Tagged: 船麵

0

【泰式半自助午餐任食沙律吧 主菜首選$88足料船麵】象屋泰國餐廳

要食得抵又多選擇?旺角象屋泰國餐廳嘅泰式半自助午餐一定啱你,自選泰式主菜(HKD88起)有9款,船麵、燒豬頸肉飯、肉眼扒等等都好受歡迎;仲包埋任食嘅鹹甜點泰式沙律吧,即刻睇吓有幾正啦! 餐廳環境都充滿泰式感覺,12:30左右就開始有食客嚟喇。 如果食半自助午餐,可以喺9款主菜之中揀1款,仲可以任食沙律吧長枱上約15款食物,有泰式木瓜大蝦沙律、椰汁糕、春卷、咖喱角等等。如果淨食沙律吧(HKD79)都可以,同半自助午餐一樣會跟杯茶或咖啡。 食得泰國菜梗係有牛肉船麵(HKD88),亦係9款主菜之中最抵嘅。牛腩同牛丸分量幾多,煮得好入味。湯底香濃唔會太鹹,麵仲好似粉絲咁嗦晒湯汁添。 如果想食炒麵,泰式雞肉金邊炒(HKD93)唔會炒到乾晒,幾香口惹味,唧埋青檸汁就更加濕潤易入口。雞肉大大粒但依然嫩滑,肉量都唔少添。 如果你鍾意食牛扒,不妨試吓少有嘅美國肉眼扒配薯菜及羅望子汁(HKD148)。肉眼扒烤焗後淋上酸甜惹味嘅羅望子汁,食晒都唔覺膩。加上炒到啱啱熟嘅椰菜仔,爽口得嚟幾fresh㗎。 如果食唔到午餐,呢度嘅晚市小炒、甜品同下午茶都一樣吸引。好似呢款辣椒膏炒大蜆(HKD148),肉質嫩滑彈牙冇咩沙,辣度適中惹味唔會蓋過蜆嘅鮮味。 不過香芒黑白糯米飯(HKD88)始終係泰式甜品首選,餐廳特別用透明外殼裝起大量椰絲同香甜多汁嘅芒果肉,打開外殼就會灑落黑白配嘅糯米飯,味道同打卡都係一流呀! 而星期六、日15:30-17:30新推嘅周末二人專享下午茶餐(HKD158)都同樣抵食。 兩碗椰香十足嘅青咖喱雞飯配上脆炸櫻花蝦、素春卷、蝦餅、一口芒果糯米飯、香甜嘅斑蘭撻同榴蓮味濃郁嘅榴蓮撻6款鹹甜小食;加上兩杯咖啡或茶,啱晒鍾意香口食物嘅你,食晒都飽肚㗎。   象屋泰國餐廳 地址:旺角太子道西193號MOKO新世紀廣場4樓453號舖 電話:2386 6882 營業時間:星期一至日:11:00-22:00

