Tagged: 蛋包飯

0

【蛋包飯蛋香欠奉冇色水 咖喱汁重味精冇咖喱味】伏務台

小編有次諗住lunch食好啲,於是去試SHY Xpress觀塘外賣店嘅蛋包飯,貪佢嘅蛋牛治出名,心諗應該做蛋嘅周邊菜式都冇死,點知連累同事齊齊中伏囉…… 心水清嘅網民應該知道SHY Xpress係由前藝員伍文生開嘅蛋牛治外賣店,中午開始仲會做埋蛋包飯。小編叫咗份牛脷蛋包飯(HKD59),本來想即刻試埋招牌蛋牛治(HKD38/全日餐),點知賣晒,唯有第二日嚟賣早餐先試到。 其實小編第一次食牛脷蛋包飯已經中伏,但今次再食依然麻麻哋囉。 話明蛋包飯就先講蛋方面,蛋皮嘅顏色比較淺,食落冇咩蛋味,仲有啲未溶晒嘅鹽粒喺裡面。既然標榜專做蛋治同蛋包飯,蛋皮整到咁就要檢討吓啦。蛋包飯可以配蘑菇汁或咖喱汁,另外可以喺香蔥、粟米、蘑菇同蕃茄四款配料任揀一款。小編揀咗咖喱汁配粟米,但出品仲頹過頹飯囉……咖喱汁口感有啲粉粉哋,好似咖喱粉未開勻嘅感覺;冇咩咖喱味之餘幾鹹吓,有幾位同事試咗啖之後都不約而同講好重味精! 而且飯嘅質感太黏,唔夠粒粒分明,撈埋咖喱汁真係黏上加黏。另外,小編要白飯底,點知佢俾錯小麥飯……其實小編已經避開繁忙時間,三點左右先嚟買,當時得一兩個客,點解仲可以咁大意呢?牛脷就煎得過火喇,韌到好似食皮帶咁,冇啲牙力都食唔到呀。 第二日試埋佢嘅招牌蛋牛治(HKD32/早餐跟熱飲),相比蛋包飯就冇咁出事,但都係有同一問題,唔夠蛋味呀!唔知係咪蛋漿出事,感覺蛋黃嘅比例太少囉……而另一個問題係本身個餐咁貴唔包烘底都算,既然跟深水埗嘅新香園學整蛋牛治,咁就應該學埋佢嘅服務精神,問吓你要唔要加烘底啦,點知冇喎!雖然小編見呢間店唔係伍文生掌廚,但發現佢哋招募緊加盟店,不如同步提升品質同服務啦。   小編伏氣:3.5星(5星滿分) 入伏點:SHY Xpress 入伏價:牛脷蛋包飯(HKD59)、招牌蛋牛治(HKD32/早餐) 中伏by #MOMO 美術by #MOMO 攝影by #MOMO 《伏務台》歡迎各界報料。

0

【蛋包飯混醬配方 食得有營又健康】niji KITCHEN

講到港人最愛嘅日本食物,相信蛋包飯都實上榜!最近西日蛋包飯料理店niji bistro開咗分店niji KITCHEN,新加咗幾款特色嘅蛋包飯料理,加埋新配方調製而成嘅日式咖喱汁同赤味噌燴等,推出有「營」餐單,等客人食得健康!值得一提嘅係新店仲會騁請7成聾啞人士工作,每完成一張訂單,就會捐贈港幣$1俾香港聾人協進會,就好似佢哋個名niji(日文指彩虹嘅意思),希望可以幫助到有需要嘅人,咁有心思,唔讃唔得喇! 赤味噌燴牛肉蛋包飯(HKD64),每日用赤味噌燉牛肉三個鐘,令牛肉更香更嫩,再配合埋木魚(又名鰹魚)飯底,食落口啖啖清新,真係食得健康又放心! 明太子忌廉汁大蝦蛋包飯(HKD64),係總廚最新嘅創意推介!用咗日本忌廉汁再加入明太子增添一點辛辣,配合埋鮮香大蝦,成個口感層次豐富咗,睇見都好想食呀! 抺茶忌廉草莓及草莓汁脆焗蛋白(HKD48),呢個脆焗蛋白餅(Pavlova)加入咗抺茶同比利時白朱古力,食落香滑甘香,鬆脆又吸睛!配上女生最愛嘅士多啤梨醬汁,好match喎! niji KITCHEN 地址:荔枝角長順街15號 D2 Place TWO二期3樓310號舖 電話:3586 8103 營業時間:星期一至日:12:00-21:00

0

【爆漿蛋包飯】Asobu Bistro

食日式蛋包飯令人幸福,但傳統蛋包飯已經滿足唔到我,最近小編發現有隱世高手,就係紅磡地膽極力推介的巷仔小店,以爆漿蛋包飯聞名,店外貼滿相引死人,完全進入飢餓狀態。注意晚市時間人多,長期要等位。 店子內裡不大,只有十數個座位,細細地有日本feel,坐得近夠親近,都幾多情侶黎拍拖食飯! 餐牌用手寫很好心,見到晚巿套餐都幾抵食,只要惠顧任何一款指定的食品加$12便可轉為套餐! 包沙律和小食脆餅三重奏(+$12/轉餐價), 更可半價享用飲品。 落柯打不久,就送到雜沙律菜及意大利香草脆餅!三款食材,有煙三文魚、車厘茄 及少許鹹香的蟹籽沙律醬配意大利香草脆餅,味道簡單清新,少少地打頭陣,讓味蕾做好準備,等食主角蛋包飯! 鎮店招牌溶岩蛋包飯有5款,手打漢堡扒、豚肉、吉列豬扒、吉列大蝦和燒鰻魚,見到幅圖小編表示已餓了! 因即叫即做關係,等左一陣,終於熔岩蛋包飯出現了,已經聞到陣陣蛋味~ 忍唔住啦!拎把刀細細力咁喺蛋中間切一條界,然後將個蛋既外皮反出黎,入面好強勁既流心蛋呼喚緊我,真係令人完全溶化!嘗每一口都有蛋汁,夠幼滑,記得一定要趁熱食! 之後到燒鰻魚熔岩蛋包飯,一樣夠濕潤同嫩滑,但懶人小編略嫌扣分係鰻魚多幼骨,要食得小心! 作為蛋包飯迷,下次一定會再黎試下其他搭配! Asobu Bistro 地址:紅磡德民街29號德民大厦地下D3號舖 營業時間:星期二至日: 12:00-15:00; 18:30-21:30 星期一休息 電話:3482 0060