Tagged: 街霸

0

【街市人氣粥檔紅足40年 生滾魚腩粥陀地遊客爭住食】街霸

依家香港地粥檔買少見少,除咗因為舖租貴之外,其實要煲一碗靚粥一啲都唔簡單㗎!今次街霸就帶大家去花園街街市入面一檔已經開咗39年嘅人氣粥檔妹記,冇被時代淘汰之外仲愈做愈勁,餐牌有齊中英日文幾個版本,證明超多遊客幫襯呀!咁多人遠道而嚟香港去街市食粥喎,咪話唔巴閉呀! 妹記嘅粥出晒名用銅煲去煲嘅,雖然當日舖頭太忙店員謝絕拍攝廚房,見唔到銅煲本人,不過食一啖就知有幾堅啦! 先食呢碗生滾魚腩粥(HKD42),落單後唔使一陣就熱辣辣送到枱面。聞落香噴噴,用匙羹摷一摷底,嘩,真係超多魚腩喎,起碼有十幾嚿!勁足料!魚腩咬落超滑,煲得啱啱好,睇嚟師傅控制火喉有一手喎!比較細塊嘅魚腩有小碎骨,大家食嘅時候要小心啦!粥底方面就的確有種老粥店風味,食得出係用明火煲嘅生滾粥,不過唔知係咪咁啱呢碗有微微燶燶哋,街霸愈食愈覺得碗粥有陣「乾炒牛河」嘅味,係嗰種有鑊氣嘅味道,其實幾好食! 另外秘製肉丸粥(HKD36)講到秘製喎,梗係要試吓啦!咬落覺得有啲綾魚味但唔腥,彈牙有咬口,真係未試過喺其他地方食到呢種質感同呢個口味嘅肉丸! 食粥當然唔少得油炸鬼(HKD11/碗)啦!開頭其實想食炸兩嘅,但老闆話冇賣炸兩,冇辦法啦!開頭有啲驚會嚟兩大條油炸鬼,食唔晒㗎嘛!好彩11蚊係一碗仔,價錢貴就貴咗少少,不過作為一人分量就啱啱好,唔好做大嘥鬼嘛!油炸鬼唔算話炸得好香脆,但勝在攤凍咗都冇變硬,浸落粥度又冇話一秒就變腍晒,依然保持到啱啱好嘅脆口感覺!唔錯! 食到最後飽飽哋,店員問試唔試吓爽魚皮(HKD28),好新鮮好爽咁話喎!一碗鋪滿薑蔥絲嘅碗仔,攪拌後見到好厚嘅魚皮,咬落的確爽口,夾埋薑蔥絲感覺幾清新,但就略嫌有少少淡。街霸落咗啲胡椒粉調吓味,加料後魚皮感覺超開胃,爽口彈牙,正!   街霸最愛:今集最愛就係生滾魚腩粥,因為足料得嚟仲有陣生滾嘅「鑊氣味」,唔知係咪用銅煲先有㗎呢?魚腩大大嚿一啲都唔慳皮,雖則話30幾蚊食碗粥好似有啲貴,但街霸就覺得有質素嘅老字號值得支持喇!40年老字號個朵你估流㗎?臨走街霸仲見到一大班外國人坐低睇餐牌添!真係多捧場客呀! 妹記生滾粥品 地址:旺角花園街123A號花園街市政大廈3樓熟食中心11-12號舖 電話:2789 0198 營業時間:星期一:07:00-15:00;星期三至日:07:00-15:00

