Tagged: 蛋餅

0

【下雨天總掛念從前! 拉埋中同去懷舊Café食蛋餅】小食糖

中學嘅時光總係令人最懷念嘅,通常大家最好嘅朋友都係嗰時識落,久唔久大家約埋食飯聚舊,講吓當年邊個鍾意邊個、講吓當年是非都幾過癮㗎!今次小編就搵到個私竇,平日下午冇乜人,靜靜哋最啱好朋友聚會,加上成間Café嘅裝修都走懷舊課室Style,一坐入去成個青春回憶返晒嚟呀! 呢間小食糖係台式Café,喺美麗華商場入面,位置唔算好好搵,不過勝在唔怕多人逼,座位都幾闊落,仲有露天位可以坐添! 除咗裝修走校園風,連餐具都有精挑細選過㗎!好似筷子係顏色筆造型,好可愛呀!台式嘢No.1必選item當然係紅燒牛肉麵(HKD60)啦!湯底熬足8個鐘,配方跟足台灣,口味偏濃,但係湯頭濃味而未至於會飲到好口渴,忍唔住一口接一口咁飲晒成碗湯! 牛肉亦炆得相當腍,咬落超嫩口,入口即溶,咬都唔係好使咬咁滯,正呀! 除咗牛肉麵,滷肉飯(HKD50)都係相當signature嘅台式招牌菜!台灣滷肉基本上分兩種,一種係肉燥版嘅滷肉;另一種就係用大片肥豬肉版嘅滷肉(又名焢肉)!而小食糖所賣嘅正正就係呢種肥豬肉版滷肉飯喇! 雖然話係肥豬肉,但其實仔細睇塊肉係分肥中瘦3 part,肥肉部分咬落爽口,夾埋碗內嘅酸菜撈飯食落啱啱好! 唔知大家係咪同小編一樣,去親台灣都會特登早啲起身去早餐店食蛋餅呢?呢度就配合返香港人嘅生活習慣,將蛋餅整成下午茶,方便大家三點三Tea Time就歎得到,附近返工嘅朋友可以一試呀!今次小編就試咗呢個肉鬆蛋餅(HKD35),賣相當然比台灣街邊蛋餅店精緻啦! 蛋餅食落餅皮比台灣普遍嘅蛋餅略厚少少,餡料亦比較單一。台灣版嘅蛋餅通常都會俾你揀2-3款配料,但呢度一個蛋餅只有一款配料,食落好似單調咗少少,不過止吓台灣癮都唔錯嘅! 最後試埋呢個台灣特調-冬瓜檸檬茶(HKD28)。賣相就夠晒得意喇,用咗科學堂實驗室嘅三角燒瓶同量杯,好卡哇伊!味道酸酸甜甜幾得意,冬瓜味唔算好重,不過夾埋檸檬嘅酸味就好match,有少少柑桔檸檬嘅感覺。成間餐廳坐得舒服,食物同價錢又幾公道,大家可以約埋成班中同聚舊喇!   小食糖 地址:尖沙咀彌敦道132號2樓 電話:2771 7828 營業時間:星期一至日:12:00-21:30

