Tagged: 肥仔文

0

【80後組隊開拉麵店圓夢 堅持自家製唔用現成貨】團日式拉麵

近年荃灣愈開愈多小店,競爭都幾大㗎!今日小編就去到一間由一班80後開嘅團日式拉麵,麵店雖小但五臟俱全!位置喺正楊屋道街市同Citywalk附近,人流都幾多㗎! 門口放咗一張長櫈俾客人等位用,隔離就係一部自助點餐機,完全仿效日本拉麵小店嘅做法,自助點麵機喺日本就見得多,今次都係小編第一次喺香港見到呢款機咋,都幾得意吖。 雖然係小店,但佢哋對自家拉麵嘅要求都好高㗎!事關小編同負責人閒談間講到,小店目前仲未定到邊日先係休息日,即係話樓面同廚房喺開業呢個幾月嚟完全冇放過假!太誇張了吧,聽到小編都嚇咗嚇,但望住廚房哥哥們喺連續一個月冇休假之下,竟然冇乜疲態?見到佢哋精神滿滿,盡心盡力做好每一碗麵嘅熱血模樣,小編真的滾動了……一問之下,原來冇時間休息同佢哋希望保持食物同服務質素有關,負責人話佢哋唔想請外人幫忙,樣樣都親力親為,一班大男孩目標一致咁為拉麵店仆心仆命真係超,熱,血,呀! 豬骨湯底每日新鮮熬製,一熬就要熬十個鐘,都咪話唔辛苦呀!所有配料例如炸蒜呀、櫻花蝦呀都係經自家調味同炒製而唔係用現成,每一樣都咁花時間同工夫。另外,店舖嘅拉麵有分直麵同曲麵,客人可隨喜好選擇。 櫻花蝦拉麵(HKD88)有海量嘅櫻花蝦,望到流口水喇,豚肉非常腍,入口幾乎唔使咬就溶喺口咁滯。湯底濃郁順喉,真係冇味精喎,至少小編冇食兩啖麵飲一啖水解渴先啦。呢個湯直頭係好飲㗎,可以好似日本人咁飲晒啲湯呢!小店人手有限,都堅持用真材實料熬湯,呢份堅持小編超欣賞呀! 黑蒜油拉麵(HKD83),同頭先碗櫻花蝦拉麵一樣,賣相好吸引,上至豚肉下至蔥花同埋紫菜嘅擺位都好講究,一啲都唔hea!黑蒜油嘅香味將濃郁嘅豬骨湯底變得更有層次,唔經唔覺飲晒碗湯!老闆仲話呢間舖就好似佢哋嘅親生仔咁,大家都自動波咁去做,目標又超一致。唔怪得今次小試牛刀就贏得大家嘅肯定啦! 差啲漏咗要頒一個「最佳配角獎」俾溏心蛋添!以一碗好嘅拉麵嚟講,如果湯底係驅幹、麵底係四肢,咁溏心蛋就應該係眼睛喇,畫龍點睛個睛呀!老闆話:「啲蛋我哋都唔係用現成㗎,係每日新鮮整,全人手剝殼,每日淨係剝蛋殼都要2-3個鐘呀,我哋廚房就淨係得2個人,所以真係好忙㗎,忙到成個月都冇真正嘅落場時間,每日都係12點開舖到夜晚10點收舖咁囉。」上至湯底下至一粒蛋都咁執著!大家下次去幫襯嘅時候真係要嗒真啲,「粒粒皆辛苦」㗎! 由於小店暫時未有水吧,所以賣嘅主要係一啲比較特色嘅日本牌子飲品,其中上圖有招財貓同埋不倒翁嘅飲品,飲完仲可以攞個樽嚟寫願望許願添!幾特別喎! 除咗以上介紹嘅兩種口味拉麵,仲有魚介拉麵(HKD80)同辛味拉麵(HKD85)!小編一路睇住製作過程,淥個麵、潷個湯、甚至灑個蔥花都好細心咁將每一個步驟做得完美。嗱,真係唔係賣廣告,小編見到碗麵上枱嘅時候,都深深感受到老闆們嘅熱血。呢班80後開店圓夢仲咁有熱誠,希望真係有發展空間啦,唔通真係開到周街都係「X千拉麵」好咩? 團日式拉麵 地址:荃灣大屋街18號金豐閣地下 電話:2488 2322 營業時間:星期一至日:12:00-15:30;18:00-22:30(詳情留意Facebook)  

