Tagged: 老字號

0

【尖鼻咀遊車河觀鳥睇日落 流浮山老字號歎海鮮】Local自駕遊

揸車想去啲遠離煩囂嘅地方?香港秘景之一嘅后海灣你去咗未呢?鄰近米埔嘅尖鼻咀左右兩邊有唔同景色,今次就一路向左出發,帶大家觀鳥睇日落,最後食埋海鮮再返屋企啦! 揸車入嚟嘅朋友可以喺唐夏寮附近泊車,然後沿路左右兩邊行吓。 如果喺地圖上沿海向右邊輞井圍行去元朗,會經過呢啲青蔥小道。 有啲人仲會專程嚟米埔后海灣拉姆薩爾濕地踩單車添。 如果向地圖沿左邊慢慢車行就會愈見愈多海景,甚至可以觀鳥㗎。 沿路去到流浮山,未食海鮮之前當然去碼頭影張風味相先啦,蠔民會喺度曬蠔㗎!如果時間尚早,可以揸多十幾分鐘車去埋下白泥,之後先返嚟流浮山食海鮮。   流浮山掃海鮮 View this post on Instagram Local oysters by the HK border. Hong Kong delicacy #hkdelicacy #laufoushan #流浮山 #金蠔 #driedoyster #hkfoodie #hkfoodblogger #hkfoodlover #hkfood A post shared...

0

【太子老字號燒味名過於實 叉燒乾過柴味道死鹹】伏務台

小編最近留意到網上指一間喺太子嘅老字號燒味店永合隆飯店有勁多伏評,大多數網民都話啲叉燒乾到好似柴咁,仲瘦過瘦叉添。不過燒味又唔可以齋睇叉燒質素嘅,所以小編試埋佢哋其他燒味,睇吓係咪樣樣都咁伏。 永合隆飯店已經開業大約50年,但近幾年就多咗人話佢名過於實,淪為遊客打卡店。今次小編試咗兩款雙拼飯同一碗例湯,一共四款燒味嚟。 先試叉燒燒肉雙拼飯(HKD63), 就咁睇色澤模樣都幾正常 ,點知入口就出事喇……有陣似燒焦咗嘅燶味,食多兩嚿都有啲難入口;明明個樣唔似瘦叉,但口感仲乾過瘦叉。小編都向員工求證係咪特登用瘦叉嚟整叉燒?點知佢哋否認之餘,仲話係用最好嘅貨嚟整,小編都有啲愕然囉。 至於燒肉味道真係好鹹,而且冇揸勻啲鹽,局部位置極鹹添,食一嚿就要飲啖水嚟中和陣鹹味。而燒肉皮就好睇食客運氣,小編呢碟就有脆有唔脆。 乳豬切雞雙拼飯(HKD63)嘅乳豬同燒肉一樣都係死鹹。而且有一點令小編覺得佢幾冇heart,就係堂食都俾一包包嘅外賣乳豬醬,作為一間老字號燒味店,仲自稱專做燒乳豬,唔係連自家製乳豬醬都冇掛?!切雞雖然味道唔錯都算滑,但小編呢碟就瘦到得幾両肉咁,唔係好夠餸飯囉。 最後唯一唔伏竟然係佢個例湯(HKD10),有料得嚟又清甜,轉行賣湯仲好喎。其實以呢度嘅價錢,可以去酒樓食個質素好啲,出品又穩定啲嘅燒味飯呀。   小編伏氣:3星(5星滿分) 入伏點:永合隆飯店 入伏價:叉燒燒肉雙拼飯(HKD63)、乳豬切雞雙拼飯(HKD63)、例湯(HKD10) 中伏by #MOMO 美術by #MOMO 攝影by #MOMO 《伏務台》歡迎各界報料。

