Tagged: 荃灣

0

【荃灣意粉小店足料外賣 $30高質意粉配大碗薯蓉】平霸

今次去到荃灣,又俾平霸搵到高質好味嘅平價西餐喇!呢間喺小巷中嘅小混混主打西式意粉、小食,一間咁低調嘅小店竟然有高質西餐水準,價錢仲夠晒親民,20蚊就食到各式意粉,認真估唔到喎! 呢間意粉外賣店隱身喺荃灣鱟地坊嘅小巷當中,規模都幾細,當日都只有一個店員看舖,由落單到炮製食物都係自己一腳踢。而且呢間小店只做外賣生意,冇堂食位㗎,淨係得一張高身枱俾你喺度立食。 由於呢間小店規模細,Menu上嘅菜式選擇的確唔多。全店食物簡單分為A、B兩區,A區食物每款HKD20;B區可以食物每款HKD12。想試多款嘅,就可以A+B咁揀,都係HKD30咋,仲可以自由配搭添。 今次就嗌一個A+B餐(HKD30)嚟試吓先,揀咗卡邦尼芝士煙肉意粉(單價HKD20)同黑松露野菌芝士煙肉薯蓉(單價HKD12)。呢度啲嘢食全部都係落單後新鮮即煮嘅,不過當時唔多人,店員亦好快手,等咗十分鐘左右,全部食物就到手喇。 先講卡邦尼意粉先,雖然裝意粉嘅外賣碗唔算太大個,但啲意粉裝到滿一滿,分量都幾多,Lunch食都應該夠飽。而忌廉汁沾滿每條意粉,煙肉碎夠多,入口Creamy,意粉亦軟硬適中,有高質西餐廳嘅食物水準。 呢款黑松露野菌芝士煙肉薯蓉同樣都係超晒班!一打開蓋就有好香嘅黑松露味,偏橙黃色嘅薯蓉質地幼滑,面頭淋滿黑松露野菌汁,仲有細細塊嘅煙肉片增加口感。不過略嫌煙肉比較少、芝士味唔夠突出。而裝薯蓉嘅外賣碗比裝意粉嘅細少少,但分量就同KFC個大薯蓉差唔多,單食呢個做下午茶都幾滿足喎。 平霸仲額外買咗碗蜆肉周打忌廉濃湯(單價HKD12),一樣充滿驚喜呀!雖然只係十幾蚊,但質素一啲都唔Hea。一潷就有勁多蜆肉同細細粒嘅帶子仔,仲有大量粟米同薯仔呢啲配料喺入面添。每一啖都濃稠足料,非常抵飲!   小混混 地址:荃灣鱟地坊80-84號華成樓B座地下B3號舖 電話:5922 8600 營業時間:星期一至日:12:00-22:00 (星期三休息)  

0

【老媽拌麵進軍荃灣開分店 新推三款香港限定台菜】老媽拌麵

前排喺將軍澳開咗香港第一間海外店嘅老媽拌麵,再下一城喺荃灣開分店喇!仲推出咗三款香港限定嘅新菜式,不過依然保存台灣風味㗎,快啲睇吓係咩嚟啦! 舖頭喺商場4樓嘅轉角位,有少少入但唔算難搵。全店以木系裝潢,同台灣店嘅風格一致。店內都幾寬敞,大約有40幾個座位。 嚟到呢間台式料理店,梗係要食台灣小菜啦!滷鴨舌(HKD46)、滷雞翅(HKD42)同百頁豆腐(HKD30)都滷得幾入味。 呢三款就係香港限定嘅新菜式,以鹽酥雞、魷魚圈同紅燒牛肉幾樣標誌性嘅台式食物入饌,自然充滿台灣風味啦! 講起台菜,梗係諗起牛肉麵!呢款新推出嘅川味紅燒半筋半肉牛肉麵(HKD78),牛肉同牛筋嘅比例係1:1!牛肉夠腍,牛筋就爽口彈牙,焦糖色嘅湯底感覺好濃。一般紅燒牛肉麵入口通常都會有啲辣,但呢款就唔係好食到辣味,而係花椒、八角等香料味比較突出嘅濃郁牛肉湯。 麵底係比較粗身嘅刀削麵,麵質唔會太腍,幾有咬口。而且每條麵都嗦晒牛肉湯,夠入味喎。 除咗牛肉麵之外,呢兩款新推出嘅飯食都值得一試!左邊嗰碗豆乳香香雞飯(HKD62)用台灣嘅腐乳配炸到酥脆嘅鹽酥雞,味道非常特別,但唔覺意蘸多咗腐乳醬就好鹹。而右邊嘅魷魚圈滷肉飯(HKD68)以時令嘅魷魚入饌;魷魚圈滷到入晒味,但食落依然軟腍鮮味,同地道嘅台式滷肉飯好夾呀。 呢杯老媽黑糖珍珠朱古力(HKD33)都係新品嚟㗎!朱古力做到少少掛杯效果,除咗黑糖味之外,朱古力味都好濃郁,唔鍾意飲奶茶都有多一個選擇啦。 如果都係想飲傳統啲嘅台式飲品,呢度都有老媽黑糖珍珠鮮奶茶(HKD33),有三層唔同顏色,賣相都唔差喎,飲落黑糖味都幾重同偏甜,但茶味就略嫌唔夠濃;想fresh啲就可以揀樽裝嘅阿里山高山冷泡茶(HKD22)。   老媽拌麵 地址:荃灣大壩街4-30號荃灣廣場4樓441A號舖 電話:2385 3330 營業時間:星期一至日:11:30-21-30

