Tagged: 街霸

0

【火炭美食沙漠除名喇!街坊大推牛三寶+足料靚湯】街霸

唔知大家有冇去過火炭呢?呢個地方不嬲都冇乜嘢好食,近地鐵站嘅大型屋苑居民要搵食嘅話,最近都要行到去山尾街附近,真係唔係好方便!不過街市翻新之後開咗銀禧開心市集,終於都為火炭帶來一啲生氣喇!呢度近御龍山,離火車站只係三、四分鐘路程,門口有幅壁畫牆,幾靚喎。 地方唔算大,食物選擇唔算好多,但街霸就發現有兩間應該幾啱街坊口味嘅舖頭喎!第一間推介就係呢間美景牛雜粉麵喇。 睇住師傅包雲吞嘅熟練工夫就知呢間嘢食得過啦。 今次街霸叫咗一碗牛三寶河粉(HKD45)同一碗四寶麵(HKD45)。 牛三寶分別有牛腩、牛肚同牛筋。炆得夠晒入味,牛腩夠腍、牛肚爽口、牛筋又夠膠,非常唔錯呀! 至於碗四寶麵就分別有魚蛋、雲吞、魚皮餃同魚片。 比較出色嘅係雲吞,隻蝦大大隻咬落好爽口,皮薄餡靚! 本來食完牛雜準備走嘅時候,俾街霸發現呢度仲有間MY·湯,原來係間專賣自家湯水嘅舖頭!街霸至鍾意就係飲湯,點可以唔試呢? 眼見幾多選擇喎,湯款每日都會有些少唔同,視乎老闆娘入到啲咩食材。真係花多眼亂,搞到街霸遲遲都決定唔到飲邊款好,於是老闆娘就推薦咗茶樹菇栗子烏雞湯(HKD48)喇。 開頭以為自家煲製嘅湯水都係用普通膠兜裝住啦,點知原來有一個專擺湯水嘅錫紙兜,上面仲有層可撕開嘅鋁紙,完全防水,唔怕打瀉。連附送嘅環保袋都係防水,好貼心呀。撕開鋁紙後發現碗湯比我想像中大碗,湯渣同湯水嘅比例啱啱好,唔會全兜都係渣,湯就得嗰兩啖。 飲落熱辣辣,茶樹菇嘅清新夾埋香濃嘅烏雞真係冇得頂,細嚐之下仲飲到栗子嘅甜味,如果街霸住呢頭一定成日幫襯啫!   街霸最愛:今集最愛就係MY·湯嘅靚湯喇!都市人日日生活咁忙,有幾何得閒返屋企煲湯吖,呢間嘢啲湯夠晒足料又好味,街霸真係好想佢哋喺我樓下開返間呀! 銀禧開心市集 地址:火炭樂景街2-18號 電話:從缺 營業時間:星期一至日:07:00-20:00(個別商店營業時間有所不同)

