Tagged: 荔枝角

0

【團拜推介5大高質Party Room VR+極限運動一站式配套】

新年除咗周圍去拜年,仲要留啲時間約埋班friends去玩嘅。未諗到去邊好?不如搵間設備齊全嘅Party Room盡情咁玩啦!除咗有打機、唱K、Board Game、打牌、波波池呢啲設備之外,依家啲Party Room仲有好多估佢唔到嘅活動㗎!即刻介紹5間空間夠大又有特色主題嘅Party Room俾大家,等你哋成班老友鬼鬼做運動放吓電又得、瘋狂打卡呃like又得,仲有高科技新奇又刺激嘅體驗,實滿足晒你哋唔同嘅願望。   獨家首創冰上曲棍球體驗 呢間3500呎嘅Fun Fun Fun Party Room坐落荔枝角,北歐風設計嘅室內環境簡約舒適。除咗有300呎變色唱K波波池之外,最特別係有獨家首創嘅室內冰上曲棍球場!呢度仿照專業冰上曲棍球訓練場地設計,仲有齊成人同小朋友嘅裝備,嚟返場合家歡嘅冰上曲棍球體驗先。 而全港首創嘅六人對戰乒乓波同Nerf Gun海綿彈槍體驗都係呢度必玩嘅遊戲設備!   Fun Fun Fun Party Room 地址:荔枝角光昌街3號鴻昌工廠大廈7B 電話:6441 2443 營業時間:24小時營業 費用:HKD198/4小時、包無酒精飲品任飲 (20人起包場)     1:1真人版大富翁+旋轉木馬 又要IGable,又要好玩?長沙灣嘅Kowloon Party Room就啱晒你喇,分咗大富翁木馬房同酒吧風格房兩大類型。呢間大富翁木馬主題房就設置咗一個真人版嘅巨型大富翁,遊戲內容係香港版本,自然玩都玩得投入啲啦。 成班女仔聚會梗係要瘋狂影相打卡啦!呢度個粉紅旋轉木馬咁夢幻,真係少女心爆發呀。另外,仲有個藍白色大型波波池,兩種唔同風格都有,閏密相ready!  ...

0

【Super Girl Yanny新開打小人餐廳 滑嘟嘟海南雞配香口油飯】圍威喂

唔去鵝頸橋都有得打小人?冇錯呀,因為Super Girl Yanny同朋友一齊喺荔枝角新開嘅東南亞菜餐廳圍威喂,逢星期六14:00-16:00都請嚟喺鵝頸橋專業打小人嘅姐姐駐場,只要點嘢食就可以享用呢個服務發洩吓!如果夾唔到星期六嚟,都可以寫低字句掛上牆。大家發洩完一定有心情食餐勁啦,即刻睇吓呢度嘅惹味人氣菜式先。 呢套就係打小人姐姐嘅專用工具喇。 店內嘅牆畫都同餐廳名一樣,提忙碌嘅香港人要輕鬆啲。 都真係有人將返工嘅怨氣寫低喺度喎。 如果晚市嚟食招牌嘅海南雞(HKD138/2-3人份),半隻雞分量啱啱好可以人人試啲。雞肉滑嘟嘟仲幾多肉添,皮同肉之間亦有層「啫喱」,口感一流。如果想配香口又粒粒分明嘅油飯(HKD18/碗),一碗都幾多,如果兩個女仔可以share食㗎。 檳城炒粿條(HKD98)係惹味啲嘅炒河粉,有爽口嘅蝦肉、油香十足嘅臘腸、嗦晒味嘅芽菜,鹹香得嚟唔會太重口味。 呢度既然主打東南亞菜,梗係要試咖喱啦!呢道黃咖喱軟殼蟹(HKD148)嘅咖喱唔太辣,椰香味會慢慢滲出嚟,絕對要撈飯囉。兩隻軟殼蟹肉質飽滿,沾滿咖喱汁都幾惹味。 鍾意食串燒的話可以點串燒拼盤(HKD188),有齊厚切牛舌、大蝦、沙嗲豬肉同沙嗲雞肉各2串,肉量十足,其實兩個人食都幾飽。 鍾意小食嘅又可以點圍威喂拼盤(HKD128),脆卜卜春卷、彈彈牙魚餅、扎扎跳蝦餅同泰式香葉包雞四款小食之中,後面兩款啖啖肉得嚟,泰式香料味道相對比較重,而雞肉仲幾滑添。 想refresh吓味蕾可以點杯新鮮果昔木瓜奶奶(HKD34/右),果味好重,奶味就偏輕淡;或者好多人鍾意嘅金桔話梅蘇打(HKD22)都一樣出色,杯底有唔少金桔肉,令成杯味道好濃郁,但唔會有甜膩感喎。   圍威喂 地址:荔枝角青山道495號誠信中心地下1號舖 電話:2350 6268 營業時間:星期一至六:07:30-22:00(星期日休息)