0

【街市良心小店高質健康餐 黑松露炒蛋包一試難忘】街霸

上次街霸同大家介紹過南朗山街市入面嘅青咖喱屋,今次介紹埋對面舖珍珠奶茶美食坊啦!聽到呢個名係咪覺得Old School得嚟又帶點台灣味呢,喺街市入面專賣珍珠奶茶都真係夠晒奇怪喎! 其實唔止賣珍珠奶茶㗎,午市有超多選擇,多到應該要嚟足一個月先可以試勻晒咁多款食物呀!以小店規模嚟講,選擇真係多到唔合理,點解可以有西式、日式、台式、連越式都有,當然唔少得港式炒公仔麵啦,淨係以套餐計都有成十六款,仲未計每個套餐都再有3-10款選擇,真係逼死選擇困難症患者呀! 店員話最受女仔歡迎嘅set係鮮芒富士什果沙律餐(HKD45/包$14飲品),邊有餐廳嘅什果沙律係新鮮生果㗎,仲要係小店喎,芒果用呂宋芒,蘋果用富士果,蝕本喎大佬!跟沙律嘅配料都好多選擇,小編揀咗藍莓多士,因為藍莓醬係自家製㗎,保證無添加! 唔好以為Lunch食沙律就唔飽呀,由於用嘅係新鮮大大個嘅富士果,所以飽足感唔講得笑,我食半碟開始飽喇,蘋果味道超清甜,唔會話太多沙律醬搞到好膩,加埋微酸帶甜嘅呂宋芒真係超fresh。每一啖食落口都係清新味道,唔係全部罐頭嘢再溝埋,真係可以稱上小編街上食過最好食嘅「什果沙律」! 多士烘得啱啱好,咬落脆卜卜,中間搽咗一層厚厚嘅藍莓醬,酸酸甜甜超開胃呀。清新藍莓醬配埋真鮮果沙律真係冇得頂呀! 叫得珍珠奶珠美食坊,當然唔少得珍珠奶茶啦!選擇有成廿幾三十種,真係少啲意志都揀唔落手。街霸今次就試咗胚芽珍珠奶茶(HKD17),因為同枱大家都係飲呢杯,所以咪好奇點解囉。飲落個味唔算甜,飲得出茶味同埋胚芽味,啱晒飲嘢鍾意少甜嘅一族呀。胚芽分量好足料,至於珍珠就係普通嘅細珍珠,咬落唔會話特別彈牙,但起碼飲落去個感覺係舒服順喉唔heavy囉。 除咗Lunch吸引,下午茶都超吸晴。健康扒飽餐(HKD25)竟然有黑松露炒蛋喎,因為好奇街市小店嘅黑松露蛋究竟可以去到咩水準,所以就叫咗嚟試吓。 開頭諗住應該係勁hea嘅包夾住一塊hea炒嘅蛋,冇諗過個包原來都幾大個,大過老麥漢堡包。麵包用芝麻包,食落有種自家製嘅軟熟,黑松露炒蛋食落真係有黑松露味喎,仲幾香濃添,分量都唔慳皮㗎!本來黑松露蛋令到咁大個包有啲heavy,但加埋塊新鮮生菜同沙律醬又中和到,街霸真心覺得呢個包好高質!一定會返頭食呀!   街霸最愛:雖然鮮果沙律同藍莓多士都好好味,但街霸覺得今集嘅真愛係黑松露炒蛋包呀!25蚊食到飽一飽,仲難得好味,食完成個感覺超fresh!街霸超佩服街市小店咁堅持做高質新鮮嘅嘢食,唔怪得舖頭細細但lunch時段都爆晒場啦! 珍珠奶茶美食坊 地址:黃竹坑南朗山道1號南朗山道熟食市場1樓11號舖 電話:2555 9113 營業時間:星期一至五:07:00-16:00;星期六:07:00-15:00  

0

【朗豪坊直通街市平民食堂 咖喱農夫包質素超晒班】街霸

去得旺角行街,相信大家都唔會miss咗朗豪坊。作為旺角最大型購物商場,無論係買定食都好,消費都相對比較高。如果糧尾又想去旺角行街食飯嘅話,其實對正朗豪坊隔離嘅旺角街市都係一個唔錯選擇!唔知大家有冇去過呢? 朗豪坊3樓有條天橋直通去呢個熟食中心,平日下午都幾多人㗎!今次街霸就試吓呢個街市入面最有名嘅澳門翠苑茶餐廳,佢哋嘅招牌菜就係咖喱農夫包喇!咖喱豬頸肉農夫包(HKD62)好受歡迎,街霸見隔離枱都係食佢,似乎係必食。 農夫包即叫即焗,上枱時用錫紙包住,感覺比想像中大個。打個錫紙後見到農夫包預先切咗個「蓋」出嚟,拎起個麵包蓋之後就見到農夫包盛載住香濃嘅咖喱汁同滿瀉嘅豬頸肉,跟餐仲會送熱飲同埋羅宋湯,羅宋湯香濃足料,足料又唔會太油,街市熟食中心嚟講質素超班呀! 農夫包食法比較原始,一般都係用手摵開嚿包點咖喱汁食先最原汁原味!咖喱汁微辣唔會太搶喉,用外脆內軟嘅農夫包一嚿嚿點嚟食別有一番風味,即叫即焗嘅包果然係唔同啲!咬落外層有少少似法包質地咁脆口,個心又好似白麵包一樣鬆軟,仲帶少少煙韌,真係食唔停口!不過呢個包分量超大,街霸食咗一半就要打包走喇,食呢個包最好搵人同Share喇! 另外呢個街市亦有平民化扒餐,福來棧嘅雜扒餐(HKD55)有齊雞扒牛扒再加隻太陽蛋同埋腸仔,仲包熱飲同餐湯,咪話唔抵呀!依家就算去茶餐廳鋸個扒都差唔多要8、90蚊,而呢度只係一半嘅價錢,唔怪得成日俾人叫做平民飯堂啦! 唔好以為價錢咁平、分量就會縮呀,呢度塊塊扒都大大塊,你睇吓塊牛扒大過塊面咁滯呀!另外太陽蛋亦煎得超靚仔,正宗大件夾抵食啦! 牛扒大塊得嚟咬落都算腍身,雖然牛味唔係好足,但都係嗰句啦,性價比高嘛!意粉大大碟一啲都唔手軟,超飽肚之選!有時突然間想食吓扒餐又唔想食太貴,呢度諗得過呀! 街霸最愛:今集最愛非農夫包莫屬喇,脆卜卜外表包裹住柔軟嘅內心……街霸真係招架唔住呀,除咗分量真係有啲太大之外真係無可挑剔,難得街市裡面有咁認真製作嘅小店,仲食到啲特色嘢,大家下次經過朗豪坊記住去埋隔離食嘢喇! 澳門翠苑茶餐廳 地址:旺角上海街557號旺角熟食中心2樓8號舖 電話:3514 4348 營業時間:星期一至日:07:00-20:30 福來棧 地址:旺角上海街557號旺角熟食中心2樓6號舖 電話:從缺 營業時間:從缺

