Tagged: 芝士

0

【極速氣炸芝士呑拿魚酥 餐廳質素邪惡下午茶】氣炸師

喺屋企要整餐廳質素嘅菜式,唔一定要出動砂煲罌罉,買N樣食材同醬汁嘅。不如試吓跟住小編整氣炸芝士呑拿魚酥,極速幫自己整個邪惡下午茶啦。三個字:快,靚,正!Go! 氣炸芝士呑拿魚酥 材料與分量: 酥皮 – 2塊 鹽水浸吞拿魚罐頭 – 1罐 蛋黃 – 1隻 芝士碎 – 適量 芝麻醬 – 適量 做法: 1. 先拎出急凍酥皮,室溫解凍至軟身備用。 2. 吞拿魚先隔去鹽水,加入芝麻醬拌勻 。 3. 將酥皮一分為二,放上餡料再灑上芝士碎。 4. 將酥皮對摺,然後用叉壓邊。 5. 發打蛋黃後掃喺酥皮表面。 6. 放入氣炸鍋焗180度13分鐘,反轉同溫度再炸5分鐘。  

0

【潮聖東京6大人氣芝士店 熔岩芝士批×甜品手信】Dining Bar UNTITLED、Meat & Cheese ARK、BELTZ、Cheeseとはちみつ エソラ 、NEWYORK PERFECT CHEESE、My Captain Cheese Tokyo

芝士控一定由正餐、甜品到零食到鍾意芝士,如果一個trip可以食到咁多種類嘅芝士食品,仲可以買埋返香港繼續慢慢歎係咪好正呢?!小編就搜羅咗6間東京人氣芝士店,等各芝士控有個美滿嘅芝士大餐,即刻行啦!   1. Dining Bar UNTITLED View this post on Instagram ❁2019.07.20❁ シカゴピザ? めっっっっちゃチーズ??? #シカゴピザ #チーズ #チーズ好き #ダイニングバー #渋谷 #地下 #instalove #likeforlikes A post shared by ✼ Mio ✼ (@ara_mi0222) on Jul 20, 2019...

0

【旺中人氣小店手卷贏晒 $15芝士玉子燒完美拍檔】平霸

平霸又同大家去旺中覓食喇!講真旺中真係每層都有新食店可以發掘㗎喎,包你每次都有驚喜! 今次介紹呢間手卷駅,最初係朋友帶平霸去食先知,貪佢平得嚟又有一定水準,食完忍唔住自己再嚟幫襯呀!    芝士玉子燒(HKD15),平霸係一個玉子控,普通嘅玉子燒已經令我瘋狂,何況加埋芝士嘅玉子燒?價錢仲要咁平,點忍到口呀?見住上面層邪惡芝士,平霸食指大動呀! 玉子燒有返一定厚度,食落口嗰吓堅滿足!上層芝士被火槍燒過,食落口仲有陣煙燻味,加埋芝士咪話唔邪惡!蛋味夠香濃,連埋沙律醬一啖放入口,正到飛起呀! 同其他嘅玉子燒最大分別係,入面居然會有啲飯粒,仲係軟腍腍嗰隻,食落更加有口感呀! 原隻軟殻蟹手卷(HKD26),開頭見到咁平都冇咩期待,見到實物之後又覺得ok喎!真係原隻軟殻蟹,食到落最底都仲食到有軟殻蟹㗎!外層非常酥脆,好香口呢! 最令平霸驚喜係估唔到入面仲有蟹膏喎!再加上飯粒入面有埋啲蟹籽粒喺度,好滋味呢! 芝士吉列蝦卷(HKD24),燒過嘅芝士寧舍好味,下面仲有沙律醬,同炸蝦一齊食味道超夾,想encore食多個呀! 吉列蝦炸到脆卜卜,肉質算彈牙,最勁係加埋芝士食一啲都唔會有膩嘅感覺,配搭真係絕!當日見到有唔少食客都叫呢款同埋軟殻蟹手卷喎,睇嚟大家都好識食呀!   平霸小評:今次呢間小店嘅手卷同壽司嘅質素真係掂!重點係,價錢夠平吖嘛,小店一樣有高水準㗎! 手卷駅 地址:旺角彌敦道688號旺角中心一期2樓SA30A舖 電話:5281 3548 營業時間:星期一至日:12:00 – 21:00 《平霸》平食四方,歡迎各界報料。

