Tagged: 葵涌

0

【純素餐廳無敵環境超relax 幸福咖啡+水果酵素有驚喜】素學堂

想搵個靜靜哋又舒服嘅餐廳食嘢已經唔容易,仲要有種relax又夠chill嘅感覺,就真係要花啲心機搜尋吓喇!今次小編有新發現喇,環境舒適裝修精緻夠晒空間感之餘,仲係一間純素餐廳添喎,呢間Loving Nature啱晒素學堂介紹啦!餐廳店員個個都咁nice,小編愈食愈有親切感,成個feel都咁正,食物又係點?即刻睇埋落去啦! 餐廳招牌上寫住Fortunate Coffee字樣,原來就係餐廳嘅宗旨,即係希望每個人嘅生活都可以幸福快樂,所以店裡面有好多同「幸福」有關嘅擺設,小編第一眼就俾呢個咁特別嘅鐘吸引咗,睇落感覺好治癒!小編都希望新一年大家都幸福快樂呀! 首先登場係牛油果天貝壽司配香煎餃子(HKD59),天貝係印尼嘅一種獨特黃豆食品,由黃豆發酵製成嘅餅狀食品,亦都叫做黃豆餅,口感軟綿,食落有啲似菇類或堅果類嘅味道;而餃子都做得唔錯,皮薄餡多,食落好香菇味。 白汁鮮蔬牛油果意粉(HKD59)有陣陣嘅牛油果香,白汁同配料嘅分量好足唔怕dry,不過白汁就唔算好濃,食慣重口味嘅朋友可能會覺得淡,但小編覺得可以接受。 大啡菇芝士牛油果漢堡(HKD80)都幾大份㗎,漢堡裡面有純素芝士,而大啡菇嘅味道濃郁,所以食落幾滿足,但出乎意料之外係小編覺得薯仔仲好味…… 滑腐皮雜菜配飯(HKD59)嘅賣相幾靚,有啲似金字塔。可能有腐皮嘅關係,食落會諗起傳統中式齋菜,白飯加咗少少紅米,而配料都好足,清清哋有飯有餸啦! 沙嗲串燒(HKD35),小編覺得沙嗲汁做得好出色,沙嗲味道夠香夠入味,不過就唔辣,值得一試。 蘑菇芝士粟米批(HKD32)啱哂下午茶食,純素芝士嘅味道融入蘑菇同粟米,都幾濃郁!餡料好足,所以食晒成個都有啲飽㗎! 輪到甜品喇,左邊係無麩質抹茶草莓卷(HKD40)賣相非常可觀,無麩質賣點已經吸引,而呢個抹茶草莓卷係用椰子片、水果再加抹茶粉之後風乾而成,所以會有椰子嘅香味,而抹茶味幾出好有回甘,食完唔會覺得滯;而右邊嘅芝士凍餅(HKD38)分別有紅莓(後)同藍莓(前)口味,而素芝士以大豆、腰果等做成,食落口感同cheese cake冇乜大分別,反而仲滑身啲添;而凍餅最重要就係個餅底,呢個甜甜哋嘅餅底唔會太硬亦唔易散,鍾意甜食嘅素人一定鍾意! 呢個水果酵素(HKD30)又點?呢期嘅口味係紅肉火龍果(左)同甘奇異果(右),口味會不定期轉,雖然價錢唔算平,但真係值得一試㗎,因為呢個水果酵素係用手做冰糖、水果同水發酵至少半個月而成。因為發酵過,所以飲落好似水果酒咁,甜甜哋好香水果味但係無酒精嘅,我諗小朋友都會鍾意喎! 唔少得歎返杯啡,幸福咖啡(HKD40)用燕麥奶沖調,拉上心形嘅花再喺面加咗啲花瓣,有埋幸福兩隻字喺面,小編要相機飲先,打卡一流! 最後就有自家製嘅「幸福麵包」,今次試咗兩款,分別係杏仁片朱古力包(HKD33)同南瓜合桃紅莓包(HKD35),100%純素麵包不含蛋奶同蜜糖,亦無任何添加劑,仲要發酵至少18個鐘,好有心機㗎!食落比想像中軟腍,味道啱啱好唔會太濃或太淡,好適合做早餐或者口痕嘅時候食!   Loving Nature 地址:葵涌葵榮路30-34號Edge1樓107號舖 電話: 3628 3884 營業時間:星期一至六:11:00-18:00