0

【坑口小食街Fusion腸粉新口味 爆汁九層塔炸蚵仔最惹味】街霸

上次街霸行開將軍澳,發現坑口Gateway嗰邊有條連住街市嘅小食街FOODLANE喎!咁啱有啲肚空空不如試吓新嘢啦。 首先見到呢間小食工房,燒賣魚蛋雞蛋仔樣樣齊,不過最吸引街霸眼球嘅係呢個芝士肉醬腸粉(HKD28)喇!其實本身對黑松露肉醬更加有興趣,不過店員阿姐話已經賣晒,冇辦法啦! 平時食開腸粉都係落甜醬花生醬豉油,最多咪整多隻蛋變雞蛋腸囉,真係未食過西式醬汁嘅腸粉喎。 腸粉即叫即蒸,等咗15分鐘左右終於有得食喇。雖然賣相唔係咁好,但味道其實比預期中好。肉醬唔會太杰,連埋芝士同腸粉一齊食味道意外地夾喎。雖然28蚊唔係話太抵,但係大大兜,食落都幾飽肚而且唔滯,可以一試。 行入少少見到呢間幾多人食嘅大哥大魚蛋,魚蛋聲稱係手打,超彈牙咁話喎。不過魚蛋有好多人介紹過,今次街霸就試咗雙色魚麵(HKD18)啦!唔知大家細個喺屋企打邊爐有冇食過唧唧魚麵呢?街霸好耐冇食過喇,今次就試吓呢間手打魚麵係咪真係正啲先。 魚麵可揀腩汁或辣汁湯底,今次揀咗辣汁,味道鮮甜,辣度就大概BB辣程度。魚麵咬落爽口彈牙,感覺同直接食緊魚蛋冇分別。雖然魚麵唔算掛湯,但係咬落魚味頗重,18蚊抵食! 幫襯任何嘢都可以用優惠價錢換杯特飲,老闆極力推薦呢杯鮮水果茶(HKD26/跟餐$8),咁就即管試吓水果茶啦。飲落茶底都算香濃唔苦澀,生果切得夠細粒用粗飲管飲到呢吓幾加分,入面仲有俗稱「青蛙卵」嘅蘭香子,整體好似高質過X芳喎…… 食完魚麵個肚仲有少少位,就走過隔離睇吓有咩吸引嘅炸物啦!GOURMET TASTY主打台灣嘢,手抓餅、炸雞扒等等一應俱全。九層塔炸蚵仔(HKD25)係最新出品,好似喺台灣夜市都冇乜點見過,一於試吓啦! 炸蚵仔即叫即炸,大概等6-8分鐘就有得食。新鮮熱辣噴晒煙,大家記得吹凍少少先放入口呀。炸皮薄又香脆,蚵仔咬落爆汁超嫩滑,感覺仲好味過夜市嘅蚵仔煎。 蚵仔炸得剛剛熟,味道鮮甜仲爆汁;九層塔有提鮮效果,簡直畫龍點晴呀!   街霸最愛:今集最愛就係九層塔炸蚵仔喇!鮮甜嫩口嘅蚵仔加埋沾有九層塔嘅薄炸脆皮真係一流,如果宵夜時段買返屋企送酒仲正呀!小食街店舖收夜晚10點,坑口嘅朋友仔必試呀! 小食工房 地址:將軍澳坑口厚德商場東翼地下 電話:從缺 營業時間:星期一至日:12:00-22:00 大哥大魚蛋 地址:將軍澳常寧路2號TKO Gateway東翼地下EF21號舖 電話:從缺 營業時間:星期一至日:10:00-20:00 GOURMET TASTY 地址:將軍澳常寧路2號TKO Gateway東翼地下EF22號舖 電話:從缺 營業時間:星期一至五:11:30-22:00;星期六至日:11:00-22:00

0

【屯門臨時街市50年老字號 必食脆卜卜炸兩懷舊炸粽】街霸

繼舊年11月尾尖沙咀臨時咗40幾年嘅海防道街市進行重建工程之後,唔少紮根其中嘅老字號都成為絕響。今次街霸就帶大家去到新界西,比海防道臨時得更耐嘅藍地大街臨時街市! 呢間祥記粥檔屹立咗喺藍地大街50幾年,真係相當old school呀! 首先街霸想同大家介紹呢個炸粽(HKD8),小編之前真係未食過。原來炸糉又稱炸糯米,60-70年代嘅車仔粥檔好多都有賣,不過依家已經買少見少咯! 中間係甜甜哋嘅糯米,外圍包住略帶鹹味嘅牛脷酥,質感比油炸鬼鬆軟少少,咬落香甜酥脆。好好特別嘅小食呀! 嚟得粥檔就梗係要整返碗生滾粥啦,小編叫咗碗生滾鮮鯇魚片粥(HKD22)同香脆炸腸(HKD16),即係炸兩呀。 鯇魚片粥香噴噴上枱,22蚊大大碗,果然係舊式街市先有呢支歌仔唱呀。鯇魚片塊塊都好大塊,食落感覺新鮮唔霉爛,魚味白濃。粥底方面相當綿滑,應該係冇落到生粉水,因為由第一啖食到最尾都仲係好綿,冇變晒做粥水。街霸平時最怕食到最後變「飲粥」㗎喇,呢度嘅粥絕對有五粒星呀! 另外炸兩亦相當出色,分量同樣係超乎我預期咁多。腸粉皮夠晒薄,唔會焗到舊油炸鬼腍晒,真係皮薄餡靚,每嚿咬落都脆卜卜,無可挑剔!   街霸最愛:今集最愛係「新鮮嘢」炸粽喇,之前真係冇喺其他地方食過,冇諗過竟然可以喺藍地食到一樣幾近喺香港失傳嘅傳統小食呀。小編強烈推薦呢個屬於老香港嘅好味道呀! 祥記粥檔 地址:新界屯門藍地大街街市 電話:9492 4482 營業時間:星期二至日:06:00-14:00