0

【熱賣人氣黃金拔絲蛋糕 15蚊3件拉絲誘惑食上癮】平霸

鍾意周圍搵好嘢食嘅平霸今次巡到去深水埗,發現咗呢間榮家糕點烘培店,熱賣台灣同內地都超火紅嘅人氣黃金拔絲蛋糕,見到張Poster已經覺得好吸引喇! 開頭平霸都唔知咩係黃金拔絲蛋糕,問咗店員先知原來即係將蛋糕同肉鬆mix埋一齊,就會有一個拉絲效果,好邪惡㗎! 除咗主打拔絲蛋糕,仲有全港首創嘅冰鎮砵仔糕賣,價錢都好親民,平霸決定幫大家試吓味! 黃金拔絲蛋糕(HKD15/三件),口味都幾多選擇,有大熱嘅抹茶、鹹蛋黃、紫薯、芝士同朱古力等,總共有七款口味,款款都好吸引咁喎!當日店員推薦咗三款口味俾平霸,分別係抹茶、芝士同朱古力味,呢三款係最受客人歡迎嘅! 先講抹茶口味,雖然聞落抹茶味道唔算太突出,不過入口茶味先至開始濃郁,鬆軟口感加上有肉鬆拉絲效果,估唔到肉鬆同抹茶可以咁夾喎,令人有驚艷嘅感覺,同平時食開嘅蛋糕好唔同呢! 芝士口味簡直係邪惡之物,就算加咗芝士,入口都唔會話覺得好膩,反而仲食到芝士本身淡淡嘅鹹香,好滋味啫! 朱古力味道最香濃,熱辣辣咁食真係好正,而且蛋糕用低糖製作,入口甜而不膩,大人細路都啱食! 冰鎮砵仔糕(HKD9/一件)同樣有多款味道選擇,平霸就揀咗石榴味同玫瑰花味。 石榴味道嘅甜品好少見,一打開已經聞到好清香嘅石榴味,入口唔會死甜。口感同傳統砵仔糕有好大分別,唔係軟腍腍嘅,質感反而好Q彈,睇落好似啫喱咁,食落去其實係蒟蒻嘅口感,煙煙韌韌幾有咬口。 玫瑰花味都唔差喎,食落有淡淡花香,味道一啲都唔假,值得一試。   平霸小評:黃金拔絲蛋糕聽到已經覺得好吸引,估唔到食落真係有驚喜!成日都好羨慕台灣有咁多好味嘅糕點,依家香港終於有呢間食到台灣咁hit嘅糕點喇,價錢平平哋,一家大細都啱食,口痕買返幾件嚟頂癮啱晒! 榮家糕點烘培店 地址:深水埗桂林街50A號地下2號舖 電話:6698 0228 《平霸》平食四方,歡迎各界報料。

0

【芝士海膽沾麵賣相差 芝士死鹹海膽失埋蹤】伏務台

香港人鍾意搞創新,但有時都會玩到過晒火變咗玩食物。好似尖沙咀元祖沾麵專門店嘅芝士海膽沾麵,本身就咁聽個名都覺得幾驚喜,但係網民就唔係咁諗喇,好多食評都話伏囉!究竟佢有冇對唔住「沾麵專門店」呢個稱號?當小編見到碗麵嘅真身……即刻想調頭走呀! 餐牌入面嘅相好細張,問店員啡色嗰嚿係咪肉?店員有啲尷尬咁話係,然後好誠實咁補咗句啲肉唔係好多,似肉碎。 好,上枱喇,呢碗芝士海膽沾麵(HKD78),唔知大家有冇聽到小編個心碎咗呢?塊紫菜冇沾湯都瞓低咗,其他配料好似求其掉落去咁。唔理係咪日本人經營,但咁頹嘅擺盤真係好少喺日本菜見到,賣相率先扣分! 而呢隻溏心蛋都幾搶眼,因為熟到一個點呀!仲唔係新鮮整,因為係凍嘅。 到重點嘅芝士湯,熱到不斷起泡泡。不過見到成個湯都係芝士,個腦諗起瑞士芝士火鍋,分別只係冇一直熱住……攪攪佢再三確認真係成鍋濃濃嘅芝士,而唔係湯面上加芝士。個湯鹹到GG,蓋過晒芝士應有嘅奶香味,就算沾麵湯比平常鹹都唔應該係咁囉。至於質地就似忌廉湯,小編額頭現咗三條黑線…… 係時候搵頭先店員講嘅肉,呢塊算大㗎喇,差唔多size有3-4塊啦,其他都係再細啲嘅肉碎。呢刻小編完全明白店員嘅尷尬!味道有少少焦香,然後又俾芝士嘅鹹味蓋過晒…… 呢個沾麵質地好似食緊烏冬咁,偏軟腍,冇咩彈性可言。 一路食就一路見到呢啲溶唔到嘅芝士,真係冇晒胃口,不過佢提醒小編:海膽呢?唔好話海膽碎,係連味都食唔到囉……小編有理由懷疑,究竟芝士海膽沾麵係咪堅落咗海膽呢?   小編伏氣:如果HKD78食一個沾麵並唔貴,但食一個賣相其差、味道勁鹹、肉量好似施捨你嘅沾麵,咁不如買現成料返屋企自己煮好過。連店員介紹嘅時候都覺得尷尬,不如連嗰少少肉都唔好落反而嚟得理直氣壯。俗語都話「唔怕生壞命,最怕改壞名」,真係說服唔到小編碗嘢係有海膽,咁點叫得做海膽沾麵呀? 入伏點:元祖沾麵專門店 入伏價:HKD78   中伏by #為食加菲貓 美術by #車雲 攝影by #為食加菲貓 《伏務台》星期一伏務大眾,歡迎各界報料。