0

【飲飽食醉西式啤酒宴 沙律薄餅甜品加料手工啤】掌門精釀啤酒

掌門精釀啤酒係台灣幾出名嘅手工啤酒品牌,香港店嘅酒都由台灣運嚟以保持一致品質。繼尖沙咀店之後,上月喺西營盤開分店,用酒煮嘅菜式多咗,星期六、日仲有Brunch食添,等小編帶大家睇吓新店有咩好食啦! 餐廳位置喺西營盤高街小斜坡之上,餐廳環境就好開揚。 沙律都可以落酒?掌門四款沙律之中有兩款加咗酒,火箭菜意大利火腿無花果沙律(HKD108)仲係廚師推介添!廚師喺沙律汁落咗精釀啤酒「酸酸」,酒味比較薄,但味道酸啲,撈埋新鮮嘅無花果、火箭菜、Parma Ham好開胃又夠fresh!最鍾意佢加埋核桃,有咬口,感覺更加健康。 意式辣肉腸薄餅(HKD118)喺搓薄餅底嘅時候以招牌精釀啤酒「55%小麥」代替水,令薄餅口感煙韌啲,不過一樣焗得好香脆。餅底搓得算薄,意式辣肉腸同車打芝士海量式鋪滿喺面,食肉獸最愛呀! 海鮮意粉(HKD148),大廚喺炒意粉時,加入以大量美式啤酒花為風味特色的暢銷酒款「柒拾肆-加強版」,務求強調香氣,襯托海鮮鮮美。 安安檸檬芝士蛋糕(HKD58)用咗啤酒花能增加果香,質地好順滑同厚實。芝士味同檸檬味都好出,配埋雲尼拿果仁有多重享受添。 試完用酒煮嘅菜,輪到新店星期六、日嘅Brunch喇,一樣好足料囉!三杯雞多士盒(HKD78)外形有啲似台灣小食「棺材板」。嫩滑嘅雞髀肉用薑片、蒜頭、辣椒同葱爆香,惹味又有少少辣,再回鍋落埋「三杯」,即係黑麻油、生抽、老抽同冰糖一齊炒。收乾之後再加埋九層塔,肉有少少焦又好鬼香。不過最點睛係溫泉蛋喇!篤爆佢,將蛋汁同雞肉撈勻更香滑。加埋即烘脆口多士盒,真係飽到上心口。 仲有將蛋漿加入蘑菇、雞肉粒、薯仔粒、紅椒、青椒、菜同肉腸,煎成厚厚嘅香腸淡色艾爾意大利蛋餅(HKD68)。口感好豐富,因為落咗勁多料。蛋餅煎到啱啱好,仲有啲蛋汁添。 當然要飲杯酒落肚啦,新款Cocktail之中,小編幾鍾意狂野烏梅(左:HKD68/杯)。以味道辛辣嘅Tequila龍舌蘭酒同Cherry Brandy櫻桃白蘭地做基酒,加上重口味的烏梅汁同清新嘅青檸汁。入口即刻feel到酒精濃度高,酸中帶甜都啱夜晚飲。 仲有炭燒西柚(中:HKD68/杯),相比之下感覺好清爽,lunch飲都好舒服。以Gin酒做基酒,簡單配上西柚汁同炭燒烏龍茶,口感順滑,同時加入西柚粉紅色糖漿都唔會覺得甜,反而餘韻有種果茶嘅香氣添。 如果都係鍾意啤酒,大吉大利(右:HKD49/250ml)都唔錯,以科隆Kolsch啤酒加入大量新鮮金桔製成,因為「吉」同「桔」係同音字,所以攞個好意頭叫做「大吉大利」。味道清新但有啲酸甜果香,反而冇咩啤酒花嘅苦味。   掌門精釀啤酒 地址:西環西營盤高街53-65號地下富裕大廈地庫 電話:2650 0511 營業時間:星期一至日:12:00-23:00