0

【王牌冰室全日瘋狂1折 $5大碟飯$2桂花珍珠奶茶】平霸

嘩嘩嘩!今次食飯埋單平到小編都嚇親呀!南豐紗廠新開業嘅王牌冰室同王牌冰茶今日開始第二波試業優惠,連續九日平日推出低至一折嘅激筍折扣。小編梗係唔執輸,即刻去享用今日嘅一折優惠啦!幾蚊就食到大大碟嘅飯,仲跟埋餐飲,唔講仲以為時光倒流囉。食完嘢去埋隔離嘅王牌冰茶,買杯一折嘅桂花系列手搖茶繼續行街,真係又飽又歎呀! 由今日至5月30日嘅平日,王牌冰室堂食指定套餐同王牌冰茶嘅桂花系列手搖茶做一至九折優惠,今日第一日就一折、第二日兩折,如此類推。咁抵嘅限定優惠錯過咗就唔抵啦,記得把握機會呀! 先俾大家睇吓頭三日嘅優惠menu,早、午、茶、晚餐都有,仲日日唔同款添。想知之後幾日食咩就留意佢哋Facebook專頁喇! 小編嚟到午市時段就嗌咗金針雲耳蒸雞配白飯(原價HKD52),成碟蒸雞嘅分量幾多吓,驟眼睇有成6、7件雞,食落啖啖肉又夠嫩滑,蒸嘅時間控制得啱啱好喎。套餐跟埋熱飲,食晒真係幾飽肚。 咁抵食就梗係嗌多樣嚟試啦!呢款王牌咖喱豬軟骨配白飯(原價HKD52/午,HKD58/晚)喺今日嘅午市同晚市都做緊一折㗎,分量都係正常size添。豬軟骨煮得夠腍又入味,咖喱汁好香濃,撈飯食好滋味囉。 王牌冰茶四款嘅桂花系列茶飲都做緊同樣嘅折扣優惠,小編試咗桂花珍珠·觀音王(原價HKD27[左])同埋桂花珍珠奶茶·龍井(原價HKD28[右])。一折飲到咁大杯,仲有埋佢哋自家製嘅手工桂花珍珠,真心抵到暈呀!如果想試清甜啲嘅口味,又有桂花蜜釀同清香桂花凍配觀音王、東方美人或普洱,都幾多選擇吖。   平霸小評:今日同大家實測王牌冰室嘅試業限定優惠真係抵食到暈呀,指定嘅優惠菜式日日唔同之餘,每餐都有三款食物俾你揀添,餐餐食都唔會厭喎。而且分量冇因為優惠而縮細,冇抽水成分添。加埋手搖茶都有同樣優惠,呢幾日俾自己食好啲飲好啲都唔肉赤囉。今次食咗咁多嘢都係用得HKD18,唔止早食早享受,仲早食平幾嚿呀!   王牌冰室、王牌冰茶 地址:荃灣白田壩街45號南豐紗廠3樓304號舖 電話:5208 7703 營業時間:星期一至日:07:00-21:00