0

【跑馬地街市馳名油砂多 隱世魚片三文治非試不可】街霸

跑馬地,除咗豪宅同埋馬場仲有咩最出名?講到食,其實喺黃泥涌街市樓上嘅熟食中心有又平又正嘅好嘢! 街霸講緊係行入去第一間見到嘅昌記!平日下午人流唔算多,一入到去就有位坐喇!伙記阿姐好熱情,好主動問街霸想食啲咩。見佢哋特別推介自家製雪菜肉絲,街霸就一於試試啦! 常餐(HKD34/2餸)可揀兩個餸再揀麵底。望落去都幾足料,雪菜肉絲果然同食開嘅唔一樣,感覺冇咁油同埋雪菜顏色比較綠。食落口有一種爽口又fresh嘅感覺,真係覺得自己食緊菜,而唔係一堆經過化學嘢同防腐劑處理過嘅物料。 雪菜色水望落超新鮮!如果鍾意食雪菜肉絲嘅朋友不得不試呀! 另外雞扒亦煎得非常香口,皮仲有少少脆,肉質嫩滑,34蚊兩餸價錢算幾抵食! 魚片蛋三文治(HKD19)好得意咁,喺第二度真係未見過喎。麵包世界級好食,提提大家:呢度叫烘底係唔使加錢㗎!所以識食一定係食烘底。蛋雖然薄薄咁,但包埋魚片感覺意外咁夾,魚片仲勁足料,分量多過蛋咁滯呀!咬落好彈牙,夠味唔會白烚咁!街霸覺得呢個三文治真係幾有驚喜,大家必試呀! 另外呢個馳名嘅油砂多(HKD12)真係一啲都唔嘢少㗎!昌記除咗天下第一厚多士出晒名之外,呢個油砂多亦係令好多人慕名而來嘅!睇吓多士表面嘅牛油融化得幾咁均勻,上面嘅砂糖粒粒分明,多士烘至金黃,真係睇見都流口水!街霸覺得牛油同砂糖夾埋一齊食有種煉奶香,加埋咬落食到砂糖粒粒,感覺好似……細個喺沙灘食到沙咁!講笑啫,呢個油砂多食落口感超有層次,唔係唔試呀? 一杯奶茶沖得好唔好飲,好多時都反映到一間茶檔嘅整體質素!街霸今次決定用一杯凍奶茶(HKD17)為今次拜訪昌記畫上完美句號!入口順滑冇渣,茶底夠甘香,有濃濃嘅紅茶味,茶同奶friend過打band,完全融為一體,果然冇令我失望。一個字,冇得彈! 街霸最愛:其實冇話最唔最愛嘅……事關今集所有嘢街霸都超滿意,完全稱得上價廉物美呀!真係要揀,我會揀最令人有Surprise嘅魚片蛋三文治,雖然聽落有啲騎呢,不過唔試又點知有幾正呢,係咪? 昌記 地址:跑馬地毓秀街2號黃泥涌市政大廈2樓熟食中心1及5號 電話:2573 5910 營業時間:星期一至六:07:00-16:30

