Tagged: 華御結

0

【華御結熊本風味新品 雞肉飯糰乾到似肉鬆】伏務台

食飯夠正氣,見華御結新推嘅熊本美食巡禮出咗兩款新飯糰就試吓啦!有豬有雞再整個蟹肉,本應感覺Perfect池,但係食完小編只能沉默以對…… 熊本縣位於九州,華御結今期就同熊本縣當地嘅企業合作,採用來自熊本縣或九州嘅美味食材。 九州產高菜灸燒豬肉(HKD16)官方介紹:「豬肉以生薑及蒜蓉提味,再經火炙帶出香味,與帶有鹹香的九州產高菜味道成絕配。」 入口甜甜哋,有少少汁,有肉碎咬到,但味道點解似阿媽煮嘅梅菜燜豬肉呢?冇灸燒嘅感覺,係極中式味道嘅飯糰,不過唔難食就算啦。 熊本大阿蘇雞肉碎(HKD16)官方介紹:「熊本天然環境下飼養的大阿蘇雞,肉質特別鮮嫩,並有低脂肪低膽固醇的特性。」 雖然唔期望真係新鮮煮嘅雞咁嫩滑,但佢冇汁之餘,啲雞肉乾到似肉鬆咁。小編食咗半個就分俾親愛嘅同事分甘同味,等佢食完我開估係雞肉餡,佢呆_咗,頭頂有烏鴉飛過…… 最後食松葉蟹肉沙律(HKD16)第一次試呢款,諗住係長賣款式應該好啲啦,點知沙律醬同肉嘅比例係1:2,似食沙律醬飯糰多啲。雖然唔期望成條肉撻落嚟,但都唔好食完唔知已經食咗吖,華御結唔係出名多餡㗎咩?!   小編伏氣:食得飯糰就係懷念日本味同想多啲餡㗎啦,但今次華御結嘅新品變咗中式味真係唔夾囉,仲要係肉乾,新品都係唔好亂試。長賣款式都好,松葉蟹肉沙律餡料分量同之前嘅鰻魚比真係差天共地。3個飯糰加埋HKD48,唔算難食,但食得華御結就係想有啲質素啫,咁樣搞法即係叫人食開一款好嘅唔轉款啫!   入伏點:華御結 中伏by #為食加菲貓 美術by #Mui Mui 攝影by #為食加菲貓 《伏務台》星期一伏務大眾,歡迎各界報料。

0

【便利店鰻魚飯糰 邊間啲飯硬掘掘?】伏務台

唔少人去親日本都瘋狂食飯糰,香港雖然唔係周圍都有飯糰食,但愈嚟愈多地方有得賣喇!今次買咗最常見嘅7-eleven、OK便利店同華御結,用返同一款材料嘅飯糰,同樣用唔叮嘅方法,食佢最原味,睇吓邊個最唔掂! Circle K 鰻魚飯糰 (HKD13.5) 包裝寫明用珍珠米,話就話新鮮製造而且有效期得兩日,咁真係放多一日都唔新鮮啦?有寫埋Hot&In教你放入微波爐叮完好食啲,不過字就有啲細,未必個個會留意到啦! 埋嚟睇吓,啲汁都算幾多,但係啲飯!發生咩事?飯已經壓到好實,口感偏硬,食落去有醋味,鰻魚分量同燒汁味都多,但飯醋就有啲搶咗啦!紫菜就唔多掂,跟足指示去做,一打開啲紫菜碎甩晒出嚟,包起嚟都危危乎喎! 價錢︰▲▲▲▲▲ 鰻魚︰▲▲▲▲△ 米飯︰▲▲△△△ 醬汁︰▲▲▲△△ 總分︰14 (20分滿分)   7-eleven 御之簡食 照燒鰻魚飯糰 (HKD13.9) 出晒名話去日本取經嘅7仔飯糰,一樣可以叮嚟食,Logo設計本身已經同7仔完全唔同,同OK一樣即刻跟住指示開嚟食! 出事了,啲飯壓到睇唔到飯粒,連啲汁都好似封印咗流唔到去啲飯度,喂,又話同日本合作,搞到咁㗎?試埋啲鰻魚,腥味有啲重,仲要無咩汁,今次唔知點食好? 價錢︰▲▲▲▲△ 鰻魚︰▲▲△△△ 米飯︰▲△△△△ 醬汁︰▲▲△△△ 總分︰9 (20分滿分)   華御結 燒鰻魚御結 (HKD16) 旨在分享日本嘢食嘅華御結,用嘅係100%日本米,包裝同其他一樣以簡潔為主,雖然分店仲未有好多,但款式係咁多間入面最多,有效期一樣係即日要食,咁小編就即刻開嚟食啦! 華御結受歡迎都係有佢嘅原因,飯粒粒分明,三款都凍食,但得呢款軟硬適中,鰻魚唔會好多,咬落又唔會有細骨,但燒汁分量啱啱好,同啲飯一齊就very good啦! 價錢︰▲▲▲△△...