0

【11蚊4粒手掌咁大麻糬球 鮮果雪米糍勁Creamy抵食】平霸

荔枝角呢間將軍堡有茶餐廳同麵包店,主要做附近街坊生意,唔少客人對佢哋麵包店嘅甜品糕點都讚口不絕,價錢仲好貼地,今次平霸就睇中咗麻糬球同埋雪米糍喇!有幾抵食即刻睇落去啦! 喺正大馬路嘅將軍堡有兩個相連舖位,一邊係茶餐廳、另一邊就係麵包店。 下午4點幾去到,麵包款式唔算好多,驟眼睇有廿款左右,反而甜品糕點就比其他麵包舖多,至少有十幾廿款,而且賣相精緻,唔係普通西餅款,價錢仲幾平。 睇睇吓原來係QQ麻糬球(HKD11/4粒) ,size真係細過隔離個包少少咋,大過平時啲麻糬球成個有多喎,11蚊仲有4粒,可以隨意配搭芝士或朱古力兩種味,平霸未食已經覺得執到寶。 嗱!平霸冇誇張㗎,呢粒芝士味麻糬球真係有手掌咁大,面頭有少少烤過嘅芝士,但係買嘅時候應該已經出咗爐一段時間,唔夠熱辣辣咁都正常嘅。粒麻糬球扁身少少,入面幾飽滿,唔似一啲麻糬球咁空心嘅。咬落幾煙韌,仲有少少軟心嘅芝士喺入面添,圍起一粒麻糬球唔使3蚊,抵呀! 朱古力味麻糬球就比芝士味嘅細粒少少,但都幾乎遮得晒成隻手掌。面頭有啲焗溶咗嘅朱古力粒,但唔算有好多。食落朱古力味反而比想像中濃,見到入面都有啲溶溶哋嘅朱古力喺度,用咗比較苦嘅黑朱古力粒嚟整,所以朱古力味相對上比較重。 各款雪米糍(HKD12)亦係舖頭嘅熱賣之選,有芒果(左)、藍莓(中)同士多啤梨(右)三種口味俾客人選擇。雪米糍並唔係平時細細粒嗰種,比長洲糯米糍更大,Size同拳頭差唔多。唔好睇佢大大件又賣得咁平就以為揸流攤呀,入面唔係就咁用果醬㗎,而係放鮮果做餡,全部真材實料,係咪抵食先? 三款雪米糍都用好薄嘅糯米皮包住水果同鮮忌廉,買嘅時候店員會喺凍櫃拎出嚟,包住雪米糍嘅皮依然好薄好軟,完全唔覺得乾同硬。入面啲Cream好滑身,加埋鮮果食唔覺膩,食晒成個都冇問題!芒果雪米糍(HKD12)啲芒果分量都幾多,有成三、四嚿,芒果顏色幾深黃仲幾甜,唔係用啲好酸嘅生芒果,感覺有少少似食緊芒果班戟咁。 藍莓雪米糍(HKD12)就有少少唔同,因為藍莓本身冇乜味,所以除咗鮮藍莓之外,仲加咗有果肉嘅藍莓果醬落去,令到藍莓味會出啲。加咗藍莓醬嘅雪米糍就甜身少少,但因為啲Cream冇乜甜味,所以甜度都適中,會食到新鮮藍莓同啲果醬入面嘅藍莓乾,幾有層次感。雖然落咗果醬,但都唔會因此減少鮮藍莓嘅分量,仲有成7-8粒,抵讚呀! 士多啤梨雪米糍(HKD12)就只有新鮮士多啤梨喺裡面,大概兩粒士多啤梨再開邊嘅分量。士多啤梨都算鮮甜,但味道就冇芒果同藍莓味咁濃。因為雪米糍入面勁多Cream,個皮又煙韌,所以係比較難切嘅,成個拎住咬嚟食就最滿足喇!如果唔係即刻食嘅話,最好返去雪多陣,等啲Cream挺身啲,會更加好味。   平霸小評:手掌咁大嘅麻糬球煙韌軟熟,11蚊就有4粒,除返一粒都唔使3蚊,早餐買嚟食兩粒都飽啦,仲有兩粒留嚟當下午茶,窮人恩物呀!除咗麵包抵買,估唔到麵包店嘅甜品都可以咁高質,包住新鮮生果嘅雪米糍,皮夠薄身又唔會穿,成個雪米糍勁Creamy又滑身,加埋鮮果唔會膩,12蚊物超所值! 將軍堡 地址:荔枝角長沙灣道808號香港紗廠工業大廈1及2期地下C2B 電話:2989 1221/2989 1222 營業時間:星期一至日:06:30 – 23:00