0

【元朗熱爆船麵日賣三百幾碗 足料牛骨湯底香到暈】阿叔泰麵

最近喺元朗人氣急升,牛骨湯船麵紅到賣斷市,要休店三日調整供應量嘅阿叔泰麵依家專注於船麵款,慢慢先再推出其他麵類。點解揀做船麵?負責人之一倫哥就話:「大廚阿揚去泰國學廚半年,加上太太係泰國人,識整家庭船麵,設計menu嘅時候俾咗好多意見我哋。所以九成食材都搵到泰國當地嘅靚貨源。」。不過點解唔揀元朗市中心啲嘅位置開舖呢?「我哋都想吸引其他區嘅客入嚟試,冇咁近市中心反而方便啲人泊車。其實冇諗到咁多人支持,重開之後試過一日賣三百幾碗,係之前嘅double。」連泊車位都考慮埋,咁裝修同食物更加以客為先啦! 呢度冇收加一,幾抵食。不過想抵食又抵飲可以Like & Share阿叔泰麵嘅Facebook,攞埋杯贈飲。 既然船麵係牛骨湯底,咁就先試牛肉船麵(HKD58)。湯底除咗用大量牛骨煲12個鐘之外,仲加入八角同冰糖等材料,唔怪得未食已經聞到陣香氣,味道層次仲幾豐富添。有3件厚切牛腩粒、3粒牛丸、炸豬皮同通菜,都幾多料。牛腩粒真係好正,炆得腍又仍然有咬口,仲幾有肉香添。夾埋濃味得嚟又唔會過鹹嘅湯底,係perfect match呀!麵就有四款,米粉、金邊粉、泰式河粉同粉絲,全部都係泰國當地食材嚟㗎!呢款粗河粉好滑嘟嘟,厚度係港式炒河粉同幼河粉之間,都唔錯,而且夾咗幾次影相都唔會爛到碎濕濕。碗麵做返港人正常食一碗嘅分量,女仔食可能會飽啲啲添。 有牛就有豬,豬肉船麵(HKD52)都幾多人食,同牛肉船麵嘅分別就係轉用豬肉片同豬肉丸。豬肉片都幾大片,不過肉丸質感就冇牛丸咁彈牙,不過呢個麵冇肥肉,感覺冇咁滯。泰式米粉好幼身,而且唔會浸到發脹,由開始食到尾口感都唔會點變㗎。 泰式牛扒沙律(HKD52)雖然係凍食,但牛扒依然嫩滑有肉汁喎,仲有啲爽口筋腱位,質感唔錯。呢款喺餐牌上有2隻辣椒,如果食到譚仔三少辣嘅朋友會覺得呢份都有啲辣,不過接受到嘅。 抵食推介要數3式雞翼拼盤(HKD58),有齊酸辣凍雞翼、香茅魚露雞翼、紅咖喱雞翼一共9隻。Size正常,唔係特別細嗰啲喎。雖然呢三款個名好似重口味咁,但其實調味都算啱啱好。 想飲嘢不妨試吓香茅斑蘭特飲(HKD24),飲完感覺喉嚨好fresh,香茅同斑蘭味道又融合到。想啤一啤亦得,有象啤(HKD22)、勝獅啤(HKD25)同豹王啤(HKD22)。   阿叔泰麵地址:元朗西菁街20號益輝大廈地下3號舖電話:2887 3269營業時間:星期一至五:11:30-15:30,17:30-22:00;星期六、日公假假期:11:30-22:00

0

【清邁拜師學藝煮泰菜 開店賣地道船麵$12食到】珍泰In泰式車仔麵

愈來愈多餐廳做泰式船麵,細細碗又惹味,唔少客人唔覺唔覺又一碗。連大角咀嘅珍泰In泰式車仔麵老闆娘Maggie,都因為喺泰國一試愛上船麵嘅味道,放棄高薪厚職嘅物流工作,去清邁拜師學藝,返嚟就同屋企一齊經營泰菜餐廳。 雖然係香港人開,但店內都充滿泰式裝潢。由牆紙到掛飾嘅大象圖案,都好有泰國風土氣息㗎! Maggie專登去清邁學呢碗泰式豬肉丸迷你船河(HKD12),用唔同香料製成正宗嘅滷水湯底。雖然係迷你,但材料都唔少㗎,有豬肉丸(或牛肉丸二揀一)、豬紅、豬膶同蘿蔔。每日14:30-18:00以HKD12優惠價限量供應,賣完即止,食兩、三碗做下午茶都抵呀! 湯麵嚟講,椰汁雞湯鮮墨魚粉麵(HKD48)都幾吸引。爽口彈牙嘅鮮墨魚唔多地方有用呢款餸,加埋椰香十足嘅湯底,再咬啖嫩滑雞肉同大冬菇,口感同味道層次都好豐富。 金牌雙髀飯(HKD48/下午茶)有齊嫩滑嘅招牌海南雞同泰式滷水豬髀,配埋黃油飯好香口。如果晚市食就HKD65,會送飲品同椰汁燉桃膠,幫你潤埋喉先走呀! 泰國菜中仲有必食嘅香葉肉碎煎蛋飯(HKD50),先篤爆太陽蛋嘅蛋黃同飯撈勻,口感會滑啲。加埋用辣椒炒香嘅豆角同肉碎,簡單得嚟勁惹味。 泰式咖喱之中,黃咖喱嘅辣最多人接受到。呢款黃咖哩牛肋條飯(HKD65)煮到牛肋好香軟,咖哩汁撈飯真係好正。如果想辣啲可以試紅咖喱,都係貴少少HKD68啫。 大家食泰國菜成日叫生蝦同蝦餅當小食,但唔好忘記仲有咖喱蟹呀!呢款咖喱炒軟殼蟹(HKD98)必須趁熱食,因為軟殼蟹炸完再用咖喱汁炒會易變腍,想保留到多啲脆口感覺就要食快啲喇。   珍泰In泰式車仔麵 地址:大角咀大全街26號地下 電話:2696 9928 營業時間:星期一至日:11:00-22:30

