Tagged: 芝士蛋糕

0

【飲飽食醉西式啤酒宴 沙律薄餅甜品加料手工啤】掌門精釀啤酒

掌門精釀啤酒係台灣幾出名嘅手工啤酒品牌,香港店嘅酒都由台灣運嚟以保持一致品質。繼尖沙咀店之後,上月喺西營盤開分店,用酒煮嘅菜式多咗,星期六、日仲有Brunch食添,等小編帶大家睇吓新店有咩好食啦! 餐廳位置喺西營盤高街小斜坡之上,餐廳環境就好開揚。 沙律都可以落酒?掌門四款沙律之中有兩款加咗酒,火箭菜意大利火腿無花果沙律(HKD108)仲係廚師推介添!廚師喺沙律汁落咗精釀啤酒「酸酸」,酒味比較薄,但味道酸啲,撈埋新鮮嘅無花果、火箭菜、Parma Ham好開胃又夠fresh!最鍾意佢加埋核桃,有咬口,感覺更加健康。 意式辣肉腸薄餅(HKD118)喺搓薄餅底嘅時候以招牌精釀啤酒「55%小麥」代替水,令薄餅口感煙韌啲,不過一樣焗得好香脆。餅底搓得算薄,意式辣肉腸同車打芝士海量式鋪滿喺面,食肉獸最愛呀! 海鮮意粉(HKD148),大廚喺炒意粉時,加入以大量美式啤酒花為風味特色的暢銷酒款「柒拾肆-加強版」,務求強調香氣,襯托海鮮鮮美。 安安檸檬芝士蛋糕(HKD58)用咗啤酒花能增加果香,質地好順滑同厚實。芝士味同檸檬味都好出,配埋雲尼拿果仁有多重享受添。 試完用酒煮嘅菜,輪到新店星期六、日嘅Brunch喇,一樣好足料囉!三杯雞多士盒(HKD78)外形有啲似台灣小食「棺材板」。嫩滑嘅雞髀肉用薑片、蒜頭、辣椒同葱爆香,惹味又有少少辣,再回鍋落埋「三杯」,即係黑麻油、生抽、老抽同冰糖一齊炒。收乾之後再加埋九層塔,肉有少少焦又好鬼香。不過最點睛係溫泉蛋喇!篤爆佢,將蛋汁同雞肉撈勻更香滑。加埋即烘脆口多士盒,真係飽到上心口。 仲有將蛋漿加入蘑菇、雞肉粒、薯仔粒、紅椒、青椒、菜同肉腸,煎成厚厚嘅香腸淡色艾爾意大利蛋餅(HKD68)。口感好豐富,因為落咗勁多料。蛋餅煎到啱啱好,仲有啲蛋汁添。 當然要飲杯酒落肚啦,新款Cocktail之中,小編幾鍾意狂野烏梅(左:HKD68/杯)。以味道辛辣嘅Tequila龍舌蘭酒同Cherry Brandy櫻桃白蘭地做基酒,加上重口味的烏梅汁同清新嘅青檸汁。入口即刻feel到酒精濃度高,酸中帶甜都啱夜晚飲。 仲有炭燒西柚(中:HKD68/杯),相比之下感覺好清爽,lunch飲都好舒服。以Gin酒做基酒,簡單配上西柚汁同炭燒烏龍茶,口感順滑,同時加入西柚粉紅色糖漿都唔會覺得甜,反而餘韻有種果茶嘅香氣添。 如果都係鍾意啤酒,大吉大利(右:HKD49/250ml)都唔錯,以科隆Kolsch啤酒加入大量新鮮金桔製成,因為「吉」同「桔」係同音字,所以攞個好意頭叫做「大吉大利」。味道清新但有啲酸甜果香,反而冇咩啤酒花嘅苦味。   掌門精釀啤酒 地址:西環西營盤高街53-65號地下富裕大廈地庫 電話:2650 0511 營業時間:星期一至日:12:00-23:00