0

【MOS BURGER騎呢意粉漢堡 意粉乾肉醬鹹夾硬嚟】伏務台

漢堡包唔用麵包可以用乜?好似麥記有時都翻生吓個「飯TASTIC」咁囉!而一直以「米漢堡」出名嘅MOS BURGER最近好有創意吓,出咗意粉漢堡喎!聽落伏味都真係幾濃,今次小編又出馬試吓伏唔伏啦,畢竟當年其實小編都幾鍾意食「飯TASTIC」㗎,唔知今次會唔會有驚喜呢! 今次小編叫咗意式肉醬牛肉意粉漢堡(HKD27),外觀同平時喺MOS BURGER食開嘅rice burger唔同,除咗一個用飯一個用粉之外,仲有本來rice burger嘅包身係由飯、香菇、薑片,再加豉油麻油壓製而成;而呢個肉醬意粉漢堡就係用傳統漢堡包嘅造法,包身只由兩餅白意粉充當,當中毫無調味料,今次意粉burger真係令人幾唔開胃! 愈睇就愈覺得呢個包有啲似寵物小精靈嗰隻蔓藤怪(下圖)…… 咬落第一啖呢,小編淨係食到齋意粉,因為肉醬喺入面嘅分佈非常唔平均,所以會出現咬一啖完全冇味,然後下一啖就鹹到嘔電嘅情況出現,伏呀!小編非常有衝動問店員攞隻叉,將佢好似肉醬意粉本人咁撈勻佢,咁應該會好啲啲……嘅。但基於尊重佢點都係一個漢堡……包,所以我就繼續食埋落去睇吓會唔會對佢改觀。 其實呢,食呢個包同食個肉醬漢堡闊條麵係冇乜分別,佢只係夾硬將麵變成一餅嘢咁,然後放pat醬同埋漢堡喺中間……感覺好滯之餘,口感仲好差。我相信如果喺餐廳食到呢個味道嘅肉醬意粉,嗰間嘢應該係會執笠嘅!意粉乾爭爭、肉醬鹹到震、漢堡薄切切……呢三樣主要材料好似完全唔關事咁,真係三權分立都冇佢分得咁開呀,依家係變到完,全,唔,Match!   小編伏氣:老老實實賣普通burger咪幾好囉,小編不嬲都幾鍾意食佢哋個北海道南瓜薯餅漢堡㗎!見佢哋有新嘢,雖然feel到伏味但點都試吓啦,點知伏到咁。除咗肉醬之外仲有凱撒沙律意粉漢堡㗎,小編真係想像唔到連鹹食都係咁,凱撒沙律有啲酸酸甜甜嘅醬會係咩味喇!小編今次俾10個伏,伏爆呀!大家下次去MOS BURGER都係食返啲正常嘢好喇! 入伏點:MOS BURGER全線分店 入伏價:意式肉醬牛肉意粉漢堡 HKD27   中伏by #肥仔文 美術by #MUI MUI 攝影by #肥仔文 《伏務台》星期一伏務大眾,歡迎各界報料。

