Tagged: 蝴蝶酥

0

【$4起平食傳統糖餅 鬆化酥脆蝴蝶酥×杏仁條】平霸

今次平霸帶大家去試吓平盡大圍全區嘅老馮餅家,佢哋大部分嘅唐餅都係平民價HKD4件咋。朝早9點鬆啲就去到佢地喺顯俓嘅分店,都有唔少街坊幫襯㗎,店員仲話熱賣嘅嘢假期會好快賣晒,想食要早啲去買喇。 佢哋門市大大隻字寫明「本店只用日本麵粉」,今次真係食平啲又食好啲喇。買嚟當早餐、下午茶仲可以慳返唔少錢添。 英式鬆餅(HKD4/右)size比平常見嘅大1倍。佢外層幾鬆脆,內層就濕潤啲。不過牛油味唔係好突出,不過提子乾就大粒又香喎。 老婆餅(HKD4)嘅酥皮焗到金黃色,包裹住軟綿綿嘅冬瓜蓉,賣相都幾靚,入口鬆軟。內餡仲有啲杏仁片增加口感,成個餅食落甜甜哋唔會膩。 新鮮出爐嘅蛋撻(HKD5)分別有牛油皮同酥皮,牛油皮食落香脆啲,酥皮就鬆化啲,蛋味都幾明顯。如果買半打會再平少少,而且兩款可以任意配搭㗎。 小編覺得最有驚喜係蝴蝶酥同杏仁條(各HKD50/半磅),睇落有少少貴,但其實分量都幾多㗎。蝴蝶酥足足有成23塊,即係HKD2.2一件。而杏仁條都有18條,即係HKD2.8一條,都好抵食!不過食唔到咁多可以買細包裝(HKD10)過吓口癮。呢兩款都標榜手製225層薄脆酥皮,睇吓層次幾豐富! 蝴蝶酥食落好香脆,仲有糖粒集中喺餅邊,甜度適中唔油膩。而杏仁條食落鬆化酥脆,牛油香十足呀,食到尾仲有陣杏仁香,真係食唔停口囉! 招牌脆口曲奇(HKD32/半磅)有4種口味,包括由左至右嘅核桃、伯爵茶果仁、牛奶朱古力杏仁同埋特濃朱古力。唔好以為佢細細盒,數吓有成32塊,即係一蚊一塊咋!小編覺得茶味香濃嘅伯爵茶果仁就最吸引喇。   老馮餅家 地址:沙田大圍顯徑邨街市M25號舖 電話:從缺 營業時間:星期一至日:07:30-19:30