0

【泰國船麵潮有平有貴 精選三間任你揀】666泰船麵、泰麵膳、昌發泰國粉麵屋

最近香港興起一陣泰國船麵潮,就等小編為你精心挑選以下三間船麵店,當中有平有貴、仲有老字號,睇你鍾意邊間啦!講起呢個船麵潮,其實船麵係泰國非常傳統嘅麵食。因為舊時泰國水路發達,小販會喺船上賣麵,為咗啲麵唔會喺行駛間倒瀉,所以惟有將分量縮細,變成一口一碗麵,亦因為咁就變成咗船麵嘅特色。 唔怪得去親泰國食船麵,啲人一坐低就起碼叫十碗,食完仲要疊到啲碗鬼咁高啦!不過依家要食船麵,唔使去泰國啦! 最抵食 666泰船麵環境偏懷舊風,小店舖位細細但就另有一番味道同親切感。佢嘅遊泰國豬肉船麵(HKD20)入面有齊豬潤、豬肉片、腩肉同豬肉丸等,又平又多料,超抵呀!湯底好濃好深色,飲落好濃郁,分量比一般泰國船麵為多,唔會話一口一碗,啲豬油渣炸到脆卜卜好正呀! 666泰船麵 地址:西環德輔道西366號中亞大樓地舖 電話:3618 4544 營業時間:星期一至星期日:12:00-22:00   平貴食 泰麵膳嘅環境就夠晒復古,用咗tiffany blue嚟做主調,當中加入咗唔少大象嘅裝飾,都幾有泰國feel喎!佢哋嘅安格斯牛肉船麵(HKD68)一上枱已經聞到濃濃嘅牛肉湯香味,飲落味道清甜又濃郁。雖然價位偏高,不過都值得㗎,分量多,配料又有安格斯牛小排、豬肉丸同埋牛腩;牛肉煮到軟稔又嫩滑,超正!嫌貴咩?唔怕,晚市9至11特定時段,有其中三款嘅船麵(牛肉船麵、粉紅湯粉同魚片魚蛋湯粉),大特價賣12蚊碗咋!平貴任你揀啦! 泰麵膳 地址:尖沙咀寶勒巷1號玫瑰大廈地下E&F1號舖 電話:2788 3060 營業時間:星期一至日:11:30-23:00   老字號 昌發泰國粉麵屋由賣泰國雜貨起家,轉賣船麵都有成超過十年時間,可算係老字號!全店由泰國人主理,街坊食過都大讚佢嘅遊船河(HKD43)味道夠晒正宗。大大碗,入面有豬潤、豬肉片同豬肉丸。湯底加咗豬血,飲落更濃味。老闆娘仲話正宗船麵係要連埋金不換同生芽菜一齊食,唔怪得同平時食過嗰啲唔同啦! 除咗船麵,都仲有好多主菜、小食、飲品同甜品選擇, 唔使飛轉泰國都可以去頂住癮先啦! 昌發泰國粉麵屋 地址:九龍城城南道25-27號地下 電話:2382 5998 / 2382 0280 營業時間:星期一至日:11:30-23:30