0

【天瑞街市有條小食街 掃盡泰川台美食話咁易】街霸

上星期街霸同你去完大埔墟街市尋寶,今次去邊呢?「天水圍好似冇啖好食㗎喎!」,呢句嘢講真街霸成日都聽到,話晒天水圍咁多個商場輪住翻新,翻新完之後開晒啲連鎖貴餐廳,街坊真係冇咩選擇㗎!不過咁,街霸覺得大家可以試吓去天瑞街市出面嘅小食街度搵食,除咗有港式格仔餅、燒賣魚蛋之外,仲有四川嘢、泰國嘢同埋台灣手抓餅添!今次一於一個街市食勻幾國菜啦! 呢條小食街由晏晝2-3點開到凌晨1-2點㗎,取代咗以前不定期會喺天瑞輕鐵站隔離出現嘅小販檔咁喎!一字排開嘅小食店感覺都幾乾淨企理,不過大多數係小店經營,人手唔會太多,宵夜時段要排吓隊喇! 呢間泰好味顧名思義就係食泰國嘢,街霸見佢個餐牌都有幾多選擇嘅,除咗比較輕食嘅炸春卷、扎肉沙律之外,仲有炒金邊粉、冬蔭功套餐(包白飯)呀、椰汁糕呀咁,幾多選擇㗎。 街霸試咗呢個豬頸肉沙律(HKD40)喇,沙律嚟講好似有少少貴,但係你睇吓,勁足料呀!佢啲豬頸肉有種蜜糖烤過嘅微炭燒味,夠晒惹味。沙律除咗生菜之外仲配有蕃茄、紅蘿蔔絲同大蔥,味道帶酸甜,清新得嚟又中和到豬頸肉嘅油膩感,正呀!呢盒嘢兩個人些牙啱啱好,食完唔會太飽,又可以再掃過! 如果你同街霸一樣鍾意食辣嘢,四川嘢啱晒啦!川味軒上至涼拌豬耳下至麻辣燙都一應俱全,今次街霸就叫咗重慶酸辣粉(HKD22)同埋拍青瓜(HKD25),唔好睇少呢兩樣嘢,俗語都有話,最簡單嘅嘢往往係最考工夫嘅,係咪先? 街霸叫咗小辣,望落去唔算滿江紅咁樣,不過都清楚見到粒粒辣椒碎(定花椒?),粉係粗身嘅紅薯粉,同傷心酸辣粉嗰種一樣。飲落個湯唔會好重口味,但辣味都夠嘅!不過我諗如果平時食譚仔十小辣嘅朋友仔就可能要叫姨姨再輕手啲喇,因為佢個小辣都有啲啲分量嘅,你當5小辣咁上下啦。22蚊嚟講算幾大碗,女仔實夠飽!仲可以加餸添! 拍青瓜其實都算幾驚喜,因為街霸曾經喺啲連鎖舖頭食過,一係太油一係就冇乜味,但呢個拍青瓜配料都好多,面頭嘅黃金豆同蔥花多到睇唔到青瓜咁滯。將青瓜同底下嘅秘製辣油撈好之後嗰種酸辣味道真係好刺激嗅覺呀,正!青瓜超級爽口,辣味有層次,吞落肚嘅時候嗰種麻辣先慢慢滲出嚟,好過癮!鍾意食辣嘅朋友唔好錯過!同酸辣粉一樣,呢個拍青瓜嘅小辣都唔嘢少,大家因應自己食辣嘅程度執生喇! 如果想食啲冇咁heavy嘅嘢,可以選擇呢間賣台灣手抓餅嘅日日店,黃金餅底(HKD10)另外再加配料上去,分別有基本嘅芝士(HKD5)、煙肉(HKD5)、火腿(HKD5)、煙鴨胸(HKD5),另外仲有啲fusion選擇,例如煉奶肉鬆(HKD10),不過街霸今日就唔試啲咁「新奇」嘢喇,留返你哋試完話俾我知啦! 街霸試咗黃金手抓餅,加咗芝士同火腿。有少少蔥油味幾香口,仲夾住啲芝士醬,問返老闆先知,原來「黃金」就係指啲芝士醬。哎吔,早知就唔加芝士加過第二樣啦!不過唔緊要,試啖先。咦,芝士味果然好濃,咬落口都有啲拉絲嘅感覺,不過雙重芝士感覺有啲啲膩喇! 除咗以上三間,隔離仲有間賣港式魚蛋燒賣、印尼撈同埋糖水舖㗎,下次去開濕地公園記住喺天瑞站落車試吓喇! 街霸最愛:豬頸肉沙律毫無疑問係街霸心目中嘅no.1呀,料多又好食,食完想翻兜添呀!(不過真係有啲遠……) 泰好味 地址:天水圍天瑞邨街市T13號舖 電話:無 營業時間:不定 川味軒 地址:新界天水圍天瑞邨街市T64號 電話:無 營業時間:10:00-01:30 日日店 地址:新界天水圍天瑞邨街市T52號 電話:無 營業時間:不定

