Tagged: 自家製

0

【西營盤小巷簡約文青Café 自家製純素甜點件件吸睛】素學堂

今次素學堂帶大家relax吓,去到西營盤一個小巷裡面嘅JOMO Coffee & Cakes放鬆同Chill吓。JOMO嘅意思係Joy Of Missing Out ,想帶出嘅係要享受當前嘅時刻,暫時放下平時工作中繁忙嘅一切。呢間café由三位年青人主理,由炮製咖啡到甜品都有豐富經驗,蛋糕全部都係自家製,賣相好精緻講究,3位店主都知道有唔少人對蛋奶敏感,所以亦都提供咗唔少純素嘅甜品同輕食,好貼心呀! 店內裝修簡約,開放式㕑房,加上Tiffany blue嘅牆色,整個感覺好文青好舒服呀!店裡面用嘅花邊蛋糕碟,每個都係用人手拉嘅陶瓷碟嚟㗎,襯埋件蛋糕真係一流呀! 含蛋奶嘅黑芝麻味戚風蛋糕(HKD52/件)夠哂吸睛啦!蛋糕面頭淋上自家製嘅黑芝麻醬,再放上杞子同桂花,顏色望落好豐富,而蛋糕質感就好鬆軟綿密亦唔會有滯嘅感覺,食得又睇得,小編都忍唔住要相機食先啦! 呢個純素海鹽焦糖蘋果烤酥批(HKD68/件)都好花心機㗎,蘋果切片後一層一層咁疊上去,每一啖都有蘋果肉好足料,而面頭嘅cream同焦糖醬都係人手做,帶少少椰香,令到整個蘋果批嘅豐富度提升。撻皮口感雖未至於好鬆脆,但喺無牛油蛋奶嘅情況下都能夠做到呢個程度真係唔錯㗎,食落仲無咁大罪疚感呢! 生可可撻(HKD58/件)都係純素嘅,用咗有機可可粉,中間嘅朱古力餡食落好似慕絲咁好滑,而撻皮嘅飽肚感就比較重。    草莓撻(HKD58/件)亦都係純素甜品,細細件好適合下午茶品嚐,不過呢個撻就唔喺餐廳menu入面嘅,要睇吓店主嗰幾日有無mood同時間去整啦,話唔定隨時有新味推出㗎! 小編都幾鍾意呢個意式番茄素芝士配酸種麵包(HKD88)。麵包面有一層自家製嘅素芝士,要用腰果浸一晚再發烤而成,味道同芝士相似之外,仲可以補充返素食者容易缺乏嘅營養,例如維他命B12、B6同葉酸。麵包比較硬身少少,切開要比平時用多少少力,但整個味道酸酸甜甜好清新有驚喜,做All Day Breakfast都幾適合! 薰衣草伯爵茶(HKD48/一壺)一陣陣嘅清香撲鼻而來,好適合配蛋糕一齊飲! 香蕉草莓沙冰(HKD50)用新鮮水果整成,而所有純素產品都無用精製糖,呢個就用椰棗代替糖,飲落好fresh有啲似奶昔。   JOMO Coffee & Cakes 地址:西環西營盤水街4號地下D號舖 電話:2762 0258 營業時間:星期一至日:11:00 – 18:00

0

【DIY脆皮蘋果批10分鐘食得 麥包做批皮低卡唔怕肥 】mui mui家政課

有時唔算肚餓但又衰口痕,就好想去老麥買返個蘋果批咬吓,貪佢抵食又有生果吖嘛!不過次次食完都後悔,因為層批皮一定多油,食咗半件已經飽飽滯滯。今次mui mui一於自己整,整返個健康版,用麥包代替批皮健康啲啦,size仲隨意自己話事添! 材料與分量: 蘋果 – 1個 蜜糖 – 1茶匙 黃糖 – 1茶匙 檸檬 – 半個(搾汁) 檸檬皮 – 少許 玉桂粉 – 1湯匙 去皮麥包 – 2片 鹽 – 少許 牛油 – 1小塊(大約5蚊咁大) 蘋果批餡料做法: 1. 將蘋果削皮去核,切成細塊之後放入鍋,加入黃糖、蜂蜜、肉桂粉、鹽、檸檬皮同檸檬汁攪勻調味,然後放一邊備用。 組合:...

