Tagged: 老闆娘

0

【荃灣街市老闆娘米線朝聖 香濃蟲草花湯你試過未?】街霸

話說街霸一直都係米線控,最近終於去咗荃灣香車街街市入面好出名嘅老闆娘米線朝聖!呢間店可以話係米線界嘅名牌,成日大排長龍就預咗,連夏天都照喺冇冷氣嘅店外排排坐大汗疊細汗咁等先誇張嘛,咁值得大家等餐飽先食到應該係有料到嘅! 呢個熟食中心同之前去過嗰幾間唔同,平日4-5點一啲都唔旺,好多舖頭都冇開門,顯得有啲冷清……另外提醒返先,呢排天氣太熱,所以老闆娘米線嘅營業時間由平時嘅12:00-22:00變成17:00-22:00,大家唔好摸門釘呀! 去到嘅時候會有員工俾張點餐紙你揀自己想要嘅湯底同餸,一個餸加米線42蚊起跳,加一個餸就盛惠10蚊。如果嗌特別啲嘅湯底例如蟲草花薑酒湯底加雞/牛/豬就要50蚊喇! 蟲草花薑酒米線+雞肉(HKD50)碗米線一嚟到就聞到好香嘅蟲草花味喇,不過望落又好似冇乜料到咁。點知原來寶物尋歸底呀,睇吓幾多蟲草花!湯底味道濃郁,有明顯嘅酒味,味道聞落去有少少似花雕雞嗰種帶點清香嘅酒味,唔錯唔錯! 蒙古湯米線+招牌酥炸雞球(HKD42)街霸喺好奇心驅使下嗌咗碗蒙古湯米線,再加咗個招牌酥炸雞球!蒙古湯一嚟到就聞到好強烈嘅孜然味,孜然係一種香料,通常用嚟辟走肉腥味嘅。好少見到會用嚟做湯底,真係幾特別喎!原來蒙古火鍋好多時都會有孜然湯底,原因係孜然有祛寒祛濕同埋開胃嘅功效,深得蒙古人喜愛㗎!湯底香而不鹹,風味十足,值得一試嘅。 食米線嘅餸通常都同車仔麵差唔多,都係蘿蔔呀豬腸呀咁,不過唔講唔知呀,老闆娘呢度炸物係好有名㗎!我見到差唔多一人一碟炸雞球,咁就梗係唔執輸嗌埋一份啦!一份雞球有4大嚿,皮炸得好香脆,一啲都唔硬。咬落去仲非常juicy,肉嫩多汁,完勝好多韓式炸雞喎! 米線價錢雖然唔算好平,但分量絕對對得住個價錢,米線同餸嘅分量多到小編有啲嚇親,食到肚都脹埋先KO咋!米線迷咪錯過喇!   街霸最愛:今集有雙冠軍呀!我覺得蟲草花薑酒湯米線同埋炸雞球都非常好食,強烈推薦大家去試呀!不過要留意營業時間喇,由於係小店經營嘅關係,營業時間經常會有變動㗎!好似呢排老闆娘就貼出告示,話因為天氣太熱,所以5點先開舖呀! 老闆娘米線 地址:荃灣曹公街8號香車街熟食中心3樓28-29號舖 電話:9842 1971 營業時間:星期一至二:17:00-22:00;星期四至日:17:00-22:00(請留意官方Facebook)

0

【元朗韓食店列三不准 阿朱媽老闆霸氣得個樣】食焦

國有國法、家有家規,咁食店又如何?有時一樣規矩多多㗎!最近就有網民喺食在元朗群組度po咗張「三不准」嘅相,寫明不准玩電話、不准食剩同埋不准未齊人入座。原来係出自元朗一間韓食小店嘅告示!其實呢間韓食店一向規矩多多,「阿朱媽」老闆娘仲成日俾人話惡聲惡氣添,不過知佢性格嘅街坊都話,其實「阿朱媽」得個樣! 所謂old news is so exciting,耐唔時就有網友開心大發現呢間名叫韓之美食嘅霸氣規矩,呢次出帖,依然引嚟好大迴響!有人認為唔准未齊人入座好合理吖,唔俾食剩都啱喎,但講到話唔准玩電話咯喎,對依家個個都要相機食先嘅香港人,真係好難接受到喇! 不過咁,被樓主稱爲「可能係全元朗最有性格嘅食店」嘅呢間韓之美食,原来都有唔少粉絲㗎!有網友話「阿朱媽」呢啲規矩已經好多年,最主要係唔想食客浪費食物,同埋真係可以好好咁享受一餐韓食,唔好淨係掛住玩電話啫!仲搞笑咁話有時試過俾「阿朱媽」作狀咁樣一嘢打落嚟個頭度添! 其實幾年前「阿朱媽」老闆娘已經因為呢條「三不准」喺網上爆紅,當時仲有傳媒去採訪過添!老闆娘話好多小朋友都已經冇嘢食,所以佢最唔主張食剩飯餸嘅,加上佢間舖啲韓食嘅分量唔算多,如果咁都要食剩就真係浪費食物咁話!睇嚟「阿朱媽」真係得個樣靠嚇,好似網友咁講係「唔識佢就嚇死、識佢就笑死!」 規矩多多會唔會少咗客?唔敢講!但係有網友就發現食店嘅價錢係呢幾年間都加咗唔少喎,就喺「三不准」告示下面就見到,炸醬麵要60蚊一碗囉!所以網友就話未必係規矩咁多搞到唔敢去,反而係個價錢囉!一日都係舖租累事呀!