0

【紐約最紅漢堡店襲港 中環Chill住食包歎生啤】SHAKE SHACK

喺香港講起食漢堡包,我諗大家第一時間都會諗起親愛的老麥,不過如果你喺紐約嘅大街問途人,最具代表性嘅Burger shop就好大機會係SHAKE SHACK喇;而SHAKE SHACK喺5月1號就正式登陸中環ifc喇!小編當然要去試吓係咪真係咁有料到啦,話晒過江龍嘛! 客人點餐後可以選擇喺室內或者室外嘅平台花園用餐,環境真係唔錯㗎!食住burger歎杯生啤都咪話唔chill呀 ! 呢度嘅飲品除咗老少咸宜嘅奶昔之外,仲有多款香港牌子嘅生啤,當然唔少得佢哋招牌嘅Shack Meister Ale(HKD68)啦,帶有清新花香味,女仔飲啱晒! 主打梗係漢堡包啦,Shroom Buger(HKD66)將原隻大啡菇鮮炸,再夾埋生菜、蕃茄同秘製嘅Shack Sauce,一啖咬落去仲有芝士爆出嚟,超有驚喜呀!呢款係無肉漢堡,素食者都啱呀! Chick’n Shack(HKD56),呢款雞肉漢堡強調用100%純天然嘅走地雞,保證絕對不含激素同抗生素咁話喎,聽落都食得放心!雞肉炸完之後依然好juicy,鍾意食雞嘅朋友一試無妨呀! 嚟到Shake Shack當然非試不可佢哋最招牌嘅ShackBurger(HKD50/single beef)啦!夾喺中間嘅牛肉係100%全天然嘅安格斯牛,同雞肉漢堡一樣保證絕對冇加激素同抗生素。生菜、蕃茄加埋芝士嘅牛肉咬落超juicy,而且牛味十足,唔會好似平價快餐店賣嗰種紙皮咁嘅所謂牛肉! 美式漢堡店當然有多款milkshake坐鎮啦,除咗普通口味嘅concrete之外,仲有主廚特別為香港設計嘅Milk Tea Shake(HKD42),呢款淨係得香港分店先有㗎咋,喺紐約總店都飲唔到㗎!呢杯奶茶味奶昔飲落唔會太甜,雖然茶味唔算好出,但係對香港人嚟講絕對親切、對遊客嚟講亦係好「香港」特色嘅milkshake!大家記得要試吓喇! SHAKE SHACK 地址:中環金融街8號國際金融中心商場四樓平台4018號舖 電話:2522 5611 營業時間:星期一至日:11:00-23:00