0

【頌富街市新開高質小食街 Q餅+小丸子童年回憶返晒嚟】街霸

天水圍嘅頌富街市翻新後,最近終於重新開張喇!今次重開仲為大家帶嚟一條超高質嘅小食街,街霸食完之後覺得可以話係雲集晒成個天水圍最好食嘅小食檔呀! 位於商場地下嘅街市,上午時間人流非常之多,間間舖頭都做到冇停手呀! 首先去咗呢間頌富美食,原來老闆係紅磡雞蛋仔嘅老闆,佢極力推介雪國Q餅(HDK20)同章魚小丸子(HKD16),話啱啱開業已經大受街坊歡迎喎! 章魚小丸子同Q餅即叫即整,街霸由細到大都好鍾意睇整章魚燒嘅過程,唔知點解覺得好療癒呀! 食章魚燒當然唔少得沙律醬同燒汁啦,仲有勁多紫菜絲,唯一可惜之處就係冇木魚絲。章魚燒新鮮整起熱辣辣,咬落皮脆得嚟裡面微熟,食落啱啱好! 另外Q餅可以揀3個配料,街霸就揀咗紫菜肉鬆配朱古力醬。 皮薄咬落脆卜卜,口味一鹹一甜幾match喎!咬落啖啖有料,20蚊食到高質嘅童年回憶,抵啦! 食完鹹食當然要飲杯凍飲解解渴,呢間壹茶係街市入面唯一一間飲料店,所以長期都大排長龍。最招牌嘅就係蛋糕奶茶喇! 今次街霸就試咗蛋糕奶茶(HKD25),同樣有蛋糕漿嘅草莓金金(HKD33)同養生木炭茶(HKD29)。 蛋糕奶茶飲落有蛋糕漿嘅濃厚同埋奶茶嘅幼滑感,甜道偏甜。街霸就鍾意草莓金金多啲,因為用新鮮草莓做沙冰嘅關係感覺fresh啲,加埋蛋糕漿都唔會話太膩;至於木炭茶就有香濃嘅芝麻味,適合唔太鍾意飲甜嘢嘅朋友仔。 行到小食街盡頭會見到冒菜麻辣燙,以自助形式運作,旁邊有corner有枱櫈俾大家坐定定慢慢食。街坊們可以喺收銀處旁先攞一個膠藍,然後就揀自己鍾意嘅餸。5餸盛惠55蚊。 今次街霸揀咗四川地道嘅貢茶、海帶絲、豆卜、東菇同鵝腸麵。 湯底可以揀麻辣或者蕃茄湯,不過食四川嘢就當然要試真啲佢哋嘅辣湯啦!手指尾咁大隻辣椒仔,睇見都feel到辣呀! 呢個就係頭先見到嘅豆卜,渌熟之後索晒啲辣汁,變成一串「辣汁豆卜袋」,正! 成個麵所有餸都索滿晒辣湯,湯嘅辣度都幾足,好有後勁,唔係單純嘅辣油味,食得出有好多材料加咗入去同湯底一齊熬煮先可以有呢個效果。不過有種愈食愈辣嘅感覺,大家記住買定嘢飲喇! 呢間椰子媽嘅甜品名幾盞鬼,街霸都俾佢哋嘅餐牌吸引咗! 平時街霸好少食淮山,覺得味道有少少怪,不過呢個狂爆伐木工(HKD26)就改變咗我對淮山嘅印象,佢係淮山芋頭西米露,芋頭同淮山都煮得好溶,食落椰汁味超濃,街霸覺得好有驚喜呀! 另外芒果pancake亦好creamy,中間嘅鮮芒果餡落足料,pancake皮又夠薄,食到舐舐脷呀!   街霸最愛:今集食咗咁多嘢,街霸最鍾意係頌富美食嘅Q餅同埋章魚燒!事關呢兩樣嘢都係我嘅童年回憶之一,當年日日放學都會去小食檔幫襯,不過依家好多小食店都式微或者做唔返當年嘅味道喇。頌富美食將呢樣簡單嘅美食做得好好,皮薄餡靚,極力推薦呀!  頌富街市 地址:天水圍天華路33號T Town North地下T Town市場 電話:從缺 營業時間:星期一至日:09:00-01:00(個別店舖營業時間不一)