0

【輕食外賣店素菜+茶飲 朱古力蛋糕味嘅茶係咩?】素學堂

今次素學堂帶大家去到葵涌嘅Green Impression Tea Bar,呢度主要做外賣生意嘅,堂食座位唔多,只得大約4個。近半年加多咗好多素菜選擇,除咗有唔同嘅素沙律輕食,仲有小食同果茶賣,佢哋仲係德國D&B嘅獨家代理,D&B係歐洲歷史最悠久嘅茶葉生產商,有好多稀有品種嘅混合茶同花果茶㗎! 呢個糖心雞蛋米牛油果沙律(HKD45)用咗糖心雞蛋、大麥米、黑豆、牛油果、紅甜椒同BB波菜配青檸黑醋汁,酸酸甜甜味道好清新;有雞蛋同大麥米嘅關係,食完都夠飽肚㗎! 小編幾鍾意呢個大蘑菇蕎麥麵沙律(HKD42),裡面有大蘑菇片、四季豆、甘荀絲、紫椰菜同蕎麥麵配芝麻醬,加埋一齊食口感都算豐富。 層層疊疊健兒沙律杯(HKD28)就啱女士們多啲喇,如果有一兩餐想食清啲俾腸胃休息吓,呢個沙律係必食呀! 特色烤茄子薄餅(HKD38)買嚟當lunch食都唔錯喎,餅底厚度適中,蕃茄醬上面有6塊烤茄子,茄子唔會切得太薄,又有烤過嘅香口感。 烤素菜意大利香草軟包(HKD48)小編就覺得幾適合做早餐,至少每一啖都有餡料,而菇味都幾香,不過最好就叫店員烘返熱嚟食,因為凍咗無咁好味呢! 素食All Day Breakfast (HKD68)就有黑松露炒蛋、雜菌、蕃茄、粟米、美式焗豆、雜菜沙律、多士/麵包,配熱餐飲一杯,男士們食可能會唔夠飽! 小編都係第一次接觸呢杯蜜綠樹混合茶,朱古力蛋糕風味(HKD24),最初都唔明個名係咩意思,原來係呢隻蜜綠樹嘅茶葉,聞落會有種似雲呢拿加奶油嘅味道,再混合埋其他茶葉,味道就變咗會有啲似朱古力蛋糕,好搞鬼啫!當然飲落就梗係冇朱古力蛋糕味啦,反而係本身蜜綠樹茶葉嘅味道,即係有種甜甜哋又帶少少奶油味嘅茶香。 最後呢個鴛鴦杯(HKD19)就做緊推廣價優惠,可以一次過滿足你兩個願望,右邊係檸檬普洱、左邊係意大利血橙水果茶,兩隻味都唔會好甜,而水果味就好突出,都幾清新!當然仲有其他味道俾大家選擇啦!   Green Impression Tea Bar 地址:葵涌葵昌路72至76號life@KCC 1樓105號舖 電話:2809 2136 營業時間:星期一至六:08:00-20:00,星期日及公眾假期:11:00-20:00

