Tagged: 藥膳雞

0

【深水埗滋補小店以酒入饌 花雕藥膳雞×酒香醉物】醉藥雞

叫醉藥雞並唔係因為佢哋「最弱雞」,而係少有地以酒、藥膳同時入饌嘅主題餐廳。喺深水埗新開嘅小店主打一系列嘅醉物以及唔同嘅養生雞鍋,究竟有幾滋補?睇埋落去啦! 呢度必試嘅砂鍋醉藥雞(HKD68)少有地以雞酒做湯底,雞酒特別用咗糯米酒同三斤三黃雞嚟煮,酒味唔會太濃烈,藥性比較溫和。再加入雲耳、紅棗、淮山、薑呢啲配料,湯底偏甜易入口,特別啱女士同注重養生人士㗎。 而醉雞藥膳湯米線(HKD58)就用熬咗12個鐘嘅雞湯加入當歸、淮山、北芪、黨蔘、圓肉等八種藥材嚟做湯底,火候十足。 呢度仲有唔同嘅醉物冷盤俾你歎,啱晒夏天食呀!當中嘅花雕酒加入桂花糖調味,醉物食落酒味突出之餘又唔苦。 其中嘅原隻醉乳鴿(HKD98)切片上都依然有啖啖肉嘅感覺,乳鴿肉滲透住淡淡酒香,咬落肉質結實嫩滑。 醉物之中小編大推呢款醉蝦(HKD88),驟眼望落分量唔少亦夠大隻。而餐廳對於唔同食材所用嘅花雕酒濃度同浸酒時間都特別講究,連殼嘅蝦浸酒嘅時間會比其他醉物耐,但如果浸得太耐就會令食材變苦,所以醉蝦浸酒嘅時間就大約維持喺2個鐘。咁樣蝦肉就會同樣入味而質感依然爽口彈牙,酒香濃郁喇。 想一次過試幾款海鮮冷盤,又唔想太多就可以嗌醉三鮮(HKD75)喇!除咗醉蝦之外,仲可以試埋彈牙唔韌嘅鮑魚同花螺添。   醉藥雞 地址:深水埗福榮街103號地舖 電話:3705 0477 營業時間:星期一至日:12:00-22:30

0

【太子新店招牌養顏雞湯米線 三黃雞+鱈魚膠真材實料】癡膠雞米線

要食滋補養顏嘅花膠就一定貴?喺太子新開嘅癡膠雞就話你知唔係呀!呢間小店主打養顏花膠鮮雞湯,招牌嘅癡花膠雞濃湯米線就選用三黃雞同鱈魚膠煮成,價錢親民,另外仲有用梭羅魚熬成嘅魚湯選擇添。除咗主食,連小食金磚豆腐都令小編好有驚喜㗎,即刻睇吓介紹啦! 呢間小店店面整潔,又有餐具消毒機為餐具殺菌,自然食得安心啦。而且疫情期間,餐廳仲會為每位客人送上抗炎嘅羅漢果菊花茶,非常有心! 小編一見到招牌癡花膠雞濃湯米線(HKD68),就梗係第一時間試吓啦!餐廳好貼心咁將花膠雞湯同米線分開上,湯底又有細火爐保溫,食得慢啲都唔驚啲米線浸腍或凍晒。奶白色嘅雞湯以雞肉、豬骨同鯊魚骨熬煮至少三個鐘,真材實料冇加味精,啖啖都係精華。餐廳採用皮脆骨軟、油脂豐富嘅三黃雞,雞味突出;而冰島鱈魚膠充滿骨膠原兼價錢親民,咁就食得經濟又可以養顏啦。 鍋內嘅花膠同鮮雞都好足料,花膠夾上嚟都幾大塊厚身,唔會碎濕濕。而且啲花膠係上枱前先同湯一齊煮,唔會煮到溶溶爛爛,咬落有啲爽身,不過如果可以煮得再入味啲就更好喇。另外,入面三黃雞嘅分量都有大約1/3隻,雞肉煮到啱啱好,好嫩滑,抵讚! 呢度另一個焦點就係藥膳黃酒雞湯米線(HKD60)喇!一上枱就有濃郁嘅藥材香,呢個藥膳湯底落咗川芎、紅棗、北芪等藥材加埋客家黃酒熬製,酒味唔算好強烈。佢同樣可以配埋米線、麵或米粉,嗦埋湯汁一齊食夠晒暖胃,仲特別補身㗎。 除咗雞湯之外,呢度仲可以揀魚湯添。呢款口水雞魚湯米線(HKD42)湯底係用梭羅魚熬煮,鮮味十足又冇魚腥味。配搭米線嘅口水雞相當惹味,口水雞醬汁微辣香濃,嗜辣嘅朋友仔仲可以加辣添。 最令小編驚喜嘅係呢款金磚豆腐(HKD28)!炸到金黃嘅嫩豆腐粒粒都外脆內滑,薄薄嘅炸漿混合咗幾款唔同嘅香料,所以唔使蘸任何醬汁都好夠味! 新品韓式燒腩肉(HKD46)都係必食之選。燒腩肉本身用咗秘製醬汁嚟醃,同樣入味到唔使蘸醬。包埋生菜同蒜片一齊食,可以減輕腩肉嘅油膩感,食落惹味不膩。   癡膠雞 地址:太子荔枝角道78-84號勝興樓地下D號舖 電話:9221 2245 營業時間:星期一至日:11:00-22:30