0

【80後澳洲回流街市開西餐 貼地價鋸扒最啱撐枱腳】街霸

石塘咀街市最近新開咗間西餐小廚!80後老闆Gavin係澳洲回流嘅大廚,不甘平凡打工仔生活,於是決定返港創業。聽落好有heart,街霸都要去捧吓場喇! 街市環境始終唔係話太理想,開間西餐廳「屈就」喺街市都算幾大膽嘅決定。被大排檔包圍嘅西餐小廚處於熟食中心角落,枱面鋪上格仔餐枱布,喺充滿港式氣味嘅街市環境,加返啲啲西味喎!Menu選擇唔算話好多,價錢由$78-$168不等。比較平價有卡邦尼意粉(HKD78),成個餐牌最貴就係特選安格斯西冷配薯條(HKD168),今次街霸就試咗呢個安格斯西冷同香辣金蒜蟹肉意粉(HKD98),再加多兩塊香煎鵝肝多士(HKD45)。 首先鵝肝多士上枱先!雖然鵝肝唔算話好厚,但食落幾足油香。美中不足係麵包烘得唔夠香脆,不過鵝肝加黑醋油感覺開胃又唔膩,質素OK啦! 跟住到香辣金蒜蟹肉意粉,擺盤好樸實,面頭嘅蟹肉分量好多,成個意粉都偏大份,食埋前菜再食真係幾飽。蟹肉存在感好強,就算同意粉撈勻咗都仲食到絲絲蟹肉,唔會好似坊間嘅蟹肉乜乜乜咁,撈勻之後完全食唔到蟹肉,味道鮮甜,感覺新鮮! 另外今餐主角特選安格斯西冷配薯條,落單時店員會問你要幾成熟,街霸今次揀咗5成熟。 5成熟嚟講佢係有少少overcook嘅,不過肉質搭夠!西冷幾嫩口,食落肉味都算香濃。喺無任何醬汁之下都唔會話乾晒柴,幾juicy,加埋面頭有少少蕃茄同洋蔥粒,一齊食感覺幾fresh。配菜薯條藏喺塊扒底下,吸晒牛扒肉汁,雖然有少少腍咗,但食落有種BBQ味道,好惹味!伴碟配菜除咗常見嘅生蕃茄同菇,竟然唔係蘿蔔仔、三色豆,而係菠菜!西餐伴碟用菠菜又幾新穎喎,有種fusion感覺。   街霸最愛:街市嚟講佢哋嘅價錢未必最實惠,不過食得出係用心製作。街霸覺得安格斯牛扒幾高質,168蚊呢個價錢,食到一塊raw得嚟仲好味嘅扒唔係咁易。街霸覺得呢間新開嘅小店幾值得支持,食厭咗連鎖西餐不妨一試!   西餐小廚 地址:西環石塘咀市政大樓熟食中心2樓13-14號鋪 電話:2540 0398 營業時間:星期一至日:11:00-15:00;17:30-23:00