0

【人氣網店開到實體店 抹茶tea set嚐盡甘甜苦】瓜破菓子店

唔知大家有冇發覺,好多甜品師傅都係男士呢?人氣蛋糕店瓜破菓子店都唔例外,老闆阿禧好鍾意日本文化,日本甜品係咪超晒班?「日本製作甜品嘅水平都幾高,除咗可以學到主流整法式甜品嘅技巧,仲有和菓子同其他類型嘅甜品。」阿禧學成返嚟就喺2012年先開網店,經過6年時間終於喺葵涌有實體店,不過仍然以預訂單為主要方向。堂食就不定時更換甜品款式,一場嚟到,小編先試主打嘅抹茶tea set,再試件裝款式啦! 店舖只有5個位,所以會以外賣為主打。 阿禧喺現場後製各款甜品,每個步驟都好仔細㗎。 抹茶尽し(HKD88)有6款,俾大家食到抹茶唔同嘅味道,點解咁講?「有啲客人食完都會話唔夠抹茶味,唔夠苦,不過我哋都係想攞到平衡嘅感覺囉。抹茶嘅甘、甜、苦等等味道都會喺呢個set入面品嚐到,同時可以試到唔同嘅質感。」 呢碗仔底有抹茶慕絲,面有團子、蜜柑同紅豆。微甘嘅抹茶慕絲淋咗蜜糖之後會慢慢出水,所以要快啲食。 抹茶白豆蓉係幾款之中小編覺得最甜嘅,同埋帶啲豆香。脆餅點少少嚟食已經好有味喇。 抹茶松露朱古力真係俾你食到抹茶嘅甘苦味。質感好滑,入口就化開,好正! 呢個黃豆脆餅有啲硬,但烘烤過嘅香味好吸引人。抹茶醬質感有別於平時嘅果醬,好流質,味道偏清新,同黃豆脆餅好夾! 清甜嘅抹茶蛋卷都深得小編歡心,蛋糕好鬆軟,濕潤唔乾;抹茶忌廉輕輕加強抹茶嘅甘香。 抹茶班戟都令人充滿驚喜!當你以為只係包住忌廉芝士同抹茶忌廉嘅時候,仲有粒甘甘哋嘅抹茶啫喱喺中間呀!試完咁多款,小編都體會到阿禧嘅苦心,唔同嘅質感配搭真係突出咗抹茶最細膩嘅味道,又同時食到多元化嘅甜品喎。好,跟住小編要攻陷餅櫃喇! 當日小編12點去到,見餅櫃銷情唔錯,不過阿禧都有啲無奈咁講:「依家開業初期,好難掌握商場人流,所以餅櫃每日大約有8-9款件裝蛋糕,每款4-5件啫。因為有時4點左右會賣晒,有時收舖又剩好多。不過賣晒都仲有堂食甜品同繼續接預訂單,因為工場喺附近。」。小編都幾好彩,下面試嘅2款cake嗰頭食緊,呢頭就賣晒喇! W(HKD42)係有2款芝士嘅芝士杯,面層係軟滑芝士cream、中間係忌廉、底層係焗過嘅芝士粒拌餅乾,一吓潷到落底就可以食到三層口感。小編本身唔係芝士愛好者都覺得幾好味,芝士唔膩又鹹淡適中,食晒成杯都唔會覺得滯喎,難怪受大家歡迎啦。 薑(HKD36)由開店到依家都係熱賣款式,杏仁撻底有淡淡清香,唔似牛油餅皮咁易散開。中間嘅檸薑忌廉質感有少少似吉士,因為比平常忌廉厚啲,不過仍然好幼滑;入口真係有陣薑嘅辣味,加上檸檬嘅酸味更容易品嚐到當中嘅甜,所以味道相對濃啲。蜜蜂仔用白朱古力而成,唔太甜亦唔會搶咗撻嘅味。 仲有自家製曲奇可以買走,款式好多元化喎。 瓜破菓子店 地址:葵涌葵昌路72-76號活@KCC 4樓409號舖 電話:2135 6705 營業時間:星期一至日:11:30-20:30(截單時間:19:30)