0

【令和夏祭自助餐買二送一 回本必食清酒一口牛+燕窩】The Platter

鍾意日式料理嘅朋友要留意喇,悅品酒店‧荃灣嘅酒店餐廳The Platter依家開始逢星期六、日同公眾假期都有「令和夏祭美食之夜」自助餐,可以食盡多款特色和風料理同燕窩甜品系列,仲每人送一份海膽玉子燒添!呢個自助餐有買二送一嘅優惠,除返開唔使HKD300位,即刻睇吓小編試咗咩正斗菜式啦! 前菜同主菜嘅食物款式望落幾多選擇,甜品corner就自成一角。餐廳仲幾多梳化位,坐得舒服自然食得開心啲啦。 先試餐廳送俾每位客人嘅海膽蟹肉沙律釀玉子燒,睇吓玉子燒上面啲海膽幾多、幾飽滿! 日式清酒一口牛即叫即整,牛肉煮到啱啱熟,口感嫩滑仲有淡淡酒香喎。 食肉獸記得試日式醬燒牛肉同羊髀,想更加啖啖肉可以叫師傅切厚啲。 其他日式料理仲有日式和風薄餅、京都三文魚籽茶碗蒸、宮崎南蠻脆炸雞等等,呢啲都係必食推介。 除咗日本美食,好少自助餐有嘅片皮鴨呢度都可以任食,仲有師傅喺你面前即片添。 頭先講過有燕窩甜品系列,小編又點會錯過呢個重頭戲呢!燕窩北海道3.6牛乳布甸同埋冰糖燉燕窩夠晒滋補養顏。另外,仲有Häagen-Dazs雪糕都係任食㗎!   「令和夏祭美食之夜」 供應日期:即日起至9月8日嘅星期六、日及公眾假期 收費:成人:HKD388/位,長者及小童 HKD288/位(另收加一服務費)   The Platter 地址:香港葵涌青山公路葵涌段443號悅品酒店‧荃灣地下低層 電話:3891 1928 營業時間:星期一至日:07:00-22:00

0

【懷舊冰室南豐紗廠試業 地道茶餐+手搖茶飲1折起】王牌冰室、王牌冰茶

作為打卡聖地之一嘅荃灣南豐紗廠,入面啲餐廳都極具特色。啱啱由大圍殺過嚟,喺南豐紗廠開新店嘅王牌冰室同王牌冰茶都有唔少打卡位,店外有特色百子櫃,店內有懷舊霓虹燈牌配「是是旦旦叉燒蛋飯」搞笑句子等等。試業期仲有唔少激筍優惠,5月20日開始一連九日嘅平日,堂食指定套餐同桂花系列手搖茶飲首日一折,第2日二折,第3日三折,如此類推至第9日就九折。講咁耐,即刻睇吓有咩人氣菜式先! 熱門麵食 王牌特濃沙爹牛肉麵(HKD36/早餐;HKD44/常餐)之所以做到王牌推介,係因為佢唔同一般茶餐廳只係喺雞湯底上面淋少少沙嗲汁,而係直接將沙嗲汁加入湯底煮成「沙嗲湯」!成碗麵味道超濃厚,仲慢慢滲出花生醬味,食過一定返唔到轉頭!牛肉煮得入味同夠滑,分量仲幾多添。個餐跟埋牛乳炒蛋、牛油多士同熱飲,亦可以轉蒜蓉多士(加HKD2),咩時段嚟食都夠飽啦。 爆香蔥油煎豬扒撈公仔麵(HKD49)嘅豬扒大塊到要摺埋上碟,食晒其實幾飽肚。撈勻啲麵仲聞到蔥油香,色香味齊全喎。 王牌鑊氣推介 招牌之一嘅特濃牛乳炒滑蛋叉燒蝦仁雙拼飯(HKD58/午餐;HKD64/晚餐)俾滑嘟嘟嘅蛋皮包住,見到juicy嘅蛋汁同秘製甜豉油已經流口水囉。加上大大件又軟腍嘅叉燒,配埋爽口大蝦,啖啖肉勁滿足! 餐廳專登搵懷舊嘅圓形麵餅整成脆炸肉絲炒麵(HKD52/午餐;HKD58/晚餐),幼身麵條炸得好鬆脆,仲夾得好方便添。而且餸料另上,唔會浸腍麵餅。 另一款特色菜係咖喱吉列豬扒飯(HKD54),同樣有超大大塊豬扒,炸過依然肉嫩多汁。吉列脆漿夠薄又唔會油淋淋,加埋香濃嘅咖喱汁撈飯一流! 邪惡下午茶 好多人出街食飯都想喺邪惡同家庭味之間攞個平衡,香煎肉餅飯限定下午茶(HKD30)就啱晒喇。煎到微微焦香嘅肉餅撈埋蛋汁一齊食,係加分嘅配搭呀! 沙爹牛肉潛艇(HKD32)夾滿牛肉,麵包吸埋沙爹湯汁,可以將所有精華食晒。 經典常餐 瑞士汁雞翼撈麵(HKD46)係冰室不可或缺嘅菜式之一,雞翼煮得超入味,肉質軟腍嫩滑。想濕口啲可以揀湯麵,跟埋牛乳炒蛋、牛油多士同熱飲都幾滿足。 三款爆餡三文治之中,芝士鹹牛肉炒蛋(HKD36)係最受歡迎。想食到滑溜嘅口感就唔好掛住影相喇,趁熱食呀!   9日「瘋狂折扣」低至一折 堂食指定套餐就有優惠喇。 健康手搖茶飲 王牌冰茶主打健康手搖中國茶飲,所以用咗冰糖控制甜度,即使正常甜度都有清潤嘅感覺。特別之處仲有品牌自製健康配料,手工桂花珍珠(HKD4)、清香桂花凍(HKD5[右])同蜂蜜洛神花凍(HKD5[上])都好有咬口㗎。 5月20至30日期間嘅平日,桂花系列四杯飲品同樣有「瘋狂折扣」優惠,每人每日限購一杯。如果想要香濃茶味有桂花珍珠 • 觀音王(HKD27[左]),鍾情台式風味又有桂花珍珠奶茶 • 龍井(HKD27[右])。 5月31日至6月30日又有「追加優惠」,只要點豐乳奶蓋(HKD29)或黃金奶蓋 • 觀音王(HKD35[左])就可以按對應日子,用優惠價追加同款奶蓋一杯,星期一加HKD1,星期二加HKD2,如此類推。 呢度嘅奶蓋質地幾綿滑,又唔會過濃而掩蓋茶香。焦脆奶蓋 • 觀音王(HKD35)薄薄嘅焦糖脆片令奶蓋鹹中帶甜。介紹咗咁多款,說好的健康手搖中國茶飲出場喇,選擇多到不能盡錄囉: 佛檸馬蹄 • 龍井(HKD26[左])清甜爽口;王牌鮮果茶(HKD38[中])有多款足料水果;冰燉雙柚觀音王(HKD30[右])就幾解滯。 女士恩物桑寄生赤棗普洱(HKD26[左])同赤棗桂圓茶(HKD23[右])都有size大粒嘅赤棗,齋睇已經feel到滋補,飲完食埋啲料更加不得了!...