0

【街市懷舊推車仔點心檔 足料魚翅餃大大個叉燒包】街霸

依家好似已經愈嚟愈少酒樓有「車仔點心」喇!小編細個嘅時候,去親飲茶都等緊點心車慢慢繞過全場一圈,又或者攞住張點心卡,周圍搵車仔攞點心食,手快有手慢冇㗎!不過依家大型連鎖酒樓都用晒電子單,連點心卡都消失埋!最近街霸就喺黃大仙大成街街市發現仲有懷舊推車點心檔喎,咁要去感受吓懷舊味道啦! 呢間歡樂中式點心望落相當有歷史呀!可能係因為平日上午嘅關係,幫襯嘅幾乎清一色係公公婆婆,點心檔就變咗一個聚腳點,大家到時到候蒲頭,好熱鬧! 茶芥4蚊一位,比想像中平喎,印象中連鎖酒樓起碼都10蚊起跳!坐低見到隔離枱嘅公公婆婆一人一個叉燒包(HKD7),街霸當然唔輸蝕,一於整返個!叉燒包比普通酒樓嘅size大得多,包大餡靚,搣開熱辣辣出晒煙,正! 一有車仔推過嚟,就梗係要八吓有咩食啦,見到有叉燒腸粉(HKD16)喎!睇落皮薄餡靚,咬落腸粉皮好重米香,呢種腸粉嘅米香真係唔係度度食到,咬落唔係一團粉,帶點彈牙咁,叉燒唔韌夠蜜香。 喺舊式點心檔食嘢最過癮係見住啲點心車仔車來車往,見到啲蒸籠噴晒煙,就知係啱啱出籠,包保新鮮!呢個魚翅餃(HKD16)粒粒都咁飽滿,超足料!咬落雖然食唔到粉絲類疑似「翅」嘅物體,但係餃皮夠晒薄,粒餡就大大粒啖啖肉,16蚊4粒超抵!唯一美中不足係呢度星期一至日都淨係開早市,遲少少起身都可能賣晒冇得食㗎!街霸原先諗住食埋個鳳爪排骨飯(HKD19)就收手,點知差唔多十一點就已經賣晒!所以大家記得早少少去穩陣啲呀! 街霸最愛:今集最愛係魚翅餃!喺其他酒樓好少食到嘅味道,就算有都一定冇呢度咁皮薄餡靚,皮薄得嚟又唔會一夾就穿晒!超足料唔慳皮,無論工夫、味道、賣相同價錢都滿分呀! 歡樂中式點心 地址:黃大仙彩虹道121號大成街街市大樓2樓 電話:2323 3808 營業時間:星期一至日:06:00-12:00