0

【石塘咀街市小店有驚喜 雞扒紅腸薑蓉撈麵冇得輸】街霸

最近有西環街坊同小編報料,話石塘咀熟食中心有間美味坊平靚正喎!最鍾意去街市搵食嘅街霸當然唔會錯過啦! 小編嗰日下午時段去到,眼見舖仔細細,人流唔算好多,可以他他條條食個tea! 早餐menu喺下午茶時段(14:30-15:30)都適用喎,而下午茶餐呢,街霸就揀咗B餐(HKD36)包自選奄列(火腿/白菌/芝士)、厚多士同埋自家製薯餅,36蚊包餐飲,小編覺得性價比都算幾高! 厚多士就冇乜特別,咬落幾脆口,正常質素;薯絲餅係自家製,用新鮮薯仔刨絲再煎,唔係以前中學小食部會見到嗰種三角形急凍薯餅。脆得嚟又幾有咬口,點埋茄汁食一流! 跟餐奄列都幾大份,小編今次揀咗白菌芝士奄列,睇吓啲白菌多到一切開就爆晒出嚟,蛋無過熟,切開依然有蛋汁流出,質素唔錯喎!雖然芝士略嫌少咗啲啲,但又多返幾塊火腿,小編覺得質素都對得住個價錢! 除咗茶餐之外,雞扒紅腸薑蓉撈公仔麵(HKD40)亦係唔少街坊鍾情嘅招牌之一!芝士撈麵大家成日食啦,薑蓉撈麵街霸又真係好似冇乜點食過喎。 薑蓉撈麵同豉油撈飯嘅原理差唔多,都係簡單又令人食唔停嘅平民美食!薑蓉配蠔油撈埋一齊係幾正喎,撈麵雖然望落大大份,但撈吓撈吓就唔小心食晒喇!紅腸同雞扒呢個配搭亦幾match,呢個撈麵雖然有啲麻甩,但起碼令人胃口大開,街霸覺得大家不妨一試呀!   街霸最愛:今集最愛當然係薑蓉撈麵啦!平時食燒味飯嘅精髓就係嗰碟薑蓉仔,有咗佢食三碗飯都冇問題呀!街霸覺得碗撈麵足料又好味,真係冇得輸㗎喎!以後撈麵唔使淨係諗住芝士撈啦,薑蓉撈一樣咁work啫!成本仲低啲添! 美味坊 地址:西環皇后大道西470號石塘咀市政大廈2樓熟食中心C2號舖 電話:9415 2268 營業時間:不定