0

【屋企都整到大排檔名物 邪惡爆餡鹹牛肉三文治】mui mui家政課

mui mui聽聞有間大排檔好誇張,每朝早都排晒隊爆晒場,人人為咗等食佢嘅三文治,仲要每日限量供應,等到唔代表食得到、食得到都至少等成個鐘。咁辛苦,不如瞓晏啲,瞓醒喺屋企自己整好過啦! 材料與分量: 方包 – 6片 鹹牛肉 – 1罐(細) 雞蛋 – 2隻 洋蔥(切碎) – 1/4個 芝士 – 2片 椰菜葉(切絲) – 3片 花生醬 – 適量 牛油 – 適量 做法: 1. 無鹽牛油塗在每片方包的其中一面,另一面塗上花生醬備用。 2. 下油,開中火燒熱平底鍋,爆香洋蔥,再加入鹹牛肉一齊炒。 3. 鹹牛肉上色後再落蛋液,炒至8成熟,盛起待用。 4....

0

【日系美食童話 任你訂製精緻蛋糕全手作】Fairy Tale Cafe

童話故事結局總係美好,雖然主角經歷重重波折,但係到最後都會憑住個人努力、愛同信念,得到成功或者幸福嘅結局。成長之後人往往只顧住打拼,偶爾都會迷失,想好好休息一下,回憶起當初嘅純粹同本心。Fairy Tale Cafe係一個好好嘅地方比大家休息一下,享受一個豐盛童話。 小店主色調係以白色同Tiffany Blue為主,室內光線自然,裝潢簡約但不失講究。店內氛圍係咪有啲日系小巧、精緻、細膩又帶點可愛嘅感覺呢?因為餐廳主廚跟隨過日本師傅學習,受過日本飲食文化薰陶,所以滲出淡淡日系感覺,裝潢同食物睇落都幾靚㗎!雖然帶有日系元素,但餐廳都無忘記本源,好多細節都好別出心裁為香港人而設,等小編同你一一介紹! 店主喺大埔開店專賣自家製蛋糕不設座位,但係經營落嚟,佢好希望客人可以有個舒服嘅環境,坐低慢慢享受蛋糕同咖啡,於是喺度開店。Fairy Tale Cafe呢個名都係想每個人嚟到都好開心滿足,就好似走入童話世界咁! All Day Breakfast B(HKD68)首先講講長條形,外形好似手指餅嘅窩夫。睇落好得意,粉漿係自家製,食落唔止脆卜卜,長條形仲更加啱女仔口形,入口亦好綿密好香!另外配搭嘅蜜糖係荔枝蜜,味道清香,同窩夫配搭起嚟唔膩又香甜。香腸用嘅係日式香草豬肉腸同德國龍堡腸;沙律用嘅係有證書嘅本地水耕菜,每日都新鮮挑選,唔止確保到新鮮好味,仲可以推動本地農業!黑醋選用無花果醋,薯蓉係由新鮮薯仔製成,質感細膩又豐富。炒蛋綿密,而烤蕃茄好新鮮多汁。成個餐都感受到餐廳嘅用心! 餐廳特別炮製冬蔭功烤雞翼(HKD42),先用自家調製嘅冬蔭功醬汁醃一整晚,醬汁包含十種香料,例如辣椒、香茅、檸檬葉等等,質地比起一般飲用嘅冬蔭功湯更為杰身濃厚,務求雞翼入口時更惹味。雞翼表層帶有少量香草,入口冬蔭功嘅濃香四溢,就連雞肉都滲出陣陣冬蔭功香濃味道,雖然味道香濃但係唔辣!入口雞皮仲唔會黏稠,雞翼迷一定要試試! 香脆軟殼蟹漢堡(HKD70)平時食軟殼蟹離不開都係手卷、軟殼蟹卷,估唔到漢堡都可以好夾!軟殼蟹炸得好香脆,配上佢嘅絕配沙律醬同蟹籽,增添美味幼滑同口感。漢堡嘅麵包烤得剛剛好,帶有輕輕脆感。裡面仲夾有新鮮嘅生菜同蕃茄,多汁爽口。整個漢堡集合嫩滑、香脆、清爽於一身! 餐廳所有蛋糕都係自家製,款款都好吸引!包括72%特濃朱古力(HKD38)。自家製嘅朱古力蛋糕,入口質感細膩,朱古力味道濃郁,比起一般朱古力蛋糕入口質感更幼滑,喺口腔溶化嘅時候仲好香醇。上面嘅生果好新鮮,賣相好精美!小編差啲睇到唔捨得食呀! 唔講你可能唔知,佢地全部野食都係即叫即製,確保熱辣辣送上!就連House coffee(HKD28/熱)都係即磨,夠晒心思!嚟到記得要預返少少時間耐心等候呀! Fairy Tale Cafe 地址:大埔仁興街2號地舖 電話:2653 0123