0

【日籍師傅主理街市居酒屋 靜岡蒸蛋地道風味好滿足】街霸

講起「葵」字頭嘅美食集中地,除咗諗起葵涌廣場之外,其實工業大廈雲集嘅葵興都有好嘢食㗎!今次街霸就帶大家到葵涌和宜合道街市入面嘅平民居酒屋滿足食堂。 居酒屋喺街市入面,座位唔算好多,但係餐牌上嘅食物款式就好多選擇喇!餐廳嘅廚房同用餐區中間隔開咗一個舖位,由於小店人手唔多,有咩需要可以直接走過去廚房搵店員幫手。 滿足食堂由日本人佐藤先生主理,佢04年被日本白木屋派嚟香港做總廚兼總經理,可能喺大公司做得耐想試吓自己把刀嘅關係,2016年佢正式落戶和宜合道街市嘅小檔位,為附近居民帶嚟地道日本美食。 最出名係呢個梳乎厘狀嘅HuwaHuwa靜崗蒸蛋(HKD42)。開頭小編見到蒸蛋仲以為係細細兜嗰種日本蒸蛋,點知一嚟到見到係一大煲!蒸蛋望落去好鬆軟,用匙羹一潷開見到下面竟然係雜菌湯!街霸之前冇見過呢款蒸蛋,後來上網google發現呢味「梳乎蛋湯」係靜崗一間老店嘅獨有菜式,後來愈來愈多人仿效。 呢個蒸蛋唔係我哋平時食開嗰種「蒸水蛋」,食落好似一陣泡沫咁樣,真係有少少梳乎厘feel,只不過佢係日本傳統嘅鹹食。口感非常有趣,蒸蛋混埋底下嘅雜菌清湯非常清爽,雜菌湯用咗金菇、薄切嘅雞髀菇等,飲落另有一番特別風味。 另外同樣係日本傳統食品之一嘅茶漬飯亦係招牌之一。好多日本餐廳都會提供茶漬飯,因為茶漬飯食落清爽解膩同時又可以增加飽足感,日本人習慣用佢作為一餐飯嘅句號。不過香港嘅日式餐廳就唔係度度有得食喇,可能同港日兩地嘅飲食習慣有啲唔同啩,我哋通常一餐都食到飽到上心口,應該解膩嘅茶漬飯都食唔落喇,哈哈。 明太子茶漬飯(HKD38),唔好睇佢細細碗好似唔抵咁呀,以比例嚟講,明太子分量真係超多,可以一啖飯一啖明太子咁食!叫得做茶漬飯都預咗比較清淡,點知食落一啲都唔淡,明太子發揮到好好嘅調味作用。飯上面嘅高湯非常好味,冇落到味精但依然開胃,食落好清爽,街霸大力推薦呀!另外仲有芥辣八爪魚茶漬飯(HKD38)同三文魚茶漬飯(HKD38),下次可以試埋另外兩款喇! 另外街霸亦食咗炸雞排定食(HKD62),定食包沙律、漬物、海帶湯、雞排同埋飯。分量算幾大份,一個人食絕對會飽到上心口,如果大家想食多幾款,不妨嗌一個定食share再點小食呀! 雞排炸至金黃,望落去好靚仔,而且有埋隔油鐵架仔,熱辣辣炸起嘅雞排唔會因為太熱上碟而黐到一嚿嚿,夾起每嚿都係清爽又嫩肉,雞皮同肉唔會分晒家,好味!   街霸最愛:今集又有雙冠軍喇,我覺得茶漬飯係必食嘅!因為食完之後真係令我徹底對茶漬飯改晒觀,真係好有日本風味!另外靜岡蒸蛋都係不得不食,街霸暫時喺香港搵唔到第二個地方有得食,喺街市竟然食到靜岡馳名嘅老料理喎,食落清新解膩,綿密嘅蒸蛋感覺好奇妙!喺葵廣對面巴士站搭43A喺打磚坪街落,10分鐘內就到喇! 満足食堂 地址:葵涌和宜合道24號和宜合道熟食市場C6號舖 電話:5491 8102 營業時間:星期一至二:12:00-15:00;18:00-22:00;星期四至日:12:00-15:00;18:00-22:00

0

【蔡瀾周潤發都話正 九龍城茶檔名物沙嗲牛西多】街霸

九龍城除咗出名食泰菜之外,唔好忘記街市都係個大寶藏呀!今次街霸就去咗食神同巨星都捧場嘅茶檔仔-樂園,係呀,周潤發同蔡瀾都幫襯過㗎,蔡瀾仲送咗幅寫住「勝過鮑參肚翅」嘅墨寶,得蔡San墨寶保證,必屬佳品啦!有傳發哥好多時都會去九龍城街市買餸,所以野生捕獲發哥嘅機會率幾高㗎!不過今日街霸就撞唔到發哥喇,咁惟有專心食嘢啦! 去得樂園搵食,響晒朵嘅沙嗲牛肉西多士(HKD30)必食啦!不過撞啱繁忙時間嘅話就要等耐少少喇,今次街霸想落單嘅時候,侍應姐姐就話啱啱嗰轉賣晒,要等20-30分鐘左右。一場嚟到冇理由空肚而回㗎嘛,咁街霸惟有等呀等,卒之15-20分鐘之後熱辣辣嘅西多上枱喇! 見到份西多脹卜卜,面頭塊牛油自動溶化,感覺好治癒呀!外皮炸至金黃,一切開係滿滿嘅沙嗲牛肉餡,足料喎!平時煉奶或者糖漿西多就食得多,今次真係第一次食鹹嘅,感覺又幾夾喎!內層鬆軟嘅麵包同外層炸到脆卜卜嘅皮,加埋入面嘅沙嗲牛,一絕呀!唔怪得蔡San都話勝過鮑參翅肚啦,雖然只係好簡單嘅材料,但真係食得出師傅嘅心機喎! 除咗沙嗲牛西多,阿華田脆醬厚西多士(HKD32)亦好吸引。Size同沙嗲牛西多差唔多,但面頭就灑咗啲砂糖,一切開又係脆卜卜,阿華田餡未至於話係爆出嚟,但睇見入面滿滿嘅阿華田醬同埋脆脆就好滿足喇!平時冇乜機會食到阿華田醬,街霸覺得感覺有啲似Nutella,食落少少漿住個口,加埋啲脆脆好正啊!完全滿足到想食甜嘢嘅心情! 紅豆冰都係茶檔必飲嘅,唔輸蝕叫咗杯奶茶紅豆冰(HKD24)。紅豆同奶茶嘅比例剛剛好,唔會話太多紅豆太少茶咁。紅豆咬落粒粒分明,唔會太甜,夾埋茶底超香嘅奶茶冇得頂!飲品冇得跟餐要單點,不過街霸覺得係值24蚊嘅! 最後食埋招牌之一樂園炸豬扒脆豬包(HKD34),即叫即整,上到枱新鮮熱辣,豬扒鬆軟多汁唔係成塊紙皮咁。脆豬包夠脆,同高質炸豬扒夾埋食簡直大滿足,而且個包都幾大件,2個share再叫西多就perfect! 街霸最愛:今次嘅最愛就係……登登登凳,沙嗲牛西多喇!本身街霸早餐好鍾意食沙嗲牛麵,平時好少喺早餐以外嘅時間食到沙嗲牛,覺得呢個沙嗲牛西多有創意得嚟又好味,輕易成為今集最愛!    樂園 地址:九龍城市政大廈3樓6號舖 電話:2382 3367 營業時間:星期一至五:07:15-15:45(視乎當日營業情況而定);星期六及公眾假期:07:15-14:00

