Tagged: 葵芳

0

【日本金賞天丼過江葵芳插旗 招牌天婦羅25cm穴子魚】金子半之助

喺日本連續五屆攞到日本全國天丼金賞嘅金子半之助有幾好食?唔使去日本試嘅,因為佢喺葵涌新都會商場開業喇。暫時香港店會供應三款親民價招牌丼飯,其中一款仲有25cm超長穴子魚天婦羅添,即刻帶大家睇吓呢間帶江戶傳統味道嘅名店有幾正啦! 店內用上傳統日式裝潢,望向開放式廚房仲可以睇住師傅即製天婦羅,未食都已經聞到陣陣香氣。 炸天婦羅用上高純度芝麻油,喺炸嘅時候已經令食物「上味」。製成後淋上由江戶時代開始傳承三代,以純天然大豆製成嘅秘製醬汁,味道鹹甜適中,如果唔係重口味人士都唔使另加醬汁。而為咗令食客品嚐到熱辣辣嘅丼飯,丼碗以江戶時代嘅佐賀有田燒陶瓷工藝製作成空心底部,仲放入保溫櫃令丼碗保持暖笠笠添。 所有丼飯都有六款天婦羅,每碗會有2隻鳳尾蝦、以墨魚粒同干貝製成嘅雜錦海鮮餅、溫泉蛋、海苔同小青龍(荷蘭豆),最後一款先會唔同,所以簡單選擇想食嘅天婦羅「主角」就知邊碗啱你喇。呢碗超人氣江戶前天丼(HKD138)就以25cm超長穴子魚天婦羅,一上枱就帶嚟視覺震撼。為咗保持品質,未炸嘅穴子魚要達到指定長度同克重先會選用;不過上枱後放耐咗會變得稍硬同縮水,所以相機食先嘅朋友唔好影咁耐喇。 上天丼(HKD118)就用上鱚魚,肉身比穴子魚薄啲,細食啲嘅朋友會覺得冇咁頂肚。不過咪以為咁就唔啖啖肉,因為雜錦海鮮餅嘅墨魚粒同干貝都幾大粒,炸完仲好濕潤彈牙。 天丼(HKD98)就用上厚用嘅舞菇,兩大件咬落幾juicy兼爽口喎。如果食到咁上下覺得膩,可以食每個丼飯都跟嘅清甜漬牛蒡同海帶伴薑解膩。 雖然見到溫泉蛋好想篤爆佢,但店員教食到一半先撈蛋汁就可姒以試兩到種風味嘅飯底喇。 臨尾飲杯麥味超重嘅Suntory Beer The Premium MALT’s(HKD28/350ml)就爽晒,呢款比平時嘅日本啤酒濃味好多㗎!   金子半之助 地址:葵涌興芳路223號新都會商場1樓107-108號舖 電話:2661 8212 營業時間:星期一至日:11:30-22:30

0

【新都會廣場法國五月浪漫出擊 美食市集×5大打卡位】新都會廣場

聽日放假去邊度好?踏正五月當然去葵芳新都會廣場嘅La Petite France發現•品味•小法國!有花系打卡位、廿幾個小食檔同工作坊,不過每個區域嘅開放日期、時間都唔同,去之前睇清楚喇。 必到打卡位   法式春日莊園 地址:新都會廣場露天廣場 開放日期:5月1日至6月16日 開放時間:10:00-23:00(L3-l4),10:00-20:00(L5)   市集美食 想知廿幾個小食檔邊檔夠法國味就要mark實下面呢幾間喇! La Creperie有法式鹹味同甜味嘅可麗餅(HKD30-50),分別有牛油糖漿、檸檬汁糖漿、焦糖、朱古力、芝士同火腿芝士六隻味。 Les Vergers De La Silve家族以種植優質蘋果而聞名,今次推出會場限定嘅法國朱古力牛角包配蘋果醬(HKD30/右)同法國芝士牛角包配松露雞肉醬(HKD35/左)。 仲有法國盧瓦爾河谷蘋果汁(HKD30)同手工盧瓦爾河谷蘋果西打(HKD30)俾大家解渴。 La Paris 牛角包專門店。紀有法國直送到港嘅珍寶珠混合甜甜圈(HKD17起/件),有士多啤梨牛奶味、青蘋果味同可樂味。另外仲有朱古力、開心果、紅桑子、雲呢拿、咖啡同香水檸檬味嘅馬卡龍(HKD10/件),多款鬆軟嘅吉士牛角酥(HKD18-19)。 La Patisserie des Idees餅廚喺藍帶廚藝學院同斐杭狄法國高等廚藝學校畢業,佢嘅拿破崙(HKD35/件)好令人期待囉。亦可以買套餐(HKD70),配任何一件批加杯咖啡㗎。 Hexapi Honey係有機蜂蜜品牌,不過今次就有小食,法式洋蔥餡餅(HKD35/件)都幾吸引喎。   法國五月美食市集 地址:新都會廣場L3露天廣場 開放日期:5月3至5日、5月10至13日、5月17至19日 開放時間:13:00-21:00...