0

【前DJ怒數唔尊重食客 鏞記$100燒鵝麵掀網戰】食焦

成百蚊食碗麵仲要食到一肚氣,今次就係為咗碗燒鵝麵喇!不過估唔到因為咁反而惹咗唔少網民惡言啫!前港台DJ何嘉麗喺自己專頁度出po,話去鏞記食燒鵝麵食到火都嚟,仲話「簡直覺得係俾鏞記羞辱!」,好激動呀! 究竟為乜咁嬲呢?就係話說叫咗碗100蚊嘅燒鵝麵,上到枱見到嘅燒鵝,鵝皮嘅唔同色明顯係來自唔同鵝,亦好明顯係師傅左一忽右一忽咁斬落嚟,拼拼砌砌咁上碟!「大佬,$100,你可能覺得唔係乜嘢錢,但係都請你尊重下我,俾返舊齊齊整整嘅肉我啦!」仲曲線咁讚師傅喎,「大大細細切頭切尾都可以砌到咁靚,,師傅刀法真係神乎其技!」 呢個po一出就有網民話全行燒味佬都係咁切法喎,又話點解唔當場投訴要食完先po文出來呀……不過咁,留意返呢位前DJ嘅說法,「咁斬鵝就梗係拼砌㗎啦!你話。問題係呢啲擺到明就係啲肉頭肉尾,呢度一忽嗰度一片咁砌成!」佢話最氣頂嘅係咁樣做法好唔專重自己個老字號同埋食客喎! 搞到出埋新聞見埋報,鏞記發言人就對傳媒回應,話鏞記嘅燒鵝係以炭燒方法烹調,喺炭燒過程入面,即使同一隻鵝受熱程度都會唔一樣,燒鵝皮先有機會顏色唔同喎。而何嘉麗就似乎唔多接受呢個解釋喇,佢留言話「越解釋越亂」! 其實鏞記係老字號兼燒鵝出名唔使多講,不過亦有唔少人對佢評價有相反意見,覺得鏞記近年嘅水準每況愈下,加上伙記服務態度非常麻麻,喺呢個講求CP值嘅年代,鏞記連食老本嘅資格都無,有網民仲話近年去鏞記幫襯嘅好大部份已經係陸客喇!