0

【承傳正宗馬拉肉骨茶 觀塘街市30年老店重開】街霸

觀塘有好多美食隱身喺工廈就眾所周知,咁大家又知唔知其實駿業街街市都有名不經傳嘅正嘢呢?街霸今次帶大家食正宗肉骨茶同埋足料花膠雞髀湯翅! 見到賣正宗馬拉嘢,舖頭仲有塊古色古香嘅牌匾加持,街霸以為一定有好耐歷史啦,點知見到門口餐牌寫住「新張期間送是日特飲」?於是問吓老闆娘開咗幾耐,原來呢間自悠廚房真係有段歷史㗎喎! 話說80年代有位老師傅喺駿業街街市開咗呢間自悠廚房,主打正宗肉骨茶,好受街坊歡迎,不過年幾前老師傅突然去世,自悠廚房後繼無人。結果有對夫婦想接手,於是喺老師傅遺孀度繼承咗老師傅嘅肉骨茶獨門秘方,不過喺1年之後再頂咗手俾依家嘅老闆娘。老闆娘話佢哋都繼承咗老師傅嘅肉骨茶秘方,不過就唔想淨係做肉骨茶,想試吓其他菜式,於是喺「自悠廚房」前面加咗「小木屋」三隻字,承先而啟後,保留傳統之餘亦不斷咁試新菜式,好有心呀! 餐牌上都係一啲養生菜式,又花膠又雞湯咁,老闆娘話保證無添加,每款真材實料煲出嚟,唔會加味精。食得健康價錢又合理,唔怪得平日Lunch Time咁多上班族幫襯啦。 啱啱頂咗手2個月左右,仲不斷試緊唔同菜式,所以餐牌隨時有變動㗎。新張期間會送是日特飲一杯,目前可選自家製羅漢果茶或者紅菜頭汁。小編本身麻麻哋紅菜頭,不過一飲之下發現杯紅菜頭汁嘅味道竟然有少少似……Fruit Punch?小編發現原來加咗新鮮菠蘿同芒果,唔怪得味道甜得嚟又Fresh啦。老闆娘話一滴糖水都冇加㗎!呢個紅菜頭汁有益又好味,正呀!另外羅漢果水亦好甜,一啲都唔覺得自己飲緊涼茶呀! 第一次嚟點都要試吓名物-肉骨茶(HKD60/配白飯)。一上枱已經傳來陣陣藥膳香,呢煲肉骨茶比想像中多料,因為以往對肉骨茶嘅印象只係幾嚿骨浮喺水面咁,而呢煲就有齊肉骨、自家製肉丸、金菇、豆卜、生菜同埋幾嚿內贜。自家製肉丸食落幾有風味,唔係話好彈牙嗰種,肉汁爆出嚟,唔錯唔錯!另外豆卜同金菇就索晒肉骨茶精華,淡淡藥膳味同肉骨熬出嚟嘅濃厚湯底超match,好正! 嗱,唔好以為平時食開嘅肉骨茶多數都係得幾嚿大骨呀,真係有大大嚿骨㗎!熬咗好多個鐘頭嘅肉骨入晒味,好味到小編忍唔住嚿嚿骨都舔乾淨晒呀。 除咗肉骨茶,老闆娘話花膠雞腿湯翅(HKD60/配香蔥飯)亦好受歡迎!你睇個湯熱辣辣都起晒膠,就知用真花膠燉出嚟啦,睇見都覺得補呀!個湯飲落去超入味,feel到嗰種「膠」嘅質地,唔係嗰種好稀好hea嘅花膠湯,飲嘅時候會feel到嘴唇有啲黏黏感覺。攞嚟送香蔥飯真係一流呀!另外雞髀肉超嫩滑,滑過我塊面添呀,啖啖都係肉,超滿足! 花膠燉得超級稔,食落去唔會話「淡茂茂」咁,吸晒雞嘅鮮味,食落去真係啖啖都係骨膠原呀!女士們食就最適合不過喇! 街霸最愛:作為女仔,街霸覺得花膠雞腿湯翅係最吸引嘅,搭埋送嗰杯紅菜頭汁真係一個超健康又fresh嘅午餐選擇呀!始終觀塘附近返工嘅打工仔每日Lunch都不外乎食茶記、車仔麵呢啲相對肥膩同味精多嘅嘢,咁依家多個有營健康新選擇啦!橫掂依家出街食飯冇40-50蚊都走唔甩,咁不如食啲養生嘢啦。小店製作需時,大家去嘅時候記住預啲時間呀!依家暫時淨係做一至五嘅午市,大家去嘅話要留意營業時間呀! 小木屋之自悠廚房 地址:觀塘駿業街熟食市場1樓43號舖 電話:9069 8254 營業時間:星期一至五:11:30-15:00

