Tagged: 肉餅

0

【肉餅哥潮推「新豬肉」素菜 蒸完再煎糖醋麻辣任揀】素學堂

大圍嘅肉餅哥小炒料理出名花款多多嘅肉餅,過往有有芝士肉餅、金沙蛋黃肉餅呢啲重口味款式。依家咁多人食素,肉餅哥都要跟上潮流步伐啦!今次肉餅哥小炒料理同Green Monday合作,選用年中引入香港嘅*新豬肉Omnipork,推出全新素肉餅,配合唔同嘅素小食,令素食者都可以大擦一餐。 肉餅可以配白飯、南瓜粥或米粉,如果加HKD2可以轉菜飯。小編就比較鍾意南瓜粥,清甜又潤喉啲。不過跟餐嘅是日餐湯有肉,所以素食者要小心喇。 幾款肉餅之中,蓮藕蒸新豬肉肉餅(HKD59)口感同真嘅最相似!新豬肉豆香味濃郁,因為用豌豆整成,口感有啲似麵筋,幾結實;混入大量蓮藕粒,非常清新爽口。 平時食中式肉餅通常都係蒸,不過先蒸後煎你又試過未呢?糖醋煎新豬肉肉餅(HKD59)先蒸6分鐘,然後再煎3分鐘左右至金黃色,外脆內滑。跟住淋糖醋汁,味道同口感似素咕嚕肉。質感有啲厚實,糖醋汁酸酸甜甜開胃,絕對會令你想食多幾碗飯。 麻辣香菇煎新豬肉肉餅(HKD59)主要用辣椒、香菇、甘荀絲同菜脯增加口感同提味。唔食得辣嘅朋友考慮清楚先好試,小編試完承受唔起,因為好易咬爆啲辣椒㗎!呢款肉餅冇醬汁,建議配南瓜粥或米粉會易入口啲。 另外都有小菜俾大家加料,芝士炸薯波(HKD28/6粒)將薯餅搓成波形包住芝士,香口又濃味,過足口癮。 前面嘅涼拌青瓜(HKD22)清爽多汁,最好係幫到解辣。 中間嘅芥香木耳(HKD22)好新鮮爽口。味道鹹中帶酸,再加埋芥末味慢慢滲出嚟都幾開胃。 後面嘅芥末四季豆(HKD20)嘅芥末味比芥香木耳強好多,完全滲晒入豆,非常攻鼻呀! *每100克“Omnipork新豬肉(純植物肉碎)”含1.5克飽和脂肪,與一般未經烹調的豬肉碎(瘦肉佔84%)#相比,“ Omnipork新豬肉”的熱量和飽和脂肪分別低65%和70%。(#參考資料:美國農業部營養資料庫)   肉餅哥小炒料理 地址:大圍美田路30號美林邨熟食亭5-8號 電話:9885 6225 營業時間:星期一至日:11:30 – 22:30

0

【32款肉餅你點揀?】肉餅哥小炒料理

肉餅比人感覺係再平凡不過嘅家常菜,而且來來去去都係果幾樣,無咩變化。小編發現荃灣有間小店叫做肉餅哥小炒料理,竟然可以做出變化無窮嘅肉餅,有多種口味,包你未食過。咁特別梗係要試一試啦! 好多人都係為食肉餅而來,全院滿座,男女老少咩年紀都有,證明舖頭有一定吸引力!原隻帆立貝黑松露肉餅(HKD99) 肉餅可以選擇煎或者蒸,小編選擇咗蒸,加咗(HKD2)揀油飯。未食已經聞到陣陣松露香氣,油飯混有少少香茅、斑蘭同黃薑,食落惹味但唔辣,仲粒粒分明。除咗表面灑上黑松露之外,肉餅裡面亦帶有一點點黑松露,十分足料!肉餅食起嚟軟腍香滑,又帶有黑松露陣陣香氣。另外帆立貝唔止大大粒一啲都唔腥,食落仲好鮮甜唔乾身!套餐有埋餐湯,如果加(HKD5)可以轉罐裝汽水。 流心芝士肉餅(HKD69)呢一個小編選擇煎,煎完嘅肉餅食落香脆而唔油膩。除咗肉餅表面有一塊芝士之外,肉餅裡面都有一塊,做到內裡柔滑嘅效果,未算流心不過好誘心,越食越想大大啖繼續食!飯方面,選擇咗加(HKD2)轉菜飯,菜飯軟硬適中,唔會太濕亦唔會太乾,食落感覺幾清新,仲可以中和一下煎肉餅嘅油膩感。 肉餅哥小炒料理 地址:荃灣聯仁街28號康睦庭園地下3號舖 電話:2886 8478 營業時間:星期一至日:11:30-16:00;18:00-22:00