Tagged: #致癌

0

【避開包裝小食致癌陷阱 營養師DIY氣炸蕃薯片】懶健康貼士

「消委會同食安中心嘅報告不斷指出薯片、餅乾等包裝小食都含有致癌物「丙烯酰胺」。最近仲檢測到有啲蔬菜脆片平均嘅丙烯酰胺含量比薯片仲要高,唔少客人同朋友都吐苦水,話要揾款健康嘅包裝小食好困難。其實除咗致癌物之外,好多脆口嘅包裝小食都經過油炸處理,無形中增加食物嘅脂肪含量,所以唔好以為食蔬菜片包裝小食就健康而食多咗,分分鐘體重爬升得仲快,今次等我教大家DIY氣炸蕃薯片啦!」 氣炸屬低脂煮食方法 「依家唔少人用氣炸方式自製小食,利用熱空氣循環嚟模仿油炸效果,用少啲油又做到油炸嘅脆卜卜口感同味道。不過健康啲都唔係隨口講,曾經喺在一個烹煮薯仔嘅研究當中,研究員比較咗利用傳統油炸方式同氣炸方式嘅脂肪含量,結果發現用氣炸整成嘅薯片脂肪含量比傳統方式大幅下降;連致癌物「丙烯酰胺」嘅含量都比油炸方式低90%,不過研究就冇測量其他致癌物水平。」 氣炸煮食比其他煮食方法更健康? 「都唔一定,因為無論用焗爐或光波爐,長時間用高溫煮食一樣會釋出致癌物。喺油炸食物研究指出,時間、溫度同丙烯酰胺嘅產生有直接關係,即係時間愈長就產生愈多丙烯酰胺。所以就算用氣炸煮食方式都要控制好時間同溫度。同埋提提大家,低脂氣炸煮食雖然將油脂攝取量減低,但其實油除咗含有卡路里之外,佢仲可以幫助身體吸收脂溶性維他命,所以過度低脂飲食反而唔健康㗎。」 DIY氣炸黃蕃薯片 「氣炸係現時做到最接近香脆口感又相對健康嘅煮食方法,我就用黃蕃薯製作蕃薯片,因為佢含有豐富嘅胡蘿蔔素,具抗氧化作用,幫助抵抗自由基;而且每100克黃蕃薯就含有3克膳食纖維,可以幫助控制體重同增加飽肚感;加上黃蕃薯屬澱粉質類食物,取代米飯就啱晒鍾意澱粉質嘅朋友。」 材料: 黃心蕃薯 -  2條 油 - 2茶匙 鹽 - 少量 做法: 1. 將蕃薯洗淨抹乾,切到厚薄相約,令受熱均勻啲。 2. 加入2 茶匙油,撈勻令每片蕃薯片都均勻沾上。 3. 以180度氣炸約8分鐘,攞出嚟反轉再氣炸約5分鐘,然後灑少量鹽攤涼就食得。   Moses Lee 現為“My Fitness”註冊營養師、澳洲營養及飲食治療碩士同澳洲營養師協會會員,擅長體重管理同運動營養。曾於醫院、社區中心、教會同非牟利機構等地方提供營養服務、舉辦營養講座同烹飪示範。依家為有需要控制體重嘅人士同運動員提供營養治療,制定飲食方案。

0

【18款人造牛油含致癌物 營養標籤要睇真啲】懶健康貼士

牛油係一種令人又愛又恨嘅神物,佢可以令食物更加香滑,但亦可以令你有更多滑溜嘅脂肪。不過消委會啱啱抽驗咗30款常見嘅預先包裝牛油、植物牛油同相關產品嘅鈉、脂肪、膽固醇等含量,仲有污染物3-MCPD同環氧丙醇嘅含量。結果有16款樣本驗出3-MCPD,18款驗出環氧丙醇;仲有15款驗出嘅營養素含量比標籤超過20%以上,或者明明有但營養標籤上就寫冇。 究竟牛油同人造牛油對身體係好定壞呢? 睇牛油同人造牛油嘅營養標籤主要睇: 鈉:係維持人體機能正常運作嘅必需元素,但會增加患上高血壓嘅風險,而低鈉食物係指每100毫克食物嘅鈉含量不多於120毫克。 總脂肪:可以提供熱量、身體必需嘅脂肪酸,幫助身體吸收脂溶性維他命(例如維他命A、D、E),但過量會致肥。 反式脂肪酸:增加體內壞膽固醇水平,同時降低好膽固醇水平,長期攝取會增加患心血管疾病嘅風險。 飽和脂肪酸:係一種壞脂肪酸,會增加血液中嘅壞膽固醇水平,令心臟健康受損。 不飽和脂肪酸:分為單元不飽和脂肪酸同多元不飽和脂肪酸 – 單元不飽和脂肪酸:可以降低壞膽固醇水平同增加好膽固醇水平,能夠減低血液中嘅壞固醇同提高好膽固醇嘅比例,幫助降低患上心血管疾病嘅機率。 多元不飽和脂肪酸:包括奧米加3同奧米加6,適量嘅奧米加3可以幫助胎兒、哺乳婦女嘅嬰幼兒同發育中兒童嘅視網膜同腦部發展;但過量攝取可能會提高血脂受氧化同血管發炎嘅風險。 膽固醇:係脂肪嘅一種,佢唔溶於血,血液中過量嘅膽固醇會沉積喺血管內壁,令血管阻塞。 3-MCPD及3-MCPDE:損害腎臟功能同影響男性嘅生殖系統。 GE及環氧丙醇:具基因毒性同致癌性。 肥唔肥係可以自己選擇嚟調節,但致癌物同污染物就真係要認清!喺30款抽驗嘅食品之中就有18款中招,真係OMG! 食品名單 含基因致癌物環氧丙醇 (每公斤) 含污染物3-MCPD (每公斤) MeadowLea Original Vegetable Fat Spread 110微克 / Olive Grove Classic Mild Tasting 65% Less...