,但其實係有2條㗎!」然後小編沉默了……好爛呀! 麻辣湯底用豬骨湯做底,加咗好多辣椒同多款香料熬足4個鐘,行近啲廚房都聞到麻味十足呀。 辣度分為6級,由「初生嬰兒辣」到最辣嘅「魔鬼辣」。小編唔太食得辣,穩陣啲叫咗小辣。今次總共試咗4款食物,分別係食神唐牛(HKD8)、滑嘟嘟雞(HKD10)、麻甩老肚(HKD10)同埋幾粒蛋蛋(HKD8)。 首先講吓麻辣老肚先!大家見到牛肚坑紋內有大量花椒狀物體?見到咁其實小編心裡面怯咗怯,好驚爆菊花呀!食第一啖覺得麻味比辣味重,雖然望落紅噹噹,但其實辣味絕對接受到嘅,不過麻味就幾重,食咗兩嚿個嘴都痺埋,幾過癮嘅。牛肚質地唔韌,10蚊值得一試! 另外呢幾粒蛋蛋呢,可以歸類為大魚蛋類別,8蚊3粒價錢其實都好OK啦!食落唔算好爽口,但魚蛋意外地入味,抵食之選。食神唐牛用嘅係滑牛,即係滑蛋牛肉飯嗰隻滑牛呢!食落都入味嘅,幾蚊食到串牛其實性價比算高啦! 最後呢個滑嘟嘟雞係小編最欣賞嘅,真係好滑,滑過小編隻手仔!雞肉食落唔嚡有咬口,加埋陣陣麻香真係口水都流埋呀!鍾意食雞串嘅朋友必食呀! 除咗單點之外,仲有提供抵食套餐俾大家選擇。不過餐名就真係……少啲勇氣都講唔出口呀!呢個刻骨銘心初戀金銀情侶套餐,33蚊可以食到2串8蚊、2串10蚊嘅麻辣串,抵啦! 除咗食辣嘅人鍾意之外,相信鍾意「周星馳式幽默」嘅人亦會好buy。小編見到無論係學生、師奶定上班族都俾熱情嘅大碌溶化呀,大家路過被「調戲」時本來冇乜表情嘅臉上,突然出現害羞嘅笑容,令街坊們嘅關係瞬間變得超融洽!同大碌傾傾吓先知原來佢本身係體育老師,唔怪得身形咁fit啦,佢話其實開舖大計喺心入面籌劃咗好耐,「都係夢想嚟嘅,兩兄弟有間屬於自己嘅舖頭。」喺葵廣著住反光衣實現夢想呢件事,真係貼地又浪漫喎! 麻辣真漢子 地址:葵芳葵富路7號葵涌廣場3樓Top世界3069號T7號舖 電話:從缺 營業時間:星期二至日:12:00-22:00