0

【傅珮嘉夫妻檔台菜新店 必食香濃花雕牛肉麵】三星台菜食堂

台式食店愈開愈多,新鮮熱辣唔少得星級牛肉麵店,呢間係藝人傅珮嘉同佢位台灣老公Steven夫妻檔開嘅三星台菜食堂,上年7月銅鑼灣店事隔8年重開,最近喺灣仔就再開分店。「三星」一直係名牌,曾被蔡瀾大讚係「最正宗台灣牛肉麵」添,當然仲有一眾明星捧場客,黃秋生、黃偉文等都話正。今次灣仔分店更加大推新Menu! 灣仔店空間唔算好大,大概只容納到5-6枱客人。不過Steven就話雖然招呼唔到太多客人,但希望可以堅持每一碗麵都係用心炮製;佢亦話唔希望舖頭太大,出現應接不暇而粗製濫造嘅情況。 花雕牛肉麵(HKD82) 湯底香濃,花雕酒分量剛剛好,唔會搶去湯底味道。唔講唔知,原來花雕係紹興人傳統嘅「女兒酒」,據說紹興人會喺女兒出世後將一枝紹興酒埋下,直至女兒出嫁嗰時至拎返出嚟宴客,所以花雕酒代表陳年嘅紹興酒;如果係男丁就會埋下壯元紅,寓意希望兒子能夠高舉科第。 魯肉飯(大)(HKD42) 食落同台灣夜市食到嘅有啲相似,粒粒魯肉都肥瘦分明,唔會有一嚿特別肥一嚿特別瘦咁。醬汁同配料嘅配搭比較清爽,唔會食完一口油。紅色嘅係台灣紅豆支,香港唔係咁興,不過台灣就習慣用佢加喺魯肉飯入面去膩,豆支同醃黃瓜中和返魯肉飯嘅油份,咁就唔驚食完好滯啦,仲可以食多個蛋餅添! 酸菜牛肉蛋餅(HKD38) 講到台灣人嘅早餐就不得不提蛋餅喇,每次小編去台灣都會特登早啲起身去早餐店度買蛋餅㗎。不過台灣嘅蛋餅通常係加火腿呀芝士咁,好少見到成嚿牛肉麵嘅牛肉擺落去喎!原來「三星」賣嘅蛋餅除咗有自選配料之外仲有3款「三星限定」蛋餅。酸菜牛肉夾落蛋餅入面有少少似墨西哥餡餅嘅感覺,啖啖肉好滿足! 花生醬Nutella蛋餅(HKD38) 係三款自家創蛋餅中唯一一款甜食,Nutella加花生醬呢個配搭真係夠晒邪惡呀,飯後如果有少少唔夠飽嘅話食埋呢個真係超滿足!   三星台菜食堂 地址:灣仔廈門街7號A地舖 電話:2882 0400 營業時間:星期一至日:08:00-22:00

0

【手撕雞專門店好唔pro 雞絲冇撕腸粉嚡過樹皮】伏務台

自從大圍間華輝小食賣手撕雞腸粉出晒名之後,唔少小店都相繼推出唔同口味嘅手撕雞腸粉,有辣有唔辣,任君選擇。小編就留意到紅磡呢排新開咗間御瓏餃子手撕雞專門店,聽個名好似好pro咁喎,咁要實測吓啦!地址呢,明明就寫紅磡,其實近黃埔站多啲㗎!如果喺紅磡落車要行成15-20分鐘左右!留意返吖! 位置喺條橫街,隔離仲有間賣burger嘅舖頭。平日下午人流唔算多,好多人行過都係得個望字,咁小編就決定身先士卒帶旺佢個場啦! 叫得手撕雞專門店,餐牌上嘅第一位就係呢個芝麻手撕雞腸粉(HKD30),睇張相都幾大份吖,好似幾抵喎!另外為食嘅小編就想試埋佢個紅豆燒餅(HKD10)喇,因為喺其他小店唔算成日見到。 舖頭不設座位嘅,所以小編買完之後就喺附近搵個位坐低慢慢歎喇!一打開手撕雞腸粉都幾香嘅,但就唔係我expect嗰種味道囉!佢傳嚟一陣濃烈嘅花生醬味,小編即刻睇返佢張外賣紙啦,咦,我仲以為我記錯,佢明明係寫芝麻醬㗎喎!唔通芝麻香聞落去聞唔出? 以為芝麻味會重啲,點知花生醬極重手喎!其實我平時都幾鍾意食花生醬,但呢個花生醬吞入喉嗰吓有啲苦澀同「確喉」感覺。再摷吓底睇吓仲有冇其他調味料啦,發現原來仲有豉油㗎!所以佢個調味料就係平時我哋腸粉嘅走辣走甜醬,淨係得花生醬同埋豉油咁囉!而且我不得不說,佢個腸粉真係世界級咁厚同嚡!好似食緊一嚿粉團咁,真心唔知自己食緊咩!同埋啲手撕雞就撕得過份粗條,正確講可能係冇撕過添!加上一啲雞油都冇,同啲腸粉一樣咁乾爭爭同嚡。總之一個字,伏! 食完令人驚豔花生醬手撕雞腸粉之後,就試吓紅豆燒餅啦!聞落去個味幾吸引嘅,不過都要真正試落口先知咩料嘅。 唔,呢個反而有啲驚喜喎!雖然佢真係有啲油,但熱辣辣食落口煙煙韌韌好QQ,甜度亦足夠。成個燒餅嘅味道有啲似高力豆沙咁,比起頭先個花生醬手撕雞真係唔錯嘅!唯一唔好嘅地方就係太油喇,兩張索油紙索爆晒都仲食到成口油咁,不過呢個都算合格啦。   小編伏氣:其實如果佢唔係自稱手撕雞專門店嘅話,可能我都只會覺得佢唔好食,但既然佢有信心話自己係專門店,咁我就有理由相信佢係整手撕雞方面嘅專家啦係咪?但佢個雞唔夠手撕之餘,仲要又嚡又乾仲要撈埋花生醬…..咁冇辦法唔為佢冠上伏食之名喇! 芝麻手撕雞腸粉 入伏點:御瓏餃子手撕雞專門店 入伏價:HKD30 紅豆燒餅 入伏點:御瓏餃子手撕雞專門店 入伏價:HKD10 中伏by #肥仔文 美術by #mui mui 攝影by #肥仔文 《伏務台》星期一伏務大眾,歡迎各界報料。

