Tagged: 茶餐廳

0

【實測網民負評灣仔老茶記 湯麵冇味菠蘿油嗦水氣】伏務台

最近留意到灣仔老字號茶記金鳳茶餐廳嘅菠蘿油同湯麵喺網上有好多負評,湯麵又少湯到變撈麵,小編就去試吓係真係假先。 呢度舖面細細,但出名程度都令佢有唔少客,所以坐得都幾逼。卡位設計都比一般嘅細張,就算兩個成人夏天坐都好易手踭碰手踭,唔好講依家凍啲著多咗衫。 好多網民俾菠蘿油嘅負評係包唔夠熱,外皮唔脆同有水氣,所以小編叫咗特價午餐(HKD49),有餐包或菠蘿包(加HKD3)、奄列同一碗湯麵。不過呢間舊式茶記仍然未裝熱櫃,如果冬天嚟又撞唔唔啱出爐時間,都難啲食到熱辣辣嘅包。 好彩小編去食嗰陣啱啱出爐,所以菠蘿包溫度適中,表面脆口;味道上都只屬一般及冇咩甜味,完全靠牛油嚟支撐;不過塊牛油只係偏室溫嘅溫度,完全唔「冰」,食唔到冰火交融嘅感覺。 雖然包本身都熱,但包底就有嚴重嘅水氣問題,令到包底嗦晒水變成發水麵包咁腍晒。 奄列正常,但湯麵就有網民話少湯到好似撈麵,而且唔夠熱。不過小編又好彩冇遇上呢個問題,取而代之係冇味囉。無論湯麵定係另外再叫嘅沙嗲牛肉烏冬(HKD34),都好似用滾水煮完裝起先加湯,而且兩碗麵條上枱已經有啲發脹。 不過烏冬嘅湯仲淡過湯麵,加上冇味又發脹嘅烏冬,真係有啲難入口。好彩沙嗲牛肉味道合格,唔會太鹹,不過將沙嗲汁撈埋落湯都唔係好救到啲烏冬。之後小編見有兩枱客人淨食餸,烏冬都冇咩點食囉……。成餐只有出名嘅奶茶OK,有時都唔可以因為老字號嘅光環而以為全間舖都有一致嘅水準。   小編伏氣:3星(5星滿分) 入伏點:金鳳茶餐廳 入伏價:特價午餐(HKD52)、沙嗲牛肉烏冬(HKD34) 中伏by #MOMO 美術by #MOMO 攝影by #MOMO 《伏務台》歡迎各界報料。

0

【連登仔投訴找少錢唔俾返 收銀姐回應:規矩等埋數】食焦

遇到收銀找少咗錢,但係都冇得攞返,應該點做先好?有連登仔開po話有日lunch去咗調景嶺間翠河餐廳食晏,叫咗個三色蒸水蛋有蛋殼喺入面都算喇,仲要埋單發現收銀找少咗錢,「個餐$43 我怕太多散銀比左$55,跟住個收銀望都唔望就以為我比$50,直接找左$7比我,咁我本身另轉身諗住走,但feel到唔對路……」 呢位巴打仲將自己同收銀姐嘅對話打晒出嚟,簡單啲講,個餐43蚊,巴打俾55蚊,係要找返12蚊嘅,但係收銀找咗7蚊啫,佢擰返轉頭同收銀講,點知俾人話「總知你另(擰)轉左身就當走嫁啦,走左就唔會比返你」、「 總知宜家冇得比返你啦,如果我地今晚真係多左錢,咁你聽日黎拎返」! 結果巴打嬲到連嗰7蚊都冇要到嘅!巴打話po上網唔係想公審間餐廳同個收銀喎,只係想大家唔好貼錢買難受咁話!當然有唔少人回應佢,話佢做乜唔當場報警呀、食43蚊點解要俾人55蚊,更多人係話翠河根本就係難食,一早唔應該去喇! 小編打咗去調景嶺間翠河,接電話位員工原来就係當日位收銀姐,佢話:「如果個個擰轉背先話找少咗錢,個個係咁,我哋唔使出糧啦!我做收銀咁多年,遇過太多呢啲情況,嗰日嗰位係後生仔嚟嘅,我冇話係邊個錯,點都要等嗰晚埋數睇吓係咪真係多咗先,呢個係規矩!」 收銀姐就話當晚埋數,係多咗15蚊!「我只係話唔可以即場俾佢,要埋咗數先得!嗰晚係多咗15蚊,佢嗰7蚊係佢自己唔要俾返我嘅!(咁係咪有12蚊多咗會俾返佢?)我都話佢第二日嚟,我咪俾返佢囉!」巴打仲去唔去呢?