0

【Fusion煲仔飯破格配搭 蟹肉×海膽啖啖鮮味】砂煲兄弟

煲仔飯要歷久常新都要玩多啲花款,主打煲仔菜嘅砂煲兄弟啱啱喺荃灣開分店,仲推出新款fusion煲仔飯俾大家試吓添。依家試業階段只供應午餐同晚餐,即刻睇吓有咩特別啦! 先仲介兩款西日fusion嘅煲仔飯,鰻魚牛蒡煲仔飯(HKD88)喺飯面鋪上烤過嘅厚身日本鰻魚同鮮牛蒡,魚油令口感更滑溜,又聞到牛蒡淡香嘅味道,感覺冇咁膩。 另一款係黑松露蟹肉海膽煲仔飯(HKD168),甘香嘅海膽加上鮮甜蟹肉同黑松露醬,係難得味道偏清香嘅煲仔飯。 西式啲嘅有慢煮鵝肝慢煮牛柳煲仔飯(HKD138),嫩滑嘅牛柳加上充滿油香嘅鵝肝,仲唔係食肉獸首選?! 馬莎拉雜菜黃薑煲仔飯(HKD78)加咗黃薑粉喺飯底,餸料用咗多款蔬菜,啱鍾意食得健康嘅捧場客。 中式嘅有川味黃鱔煲仔飯(HKD82),辣味滲入鱔肉,又唔會蓋過黃鱔本身嘅鮮味,都開胃喎。 想叫邪惡小食又有芝士蝦煲仔煎麵(HKD92),可以揀公仔麵或米粉。煎到脆口嘅麵餅淋上芝士汁,令人好回味囉。   砂煲兄弟 地址:荃灣荃華街3號悅來酒店悅來坊地庫一層B119A號舖 電話:從缺 營業時間:星期一至日:08:00-22:00