0

【神枱級名店一定好食? 點評中環三大老字號】九記牛腩、蘭芳園、一樂燒鵝

中環有唔少老字號個名係好響,有啲仲係神枱級俾人讚到佢哋啲西多呀、麵呀、牛腩呀好食到天上有地下無咁!不過,好似係旅遊書介紹先講到咁好囉,現實係點?餓底們又未必咁睇喎!小編今次就試吓呢幾間所謂老字號名店係咪真係咁神啦,不出所料,期望愈大通常就……大家明啦! 九記牛腩出名嘅程度絕對係神枱級別喇,佢嘅裝潢仲好有港式老麵檔嘅味道,呢個相信亦係唔少遊客都慕名而來嘅原因之一。平日12點半開門,但係呢日小編12點鐘到,已經見到有人排緊隊喇,過咗15分鐘之後仲成條人龍添,好誇張呀! 嚟得九記點都要嗌返碗牛腩麵嘅,正如你去大X樂多數會食一哥焗豬一樣,梗係食佢最耍家嗰樣嘢啦!咖喱牛筋腩伊麵(HKD55),睇落去幾細碗吓,湯底呈啡紅色,浮晒啲油上面,感覺有少少唔開胃。雖然牛腩真係炆得幾腍嘅,不過碗嘢真係有啲太油、同埋分量太少喇,男士們食一碗應該係完全唔夠飽。 另外仲試埋呢個上湯牛腩河粉(HKD50),呢碗個湯頭幾好,味道適中,而且冇嗰種飲完味精湯會口渴嘅感覺。不過呢碗嘢同頭先嗰碗麵一樣咁細碗。兩者比較嘅話呢,小編就比較鍾意呢碗上湯牛腩河喇,原汁原味啲。總括嚟講,味道唔算差,又未至於會念念不忘又或者難食到想嘔,不過分量同埋等候嘅時間確實唔值$50一碗,重點係如果再遲啲嚟,最出名嘅牛腩有機會賣晒,如果你排完一大輪先知賣晒嘅話,真係嘥時間喇! 九記牛腩 地址:中環歌賦街21號地舖 電話:2850 5967 營業時間:星期一至六:12:30 – 22:30 蘭芳園亦係被大眾熱捧上天嘅小店之一,的確門口已經可以feel到一陣懷舊嘅港式風味,食正懷舊gimmick。呢間「鐵皮屋」夠晒特色呀! 一場嚟到點都要試吓最出名嘅豬扒包(HKD28)同埋西多士(HKD28)啦,睇落個豬扒包有少少單薄咁樣,成個包望落扁塌塌,唔多吸引喎!Size仲要勁細,仲細過小編隻手掌呀!不過「包不可以貌相」,可能食落會有驚喜呢?一啖咬落去之後,小編真係好想唱一句「我的天空今天有點灰!」。佢個麵包皮好硬,連塊肉都係偏硬,仲乾爭爭添呀!明明網上大受好評㗎喎……點解會咁㗎…… 至於西多士呢,起碼賣相唔錯,唔會炸到一嚿粉咁。加埋糖漿同牛油就fit喇,都炸得幾好嘅,幾crispy,係好正宗地道嘅西多士,完。 至於呢杯跟餐嘅熱奶茶(HKD4),真係令小編有啲詞窮喇,即係咁,佢擁有一杯奶茶應該有嘅嘢-奶同茶。但啲奶冇特別滑呀,個茶底又冇特別香,好普通嘅熱奶茶。不過如果大家閒日經過嘅話都不妨入去食個西多,畢竟呢啲老店喺香港都愈來愈少喇! 蘭芳園 地址:中環結志街2號 電話:2544 3895/2854 0731 營業時間:星期一至六:07:00 – 18:00 (星期日休息)   最後一站嚟到呢間連續幾年獲米芝蓮車胎人推介嘅一樂燒鵝,小編睇到網友對呢間一樂嘅評價十分兩極,所以專誠去試吓喇! 馳名燒鵝瀨粉盛惠HKD56,抵唔抵就真係見仁見智喇。其實食落都ok嘅,肉質唔會太老或太嚡,不過就比較細件啲,瀨粉嘅分量亦唔多;另外伙記們嘅態度就真係……有待改進喇!所以總括嚟講,小編係覺得唔太抵食嘅,不過如果真係好想試吓米芝蓮推介嘅燒味都可以試吓嘅! 一樂燒鵝 地址:中環士丹利街34-38號地舖 電話:2524 3882 營業時間:星期一至六:10:00-21:00;星期日及公眾假期:10:00-17:30   小編真心覺得以上呢三間舖頭都係名過於實嘅,不過佢哋至今仍然保留咗獨特嘅港式情懷同風味係無可否認。所以小編認為如果你想食佢哋個環境、打個卡,叫做食過吓神枱級名物係可以一戰嘅,但真心唔好抱太大期望喇!...

0

【中環老字號親民價 20蚊一碗足料雲吞麵】平霸

平霸食啲咩?今次小編就搵到呢間位於中環嘅老字號權記雲吞麵。街坊由細食到大,十蚊食到依家廿蚊碗,水準都一樣可以保持不變,咁犀利,小編點可以唔試吓呢? 雲吞麵(HKD20)上菜速度好快手,叫完唔使一分鐘就有,果然係香港特色,夠晒快呀!就咁睇,啲雲吞真係有乒乓波咁大粒,若隱若現都見到啲蝦肉㗎,而且都幾大碗,好似唔錯喎! 味道方面,小編覺得麵嘅鹼水味唔算好重,食落都彈牙,仲食到小編「嗦嗦」聲,不過放耐咗就會有少少淋,但都OK啦!雲吞入面嘅餡真係好足料,起碼都有成兩隻蝦肉同豬肉粒,香滑又多汁,個皮都好薄,20蚊嚟講仲要喺中環位置,好高質喇! 平霸小評:今次又成功食到正嘢,小編俾3個心心權記啦!呢度嘅雲吞麵的確又平又好食,不過都係嗰句啦,小編覺得服務態度大過一切,嗰日去到,店員對小編嘅態度非常惡劣,所以就算啲野幾好食,態度差嘅就大扣分囉!會唔會encore?都會嘅,不過希望下次時運高啲,唔好遇到呢位惡阿姐喇!唔該晒! 權記雲吞麵 地址:中環卑利街2號地下