0

【Google 2018搵食熱搜 葵芳桃膠蘿蔔糕最hit】食焦

年尾流流,又係一大堆回顧同頒吓獎咁啦!米芝蓮指南出咗籠,入圍嘅開心、被搣星嘅都唔使愁嘅,始終都係獲得大眾口味嘅肯定先係最實際啦!上星期都有另一個重要嘅排行榜公佈咗,就係Google 2018度熱門搜尋排行榜,當然延禧呀山竹呀任何人呀呢啲實上榜啦,而有關飲食界嘅都有㗎! 搵食地區嘅熱搜十大,冠軍係葵芳、亞軍係旺角、季軍就係銅鑼灣!三甲地區都係意料中事喇,單係喺正葵芳地鐵站對面嘅葵涌廣場,葵廣葵廣你唔係未去過呀?平靚正搵食熱點,要數小食真係不二之選呀!旺角呢,旺中就梗係多嘢食,今年仲有另一個美食廣場T.O.P誕生,擸咗唔少餐廳,乜菜都有得食;而港島班霸梗係老銅啦,一條渣甸街已飲盡今年最hit嘅黑糖乜乜乜啦! 搵食地點有喇,輪到十大熱搜食材喇!登登登凳,首位係今年hit爆嘅桃膠,滋陰養顏可說係平版燕窩咁呀,乜都要加桃膠先至叫健康咁款!比較估唔到係第二位係豆腐喎,第三位係雞翼!榜尾呢就係苦瓜! 仲有食譜熱搜㗎,十甲位置真係俾各糕餅類霸咗唔少喎!芋頭糕同芋圓分佔第三同第二位,冠軍係蘿蔔糕,睇嚟有唔少人都上網搵糕餅食譜嚟整喎,甜食佔咗八個位,得雞煲同羊腩煲係鹹食,霸咗第七同第九!至於年度熱爆夜市就爆大冷喇,深水埗夜市竟然力壓港人至愛嘅台北饒河街夜市,榮登榜首喎! Google 2018年度熱搜搵食地區 1.葵芳 2.旺角 3.銅鑼灣 4.長洲 5.佐敦 6.大圍 7.中環 8.大埔 9.太子 10.葵涌 Google 2018年度熱搜食材 1.桃膠 2.豆腐 3.雞翼 4.南瓜 5.牛油果 6.海參 7.豬扒 8.秋葵 9.茄子 10.苦瓜 Google 2018年度熱搜食譜 1.蘿蔔糕 2.芋圓 3.芋頭糕...