0

【中村藤吉$80套餐唔掂 飯糰怪味麵豉湯冇味】伏務台

抹茶嘢一向受歡迎,凡係新出抹茶乜乜乜,抹茶控就一窩蜂咁衝。今次小編就去咗金鐘太古廣場嘅京都過江名店中村藤吉,之前網友已經話佢啲雪糕好食,不過啲熱食就冇乜好評喇!好,小編決定試吓金鐘店限定嘅丸十茶香飯糰套餐啦,套餐總共有4款可以選擇,有兩款唔同口味嘅飯團,如果想要食齊飯糰、麵豉湯、茶類同抹茶啫喱,就要點最貴嗰個「月」餐試喇!橫掂都係,小編就點咗呢個喇! 由於舖頭比較細,基本上只for外賣嘅,尖沙咀店先有堂食嘅甜品供應囉!除咗雪糕同埋飯糰套餐之外,呢度仲有啲茶葉、茶包嘅套餐可以買返屋企慢慢沖,另外仲有賣啲抹茶副產品,例如抹茶朱古力同抹茶蛋糕等等。 丸十茶香飯糰套餐「月」(HKD80),包括抹茶鹽煎茶山椒魚乾海苔飯糰(嘩,好似好足料咁喎)、一杯自選茶(中村茶、覆蓋茶、玄米茶、煎茶、煎茶莖茶同埋莖焙茶)、迷你抹茶啫喱、同埋一碗本田麵豉湯。買完之後店員問使唔使幫我泡茶,定係我自己拎茶包返去再沖嘅時候我先驚覺,原來套餐包嗰杯茶係茶包嚟㗎……呢個價錢但飲茶包茶?小編表示有啲失望囉! 呢個抹茶鹽茶山椒魚乾海苔飯糰,個名就夠晒長同埋好有gimmick咁喇,但係一打開張包裝紙,點解成個飯糰都係得啲一點點似調味料嘅嘢,當初小編仲天真地以為咬落去中間可能會有餡啦,諗住起碼都有一兩條魚乾仔食到啩,點知呢,原來係一個山椒魚乾海苔碎嘅飯團,即係呢,就算你咬幾入想搵吓有冇魚乾本人呢,都係搵唔到㗎!感覺就好似食鰻魚手卷,你梗係expect有原條鰻魚啦係咪?點知打開原來得幾粒仔鰻魚咁失望囉!同埋好老實講,飯糰味道係有少少怪嘅,淡味得嚟又有陣煎茶味,另外有一兩啖咬到係有少少辣辣哋,但同整體嗰種淡淡嘅茶味完全唔match,亦食唔出有魚乾喺入面!簡單啲講,冇,下,次! 至於呢個麵豉湯嘅賣相同我哋一般飲開嘅都有啲出入,面浮起嗰幾嚿發晒脹嘅嘢,我都唔知點形容好,個樣真係好伏囉!聞落去唔係好覺有麵豉味,等我撩吓裡面有咩材料先! 其實佢有兩款可以揀嘅,分別有腐皮同豆腐,我就揀咗豆腐。咁佢都有幾嚿豆腐同埋嗰啲發晒脹嘅……腐皮?其實佢發脹到我都唔係好分到佢係咩嚟,有啲似豆卜類嘅嘢啦,但就冇平時飲麵豉湯會有嗰啲海帶喇,同埋個麵豉湯竟然完,全,冇,麵豉味。小編飲到頭都側埋,開頭以為係自己未攪勻啦,但攪極都係咁喎! 經歷完頭先嗰兩款伏食,我對享負盛名嘅抹茶啫喱都開始有啲懷疑喇!佢將底層嘅啫喱同topping嘅抹茶蓉同埋丸子分開咗,應該係出於外帶食品品質保證嘅考慮嚟嘅,呢點算係幾貼心。咁我就先將佢哋撈返埋一齊先。 試吓嚿啫喱先,咦,係幾爽滑嘅,但就冇甜味,只有綠茶嘅甘香味。將啫喱同抹茶蓉撈勻後就覺得味道剛剛好,抹茶蓉嘅甜味同埋啫喱本身嘅茶甘味都真係幾夾。試埋粒丸子,食丸子最驚就係佢極黐牙又淋坺坺咁。好在呢次算得上係好食,煙韌得嚟唔黐牙!好啦,招牌抹茶啫喱總算交足貨! 甜品都食埋,係時候飲埋杯茶喇。小編揀咗呢個莖焙茶,用熱水浸泡嘅茶呈黑色,顏色望落感覺「好蓉」。飲落口第一啖都幾順口,但吞嘅時候就有一種澀味湧出嚟。呢款茶俾我嘅感覺就唔太好,一來是茶包茶,二來佢澀得嚟完全冇嗰種解膩感覺,又唔似綠茶有種清爽感,感覺就係單純嘅澀。如果大家真係要試唔該揀吓其他喇,仲有5款可以試嘅,好飲記住話俾小編知!   小編伏氣:其實80蚊食個飯糰仔真係連女仔都唔係好飽,即使想貪得意試吓都可免則免喇!反而試完呢個set我比較對佢哋嘅甜品有信心,起碼抹茶啫喱我係懷住愉快嘅心情食完㗎!真係寧願佢哋專心啲,淨係做抹茶甜品算喇! 丸十茶香飯團套餐「月」 入伏點:中村藤吉金鐘店 入伏價:HKD80 中伏by #肥仔文 美術by #mui mui 攝影by #肥仔文 《伏務台》星期一伏務大眾,歡迎各界報料。