0

【$148大歎抹茶自助餐 甜點鹹食好芝味】諾富特東薈城酒店

一講到抹茶乜乜乜,相信都好難有人唔鍾意,唔知點解,抹茶及同綠茶好似有種魔力咁,有啲咩只要加咗佢哋,就總可以引嚟一陣熱潮。小編都唔例外,絕對係抹茶嘅忠實粉絲呀!依家諾富特東薈城酒店推出咗「抹茶及綠茶週末下午茶自助餐」,星期六及日每位(HKD148),公眾假期每位(HKD168),由依家至4月15日逢星期六、日及公眾假期供應,咁就可以一家親食住抹茶享受family day啦! 自助餐入面嘅甜品同鹹食款款都好吸引,好似呢個抹茶流心芝士撻,一講到話芝士撻已經好殺食,仲要加埋抹茶口味,絶對係人氣首選。鬆脆帶有牛油香嘅撻皮裝住滿滿嘅流心忌廉芝士,最後灑上抹茶粉,點忍到口呀?食足三個都唔過份。 另外有抹茶意大利芝士蛋糕,傳統意大利芝士蛋糕大家都食過,但係Matchamisu又有冇試過呢?混入抹茶嘅軟滑芝士蛋糕夾住口感香脆嘅曲奇,咁嘅配搭想引死人咩! 綠茶香酥排骨就比較特別,排骨充滿綠茶味仲炸至金黃香脆,咬開熱辣辣仲流出唔少肉汁,肉質外脆內軟又唔油膩,好味喎! 仲有呢個鮮蝦綠茶冷麵,以綠茶為主要材料嘅蕎麥冷麵,配上鮮蝦同蟹籽提鮮,味道相對冇咁濃郁但又帶有陣陣茶香,好清新! 諾富特東薈城酒店 地址:香港東涌文東路 51號諾富特東薈城酒店大堂 電話:3602 8808 供應日期:即日至4月15日期間內,逢星期六、日及公眾假期供應 供應時間︰14:45-17:00

0

【OK新出芝士小籠包 好難食完全唔OK】伏務台

作為便利店忠粉嘅小編,一知道佢哋出咗新嘢當然要第一時間幫大家試吓味啦!今次OK便利店新出芝士小籠包(HKD10.5),未推出啲反應已經好極端,網民仲留晒言話:「放芝士入去簡直不知所謂!小籠包係食佢入面啖上湯,唔係食嚟做乜?」等小編即刻試,睇吓佢有幾伏啦! 一見到個包裝,小編咀都O埋,包裝細到一個點,連衫袋都放得落,可想而知佢有幾細!不過打開個包裝味道都幾出,係幾香㗎喎。 一盒入面有四粒,跟佢個指示,家用微波爐叮40秒就食得喇。 叮完之後都見到有啲肉汁出咗嚟,不過就細粒咗啲囉,仲細過隻細湯匙呀! 就咁睇其實係搵唔到芝士嘅存在,食到落口,真係難食到一個點!完全係怪味囉!小編好艱難先吞到佢落肚,勁勁勁難食呀!俾埋同事食,佢哋都覺得皮太厚又乾爭爭,唔講係芝士小籠包都唔知原來入面有芝士,淨係食到啲酸酸甜甜嘅味道;同埋一啲汁都冇,咁樣都叫係小籠包? 小編伏氣:其實唔止一次喺便利店中過伏,不過今次真係離譜咗啲喎!有時唔係咩都加芝士都會好食㗎,難聽啲都要講返句,叮叮真係愈出愈垃圾了,不如下次唔好搞熟食啦!對小籠包有陰影,還我多汁小籠包呀! 入伏點:OK便利店 入伏價:HKD10.5 中伏by #愛吃的旅人 美術by #Mui Mui 攝影by #大食積 《伏務台》星期一伏務大眾,歡迎各界報料。

