Tagged: 茶葉蛋

0

【90後創業涼茶舖x台飲店 茶葉蛋+芋圓豆花雙冠軍】津生堂

最近見到旺角金雞廣場隔離開咗間新嘢喎,睇招牌以為係中式涼茶舖,望真啲原來除咗賣涼茶之外,仲有賣芋圓豆花同台式飲品,連大熱嘅黑糖珍奶都有喎! 旺角涼茶舖來來去去嗰幾間,小編間唔中都會去飲返杯清吓熱氣嘅。點解揀喺旺角賣涼茶又賣埋台式飲品呢?老闆李先生話自己本身有做開涼茶,開頭諗住涼茶crossover台式飲品,後來覺得可以試吓做埋甜品,就膽粗粗試吓。 涼茶舖通常賣埋茶葉蛋,津生堂都唔例外!老闆仲話佢哋嘅茶葉蛋(HKD6/隻)非常受歡迎,唔少客人一買就買十粒八粒走,試過有客人一口氣買走40粒添!差啲清晒貨咁滯呀!咁受歡迎當然有理由啦,原來啲蛋係由老闆嘅媽媽每朝用足料嘅茶葉、醬油、花椒同八角等香料去烹煮,一煮就要煮足幾個鐘,但又唔可以一次過煲太耐喎,煲太耐蛋就會老,但煲太短時間又會唔夠入味,所以對於烹煮時間嘅控制非常重要㗎!每隻蛋都係十足心機、血汗,唔怪得街坊咁捧場啦! 一搣開就聞到花椒八角嘅香味,望落滑捋捋咁,咬落入味非常。蛋白入味得嚟一啲唔老,估唔到連蛋黃都入晒味,6蚊一隻值回票價。6蚊其實偏貴少少,但堪稱係我食過最好食嘅茶葉蛋之一,忍唔住俾10隻手指公呀! 除咗茶葉蛋每日新鮮製作,豆花亦係每日新鮮撞㗎!自家製豆花又香又滑,豆味十足!招牌豆花芋圓(HKD25)連球雪糕都係自家廠房製造,出面食唔到㗎!芋圓大大粒勁彈牙,QQ感十足。芋泥亦係自家手製,夾埋豆花一齊食香滑又鮮甜,連糖漿都唔使落呀!25蚊碗大大兜,食完覺得自己好似食咗成碗飯咁,每款材料都勁多,作為飯後甜品2個人share都得呀! 唔止賣涼茶,連台式飲品同甜品都撈埋,認真緊貼潮流喎。老闆話始終旺角地區係遊客集中地,唔似屋邨涼茶舖會有班人固定嚟飲涼茶,所以就一於提供埋年輕化啲選擇俾客人,傳統同創新並行,OK喎!黑糖珍珠奶茶(HKD19)用咗港式奶茶底,再加黑糖珍珠,飲落充滿港台風味。珍珠每日新鮮熬煮,味道幾香濃㗎! 身為90後嘅李先生本身有份正職,依家仲要兼顧埋舖頭,咁辛苦為咩呢?「個女啱啱出世,趁仲後生咪搏吓囉,依家唔搏唔通40、50歲先嚟搏咩?到時就唔敢㗎喇!」都係嘅,趁有能力跳出comfort zone當然要試吓啦!小編覺得佢哋嘅甜品喺旺角嚟講真係算超平,大家行過記住支持吓喇! 津生堂 地址:旺角洗衣街57-59號金雞廣場地下8號舖 電話:6774 2265 營業時間:不定    

0

【力撐小店人情味濃 14蚊超足料糯米雞】平霸

喺網上發現呢間林記小食,知道佢除咗燒賣出名,原來仲有好多其他小食都好好味,最緊要價錢好親民,平霸又點可以錯過呢! 燒賣(HKD6蚊/5粒) 就咁睇個樣同平時食開嘅燒賣有啲唔同,因為佢啲燒賣係全人手自製,每粒size都唔同㗎!食落口又的確好彈牙,而且有魚味,就咁加豉油已經好好味喇! 糯米雞(HKD14) 14蚊就有隻足料糯米雞邊度搵呀? 本身諗住咁平會好似7仔嗰啲細細件咁,不過原來size係超大,差不多有成隻手掌咁大,絕對飽肚喎;而且入面仲有雞翼、臘腸、冬菇同雞肉等,勁足料喎! 糯米軟滑可口,荷葉味香濃,絕對值得一試呀! 茶葉蛋(HKD3蚊/隻) 唔知點解依家出面啲茶葉蛋愈來愈貴,好少有機會見到3蚊隻嘅茶葉蛋。睇落蛋殼已經浸到變晒色入晒味咁,果然食落有淡淡嘅茶葉香味,入晒落隻蛋度,好香,尤其係隻蛋黃,超好食呀! 平霸小評:今次呢間林記小食果然不負我所望,燒賣有驚喜之餘,糯米雞都一樣咁正,而且老闆娘好好人,好熱心又好態度,小店先有嘅人情味呀,小編力撐! 林記小食 地址:石硤尾偉智里1-3號白田購物中心G25號舖 電話:9675 5522 營業時間:星期一至日: 08:00-21:00 《平霸》平食四方,歡迎各界報料。