0

【本土人氣爆谷 避風塘味夠晒新奇! 】Pop Pop Rangers

平時去睇戲,總需要帶啲野食入去食,爆谷無疑係戲院必食排行榜嘅榜首。不過戲院買嚟買去不外乎都係一兩種味道,小編有一日咁啱見到一間專賣爆谷嘅舖頭POP POP RANGERS。發覺店舖內售賣爆谷嘅種類繁多,滿足到貪心嘅小編。聽講依間舖頭入面嘅爆谷來自美國,質素有保證,小編都忍唔住要快啲試下! 店舖喺旺角港鐵站,人來人往,好多人路過都會停低試一試咁多款唔同爆谷口味,亦都有唔少人即場買啲爆谷走。 擺設櫃上擺放咗好多唔同大細嘅包裝,無論多人分享定自私食,總有一個份量會啱你買返去。 店舖內爆谷嘅種類基本上有六種,包括有蜜糖芥末、朱古力、焦糖、避風塘、鹽同車打芝士,各有特色。此外,店舖仲會不定時推出季節限定口味,比顧客耳目一新嘅感覺。 其中四款係小編嘅心水之選。首先避風塘味(左一)感覺非常新穎,入口非常有驚喜,好似食緊避風塘炒蟹,香口惹味,係想試鹹味爆谷同重口味嘅人必試口味;焦糖味(左二)濃濃嘅焦糖包圍住爆谷,令口腔每一啖都充滿焦糖絲絲嘅細滑;蜜糖芥末味(右二)估佢唔到食落酸酸甜甜,好開胃;朱古力味(右一)絕對係皇牌之一,唔太甜,有黑朱古力嘅感覺。 其中有兩個包裝最受歡迎,中(HKD30/左)同細(HKD22/右)嘅包裝不但價錢相宜,而且買嘅份量仲可以當零食周街食。仲可以比你混多一種味,咁就唔駛食得一種味道咁單調啦。 芝士迷要留意啦,車打芝士味爆谷只可以買(HKD42)大包裝。存放時間大約一個星期左右,時間比較長,可以慢慢食,唔需要一時三刻食晒。 除左紙包裝之外,仲有罐裝(HKD70)。紙包裝食完就要掉,唔夠環保。但罐裝食完,仲可以擺喺屋企作為擺設,同擺其他野入去,一舉兩得。 如果想一大班人分享,就要買派對(HKD80)包裝,可以混埋唔同味道。開派對嘅時候,個個都啱食,總有一款口味適合你。 店舖非常貼心,每個細同中嘅包裝都有一個自家製爆谷型嘅萬字夾,呢個小小嘅心思令顧客得到爆谷以外嘅小驚喜。 POP POP RANGERS 地址:葵芳葵富路7號葵涌廣場3樓K28舗 營業時間:星期一至日: 12:00-21:30 地址:旺角港鐵旺角站19號舖 營業時間:星期一至日: 11:00-22:00 地址:太古中心誠品店L108A號舖 營業時間:星期一至日: 10:00-22:00 Online Shop poppoprangers-popcorn.com

0

【安格斯牛小排鍋飯】Castle Wine & Restaurant

有時小編發下白日夢,都會夢下自己喺城堡入面大魚大肉,做個貴族都咪話唔梳乎!但係香港地邊度有城堡呢?一齊跟住小編打開隨意門啦,就係位於葵涌嘅Castle Wine & Restaurant喇!即管入去睇下係唔係貴族級享受先! 餐廳坐落大馬路旁邊,但係入到去十分寧靜,燈光柔和。黑色同木檯櫈嘅組合,令人覺得別有格調,坐落悠閒舒適,有種低調雅致嘅感覺。 城堡入面又點可以無用心煮食嘅廚師呢?小編試咗香炸雞中翼配墨西哥辣汁(HKD68),雞翼嘅皮非常酥脆,入口感覺好輕盈,完全唔會有好肥好黏稠嘅感覺,啱晒怕肥怕油嘅朋友。自家調製嘅墨西哥辣汁亦唔辣,兼且好滑,配合灑上紅椒粉嘅巴西雞翼香濃鬆脆,食落即刻感受到廚師嘅心思! 想食海鮮不妨試試蟹皇汁蟹肉意粉(HKD168)。入面雖然混合咗蟹膏、蟹肉同忌廉,但食落去完全唔會好黏好滯,反而入口軟滑,每條意粉滑溜之餘,啖啖都食到蟹嘅鮮味。加上筍、菇,洋蔥都非常鮮嫩,真係越食越想食呀! 鍾意食飯焦嘅朋友可以試試安格斯牛小排鍋飯(HKD238)。未上到檯,已經聞到超香!碳燒嘅牛肉,食落實肉得嚟唔韌,細細咀嚼仲會有肉汁滲出。米飯方面選用嘅係珍珠米,先用牛肉同牛骨熬湯,再放入生嘅珍珠米煮,食落粒粒珍珠米都好飽滿彈牙煙韌,滲入肉味而不失米飯嘅香甜味。加上個鍋熱力十足,軟熟嘅飯底有唔少飯焦,又香又脆,食落口感豐富又香口!蔬菜亦吸收咗豐富牛肉汁,食落唔止鮮甜,仲有牛肉味慢慢滲出嚟,好正呀! 如果想悠閒飲酒歎下,仲可以試下Sangria Jug(HKD258)。以西班牙紅酒、果汁、水果同基酒調和,飲落酒精味雖然濃,但係唔會嗆喉,容易入口,就算平時唔係好飲酒都適合㗎!一支大約750ml,大約斟到5杯紅酒杯咁多,可以約埋朋友去試下喎!順便提提大家,餐廳後面有停車場,駕駛人士去都好方便㗎! Castle Wine & Restaurant 地址:葵涌石文徑1號葵英大廈地下G10號舖 電話:3708 8265 營業時間:星期一至日:12:00-23:00