0

【瘋狂拉絲火焰Show 全港芝士迷攻陷將軍澳】 say cheese

將軍澳愈嚟愈多小家庭居民,充滿歡樂溫暖形象嘅say cheese,係一間用意大利芝士攻城嘅西餐,除咗有得食,價錢仲好相宜,最緊要係分量夠,地方又闊落,同屋企人或者朋友聚會都唔驚唔夠飽!經過出餐位仲可以見到預熱上菜嘅芝士,非常吸引! 用40公斤帕爾瑪芝士燒住嚟炒嘅火焰卡邦尼意粉(HKD98),喺出餐嘅位置上演火焰表演,好精彩㗎!炒出嚟每啖意粉都同芝士完美融合,非常香濃嘅芝士味! 用墨魚汁炒嘅鮮魷魚墨魚汁意粉(HKD98),加多HKD20仲可以有雙重芝士添啊!食完棚牙黑「黑忟忟」,一家人嚟到,小朋友一定食同玩都一樣開心,仲有新鮮爽口嘅鮮魷魚,大大份勁抵食。 朋友聚餐一定啱食嘅雜錦小食拼盤(HKD118),有齊芝士粒、魷魚、雞翼同薯條,分量都唔少㗎,小編仲以為新出咗細塊薯餅,原來係炸芝士,食落外脆內軟,絕對抵食! 見到門口咁多款Mövenpick嘅雪糕已經好心動嘅小編,揀咗呢款野莓狂想曲蜜糖多士磚配Mövenpick士多啤梨雪糕(HKD78),用Cream cheese將多士磚堆疊成一座小山,一啖一件脆卜卜嘅多士,再食啖香滑又唔膩嘅雪糕,勁歎! say cheese 地址:將軍澳唐德街9號將軍澳中心 1樓173號舖 電話:2343 0868 營業時間︰星期一至日 11:30-22:30

0

【必試芝士鰻魚滑蛋熱狗 人氣小店日賣過百隻】白羊.座

大圍有隻熱狗好出名,日賣過百隻㗎!等小編同你潛入白羊.座,搵出佢哋過人之處俾你睇啦! 簡約嘅設計都幾舒服,同朋友嚟聚一聚都唔錯。 火灸芝士鰻魚滑蛋熱狗(HKD58)麵包好鬆軟,喺厚身入味嘅肥美鰻魚上面,鋪足三層碎芝士都未夠邪惡,仲燒到佢好似熔岩芝士咁,香滑美味必食之選! 想清少少就可以試吓煙三文魚碎蛋牛角包(HKD45),可以改豬仔包都得,配薯角或沙律都好惹味。 即炸芝士松露蝦多士(HKD50)未切開已經散發淡淡嘅松露香氣,入面好足料,唔會令你覺得淨係食緊麵包,必點小食呀! 黑松露滑蛋雞扒意粉(HKD55)份量十足,雞扒大大塊,煎到好香脆,滑蛋口感仲超級嫩滑添。 特飲波斯貓(HKD40)幾清甜,飲完之後人都好似波斯貓咁懶洋洋。順便提埋你,呢度午市時間好長,由11:30-16:00㗎,食足4粒半鐘都得呀!   白羊.座 地址:大圍積信街積信樓地下59號舖 電話:5204 9249 營業時間:星期一至日:11:30-21:30

0

【人情味濃厚 真正韓國人主理住家料理】韓宮

自從地鐵黃埔站開通後,去黃埔覓食更方便,小編時不時都會去轉黃埔食好西。黃埔地鐵站A出口,一出去就會見到韓國餐廳韓宮。由一家韓國人經營,將韓國傳統美食帶到黃埔,去黃埔想食返餐正宗韓國菜,呢度係唔錯嘅選擇。 餐廳除咗有炸雞、燒肉外,仲有多款韓國地道菜式選擇, 每款菜式份量都大大份,想食多啲菜式就要約埋一大班朋友啦! 芝士排骨(HKD238)芝士同排骨嘅比例係一半一半,就算唔加芝士排骨都好JUICY。 芝士控當然會將成塊排骨浸入芝士漿,拉絲無難度! 韓式豬手 (Queen Size HKD198, King Size HKD298) 食豬手最驚無從入手,呢個豬手已經預先拆咗骨,好細心呀。夾塊豬手肉再點韓式醬再生菜包住食,入口一啲都唔肥膩,仲可以補充到骨膠原。 Half Half Combo(HKD188) 一共有六種口味炸雞,你可以喺入面自由選擇兩款,小編就揀咗甜酸炸雞同原味炸雞。一上檯已經聞到好濃郁嘅雞味,甜酸炸雞唔會太辣,適合不嚐辣又想食韓國甜酸炸雞嘅朋友。另外,原味炸雞唔會比醬汁蓋過咗雞肉味道,再配上蜜糖芥末醬味道更佳。 韓宮 地址:紅磡黃埔新村民兆街16號地舖 電話:2334 5567 營業時間:星期一至日: 12:00-23:00