Tagged: 芝麻包

0

【元朗良心麵包店大特價 餐包$2.5瑞士卷10蚊5件】平霸

平霸又出動周圍搵平嘢啦,今次去到元朗發現咗間麵包店做緊大特價喎!食件麵包蛋糕做早餐啱晒啦,$2.5一餐,一個唔夠飽、食夠2個都係5蚊,真係食極都唔肉赤呀! 呢間櫻桃麵包西餅喺大橋街市附近,平時人流就麻麻啦,不過今日平霸經過就發現入面人頭湧湧喎,大特價果然成功吸引街坊眼球! 一入門口就已經見到大大隻字寫住「瑞士卷大特價」,究竟有幾平呢?6蚊兩件、10蚊就有一條5件,圍起都係2蚊一件,係抵喎!依家喺連鎖麵包店要買條瑞士卷閒閒地都講緊20蚊起跳,一條瑞士卷正常都解決到2日嘅早餐/下午茶啦!仲有四款口味任你揀,分別有原味、朱古力味、綠茶味同拿破崙口味!特價嚟講選擇都算幾多! 平霸買咗10蚊條嘅拿破崙瑞士卷,雖然話就話係平嘢,但水準一啲唔差喎!面頭嘅拿破崙碎碎都算多,食落有嘢咬吓感覺冇咁齋,另外奶油忌廉分量都算足。食落感覺有種童年嘅味道,軟綿嘅蛋糕同埋帶少少油膩嘅忌廉感覺好match,間唔中食吓回味吓都幾好吖!依家呢種咁傳統嘅瑞士卷都唔係成日見了,新式西餅店多數都賣啲花巧款式,雖然有新鮮感,但價錢貴成倍咁滯呀!呢度10蚊5件真係算好抵喇! 除咗瑞士卷做緊特價,麵包類都有份。最平係芝麻包(HKD2.5)同鹹餐包(HKD2.5)!兩個半依家真係冇乜嘢買到,但就可以買到個包食喇!雖然款式冇乜花款可言,大佬,兩個半唔通想佢雕花咩?糧尾絕對係早餐嘅好選擇,除咗方便攜帶(朝早出門口趕時間嘛),最緊要係咩呀?平囉! 芝麻包嘅味道相信都唔使多作介紹啦,不過值得一提嘅係食得出佢係新鮮嘅麵包,完全冇變硬或者乾噌噌咁。 鹹餐包就比芝麻包厚實少少,飽足感相對高啲;同埋感覺到麵包焗前應該面層掃過牛油,食落有少少牛油嘅鹹香味!   平霸小評:香港地買包真係愈來愈貴,由以前嘅3、4蚊食到個腸仔包,到依家好多時都要6、7蚊先買啦!我都知香港通脹嚴重,但份糧又冇乜點脹呢!所以街霸覺得呢個麵包店嘅價錢簡直好似搭咗時光機咁返咗20年前!希望佢哋長做長有,繼續為街坊帶嚟平價抵食嘅選擇啦! 櫻桃麵包西餅 地址:元朗元朗安寧路75號地舖 電話:2638 8195 營業時間:從缺