0

【孖Deliveroo簽約合作 台式小店「請坐」真.復活】食焦

一直好得網民歡心嘅台式小店請坐,近日有好消息公佈。兩位台灣媽媽上月尾已經喺自家專頁出po,留言「尖叫聲!某英國企業看見我和T的外型及臉書人氣與故事,在幾個月的討論後,正式和我們簽約。其實我們連自己都不敢相信會有這麼一天。」粉絲知道喜訊都留言恭喜!等咗幾日,終於揭曉,原來係同外送App Deliveroo合作! 兩位台灣媽媽今次會喺中央廚房戶戶小廚炮製食物,由Deliveroo外送,暫時服務地區只限銅鑼灣、灣仔同金鐘!粉絲當然即刻支持,仲po埋相出嚟話終於可以食返台灣媽媽嘅味道喇!而兩位媽媽仲隱約透露埋另一個好消息,就係實體店已經準備中,好快面世,至於地點喺邊?好多人都估會唔會開返喺西環! 其實當兩位台灣媽媽宣佈會同一間英國企業合作,仲未開估係Deliveroo之前,有唔少粉絲都有留言提醒佢哋今次簽約要睇清睇楚先好,唔好再好似上次咁易信人,最後累埋自己,搞到要停業!講返少少歷史,上次為咩要停業?長話短說,就係兩位台灣媽媽疑似遭到另一位股東侵股,又攞埋請坐個商標,俾人喺尖沙咀開咗間A貨請坐……最後兩位媽媽將西環店無奈停業。 兩位台灣媽媽嫁到香港17年時間,由最早期嘅小店「吃什麽」、到西環「請坐」,再到獲米芝蓮美食推介,然後爆出停業風波,期間真係一步一腳印!今次俾Deliveroo睇中合作外賣服務,據兩位媽媽所講,原來係多得一個熟客牽線,呢位熟客就係Deliveroo嘅員工,全靠佢向老闆講咗「請坐」故事而成功拉線!依家難得「復活」,大家有機會食返媽媽味道嘅蛋餅同魯肉飯啦,下一步,梗係盡快開新店,請大家坐坐啦!

0

【傅珮嘉夫妻檔台菜新店 必食香濃花雕牛肉麵】三星台菜食堂

台式食店愈開愈多,新鮮熱辣唔少得星級牛肉麵店,呢間係藝人傅珮嘉同佢位台灣老公Steven夫妻檔開嘅三星台菜食堂,上年7月銅鑼灣店事隔8年重開,最近喺灣仔就再開分店。「三星」一直係名牌,曾被蔡瀾大讚係「最正宗台灣牛肉麵」添,當然仲有一眾明星捧場客,黃秋生、黃偉文等都話正。今次灣仔分店更加大推新Menu! 灣仔店空間唔算好大,大概只容納到5-6枱客人。不過Steven就話雖然招呼唔到太多客人,但希望可以堅持每一碗麵都係用心炮製;佢亦話唔希望舖頭太大,出現應接不暇而粗製濫造嘅情況。 花雕牛肉麵(HKD82) 湯底香濃,花雕酒分量剛剛好,唔會搶去湯底味道。唔講唔知,原來花雕係紹興人傳統嘅「女兒酒」,據說紹興人會喺女兒出世後將一枝紹興酒埋下,直至女兒出嫁嗰時至拎返出嚟宴客,所以花雕酒代表陳年嘅紹興酒;如果係男丁就會埋下壯元紅,寓意希望兒子能夠高舉科第。 魯肉飯(大)(HKD42) 食落同台灣夜市食到嘅有啲相似,粒粒魯肉都肥瘦分明,唔會有一嚿特別肥一嚿特別瘦咁。醬汁同配料嘅配搭比較清爽,唔會食完一口油。紅色嘅係台灣紅豆支,香港唔係咁興,不過台灣就習慣用佢加喺魯肉飯入面去膩,豆支同醃黃瓜中和返魯肉飯嘅油份,咁就唔驚食完好滯啦,仲可以食多個蛋餅添! 酸菜牛肉蛋餅(HKD38) 講到台灣人嘅早餐就不得不提蛋餅喇,每次小編去台灣都會特登早啲起身去早餐店度買蛋餅㗎。不過台灣嘅蛋餅通常係加火腿呀芝士咁,好少見到成嚿牛肉麵嘅牛肉擺落去喎!原來「三星」賣嘅蛋餅除咗有自選配料之外仲有3款「三星限定」蛋餅。酸菜牛肉夾落蛋餅入面有少少似墨西哥餡餅嘅感覺,啖啖肉好滿足! 花生醬Nutella蛋餅(HKD38) 係三款自家創蛋餅中唯一一款甜食,Nutella加花生醬呢個配搭真係夠晒邪惡呀,飯後如果有少少唔夠飽嘅話食埋呢個真係超滿足!   三星台菜食堂 地址:灣仔廈門街7號A地舖 電話:2882 0400 營業時間:星期一至日:08:00-22:00