0

【恆安街市日式小店勁高質 鰻魚飯+大阪燒性價比超高】街霸

最近街霸去咗馬鞍山嘅恆安市場,最初以為街市小食通常都係啲燒賣魚蛋腸粉咁啦,但係俾街霸發現呢個街市竟然有日本好嘢食喎,真係要試吓先得喇! 翻新街市run咗一排,睇落井井有條,美食街夜市仲開到凌晨兩點添!馬鞍山街坊又多個宵夜選擇喇! 小編喺網上見到舌尖回味都幾多好評喎,專賣日式料理,價錢真係幾「街市價」㗎,想食日本嘢又唔想咁傷荷包就啱啦!不過價錢平極都係假,質素點先?街霸今次就食咗日式鰻魚飯同埋小食喇! 日式鰻魚飯(HKD48)真係幾足料!近幾年鰻魚飯愈賣愈貴,出面啲餐廳閒閒哋賣成8、90蚊㗎!小編覺得呢個鰻魚汁同埋肥美嘅鰻魚配合得好好,唔係嗰啲以假亂真嘅薄切切海鰻,係真.鰻魚呀,厚切㗎真係,咬落鰻魚獨有嘅油脂味夾埋彈牙鰻魚皮,48蚊就滿足到想食鰻魚飯嘅慾望,抵啦。店員姨姨話下午茶都有鰻魚飯,不過分量相對細啲,包埋紙包嘢飲都係32蚊,如果下次Tea Time口痕都可以諗諗喎! 另外店員姨姨亦推介咗3款小食俾街霸,分別係右起:蟹肉忌廉薯餅(HKD8)、薯絲蝦(HKD12/2隻)同埋芝麻雞翼(HKD18/2隻)。樣樣新鮮炸起,望落金黃香口,聞落香噴噴添呀,口水都流呀! 蟹肉忌廉薯餅一夾開啲忌廉就流出嚟喇,好香忌廉味呀!食落蟹味唔係話超香濃,不過都食得出係蟹味忌廉薯餅呀,同埋忌廉都算creamy!小編覺得8蚊都幾抵食嘅,仲有好多種口味,例如吉列牛肉薯餅、咖喱薯餅、南瓜薯餅、栗米薯餅同埋蔬菜薯餅,全部8蚊,同fd Share食多幾款口味就最正啦! 薯絲蝦都唔簡單,咬開食到一條條薯仔絲㗎!炸到條條分明,香口又重薯味,好正!街霸覺得呢個真係有驚喜,薯仔控不要錯過! 隔離呢間鐵板工房亦係街市少見嘅日本料理,話明鐵板工房就梗係賣啲鐵板美食啦,最招牌係大阪燒喇!另外炒麵都係鐵板上,嘩,好似突然置身大阪小食檔一樣啫! 除咗鐵板嘢仲有好多唔同嘅小食,好似芝士蟹籽玉子燒都幾吸引!不過一場嚟到,梗係要試吓招牌鐵板燒餅(HKD28)啦! 由於嗰日太旺場喇,檔口坐滿晒人,所以街霸外賣咗去市場外面嘅公園慢慢歎!一打開個盒,真係好有大阪燒嗰種風味,燒汁加埋沙律醬,熱騰騰冒住熱氣,28蚊有呢個賣相真係100分呀! 切開睇吓有咩料先,除咗最基本嘅椰菜絲,亦有好香口嘅煙肉,加埋燒到啱啱好嘅餅底,正呀!街霸以前食過一啲唔太正宗嘅大阪燒,個餅底超級厚,食到一肚都係麵粉咁,呢個餅底厚薄啱啱好,材料同粉漿嘅分量配合得唔錯。28蚊食到飽一飽,性價比超高呀!   街霸最愛:今集真係好難分高下,鰻魚飯同大阪燒都咁好味……不過街霸就覺得大阪燒嘅性價比真係完勝嘅,大件夾抵食得嚟又唔係粗製濫造,睇得出老闆好用心咁燒每一塊餅。28蚊食到塊大過我塊面嘅大阪燒喎,抵到爛呀! 舌尖回味 地址:馬鞍山恆錦街1號恆安商場地下恆安街市42號舖 電話:6462 9701 營業時間:09:00-02:00 鐵板工房 地址:馬鞍山恆錦街1號恆安商場地下恆安街市41號舖 電話:5402 1008 營業時間:10:00-02:00

