Tagged: 芭菲

0

【滿室花香美食結合 超治癒心靈花園Café】花子舍 Florahouse

生活總係會有倦怠嘅時候,再堅定嘅信念都有動搖嘅時候,想逃離紛亂嘅環境,但無時間出走。呢間位於銅鑼灣同天后之間嘅花子舍 Florahouse就非常適合你忙裡偷偷閒。坐低一邊欣賞店主用心栽種嘅花花草草,一邊品嚐美點,匿喺呢個神秘花園入面抖一抖,輕輕鬆鬆享受用餐時光。     餐廳所擺放嘅花草,每棵都好用心種植,坐低比花草圍住,感覺就好似成個城市小花園咁。嚟多幾次分分鐘識多幾種植物添! 除咗可以坐定定喺店內歎世界,佢地仲會提供花束同可以保存2-3年嘅永生花可以比大家買走。 加拿大黑豬鞍架8oz(HKD185),豬鞍架煎到好香脆,肉質彈牙又豐腴。再配埋特製嘅蘋果醬,用咗蘋果同醋煮溶製成㗎!清清甜甜帶出豬鞍架濃厚嘅豬肉香。 慢煮三文魚扒配薯蓉和雜菜(HKD178)三文魚扒食落無比鮮嫩,肥美又有豐富魚油,外皮又夠甘香。原來店主先以慢煮方式將三文魚入袋慢慢浸熟,再落鍋煎香,所以先至咁外脆內嫩咋!再配埋帶有奶香嘅薯蓉同雜菜,仲有自家製茄醬,啖啖鮮茄,真係一啲都唔馬虎。 嚟到當然要試下佢地嘅特飲Very Berry Smoothie(HKD65),混和多種莓同士多啤梨,再加入乳酪製成,入口酸酸甜甜夠晒凍冰冰,啱晒女仔熱天消消暑! 玫瑰草莓芭菲(HKD52)入面裝住滿滿嘅忌廉、啫喱同士多啤梨同雪糕,最特別係面層加咗玫瑰花碎碎,聞落陣陣花香,入口又香甜!要嚟影相呃Like又得! 花子舍 Florahouse 電話:2320 1198/6110 8487 地址:銅鑼灣信德街2-3號百威商業大廈2-3號地舖 營業時間:星期一至五:11:00-21:00;星期六至日:11:00-22:00

0

【抹茶控注意!食住雪糕遊世界】Kafulin Gallery

你喜歡旅行嗎?想逃離香港嗎?相信大家無時無刻都會有去旅行嘅打算。小編喺灣仔見到一間以旅行為主題嘅雪糕店,店舖內外都有店主周遊列國嘅相片和擺設。小編見到之後,十分羨慕店主有咁多咁美好嘅回憶。據說成日去旅行嘅店主仲親身到日本拜師學藝,所以店內主打日本雪糕,雪糕味道比坊間更加正宗! 單單喺店舖外就已經知店主熱愛旅行,玻璃窗貼上世界大地圖,非常搶眼。每個人都好想去曬地球上每一個地方,小編都唔例外,依間店舖真係望梅止渴,充滿旅行感覺。 牆上掛滿店主喺唔同國家影過嘅照片,顧客嚟到可以置身於唔同國家感覺之中,慢慢享受美味嘅雪糕。佢地仲會不時轉下主題,而家呢期係日本軍艦島,嚟到就可以睇下軍艦島有咩靚相啦! 日本京都宇治抹茶阿法奇朵(HKD36) 首先,抹茶雪糕嘅質感細滑。要做到依種效果,相信需要下唔少嘅苦功,再倒上熱嘅抹茶Latte,冷熱同時喺口腔交織。抹茶豐層次感,味道更為突出。 宇治抹茶軟雪糕筒 Premium Cone (HKD43) 雪糕用咗日本京都宇治抹茶做成,加上日本白玉丸子、十勝紅豆、蕨餅及自家製的抹茶曲奇,配上香脆窩夫雪糕筒。抹茶雪糕香濃軟滑,紅豆香稔加上煙韌白玉丸子,口感非常豐富。 草泥馬芭菲(HKD42) 以秘魯草泥馬為主題,牛奶軟雪糕雪糕上加上一塊草泥馬造型藜麥曲奇,可愛得嚟又非常健康。自家製黑糖蛋糕粒同楓糖焗南美藜麥,口味獨特之餘帶點異國風情。蛋糕嘅綿密、雪糕嘅軟滑同藜麥嘅香脆,入口後真係點食都唔夠喉。 京都宇治焙茶拿鐵 (HKD30/Hot) 香濃日本焙茶加上奶泡,細滑之餘又保留到濃郁嘅茶味,絕對係雪糕之外又一好選擇。 紫薯拿鐵(HKD30/熱) 未飲已經聞到紫薯香味四散,入口之後濃濃紫薯香氣更留於口腔縈繞,紫薯控應該會好鍾意! Kafulin Gallery 地址:灣仔巴路士街17-21號樂景大樓地下4號舖 電話:3709 8434 營業時間:星期一至五:12:30-22:00;星期六、日及公眾假期:12:00-22:00