Tagged: 蔥油餅

0

【太子小店專賣台式炸蛋蔥油餅 招牌肉鬆鹹蛋黃香脆爆漿】炸老闆

依家唔使飛台灣都食到正宗嘅台式炸蛋蔥油餅喇!喺太子新開嘅炸老闆主打一系列爆漿台式蔥油餅,佢哋嘅師傅專程去台灣宜蘭學師,務求將最地道嘅口味帶到香港。呢度嘅台式蔥油餅除咗原味外,仲有6款口味俾你揀,其中招牌嘅肉鬆鹹蛋黃、台灣經典嘅大蒜香腸同九層塔、充滿港式風味嘅餐肉炸蛋都係熱賣之選嚟㗎!呢度嘅蔥油餅好食仲充滿視覺效果,皆因入面嘅炸蛋真係好似「炸彈」咁一咬即爆,食嘅時候記得要小心喇。 每日人手新鮮即製嘅蔥油餅食落特別鬆脆,麵糰落鑊炸嘅時候會打一隻雞蛋喺上面,令兩者結合變成炸蛋蔥油餅! 呢款招牌嘅肉鬆鹹蛋黃炸蛋蔥油餅(HKD38/套餐連茶飲)喺炸到香脆嘅蔥油餅搽上特製嘅鹹蛋黃醬,再加入大量肉鬆!入口鬆脆之餘仲充滿鹹蛋黃嘅鹹香,係一款比較大眾化嘅口味。 台式九層塔炸蛋蔥油餅(HKD32/套餐連茶飲)就最有台式風味喇!新鮮嘅九層塔略略油炸後放喺搽上醬油膏嘅蔥油餅皮上,食落有啲脆身嘅九層塔味道清新,入口會散發九層塔獨有嘅香味添。 另一款經典嘅台式口味就係大蒜香腸炸蛋蔥油餅(HKD37/套餐連茶飲),不過唔係咁多香港人食到生蒜片,所以舖頭都貼心咁改用香蒜蓉。喺炸好嘅炸蛋蔥油餅上面加一大羹蒜蓉再鋪上台式香腸片,惹味到暈呀! 平時鍾意食港式餐蛋麵嘅朋友仔,今次就可以試吓餐肉炸蛋蔥油餅(HKD37/套餐連茶飲)。將厚切嘅午餐肉微微炸香,夾入餅中再搽上醬油膏。食落又估唔到午餐肉會同台式蔥油餅咁夾喎,亦食到午餐肉獨有嘅鹹香。 除咗蔥油餅之外,呢度嘅波霸滷肉飯(HKD35/套餐連茶飲)都幾與別不同㗎;佢個包裝好似杯麵咁有封口,唔怕倒瀉又衛生,方便客人外賣拎走。一揭開封口就見到滷肉同大大隻流心蛋,賣相幾吸引喎。撈埋一齊食,飯同滷肉嘅比例啱啱好,而且滷肉唔算太肥。唔好睇佢杯麵咁嘅size就好細碗,食落分量都唔少㗎,一人獨享都夠食。 呢度仲有小食賣,切成一片片嘅台式炸饅頭(HKD25)炸到金黃酥脆,唧上煉奶、灑滿花生粉啱晒鐘意甜食嘅你。一份約有十件,都幾抵食。 茶飲(HKD17/單買;跟餐免費)方面選擇都算多,5款都係自家沖製再入樽。其中人氣之選有清甜唔膩嘅冬瓜茶,同埋加入牛蒡、甘草,入口甘香又有淡淡牛蒡味嘅養生茶,夠晒健康呀!   炸老闆 地址:旺角弼街60號地舖 電話:5401 5749 營業時間:星期一至日:12:30-22:00

0

【粉嶺平價上海包點5蚊搞掂 超大件香蔥餅+爆汁牛肉包】平霸

天氣凍凍哋,有咩小食暖笠笠?梗係要食啲熱辣辣嘅包點暖吓肚啦!平霸今次就喺粉嶺聯和墟附近發現咗一間賣上海包點嘅小店上海飽點,一件大到可以遮住塊面嘅香蔥餅只係賣$5.5 ,食晒成件已經飽肚,確係大件夾抵食呀!雖然其他包點嘅分量唔係大得咁誇張,但勝在足料又多汁,性價比超高,食一個當下午茶都好滿足喇! 小店舖面細細唔算起眼,但喺平霸買緊嘢食期間,一直有唔少街坊幫襯,個個都幾件幾件咁買走,老闆娘做到冇停手。 食物款式唔算多,一眼睇晒得7款,一眼望晒有咩食同埋個價錢,非常方便。除咗菜肉包、豆沙包同饅頭喺蒸籠入面攞出嚟新鮮熱辣,其他煎嘅包點都係暖笠笠。 香蔥餅(HKD5.5)大件到要兩隻手先拎得哂,拎上手一啲都唔薄身。香蔥餅兩邊都煎到好金黃,聞起已經有好香嘅蔥油味,咬落幾香口,蔥粒唔算好多但分佈得幾均勻。 牛肉飽(HKD5) 賣相以為平平無奇,一搣開見到大大嚿牛肉餡,仲有肉汁流出嚟㗎!個包吸左啲肉汁,成啖食落去都唔會覺得鹹,牛肉味好濃,幾有驚喜。 本來見到個櫃冇哂蒸菜肉飽(HKD5),以為賣哂,問咗老闆娘先知原來仲有喺蒸籠入面。熱辣辣嘅菜肉包好軟熟,餡料主要係椰菜同豬肉,味道幾清。 生煎飽(HKD5)餡料同菜肉包個餡好似,生煎包最緊要個底煎得燶,呢個完全夠香夠燶喇!不過略嫌個皮有啲厚,好在食落冇乜油膩感啫。 除咗包之外仲有鍋貼(HKD3.5) ,比出面食到嘅大隻少少,個底又係煎得好香脆,仲多咗陣韭菜香味,又有唔少肉汁正呀!不過同生煎包一樣,都係個皮厚咗啲啫!   平霸小評:要食上海包點去啲名店或者啲乜乜生煎皇,價錢唔平㗎!論風味同性價比,梗係幫襯小店好啦!雖然今次呢間小店係就係遠咗啲啲嘅,但去開不妨試吓囉!平霸最鍾意食牛肉包,牛肉餡夠多、肉汁又濃郁,唔錯唔錯!價錢咁親民,唔怪得有咁多街坊幫襯啦! 上海飽點 地址:粉嶺聯和墟聯昌街2號A錦福大廈地下 電話:從缺 營業時間:星期一至日 10:00-18:00