0

【天盛街市有條立食街 喇沙米線色香味齊全】街霸

今集街霸又帶大家返嚟天水圍街市搵食喇!自從天耀街市俾領展收返之後,天盛街市成為呢頭唯一嘅街市喇!門面裝潢同樣係領展新派街市一貫風格咁囉! 聽居民講,領展夾硬摺咗天耀街市之後,仲焗啲檔主搬過嚟呢邊貴一倍租嘅新街市,間接搞到街坊買餸都貴咗呀。不過天盛街市聽講整咗條「立食街」喎,等街霸去試吓掂唔掂先? 小編喺網上見到榮少喇沙有唔少好評,雖則價錢就唔算「街市價」,舖面細細,不過都叫做有個位坐吓,可以慢慢食。 肥牛喇沙米線(HKD42)相當足料,多餸到見唔到啲米線呀!睇落啲豆卜好入味咁喎,聞落好香喇沙味! 湯底超濃郁,食得出咖喱、椰槳嘅味道,帶有少少辣,各種調味配合得啱啱好,唔會太鹹。米線、肥牛同豆卜等等「索」晒個湯超入味。肥牛分量比想像中多,唔係淨係得面頭見到嗰3、4塊,起碼有成7、8塊,食極都仲有!性價比高! 另外招牌豬軟骨肉燥飯(HKD38)亦相當唔錯,盒飯超大份,肉燥同豬軟骨分量亦都好足,唔會話淨返一半飯冇餸食咁。味道比較偏向港式肉燥,唔係台灣嗰種帶肥豬肉嘅肉燥,攞嚟送飯味道啱啱好。豬軟骨好入味,仲有隻真.溏心蛋,見到都心心眼呀! 如果想食輕食嘅話可以行多兩步去柒拾后,有做午市學生優惠,20蚊就有個米線真係唔錯喎!小編當年返學食lunch都冇咁平啦……睇嚟呢個街市對附近嘅學生哥嚟講都係飯堂喎! 之前成日都聽見話元朗有廿幾蚊嘅花膠碗仔翅好正咁,原來天盛呢邊都有呀!花膠碗仔翅(HKD20)望落啲料唔算話好多,不過聞落都幾香嘅。 開頭街霸搵極都搵唔到花膠BB喺邊,差唔多食到最後嘅時候終於都食到兩嚿疑似花膠狀物體。雖然花膠數量有啲少,但呢碗碗仔翅味道是唔錯的,個芡唔會太杰唔會太水,啱啱好!落少少胡椒粉調味就掂晒!講真,20蚊都估到佢唔會話勁多花膠,味道OK就打和啦。   街霸最愛:街霸真係Like爆個肥牛喇沙米線呀,湯底濃而不鹹,雖則未至於話可以成碗湯飲晒落肚,但都同出面連鎖店成日食到水注注嗰啲喇沙唔一樣,有明顯嘅咖喱同埋椰汁味!餸嘅分量又多,42蚊我覺得係值嘅! 榮少喇沙 地址:天水圍天靖街3號天盛商場天盛街市M415號舖 電話:3427 9226 營業時間:12:00-23:00 柒拾后 地址:天水圍天靖街3號天盛商場地下天盛街市CF11號舖 電話:冇提供 營業時間:不定