0

【黃大仙竹園街市大翻新 小食街必掃4小店開到凌晨】街霸

最近黃大仙竹園街市翻新咗,多咗條小食街!雖然話就話係小食街,但其實選擇好多,小食類同埋正餐類都有,竹園街市仲多咗好多特色嘅小店,開到凌晨1點添,一齊睇吓有咩好食啦! 街霸覺得呢間食住上真係卧虎藏龍嘅小店,老闆娘曾經喺日本住過20年,跟住又喺越南工作過年半,所以舖頭賣嘅款式都幾多花款㗎! 呢碗熬足8個鐘嘅花膠雞絲湯翅(HKD35)真係唔簡單,可能你會話,35蚊碗碗仔翅咁貴!但街霸就認為呢35蚊值,回,票,價喇!首先翅湯嘅質地同平時食開嘅「茨汁碗仔翅」完全唔同,街霸即時嘅反應係「咦,咁稀嘅!」不過當你試咗第一啖之後就會忍唔住講句「好味喎!」老闆娘話呢碗碗仔湯翅原來係師承自一位已經退隱加拿大嘅老師傅,材料同製作過程都非常講究。湯底要用金華火腿每日熬足八個鐘,再加上新鮮雞絲、冬菇同埋素翅,完全冇落味精,Less Is More呀! 呢碗日式咖喱牛肉(HKD35/配薄餅)性價比其實好高,仲可以坐低食,正喎!薄餅酥軟可口,配椰味香濃嘅日式咖喱,呢個配搭食唔停口呀!老闆娘話呢個咖喱其實都係有個秘密食譜㗎!佢話呢款咖喱唔係普通嘅日式甜咖喱,總共溝咗3款咖喱粉,再加進口椰奶製成。雖然只係街市小店,但製作每款食物一啲都唔馬虎。 薄餅撕開後嘅層與層之間嘅密度好高,一點落去就索晒汁,薄餅控不能錯過呀! 呢間嚟喇喂由幾個80後一齊開㗎,老闆話佢啱啱先大學畢業,超後生喎!點解會喺街市開舖呢?佢就話:「其實之前都有擺過吓小販,跟住又見到呢度招租,咪試吓囉!」除咗有重慶酸辣粉、四川涼麵之外,最新產品就係呢個超吸睛嘅海鮮錫紙鍋喇! 今次街霸叫咗一個雙拼海鮮錫紙鍋(HKD40),即叫即整,包保熱辣辣!除咗有卜卜蜆之外亦有鮮蝦,再加埋入晒味嘅蒜蓉粉絲,好似街霸咁重口味嘅朋友啱晒喇! 另外呢間凱泰船屋顧名思義係食泰國嘢,主打近排大熱嘅泰式船麵!老闆係一位80後嘅後生仔,第一次創業似乎都有板有眼喎! 單拼船麵(HKD28)價錢都幾經濟,今次小編揀咗豬頸肉再加船麵湯底,另外仲有豬骨湯可以揀。老闆話湯底係每日新鮮熬製,用足20斤豬骨同雞骨,超足料! 每碗除咗可以揀一款自選餸之外,仲會附上自家炸豬皮,脆口得嚟帶點煙韌,好咬口! 豬頸肉有炭燒味道,咬落超腍唔乾柴。夾埋香濃船麵湯底嘅金不換、香茅,老闆為咗開正宗泰國嘢果然做足功課喎。 最後同大家介紹嘅燒賣王子,最招牌係全港首創嘅墨魚汁燒賣(HKD15/6粒),唔係虛有其表㗎!咬開每粒都有墨魚粒粒喺入面,仲食到超香嘅墨魚汁。超多街坊幫襯,唔怪得阿姐包到冇時停啦!佢話一日要包成千粒燒賣!想睇阿姐摩打手包燒賣就要睇埋video喇! 點解要用墨魚汁做燒賣呢?老闆娘就話因為健康囉!象徵健康飲食嘅五色食物之中其中一色就係黑色喇!墨魚汁含有可以預防心血管疾病嘅牛磺胺基酸,食粒燒賣都咁講究,抵佢大排長龍嘅。   街霸最愛:今集最愛就係個花膠雞絲翅湯喇!事關小編由細到大食嘅碗仔翅都係勁杰撻撻嗰種,今次第一次食到有鮮味嘅翅湯,仲要係用環保素翅,而且湯底落足料熬製,一樣啖啖精華呀!小店老闆娘出心出力,點可以唔支持呀? 竹園街市 地址:九龍黃大仙竹園道 15 號竹園廣場地下 電話:從缺 營業時間:09:00-01:00(視乎各餐廳實際營業情況而定)