0

【無懼世事變改 新舊香港牌子大集匯】PMQ世代同撈@Mart Box

舊時代產物總係令人心動,雖然未必及得上今日嘅科技方便,但係無咗昔日嘅努力同奮鬥,就無辦法開啟新世代生活。唔想往昔生活文化被時日淘汰,將手藝代代相傳並喺傳統之中尋求創新,新舊共存先至夠「襟撈」。6月28日至7月2日期間,PMQ元創方會舉辦懷舊與創新共融「世代同撈@Mart Box」市集,集結咗大約30個攤檔,提供衣、食、住、行元素,其中包括廣為人熟悉嘅傳統品牌:好似紅A、坤記竹昇麵,仲有創新Crossover例如:雙妹嚜 x Artisense、公利蔗汁 x 麥氏手工啤等等!傳統同創新一次過體驗得到,一齊向默默推動香港發展嘅傳統品牌致敬! 去市集梗係要邊食邊玩,老字號「公利蔗汁」,將會聯同由80後創立嘅本地薑手工啤酒品牌「麥氏釀酒廠」,以家傳古法製作嘅公利蔗汁創出公利蔗汁手工啤酒,百分百本地精釀同埋活動限定㗎! 榮獲米芝蓮推介嘅「坤記竹昇麵」就會同英國地道傳統脆豬皮小食「Mr. Porky」合作,以脆豬皮碎製成脆豬皮竹昇麵,夠晒特別呀! 重現七、八十年代香港情懷嘅「美樂士多」亦都會帶嚟各式各樣經典零食同小玩意,同本地手工雪條品牌「NICE POPS」合作推出多款懷舊口味雪條,齊齊緬懷兒時食雪條嘅美好時光。仲有唔少小學雞都識嘅「阿波羅Appolo」會同藝人欣宜嘅「Homie Cookies」曲奇品牌合作推出不同口味嘅雪糕三文治,勁多品牌大集合,為炎炎夏日降降溫! 除咗食之外,仲有陪伴香港人已經超過一個世紀嘅「雙妹嚜」仲會同新晉香水品牌「Artisenses」合辦香水工作坊,教大家以「雙妹嚜」產品創製個人風格香水產品,整出真正屬於自己嘅氣味添。 本地品牌「紅A」亦都會將展現好多深入民心嘅塑膠擺設,更會以經典紅A水桶製作拋豆袋過三關小遊戲,啲童年回憶即刻返晒嚟呀!唔止呀,佢仲會以副線CreA帶嚟設計新穎嘅塑膠產品,現場仲會大送「紅A」特製限量塑膠卡片套添! 有得食、有野睇、有野買,更加重要嘅梗係打卡啦!現場會有美樂懷舊甲蟲車比大家大影特影。仲會將迷你貨櫃變埋懷舊照相館,佈置成七、八十年代懷舊公屋背景,大家可以盡情影相,記錄舊日香港情!另外,現場仲設有攝影黑房,如果想知多啲黑房運作,試下自己曬相就唔好錯過喇! PMQ 世代同撈@Mart Box 日期:2017年6月28日至7月2日 時間:6月28日:16:00-21:00 6月29日至7月2日:12:00-21:00 地點:中環鴨巴甸街35號PMQ元創方地面廣場