0

【葵廣麻辣串串出位 搞鬼「真漢子」街坊超buy】麻辣真漢子

葵廣多嘢食就係人都知,競爭咁激烈,小店總要施展渾身解數,一係鬥平、一係鬥大份!最近就有間小店以出位造型跑出喎!呢間喺3樓巷仔嘅麻辣真漢子,由老闆Ryan同佢老友大碌開嘅,舖頭幾時都咁熱鬧,大碌仲好主動同路過嘅街坊打招呼,氣氛超融洽! 成間舖頭行「地盤風」,喺商場入面見到佢哋「職安真漢子」嘅打扮,真係充滿違和感,不過又幾eye-catching嘅!除咗衣著,店舖裝修同餐牌都加入咗工程界元素,播嘅歌亦係八、九十年代經典歌,好耐冇喺商場聽到播哥哥嘅《追》喇,係好feel喎!老闆開舖唔係為咗gimmick㗎,佢哋話因為屋企人真係做過職安真漢子,所以想藉住開店向各位辛勞工作嘅真漢子致敬咁話! 除咗造型同埋舖頭氣氛夠晒貼地盞鬼之外,餐牌上嘅每一樣食物都有一個度身訂造嘅名堂!啲名無厘頭到令小編落order嘅時候都大翻白眼,我想要……「幾粒蛋蛋」,點講得出口呀大佬!大碌話佢哋係睇周星馳大嘅,非常鍾意嗰種「無厘頭」嘅幽默感!當小編問佢覺得邊個名改得最好嘅時候,佢話:「其實每個都好有心機改㗎喎,『1條蟹柳』囉,因為佢個名叫『1條蟹柳』,但其實係有2條㗎!」然後小編沉默了……好爛呀! 麻辣湯底用豬骨湯做底,加咗好多辣椒同多款香料熬足4個鐘,行近啲廚房都聞到麻味十足呀。 辣度分為6級,由「初生嬰兒辣」到最辣嘅「魔鬼辣」。小編唔太食得辣,穩陣啲叫咗小辣。今次總共試咗4款食物,分別係食神唐牛(HKD8)、滑嘟嘟雞(HKD10)、麻甩老肚(HKD10)同埋幾粒蛋蛋(HKD8)。 首先講吓麻辣老肚先!大家見到牛肚坑紋內有大量花椒狀物體?見到咁其實小編心裡面怯咗怯,好驚爆菊花呀!食第一啖覺得麻味比辣味重,雖然望落紅噹噹,但其實辣味絕對接受到嘅,不過麻味就幾重,食咗兩嚿個嘴都痺埋,幾過癮嘅。牛肚質地唔韌,10蚊值得一試! 另外呢幾粒蛋蛋呢,可以歸類為大魚蛋類別,8蚊3粒價錢其實都好OK啦!食落唔算好爽口,但魚蛋意外地入味,抵食之選。食神唐牛用嘅係滑牛,即係滑蛋牛肉飯嗰隻滑牛呢!食落都入味嘅,幾蚊食到串牛其實性價比算高啦! 最後呢個滑嘟嘟雞係小編最欣賞嘅,真係好滑,滑過小編隻手仔!雞肉食落唔嚡有咬口,加埋陣陣麻香真係口水都流埋呀!鍾意食雞串嘅朋友必食呀! 除咗單點之外,仲有提供抵食套餐俾大家選擇。不過餐名就真係……少啲勇氣都講唔出口呀!呢個刻骨銘心初戀金銀情侶套餐,33蚊可以食到2串8蚊、2串10蚊嘅麻辣串,抵啦! 除咗食辣嘅人鍾意之外,相信鍾意「周星馳式幽默」嘅人亦會好buy。小編見到無論係學生、師奶定上班族都俾熱情嘅大碌溶化呀,大家路過被「調戲」時本來冇乜表情嘅臉上,突然出現害羞嘅笑容,令街坊們嘅關係瞬間變得超融洽!同大碌傾傾吓先知原來佢本身係體育老師,唔怪得身形咁fit啦,佢話其實開舖大計喺心入面籌劃咗好耐,「都係夢想嚟嘅,兩兄弟有間屬於自己嘅舖頭。」喺葵廣著住反光衣實現夢想呢件事,真係貼地又浪漫喎! 麻辣真漢子 地址:葵芳葵富路7號葵涌廣場3樓Top世界3069號T7號舖 電話:從缺 營業時間:星期二至日:12:00-22:00

0

【芒果糯米飯難食又呃秤 態度奇差永久blacklist】伏務台

平時食開唔少伏嘢嘅小編,今次終於遇到大佬了!得主就係葵涌廣場嘅泰糯米!其實食到伏嘢已經嬲啦,重點係,店員嘅態度差到真係令小編打咗個突,完全唔明點解可以差到咁呢! 貼錢買難受,大家真係唔好中伏呀! 香芒糯米飯(HKD20),睇Poster張相係好吸引嘅,可惜一見到真身,照騙無誤啦!買嘅時候,見住店員先倒啲椰漿落去,就咁睇得三樣嘢,就係椰漿、糯米飯同芒果,簡陋到呢! 味道方面,首先個芒果係非常之酸嘅,酸度大槪同檸檬差不多。芒果糯米飯好食嘅重點係,芒果一定唔可以酸! Ok,咁都算喇,個糯米飯平面睇呢,好似係full嘅,但當你打側睇吓,啲飯完全係勁唔balance,即係呃秤啫!真係完全中大伏呀,食落肚辛苦晒自己個胃! 玫瑰千層糕(HKD20/6件),又係難食㗎喎!見到個千層糕變成綠色都唔慌會好味得去邊,店員就話係加咗斑蘭落去啦,但sorry,我真係一啲都食唔到斑蘭嘅味道! 我食到嘅只係一嚿用咗好多糖整成嘅糕點,今次呢個玫瑰千層糕真係得個樣喇!請我都唔會食,甜度食完應該會有糖尿吧?   小編伏氣:食完呢間泰糯米,確認一山還有一山高,沒有好難食、只有更難食。難食都唔係重點了,因為服務態度已經扣晒大分;食物方面,唔好食得嚟又呃秤,個千層糕真心除咗甜味之外我食唔到任何味道。希望店員改善食物味道嘅同時,都可以改善埋服務態度啦! 入伏點:葵涌廣場-泰糯米 入伏價:香芒糯米飯(HKD20),玫瑰千層糕(HKD20/6件) 中伏by #愛吃的旅人 美術by #車雲 攝影by #愛吃的旅人 《伏務台》星期一伏務大眾,歡迎各界報料。