0

【網民留言鬧錯係「三哥」 譚仔神回化解公關災難】食焦

鬧人都要揀啱對象先得㗎,唔係就盞自己攞嚟衰,鬧人反被其他網友圍剿就唔好啦!好似最近有位網友喺譚仔雲南米線個專頁度留言,猛咁投訴譚仔服務差,「比(俾)少少錢呢,就好似欠咗佢咁!」仲話譚仔再唔做返好啲服務態度,做幾好嘅宣傳都係多餘咁話! 由於呢位網友喺唔同嘅po度都留言投訴,但係留意返,佢其實想投訴嘅係「譚仔三哥」,而唔係「譚仔雲南米線」,當譚仔回覆返佢,「土瓜灣我哋冇分店」,同埋「我哋唔係呀『乜哥』」,呢位網友都一樣死心不息,仲話返「你哋都係譚仔,我唔理得你咁多……」 面對呢位鬧錯人嘅網民,譚仔嘅回覆好彩都挽回其他網民嘅like,唔少人都話處理得好喎,至於鬧錯人嗰位,就梗係俾人鬧爆返轉頭啦,有人話睇一次就笑一次,仲話下次想投訴大家樂唔好食,不如去大快活投訴,個個網友都一面倒話佢鬧錯人仲好意思死撐囉!其實譚仔同三哥反正都先後俾「丸龜製麵」收購咗,去「丸龜」度投訴唔知又點呢? 講到話鬧人反被人圍攻呢回事,喺網上世界成日發生,近排都有唔少例子!除咗話譚仔變三哥俾人笑之外,另外有位網友po咗炮台山一間茶記喺餐廳內張貼嘅通告,寫住「自取紙巾,每張十元」,結果有唔少人係撐返間茶記,仲話「你估紙巾唔使錢」、同埋遇正有網友係熟客仔,即刻話曾經試過叫侍應俾紙巾,係唔使收錢都會俾,只係餐廳唔想人浪費紙巾任咁搣,先會話要自取十蚊啫!都係嗰句啦,識睇梗係睇留言喇!

0

【鬼馬港式風味cupcake】Twinkle Baker Decor

想體驗茶餐廳風味唔一定要行入茶餐廳嘅,Twinkle Baker Decor新出「扮清糕By Twinkle」茶餐廳系列cupcake,總共有 8 款口味,飲品同食物都有。無論造型、味道同個名都一樣咁抵死!一齊去試下港式鬼馬創意風味! 整個系列中總共有 8 款口味,都係港式茶餐廳成日都會見到嘅食物同飲品,包括凍檸賓、凍檸茶、紅豆冰、好立克、港式奶茶、咸檸七、奶醬多同菠蘿油。每一款設計都別出心裁,好似茶餐廳飲品真係會有茶餐廳紙杯托,仲分埋冷熱飲,凍飲仲有埋匙羹飲管添!無論外觀定係味道「像真度」都幾高㗎,等小編同你一一介紹! 凍飲有:凍檸賓(HKD28)cupcake入面有細粒粒柚子,食落滲出淡淡香味。忌廉上面有一粒粒紫色糖,同檸檬片嘅酸味互相輝映。 凍檸茶(HKD28)帶有少少酸味。忌廉上面佈滿糖粒,食落甜味大於酸味。鍾意飲檸茶少甜嘅朋友可能唔多啱喎! 紅豆冰(HKD28)蛋糕上面係紅豆味忌廉,粒粒砂糖令到外觀有冰凍嘅感覺,好細緻。蛋糕質感幼滑,入面仲有紅豆夾心,味道比較甜。 咸檸七(HKD28)上面嘅青檸係新鮮青檸嚟,真係可以榨出青檸汁㗎!蛋糕入面夾住舊話梅肉,忌廉上面灑上少量鹽粒,無論睇落定食落都有咸檸七嘅感覺。 熱飲有:好立克(HKD28)用熱飲杯裝住嘅好立克cupcake,上面有好立克粉同忌廉,上面仲有塊好立克餅,賣相十分精美。比較輕口味,適合唔太鍾意食甜嘅朋友。 港式奶茶(HKD28)造型抵死,睇落脹卜卜嘅忌廉做出熱飲感覺,上面仲灑上紅茶葉碎。忌廉連蛋糕都係奶茶味,茶味咁香濃,食完今日唔駛飲奶茶啦! 奶醬多(HKD28)忌廉上面有幾粒麵包粒。忌廉係花生醬味,仲淋埋煉奶,有齊奶醬多元素。 菠蘿油(HKD28)上層特意造成菠蘿皮,夾住大大舊牛油,同真正嘅菠蘿油一樣入口即溶,同埋一樣咁邪惡! Twinkle Baker Decor 地址:尖沙咀東部麽地道 63 號好時中心 2 樓 282 號舖 電話:2114 0052 營業時間:星期一至五:08:30-20:00,星期六及日:11:30-20:00