0

【荃灣$4.5芝士撻平通街 $9大件黑森林切餅任揀】平霸

平霸去麵包舖除咗留意入面啲麵包夠唔夠平之外,仲會睇埋佢哋啲西餅甜品抵唔抵食㗎!呢間喺荃灣街市街嘅貝嘉餅屋啲西餅就逆市咁平,出面閒閒哋都十幾蚊一件嘅蛋糕切餅,呢度仲係賣緊9蚊,4個半銀錢嘅迷你撻都係熱賣之選! 喺轉角位嘅餅店有兩個門口,麵包舖嚟講環境唔算細。上午時段有唔少客人幫襯,更幾度大排長龍。 門口嘅蛋糕櫃入面竟然見到各式切餅只係賣緊9蚊一件,仲有成5款揀,點可以唔試吓佢哋呢? 呢件黑森林切餅(HKD9)望落好大件,上面鋪滿朱古力碎,朱古力碎係偏甜嗰種,蛋糕整得好鬆軟,朱古力味夠濃;忌廉都係朱古力忌廉嚟,中間嗰層同平時啲黑森林蛋糕一樣有啲提子啫喱,食落口感都幾豐富,抵食! 藍莓芝士切餅(HKD9)面頭嘅藍莓醬都幾多,冇用到新鮮藍莓整,係用比較甜嘅藍莓果醬,果醬本身都有少少藍莓肉,配埋蛋糕一齊食就中和返個甜味。蛋糕入口同樣都幾鬆軟,忌廉同蛋糕嘅比例啱啱好,唔太膩。雖然佢叫芝士切餅,應該係用咗忌廉芝士嚟整層Cream,但就唔係好食得出芝士味,平霸就覺得啲忌廉可以打得更幼滑,不過唔使10蚊就食到件Cake好滿意㗎喇! 呢兩款的的骰骰嘅係餅店熱賣嘅迷你撻。撻皮係平時食開嘅牛油撻皮,咬落去質感比較實在,搽咗啲朱古力醬喺撻皮上面,所以冇俾啲餡整腍個撻皮,食落依然係乾身脆口嘅。 淡啡色嘅迷你栗子撻(HKD4.5)有唧花造型,啲栗子蓉唧得幾高,唔會話得嗰兩圈。味道方面,食落都有栗子味,甜度適中,不過栗子蓉入面應該有溝到忌廉,唔係純栗子蓉。 白色脹卜卜嘅係迷你芝士撻(HKD4.5),面頭灑咗啲朱古力粉,呢款同坊間食到嘅芝士撻完全唔同,佢用咗忌廉芝士,食落芝士味唔係好出,但味道都唔錯,只係食晒成嚿會有啲膩。   平霸小評:一間餅店要經得起通脹嘅考驗真係唔易,9蚊一大件蛋糕嘅水準唔差,仲要賣得咁平,好難得㗎喇!4.5蚊嘅迷你撻可以買嚟過吓口癮,平時餅店仲有賣紫薯撻㗎,好受食客歡迎添,不過平霸嗰日去到就賣晒喇,惟有下次再試啦! 貝嘉餅屋 地址:新界荃灣荃灣街市街166號地下 電話:2615 1123 營業時間: 星期一至日:06:15-21:30    