0

【國產皇帝鮑韌過擦紙膠 味道唔合格腥味100分】伏務台

話說前排新年收到啲禮盒都清得七七八八,但竟然俾小編喺廚房發現到一罐罐頭鮑魚喎!地上執到寶?咁我就諗住自私食咗當做下午茶啦,點知就因為貪心而又中伏鳥……(今次係抵死嘅!)。 介紹返先,就係呢一罐皇帝鮑(HKD58)。就咁睇落同一般罐頭鮑魚冇乜分別,頂多係個罐身設計比較樸素啲,冇平時嗰啲乜乜乜頂級鮑魚咁華麗嘅包裝。 雖然係罐頭鮑,但為咗尊重佢身為鮑魚嘅身份,小編將佢隔水加熱再慢慢歎。不過時間就喺我拉開鐵蓋嘅一刻靜止咗……點解會有陣腥味,仲有啲酸酸餿餿喎!開頭以為係我聞錯,但再索多兩索,陣味越嚟越難頂呀!小編當時心諗唔開都開咗,可能食落口會好味啲呢?(你估臭豆腐咩!)。 正所謂,無論黑鮑白鮑,只要放得落口都算係一隻好鮑。可惜今次小編真係投降喇!我食,唔,落,呀!點解真係咁腥㗎?真係同想像中嘅罐頭鮑魚完全唔一樣,食到入口就似係食咗好腥嘅擦紙膠咁,仲要啲汁完全唔似鮑汁,無厘味道!唔通呢個就係上天俾自私食嘅人嘅懲罰? 雖然一罐得六小隻,但小編食完半隻之後真係冇辦法,惟有周圍請(呃)同事幫手食咗佢啦!(我認我無賴),個個以為有好嘢食衝晒埋嚟,但食完之後個樣好似食咗嚿X咁……不過正所謂鹹魚白菜各有所好,有同事食完之後又話ok喎,仲連汁都清埋添!   小編伏氣:真係從來冇食過咁伏嘅鮑魚,腥味100分,真係食硬膠鮑片都好過食佢!好彩冇唔知頭唔知路買嚟送禮,真係唔小心送伏俾人都唔知呀!   皇帝鮑(紅燒鮑魚味) 入伏點:各大超市 入伏價:HKD58 中伏by #肥仔文 美術by #mui mui 攝影by #肥仔文 《伏務台》星期一伏務大眾,歡迎各界報料。    