0

【孖Deliveroo簽約合作 台式小店「請坐」真.復活】食焦

一直好得網民歡心嘅台式小店請坐,近日有好消息公佈。兩位台灣媽媽上月尾已經喺自家專頁出po,留言「尖叫聲!某英國企業看見我和T的外型及臉書人氣與故事,在幾個月的討論後,正式和我們簽約。其實我們連自己都不敢相信會有這麼一天。」粉絲知道喜訊都留言恭喜!等咗幾日,終於揭曉,原來係同外送App Deliveroo合作! 兩位台灣媽媽今次會喺中央廚房戶戶小廚炮製食物,由Deliveroo外送,暫時服務地區只限銅鑼灣、灣仔同金鐘!粉絲當然即刻支持,仲po埋相出嚟話終於可以食返台灣媽媽嘅味道喇!而兩位媽媽仲隱約透露埋另一個好消息,就係實體店已經準備中,好快面世,至於地點喺邊?好多人都估會唔會開返喺西環! 其實當兩位台灣媽媽宣佈會同一間英國企業合作,仲未開估係Deliveroo之前,有唔少粉絲都有留言提醒佢哋今次簽約要睇清睇楚先好,唔好再好似上次咁易信人,最後累埋自己,搞到要停業!講返少少歷史,上次為咩要停業?長話短說,就係兩位台灣媽媽疑似遭到另一位股東侵股,又攞埋請坐個商標,俾人喺尖沙咀開咗間A貨請坐……最後兩位媽媽將西環店無奈停業。 兩位台灣媽媽嫁到香港17年時間,由最早期嘅小店「吃什麽」、到西環「請坐」,再到獲米芝蓮美食推介,然後爆出停業風波,期間真係一步一腳印!今次俾Deliveroo睇中合作外賣服務,據兩位媽媽所講,原來係多得一個熟客牽線,呢位熟客就係Deliveroo嘅員工,全靠佢向老闆講咗「請坐」故事而成功拉線!依家難得「復活」,大家有機會食返媽媽味道嘅蛋餅同魯肉飯啦,下一步,梗係盡快開新店,請大家坐坐啦!

0

【品味凡間美點!暢遊梵高主題餐廳】凡高廚房

日做夜做無時間接受藝術嘅薰陶?小編今次帶你去凡高廚房,等你可以一次過享受藝術同美食!凡高廚房以梵高名畫「夜間咖啡店」為主題,像真度都幾高㗎!你可以喺入面一邊欣賞名畫,一邊品嚐美食,仲可以享受精緻嘅意大利菜餚添! 梵高「夜間咖啡店」 室內佈置係咪真係同原作好似呢?用色同佈置都似到十足十,紅色牆仲畫上燈泡,認真抵死! 餐廳環境舒適,仲掛上唔少梵高嘅畫作,仿如入咗梵高世界一樣。 一份行政套餐包括前菜凱撒沙律、湯、主菜同埋甜品,根據主菜決定價錢。小編首先介紹一下大受好評嘅餐湯98%磨菇忌廉湯,之所以叫做98%係因為裡面有8種蘑菇,蘑菇有片狀、粒狀同塊狀,每一啖都飲到豐富質感。所選蘑菇類仲有松露、牛肝菌等等8種,味道非常香濃。除咗以多種蘑菇炮製,仲混合上湯同忌廉一齊煮,配以黑椒同香草調味,飲落散發陣陣香氣。因為豐富足料、湯底濃厚,所以湯的質感比較濃厚,比較杰,咁正一定要試試! 食羊最怕有羊羶味!但呢道招牌炭燒澳洲新鮮羊架配羊肉濃汁(套餐價HKD178),肉質嫩滑軟腍,唔駛點任何薄荷醬入口都可以,仲一啲都唔羶。食落羊肉會滲出肉汁,碟上附有嘅濃汁都係由羊肉烹製而成,比起一般燒汁或燒烤醬,醬汁濃郁又帶有甘香,令每啖羊肉食落都更加肥美、味道更突出。伴碟嘅薯角非常香脆,先炸後焗,食落外脆內軟,如果蘸上羊肉醬汁更加惹味甘香。 心太軟好常見,但係質素參差,一係就蛋糕太厚,一係就唔夠流心,好難搵到超好食。但係呢度嘅心太軟真係好有水準,一切落去朱古力漿慢慢流出嚟,同時散發出香甜嘅朱古力味出嚟,非常誘惑!蛋糕烤焗時間剛剛好,朱古力蛋糕外層鬆軟但有一定韌度,切落唔容易變形,仲可以保持美感!餐廳嘅心太軟用黑朱古力製成,味道苦中帶甜,陣陣回甘。唔鍾意苦味嘅朋友可以混和雲尼拿雪糕慢慢食,入口更軟滑香甜。 凡高廚房 地址:銅鑼灣軒尼詩道451-457號勝華樓2樓B室 電話:3528 1333 營業時間:星期一至日:12:00-23:00