0

【葵廣超人氣小店 16蚊惹味麻辣手撕雞拌麵】平霸

一向都知葵廣出名多食店,今次平霸就介紹呢間紫天招俾大家!喺葵涌廣場地下,非常易搵! 平日下午都有好多食客幫襯,相當有人氣㗎! 擔擔麻辣青瓜手撕雞拌麵(HKD16/細),細size啱啱好啦,其實去得葵廣唔使食咁飽就可以食多幾間嘛!撈勻之後,上面都有一層麻醬,加上少少麻辣,惹味得嚟又唔會辣到噴火,唔係好食到辣嘅人都唔怕! 手撕雞分量都算足料,再加埋青瓜一齊食,夠晒fresh啦,食過都會返轉頭再幫襯! 麻辣雞鮑翅拌麵(HKD16/細),入面有齊鮑片、雞絲同素翅,但價錢都只係16蚊,真係超抵呢!呢個拌麵可能因為冇咗麻醬嘅關係,所以食落偏辣,而且有少少似食緊重慶麻辣嘅味道,辣得嚟好過癮。 如果大家食得辣嘅,不妨挑戰吓大辣喎!   平霸小評:店主好好態度又有禮貌,抵讚!因為小編唔太食得辣,佢就同小編講可以走辣,不過味道就冇咁好。今時今日仲肯聽客人講咁多又會細心俾建議嘅店主真係唔多,小編寫包單,真係味道好又有人情味呢!經過葵廣絕對要試呀! 紫天招 地址:葵芳葵富路7號葵涌廣場地下A48A號舖 營業時間:星期一至日:12:00-22:30 《平霸》平食四方,歡迎各界報料。  

0

【學生熱捧外賣店 14蚊足料三文魚丼飯】平霸

今次平霸小編又搵到間正嘢俾大家喇!呢間寿千歲出前寿司喺葵芳廣場附近,有少少難搵,不過都超多人幫襯呀!點解?食過就知佢啲丼飯同壽司除咗夠平之外,仲要係超水準!小編嗰日食咗四樣嘢都係48咋,手卷好食過爭X多多聲喎! 汁燒牛肉便當(HKD16) 牛肉飯食落其實有少少似吉野家,不過啲醬汁就好濃味同埋偏甜咗少少,其他都好ok,而且牛肉分量一定多過吉野家,啲牛又唔會話煮到太老,最鍾意佢啲洋蔥煮到淋晒又夠甜,同埋啲飯係珍珠米嚟㗎,配埋啲燒汁超好食! 醬燒三文魚丼(HKD14) 呢個價錢我真係搵唔到任何嘢可以挑剔佢,面層鋪滿晒三文魚同埋啲芝士,食落好creamy,分量又足,加上啲三文魚好似有再燒過咁,食落一啲都唔會腥,撈飯一流呀!而且飯本身有加工過好似壽司醋飯咁,所以就算呢個飯冇汁,食落都好有味,一啲都唔乾! 章魚小丸子(HKD10)     平時出面都要十幾廿蚊先食到,呢度10蚊就有成5粒呀,入面堅有章魚粒㗎!仲要唔係成粒都係粉漿,推介! 玉子手卷(HKD8) 手卷嚟講我都覺得算平㗎喇,同埋嚿玉子又真係食到落底都仲有喎!手卷簡直係學生哥至愛,有餸有飯又夠飽,8蚊搞掂! 平霸小評:小編嗰日咁啱係喺中午去到,完全俾啲學生哥包圍咗,逼到出又出唔到、入又入唔到,真係好誇張!睇嚟呢度真係學生哥嘅開飯熱店喇。雖然只係外賣店,但食物同衛生都唔馬虎㗎,而且啲丼飯同拉麵都用熱櫃裝住,就算外賣返去都唔會凍晒,最重要係咁嘅價錢,超抵啦! 寿千歲出前寿司 地址:葵芳仁芳街4號美豐大廈地下9號舖 營業時間:星期一至日:10:30-21:00 《平霸》平食四方,歡迎各界報料。