0

【超市尋寶搵到平貨 $29.9超讚TESCO蛋糕】平霸

行超市同便利店已經成為咗小編嘅日常,隔幾日點都要行一行。今次行開U購select,又俾小編執到寶喇!見到TESCO牌嘅蛋糕都只係(HKD29.9),平到黐晒線呀!如果呢個味道、呢個size,出面賣起碼都HKD99 up喇,依家30蚊唔使就食到高質蛋糕,抵食! TESCO紐約芝士蛋糕(HKD29.9) 一打開個cake都幾靚仔㗎,不過食之前大家記得要解凍2-3 hrs,唔係就好難切㗎啦。 味道嚟講,小編覺得真心唔錯,芝士味濃郁,都幾smooth,而且仲要有埋餅底,唔話得啦! 就咁睇唔好諗住佢好細件喎,其實都夠8個人分,又係大件夾抵食! TESCO急凍拖肥香蕉批(HKD29.9) 比起芝士蛋糕,呢個味道就多返啲層次。 面層有滿滿嘅拖肥醬,外面有cream包住,入面仲有一層係香蕉味嘅蛋糕,一樣有餅底。 兩個cake,小編就鍾意呢個多啲,食落又冇咁寡,多返啲味道。雖然有同事話覺得食呢個偏膩,但我就覺得啱啱好。 平霸小評:今次平霸轉吓新路線,唔食餐廳唔食小店,超市都可以有超抵好食正貨㗎!小編打從心底覺得呢兩個蛋糕超平超好食!大家快啲買嚟試吓啦! 平食點:U購select TESCO紐約芝士蛋糕(HKD29.9);TESCO急凍拖肥香蕉批(HKD29.9) 平食by #愛吃的旅人 美術by #Mui Mui 攝影by #愛吃的旅人 《平霸》平食四方,歡迎各界報料。

0

【$148大歎抹茶自助餐 甜點鹹食好芝味】諾富特東薈城酒店

一講到抹茶乜乜乜,相信都好難有人唔鍾意,唔知點解,抹茶及同綠茶好似有種魔力咁,有啲咩只要加咗佢哋,就總可以引嚟一陣熱潮。小編都唔例外,絕對係抹茶嘅忠實粉絲呀!依家諾富特東薈城酒店推出咗「抹茶及綠茶週末下午茶自助餐」,星期六及日每位(HKD148),公眾假期每位(HKD168),由依家至4月15日逢星期六、日及公眾假期供應,咁就可以一家親食住抹茶享受family day啦! 自助餐入面嘅甜品同鹹食款款都好吸引,好似呢個抹茶流心芝士撻,一講到話芝士撻已經好殺食,仲要加埋抹茶口味,絶對係人氣首選。鬆脆帶有牛油香嘅撻皮裝住滿滿嘅流心忌廉芝士,最後灑上抹茶粉,點忍到口呀?食足三個都唔過份。 另外有抹茶意大利芝士蛋糕,傳統意大利芝士蛋糕大家都食過,但係Matchamisu又有冇試過呢?混入抹茶嘅軟滑芝士蛋糕夾住口感香脆嘅曲奇,咁嘅配搭想引死人咩! 綠茶香酥排骨就比較特別,排骨充滿綠茶味仲炸至金黃香脆,咬開熱辣辣仲流出唔少肉汁,肉質外脆內軟又唔油膩,好味喎! 仲有呢個鮮蝦綠茶冷麵,以綠茶為主要材料嘅蕎麥冷麵,配上鮮蝦同蟹籽提鮮,味道相對冇咁濃郁但又帶有陣陣茶香,好清新! 諾富特東薈城酒店 地址:香港東涌文東路 51號諾富特東薈城酒店大堂 電話:3602 8808 供應日期:即日至4月15日期間內,逢星期六、日及公眾假期供應 供應時間︰14:45-17:00

0

【可愛3D Latte】荳子

話說將軍澳東海堂有個限定紫薯雪糕,身為一個專業美食報料員,我當然要去食!但係原來9點去到差不多關門之餘,已經賣晒紫薯雪糕。之後就即刻轉移陣地去popcorn食BEANS。 環境不錯,人流非常多!由於去到都已經9點多,大部份人都食緊甜品。 入口處會見到個黑板寫住有3D Latte,仲有好多味道可以選擇添! 事不宜遲,當然就係叫左個可愛3D Creme Brulee Latte影相呃like啦。好多人都話叫3D Latte會唔好飲因為製作時間長會令咖啡放涼左,但依杯奉上時候都仲夠熱。 小食當中比較特別係個孜然單骨雞翼(HKD48),炸得夠酥脆但孜然味唔夠濃烈。 巴馬火腿火箭菜薄餅(HKD98)份量唔算太大,兩個人分剛剛好。食得出火箭菜好新鮮,芝士夠多,好味! 點任何正餐食品加$25就可以享用埋個是日精選蛋糕,好抵啊!當日精選係芝士蛋糕,初初擔心會好漏,食落又okay播,芝士味夠出又唔係飽到想嘔,非常好。 荳子 將軍澳唐賢街9號PopCorn商場1樓F95號舖 星期一至日: 11:00-23:30