0

【搶試Taste of Hong Kong菜單 精選中西日驚喜餐廳】Okra、都爹利會館、Caprice

美食節又嚟喇!今次輪到第三年舉行嘅Taste of Hong Kong,今個月22-25日喺中環海濱活動空間舉行。為期4日嘅美食節,齊集全港頂級廚師,食家們可以一飽口福啦!小編日前就率先去咗Taste of Hong Kong嘅「菜前預習」,有3間分別主打中、西、日料理嘅餐廳。原來今年有份參加Taste of Hong Kong嘅餐廳,都會為美食節設計出幾道「期間限定」菜式,平時係食唔到㗎!做定呢3間餐廳功課,到時就識得搵食啦! 西環嘅日式餐廳Okra Hong Kong,入面幾位主廚同侍應都係外國人。 餐廳有兩層,上層是Dining room、下層則設有幾張高枱及吧枱供食客使用。 Dry Aged Pompano Nanbanzuke(HKD100) 由於主理這道菜嘅主廚係外國人,所以菜式並冇官方中文譯名。如果要直譯嘅話,就叫佢「風乾鯧魚漬物」囉!食落口完全唔似食緊魚,味道酸甜、質感有啲爽脆,相當開胃。 Okra同卅二公館合作嘅點心三寶(HKD100),分別有風乾鯧魚燒賣、腰果煎堆同埋羊肉千層酥。燒賣入面有流心嘅鵪鶉蛋,連廚師一齊試食嘅時候都唔小心噴到周圍都係呀!小編本身唔係好食羊肉,不過呢個羊肉千層酥食落口完全唔羶,相當美味。 Okra Hong Kong 地址:西環西營盤皇后大道西110號地舖 電話:3954 5381 營業時間:星期一至二:16:00-23:00;星期三至五:16:00-23:30;星期六:18:00-00:00 另一間係中環嘅中菜名店都爹利會館。餐廳裝潢以西式風格為主,環境闊落舒適,設有會客廳及貴賓房,同三五知己嚟食就最寫意喇!唔講唔知,雖然都爹利會館係一間中菜館,但佢最出名嘅竟然係創新嘅cocktail,大家有興趣嘅話可以喺美食節舉行嘅時候試吓! 都爹利龍皇餃(HKD90) 呢款點心用咗新鮮本地乳龍(BB龍蝦)製作,務求做到皮脆肉爽的效果同時亦保留龍蝦鮮味。咬落口果然係皮薄餡靚,龍蝦肉爽口彈牙。正如馮主廚話齋:「最緊要食蝦有蝦味,食魚有魚味!」。 今次都爹利會館亦同倫敦Bubbledogs合作設計fusion菜,就係呢道The Duddelldog(HKD95)。主廚以咕嚕肉做靈感,希望透過熱狗呈現中西合壁嘅味道。醬汁酸酸甜甜,再加上細粒咕嚕肉質感嘅肉粒配上熱狗腸,味道意外地夾。不過女仔自己食晒一隻就有少少heavy喇,呢款可以考慮兩個人share,咁就可以試多幾款菜嘛!  ...