0

【試勻葵廣三大平店 20蚊手撕雞麵食上癮】平霸

平霸今次終於輪到葵廣啦!葵廣一向出名多食店,價錢仲鬼死咁平,小編精心挑選咗三間食店,有辣有唔辣,有飯又有麵,睇吓啱唔啱你哋心水啦! 第一間 三和 唔知點解去到冇咗三和個名,變咗重慶小吃,不過地址都一樣,認住K27號舖就得。小編叫咗重慶小吃套餐(HKD25),可以自選一款粉麵,套餐有手撕雞、雞胗、豬耳朵同豬雜,隔離仲有個飲嘢區,買任何粉麵可以自取一杯雪梨湯。即係25蚊有麵有餸仲有埋野飲,真心超平! 味道方面普普通通啦,唔知係咪因為小編叫咗涼皮,食落有少少酸酸餿餿味,不過整體都算係咁,料都好足,辣味夠,但佢個雪梨湯就冇雪梨味,似凍茶多啲。 地址:葵芳葵富路7號葵涌廣場3樓K27號舗 營業時間:星期一至日:11:00-20:00 第二間 無辣不歡 小編最期待就係呢間,果然冇令我失望。手撕雞蒿麥麵(HKD20),呢個性價比極高!蒿麥麵超級彈牙,加埋啲辣油撈勻食好惹味,雖然係細size,不過雞嘅分量多到好似唔使錢咁,仲要係好食㗎喎!雞皮食到嗦嗦聲,辣汁好似譚仔嘅口水雞辣油,又麻又辣,勁過癮呀,呢間小編十分推介! 地址:葵芳葵富路7號葵涌廣場2樓2019號舖 電話:6803 1280 第三間 回味無窮 行過已經見到幾多人買,一睇啲飯最平15蚊就有交易,良心飯堂呀!小編叫咗秘製雞排飯(HKD18),寫明大小同價,又係超足料,啲飯仲要係珍珠飯,雞扒食到落口仲係脆㗎,18蚊食到飽一飽,仲要係高質嘢,喺葵廣附近返工嘅朋友們太幸福了吧! 地址:葵芳葵富路7號葵涌廣場2樓C83號舖 平霸小評:葵廣果然係香港嘅小美食天堂,每間小店都又平又高汁,今次呢三間食到小編笑騎騎。歡迎大家諗唔到食咩就去葵廣行返轉啦,包你飽到捧住個肚走呀!

0

【星級口碑隱世西菜】Star Kitchen

當你諗食咩既時候,第一時間都會諗起大集團,無論快餐店,甚至餐廳,都離不開連鎖店,但係,你又有無察覺到?其實每區都會有唔同既小店,佢地靠既唔係品牌效應,只係靠口碑同本身餐廳食物既質素黎留住每一個顧客,而葵芳就有一間小店,雖然並不太鄰近地鐵站,但因為本身食物性價比高,而且同顧客關係好好,所以吸引好多附近街坊及學生光顧。 裝潢簡約,而且簡單既餐牌有心機,足見餐廳對每件事既執著同誠意。 瑤柱帶子羽衣甘藍意大利飯(HKD88) 本身意大利飯就食得多,但加埋羽衣咁藍就好少見,本身羽衣咁藍含有維他命A同C,對抗癌大有幫助,加上羽衣甘藍用左油醋調味,減少其草青味,而本身意大利飯Creamy口感,加上帶子,真係絕對要試下,對健康又有好處。 秘製醬燒豬肋骨-1LB(HKD188) 最緊要豬肋骨燒得肉曬離骨,醬汁滿滿沾成肉既周圍,依樣野絕對做到,除北之外,配菜仲有芒果蕃茄沙沙,酸酸甜甜既感覺,店主希望比坊間既多一點創意同心機,而且佢選用原隻焗薯同埋原顆黑蒜,既充滿飽滿感,同埋比起豬肋骨卻毫不遜色。 原隻南瓜意大利飯(HKD128) 為萬聖節期間限定,除左意大利飯沾上濃濃既南瓜醬,南瓜內的南瓜都係甜甜的,令味道更加平衝。 芝士焗珍寶大蝦拼香草濃烤雞扒(HKD288) 珍寶大蝦配上芝士,味道好厚實,大蝦爽口彈牙,加上其他調料,絕對物有所值,而且就咁睇起上來,真係好似一幅畫一樣野,食物質素好同時,賣相都吸引住顧客既目光。 天際星空-右(HKD38) 同 天藍碟戀 -左 (HKD38)都係用蝶豆花做主要原料,經過攪拌,可以變色,睇起上黎又靚,又可以玩,啱曬想自拍既港女們。 Star Kitchen 地址:葵芳禮芳街21號地舖 電話:9777 3132 營業時間:星期一至日: 07:30-23:00