0

【玩盡假期9粒鐘 20個攤位任你狂食喪玩】香港掂檔街頭嘉年華

7月1日放假仲未知道去邊度玩?荔枝角當日就有一個街頭嘉年華,20個遊戲同飲食攤位比你一次過狂食狂玩,仲有連續7粒鐘唔停嘅音樂同歌舞表演添呀! 「香港掂檔 Made In Hong Kong」係個戶外嘉年華,有超多特色地道小食攤位,好似雞蛋仔、魚蛋、牛雜,香港人至愛小食都齊晒!  除咗有地道小食,仲有回憶嘅味道呀!港人熟悉嘅多個品牌同機構,包括九巴、天星小輪、荔園、海洋公園同HMV等等仲會開設互動遊戲同特色飲食攤位,以遊戲方式大派禮物!大家可以一邊食、一邊玩,享受超強香港風味嘅一日! 唔止有得食有得玩,下晝1點鐘仲開始有連續7粒鐘嘅精彩表演,歌舞表演、街頭音樂、水晶球雜耍、團體舞蹈及魔術等馬拉松式送你送上。想玩盡一日九粒鐘,完全無難度啦! 香港掂檔街頭嘉年華 日期:2017年7月1日星期六 時間:12:00-21:00 地點:荔枝角長義街(D2 Place一期及二期對出) 舞台:D2 Place 二期 G/F 費用:全免

0

【人氣必食雪糕「蕃」外篇】Smokey Ice

SMOKEY ICE既大名,深信係雪糕界已經享負盛名,無論佢之前推出既「鐵板雪糕牛扒」定「雪糕炸豬扒」,本身好食之餘,仲可以自拍黎呃下LIKE,絕對係外內兼備既頂級雪糕,但老闆當然唔會固步自封,不斷創新,令到顧客享受更多快感。絕對係雪糕界既創意達人! 招牌用咗霓虹光管,簡單粗線條而簡單突顯雪糕店美式既風格。而紫藍既用色都突顯SMOKEY ICE本身帶有玩味既感覺。 而店舖內牆身和桌椅都用黑白色為主打,希望帶街頭一點既味道出來,令顧客黎到都不會太拘束,隨意一點。 SMOKEY ICE其中一樣主打特色係依個夢幻雪糕杯(HKD40-46)啦!本身杯底放左乾冰,既保持雪糕冷凍既溫度,而且同時令到雪糕向上噴煙,營做出夢幻既特效。仲有!見到啲味道都知唔係一般雪糕,除左有坊間一般有既味道之外,仲有一啲獨特味道,例如:馬騮搣,菠蘿包等等,真係驚喜一浪接一浪! 如果食過之前味道仲未滿足既話,依個新出既北海道鮮茄味雪葩(HKD46)就岩晒大家,除咗杯雪糕仙氣爆滿之外,佢仲選取左北海道蕃茄直接磨成溶整成雪葩,食落去酸酸甜甜,夾雜住蕃茄肉,感覺似沙冰,係炎炎夏日之下透心涼。 心諗,點解一間西式既甜品舖會有港式腸粉,望真啲,原來係好似係‧腸粉套餐(HKD58),「腸粉」用椰子卷製成,而「魚蛋」就炸糯米糍,再加士多啤利,菠蘿同埋自家製豆腐味雪糕,一食落去,椰子夾埋朱古力醬味道濃郁,加上外脆內軟既炸糯米糍,最後食返生果平衡返,絕對係另一夏日消暑佳品。 除左甜品之外,佢地既小食都同樣出色,千島醬窩夫雞堡(HKD40)就係其中例子,窩夫取代本身漢堡包,多了一份鬆軟同口感,內裡雞肉透過油炸鎖住肉汁,令到雞肉依舊香脆多汗,再加上新鮮蕃茄同蔬菜,絕對係消閒小食中絕對好選擇。仲有,雞堡供應時間為下午茶時段(14:30-18:00)。 Smokey Ice (荔枝角分店) 地址:荔枝角長義街9號D2 Place 1樓101號舖 電話:6153 0309