0

【荃灣$15平價飯窮人恩物 多料魚香茄子撈汁送飯】平霸

今次平霸去荃灣覓食!喺荃灣呢間大家姐小食店都算出名㗎,好多時平霸都會俾佢嘅小食吸引到,忍唔住手就買返兩串嚟食。呢次又點呢?竟然俾平霸留意到餐牌又有抵食平嘢,就係15蚊一碗嘅平價飯喎!係真唔係呀? 小食店主要賣煎釀三寶、串燒同雞蛋仔呢啲小食,餐牌上面都有一項「精選飯類」係全日供應嘅,最平只係15蚊一碗,不過就註明係「針量級」,即係細細碗啦!好,平霸點都要試吓,即刻嗌咗15蚊嘅魚香茄子飯同豉油皇雞翼飯各一碗。原來嗌嘅時候都有得揀Size,$15細碗、加多5蚊就加大碗少少(輕量級)。 旁邊有用餐區俾客人坐喺度食,以小食店嚟講空間感都算多喇,仲有店員幫手執嘢清潔,乾淨企理。 呢碗魚香茄子飯(HKD15)望落幾吸引,唔似食開嗰啲頹飯,個汁聞落都幾濃郁。驟眼睇魚香茄子分量都幾多,蓋住成個飯面。呢碗飯叫得做針量級,自然稱唔上大碗啦,不過女仔食完應該都夠飽,胃口大啲嘅就可能要嗌埋其他嘢食喇。問心嘅,呢個價錢有呢個分量同質素,真心抵喎! 平霸食嘅時候真係隨便一羹都有唔少茄子,啲茄子夠腍身,色澤幾靚㗎,又煮得入味。除咗茄子,都食到幾多肉碎,入口有微辣。魚香茄子個汁唔會好稀,有少少芡喺飯面,用嚟送飯食一流!成個飯惹味又唔會食到成口油,值得一試㗎! 就咁睇個名,以為會俾雞中翼,點知呢度嘅豉油皇雞翼飯(HKD15)係成隻雞全翼放喺飯面,隻雞翼仲滷到成個色水都係焦糖啡咁,睇見都想食! 啲雞翼係預先用豉油汁煮定嘅,嗌嘅時候店員會主動幫你再用豉油汁翻浸隻雞翼。雖然成碗飯冇其他配料,但係雞翼個豉油汁撈飯都好夠味,反而係略嫌個飯冇乜味,如果俾多少少豉油汁就更好喇!   平霸小評:15蚊一個飯預咗係頹飯質素,冇乜味道可言,點知食落又幾有驚喜喎。有時食飯又唔想食咁多嘅話,呢個細細碗又夠平就啱晒,仲係打工仔恩物添,以後糧尾又多個選擇喇! 大家姐小食店 地址:荃灣青山道144-172號荃豐中心1樓 電話:從缺 營業時間:星期一至日:07:00-23:00  

0

【荃灣海濱街市潮食文青西餐 蛋沙律牛角包酥脆爆餡】街霸

邊個話去街市食嘢環境一定差㗎?今次街霸帶大家去荃灣海濱街市入面嘅Tong’s Kitchen & Yan’s Dessert,就咁睇門面完全唔覺得喺街市入面喎,天藍色外牆仲有種小清新嘅文青感添! 呢個街市地理位置比較隱蔽一啲,就喺正海濱花園平台,冇地面入口,入去要左穿右插,街霸都兜咗幾個圈先搵到路呀!好彩呢間西餐嘅顏色夠醒目,一入街市就見到佢喇! 呢度出晒名食焗飯同焗長通粉,街霸今次就叫咗白汁忌廉雞皇焗長通粉(HKD46)。大大兜長通粉,面頭鋪滿芝士,一潷落去啲芝士就牽晒絲,啖啖都食到烤到焦香嘅濃厚芝士,超正呀! 焗長通粉最好味嘅地方莫過於醬汁掛晒喺中間嘅通心位置,每一啖都食到奶味、芝士香濃嘅白汁,至於「雞皇」方面呢,其實我就覺得叫白汁雞扒飯比較貼切喇!雞扒超大塊,肉厚得嚟又嫩滑,成個長通粉都好Perfect呀! 另外好受歡迎嘅有蛋沙津牛角包餐(HKD39)!呢個餐啱晒啲Lunch唔太鍾意食飯嘅朋友仔,蛋沙律牛角包超開胃,包身酥軟可口,夾埋滿滿嘅蛋沙律做餡好吸引呀!入面夾有生菜、青瓜同蕃茄,起到解膩作用。一咬落去就爆餡,啖啖都食到蛋沙律同埋包身,蛋沙律食落感覺超新鮮,蛋黃醬同蛋白嘅分量剛剛好。睇唔睇到牛角包嘅紋路?唔係一張紙咁薄嗰種牛角包,而係咬落好有層次,食唔停口呀真係!呢個包令街霸超Surprise呀! 伴碟嘅雜果沙律亦好清新,裡面有新鮮薯仔同粟米粒,仲有椰果同菠蘿添!呢個沙律配牛角包真係鮮到絕呀! 街霸最愛:雖然焗長通粉街霸都好愛,但今集最愛都係蛋沙律牛角包!以前未試過喺第二度食呢種以牛角包為主食嘅Lunch,估唔到身於街市竟然會整一啲西餐新款式喎!味道一流之餘夠晒清新,食完唔會有罪惡感仲好飽肚,啱晒女仔嘅小鳥胃呀!食完呢個餐,連下午茶都慳返,加上環境舒適,如果平日下午茶時段,同三五知己一齊食吹吓水相當唔錯! Tong’s Kitchen & Yan’s Dessert 地址:荃灣怡康街1-7號海濱花園D平台街市1樓1A舖 電話:5168 6328 營業時間:星期二至日:11:00-16:30;18:00-20:45