0

【本地牛角包店兼賣意粉+薄餅 酥脆曲奇禮盒買二送一】Crostini Bakery & Cafe

本地牛角包品牌唔少都有高質出品,好似Crostini Bakery & Cafe就每日製作三次牛角包以確保新鮮品質。不過佢嘅曲奇、蝴蝶酥同蛋糕你又試過未呢?而且部分分店仲有意粉、薄餅等熱食添。銅鑼灣旗艦店款式最齊全,今次就等小編試吓佢牛角包以外嘅食物,睇吓有咩正嘢先! 雖然以牛角包起家,但佢嘅曲奇同蝴蝶酥都幾出色,想試多啲口味就一定要揀禮盒裝喇!至尊曲奇禮盒(HKD238/45塊)有咖啡杏仁曲奇、紅莓棒子曲奇、南瓜籽熱情果茶曲奇、海鹽朱古力伯爵茶曲奇同牛油曲奇同玫瑰蝴蝶酥。有牛油香又唔會太乾身,而且每款口味都做得幾出,甜度亦控制得啱啱好,連續食幾塊都冇問題。 如果你係蝴蝶酥迷就更加要試至尊蝴蝶酥禮盒(HKD238/45塊),蝴蝶酥每層都搓得好薄,脆口又唔會太硬,而且有芝士、玫瑰、黑芝麻、玉桂、茉莉同原味6款咁多。今個月仲推出賀年優惠,1月6日起全線兩款禮盒可以自選口味買二送一! 想輕巧啲亦有單味細盒裝(HKD32/12塊),做小禮物或自私食又得。 小編發覺呢度嘅蛋糕外表比實際甜,唔嗜甜嘅朋友都可以一試。其中幸福橘子(HKD46)以雲呢拿慕斯包住清甜嘅柑橘果凍、柚子cream同海綿蛋糕,食完感覺又令人幾滿足喎。 想感覺貴氣啲?試吓呢個喺朱古力脆皮噴上食用金粉嘅金蕉流行(HKD52)啦!佢有一個甜甜嘅外表,但入面嘅香蕉蓉反而令層層疊嘅香蕉朱古力cream、朱古力蛋糕同朱古力脆皮珠帶陣清新香氣,又唔會太甜膩。 熱食方面薄餅套餐同埋配迷你沙律嘅意粉套餐都算抵食,另外會跟杯熱飲。呢個即焗嘅輕型三文魚薄餅(HKD89/8寸)落足料,煙韌嘅厚批上鋪滿鹹香又大塊嘅煙三文魚,配上三色芝士碎、車厘茄、黑水欖、火箭菜同蜜糖芥末醬,同平時食嘅pizza一樣有肉感但唔油膩,一個人當lunch食都幾飽。 估唔到香蒜大蝦炒意粉(HKD138)會有少少鑊氣,蒜蓉、紫洋蔥等材料炒過嘅香氣令意粉更惹味。蝦肉爽口彈牙,如果可以辣啲就更好喇。另外點咗杯凍抹茶咖啡(HKD46)試吓,宇治抹茶嘅甘味同咖啡幾融合,不過唔攪勻啲cream就飲會偏酸。 最後如果想食埋佢嘅麵包(HKD14-20),記得捕實每日18:00後有買二送一優惠呀!   Crostini Bakery & Cafe旗艦店 地址:銅鑼灣勿地臣街1號時代廣場7樓728-729號舖 電話:3105 9923 營業時間:星期一至日:11:30-20:30 供應意粉及薄餅分店:時代廣場店、杏花新城店、荷里活商場店、泓富廣場店、逸瓏坊商場店、新港城中心4期店 供應薄餅分店:時代廣場店、杏花新城店、荷里活商場店、K11店、泓富廣場店、九龍灣國際展貿中心店、上水中心店、連理街店、九龍貿易中心店、千色匯一期店、荃灣廣場店、青衣城店

0

【嘉麟樓奶黃月始創人坐鎮 皇玥旗艦店今日開業】皇玥餅藝

皇玥集團為咗傳承中式餅藝文化,誠意邀請入行逾50年、前半島酒店嘉麟樓點心部主管、奶黃月餅始創人葉永華師傅擔任皇玥首席餅藝大師。今日旗下嘅皇玥餅藝旗艦店喺尖沙咀開業喇!不過未到中秋節,當然唔係食葉師傅嘅奶黃月餅,而係佢精心研發嘅蛋卷、蝴蝶酥、酥餅、酥條和曲奇五個系列。當中有啲反傳統口味都幾吸引㗎,即刻俾大家睇睇先。 香脆鬆化嘅蜂巢蛋卷好多人都鍾意,皇玥蛋卷系列就有12款口味,包括原味、皇金(鹹蛋)、椰汁、薑汁、岩鹽朱古力、咖啡、伯爵茶、香草蕃茄、櫻花蝦、黑松露、香蔥紫菜同榴槤。不過三款禮盒只係包括其中10隻味: 經典蛋卷禮盒(HKD198/24件)有原味、椰汁、皇金同薑汁。 休閒蛋卷禮盒(HKD198/24件)有原味、岩鹽朱古力、咖啡同伯爵茶。 奇趣蛋卷禮盒(HKD198/24件)有原味、香草蕃茄、櫻花蝦同黑松露。 酥餅系列嘅選酥餅禮盒 (HKD198/24件)有皇金酥同芝麻酥兩種味。師傅將傳統配方改良,唔用豬油而改用法國天然牛油,分別加入鹹蛋黃同黑白芝麻再低溫烘焙。 蝴蝶酥系列嘅鴛鴦蝴蝶酥禮盒(HKD198/16件)唔止用法國天然牛油同上等芝麻,酥皮摺疊層數仲超過1400層!所以原味同芝麻味都係心機之作! 酥條系列嘅精選酥條禮盒 (HKD198/16件)有兩種味,杏仁酥條用咗美國嘅厚身杏仁;五穀籽酥條就加入南瓜籽、葵花籽、亞麻籽、黑芝麻同白芝麻五種配料,口感層次極豐富。 曲奇系列嘅精選曲奇禮盒(HKD198/28件)有牛油、開心果、朱古力杏仁同蜜餞薑粒四種口味。曲奇用新鮮雞蛋同法國天然牛油製成,冇添加任何膨脹劑㗎。   皇玥餅藝 地址:尖沙咀加連威老道 43 電話:2361 8080 營業時間:星期一至日: 11:00-21:30