0

【識食雞一定去觀塘街市 百里香午市爆場一雞難求】街霸

相信喺觀塘返工嘅朋友都知道駿業街街市多嘢食,其中一間lunch time長期見唔到龍尾嘅餐廳就係呢間百里香喇!每次行親過去都見到打晒蛇餅,人氣超旺! 行到上一樓經過海南雞餐廳就會見到有百里香嘅易拉架,最好就等店員阿姐帶你入座,因為多人等位好易有拗撬呀!等阿姐決定就最公平喇! 百里香最出名一定係百里香皇牌燒雞1/2隻配燒烤醬跟脆薯皇(HKD45),有錢都唔係咁易食到㗎,事關呢隻燒雞超受歡迎,要打定電話留定先可以確保有雞食呀!由於百里香午市長期爆場嘅關係,所以佢哋有「早鳥」同埋「下午茶」優惠,如果午市12點3前埋單,或者下午2點3之後入座,每個餐可以減5蚊。如果Lunch Time係Flexible嘅朋友其實幾抵㗎!不過都係嗰句啦,記住朝早打定電話留雞呀!   喂,街市咋喎,要打電話預訂咁滯,有冇咁誇張呀?就係咁誇張!10個幫襯嘅客人有11個都係叫呢個皇牌燒雞,45蚊食到半隻雞,雞髀位滑溜得嚟雞皮仲有陣微焦嘅煙燻味,點埋燒烤醬就perfect喇!另外薯皇亦夠晒足料,點埋茄汁食就正喇。燒雞配薯皇真係不敗配搭,唔怪得咁多人食啦! 如果食唔到燒雞,好多人都會退而求其次叫呢個百里香墨西哥BBQ煙燻豬絲漢堡飽(HKD45),雖然冇燒雞咁受歡迎,但其實都幾高質㗎!呢個漢堡飽嘅精華就係夾喺入面嘅煙燻豬絲,究竟係咩豬絲呢?豬頸肉絲?普通肉絲?NO NO NO!係豬手絲呀!咬落個包一啖,發覺入面嘅豬手絲幾Juicy喎!本身豬手就已經好入味同好腍,再沾滿BBQ醬,加埋個包嘅質感係偏向煙韌嘅,非常唔錯! 入面嘅豬手絲都幾足料㗎,塞滿晒個漢堡飽。另外配菜同燒雞一樣都係薯皇,Burger襯薯皇,大滿足啦!   街霸最愛:雖然豬絲漢堡飽都好食,不過今集最愛都係皇牌燒雞!因為真係冇乜地方40幾蚊食到半隻雞,仲要係高質㗎喎,邊度搵呀?雞肉又嫩又滑,夾埋自家嘅燒烤醬真係冇得輸,再整個薯皇,返工嘅日子食到一個令人超滿足嘅Lunch,夫復何求! 百里香 地址:觀塘駿業街67號熟食市場1樓44號舖 電話:6708 2851 營業時間:星期一至五:11:00-16:30;星期六:11:00-16:00

0

【鴨脷洲街市陳新記超好評 招牌名物一口西多+炸魚皮】街霸

最近街霸聽街坊報料,話鴨脷洲街市原來都有好西食喎,就係呢間陳新記喇!嘩,午市時段已經見枱枱都食緊海鮮大餐咁,好豐富咁款,之但係隔離枱又有人食牛腩麵,究竟搞邊科呢? 原來呢間陳新記可以俾食客喺下面海鮮檔揀完海鮮再拎過嚟加工,佢哋開朝早7點到晏晝5點,即係話想食到海鮮大餐惟有Lunch time去食喇!眼見個個都蒜蓉蒸蝦、龍蝦伊麵咁,好正咁喎! 不過今次街霸唔係食海鮮嘅,而係食佢嘅茶記招牌一口西多士(HKD40/跟凍飲)、炸魚皮(HKD10)同坑腩麵(HKD25)! 呢個「一口西多塔」一上枱街霸就心心眼喇!除咗外形好有睇頭,真係超多醬呀!望住煉奶同花生醬滴滴吓,口水都流埋呀!雖然話就話一口西多,但size其實一啲都唔細,一啖一口食到成口都係煉奶花生醬同埋外脆內軟嘅西多,超滿足呀!街霸見到食住海鮮嘅街坊都忍唔住補一口西多食吓,就知道真係招牌啦! 炸魚皮亦非常馳名,每日新鮮現炸,做好就放定喺枱面,見到一兜兜新鮮熱辣脆卜卜嘅魚皮就忍唔住想叫返份喇,幾乎枱枱都有一碟咁滯!魚皮非常酥脆,一咬落去有「咔嚓」聲㗎,一啲都唔乾唔硬,屬於中高等級別嘅魚皮呀! 牛坑腩麵亦係好多食客必點招牌之一,街霸食落覺得味道都幾OK,不過師傅唔小心俾咗一大嚿筋,韌到咬唔開咁滯……至於坑腩都腍嘅,夠晒入味!   街霸最愛:今集最愛毫無疑問係一口西多,呢排秋高氣爽,大家如果去行山經過呢頭真係要去食吓!平時西多士都有花生醬,中間夾心會一層勁薄㗎嘛,呢度就相反,西多裡面冇夾住任何醬,但就喺面頭加勁多,務求令你每一口都食到爆醬嘅西多。食西多切忌乾爭爭,大家同意嗎? 陳新記 地址:鴨脷洲鴨利洲大街鴨利洲市政大廈1樓 電話:2555 1862 營業時間:星期一至日:07:00-17:00  

0

【荃灣海濱街市潮食文青西餐 蛋沙律牛角包酥脆爆餡】街霸

邊個話去街市食嘢環境一定差㗎?今次街霸帶大家去荃灣海濱街市入面嘅Tong’s Kitchen & Yan’s Dessert,就咁睇門面完全唔覺得喺街市入面喎,天藍色外牆仲有種小清新嘅文青感添! 呢個街市地理位置比較隱蔽一啲,就喺正海濱花園平台,冇地面入口,入去要左穿右插,街霸都兜咗幾個圈先搵到路呀!好彩呢間西餐嘅顏色夠醒目,一入街市就見到佢喇! 呢度出晒名食焗飯同焗長通粉,街霸今次就叫咗白汁忌廉雞皇焗長通粉(HKD46)。大大兜長通粉,面頭鋪滿芝士,一潷落去啲芝士就牽晒絲,啖啖都食到烤到焦香嘅濃厚芝士,超正呀! 焗長通粉最好味嘅地方莫過於醬汁掛晒喺中間嘅通心位置,每一啖都食到奶味、芝士香濃嘅白汁,至於「雞皇」方面呢,其實我就覺得叫白汁雞扒飯比較貼切喇!雞扒超大塊,肉厚得嚟又嫩滑,成個長通粉都好Perfect呀! 另外好受歡迎嘅有蛋沙津牛角包餐(HKD39)!呢個餐啱晒啲Lunch唔太鍾意食飯嘅朋友仔,蛋沙律牛角包超開胃,包身酥軟可口,夾埋滿滿嘅蛋沙律做餡好吸引呀!入面夾有生菜、青瓜同蕃茄,起到解膩作用。一咬落去就爆餡,啖啖都食到蛋沙律同埋包身,蛋沙律食落感覺超新鮮,蛋黃醬同蛋白嘅分量剛剛好。睇唔睇到牛角包嘅紋路?唔係一張紙咁薄嗰種牛角包,而係咬落好有層次,食唔停口呀真係!呢個包令街霸超Surprise呀! 伴碟嘅雜果沙律亦好清新,裡面有新鮮薯仔同粟米粒,仲有椰果同菠蘿添!呢個沙律配牛角包真係鮮到絕呀! 街霸最愛:雖然焗長通粉街霸都好愛,但今集最愛都係蛋沙律牛角包!以前未試過喺第二度食呢種以牛角包為主食嘅Lunch,估唔到身於街市竟然會整一啲西餐新款式喎!味道一流之餘夠晒清新,食完唔會有罪惡感仲好飽肚,啱晒女仔嘅小鳥胃呀!食完呢個餐,連下午茶都慳返,加上環境舒適,如果平日下午茶時段,同三五知己一齊食吹吓水相當唔錯! Tong’s Kitchen & Yan’s Dessert 地址:荃灣怡康街1-7號海濱花園D平台街市1樓1A舖 電話:5168 6328 營業時間:星期二至日:11:00-16:30;18:00-20:45