Tagged: 西多士

0

【快速氣炸朱古力醬厚西士 輕邪惡小食5步製成】氣炸師

想整返件西多士,又唔想好似茶餐廳咁肥膩,不如試吓喺屋企用氣炸鍋整西多士啦。無論落唔落油,定係入面嘅餡料都可以自己控制。依家跟住小編做輕邪惡嘅少油版「朱多士」啦! 朱古力醬厚多士 材料與分量: 朱古力醬 – 適量 牛油 – 適量 雞蛋 – 兩隻 厚方包 – 兩片 做法: 1. 先將厚方包切邊去皮。 2. 方包內均勻塗上牛油同朱古力醬。 3. 將兩隻蛋發打均勻後,放入方包令四面都均勻沾上蛋液。 4. 預熱氣炸鍋200度,3分鐘;之後用180度氣炸8分鐘,反轉再氣炸4分鐘。 5. 炸完放返塊牛油喺面就完成喇。

0

【新斗記班底開親民價冰室 鑊氣小菜+必食農夫包】春蘭冰室

傳統粵菜館新斗記班底最近靜悄悄,自己組隊喺深水埗開咗春蘭冰室,依家可以用親民價試到佢哋嘅小菜有幾鑊氣喇!話明係冰室,食物當然唔係傳統粵菜啦,而係大家熟識嘅菜式,即刻睇吓有咩啦! 冰室設計行懷舊風,牆上仲寫咗唔少為人熟悉嘅金句俾人話當年。負責人Jessica話原來好多人唔知「二仔底」係「死跟」咁解,因為咁同唔少食客打開話題添。 係人都知新斗記嘅咕嚕肉出名,但冰室都有其他小菜飯餐一樣正斗㗎。好似麻婆煮豆腐套餐(HKD55)配埋足料老火湯、飯同熱飲,見到呢個分量都飽咗。 呢個麻婆豆腐同平時有啲唔同,加咗榨菜增加口感之餘,微辣中帶點鹹香。而且豆腐同肉嘅比例近乎1:1,都落足料㗎。 自細去大排檔都鍾意食炸嘢,呢度都有,仲好夠火喉添!椒鹽九肚魚(HKD48)比一般酒家平成截,但都有約十件左右九肚魚。脆皮唔厚,魚肉炸到啱啱熟,滑嘟嘟,不過選用大條嘅九肚魚,魚骨粗啲唔可以食埋。 其他套餐同小菜都好抵食,而且款式都係大眾熱選嘅款式。 黑椒牛肉炒意粉(HKD48)係茶室人氣食品之一,呢度嘅意粉彈牙唔會發脹,睇落油光強勁但入口唔膩喎。黑椒香氣十足,牛肉就大件爽口。 除咗行親民路線之外,西式菜對粵菜班底都係新嘗試,不過絕對冇考起佢哋喎。皇牌馬來咖喱豬扒農夫包(HKD68) 係呢度嘅必食菜式之一,大大個超足分量。但提提大家唔好打卡太耐,要趁熱熱切開佢,等面頭嘅芝士滲埋入去!豬扒幾嫩滑有肉汁,咖喱香得嚟唔會好辣,香軟嘅麵包嗦咗咖喱汁更加令人食得滋味,令小編唔記得入面仲有飯添。 就算下午茶時間嚟都一樣有正嘢食,呢款朱古力紅豆法蘭西多士(HKD28)唔止賣相吸睛,西多士仲夾咗唔少花生醬! 蛋沙律西多士(HKD31)外表平平無奇,但一食係充滿兒時回憶嘅滋味囉!成口蛋沙律但配西多士,反而冇三文治乾噌噌嘅口感,又反傳統唔係配花生醬、牛油同糖漿。 竟然玩懷舊風又點少得黑牛(HKD22)同雪糕紅豆冰(HKD22)呢啲特色飲品呢?!而且紅豆仲好大粒㗎。   春蘭冰室 地址:深水埗福華街188號海峯地舖 電話:2881 8331 營業時間:星期一至五:11:30-22:30,星期六、日:11:00-22:30

0

【小食部兩蚊起仲有鐵皮玩具 九龍灣食真懷舊茶座口味】九五茶座 – 放宮樂園

成日話懷舊,冇啲舊嘢又點夠味道呢?!但九龍灣Megabox 嘅九五茶座 – 放宮樂園就明白呢點喇。呢度有好似士多咁有小食同舊時代嘅玩具俾人話當年,啲零食都係兩蚊起,就連茶座嘅食物都係舊時嘅味道,仲冇加一添!所以呢度除咗懷舊,都希望等大家收工之後可以喺度放鬆吓。呢度仲有好多打卡位㗎,即刻帶大家睇吓啦。 門口有大大副,由本地插畫家全神畫嘅牆畫扮士多,set埋枱櫈俾你,任影唔嬲。 小食部有好多款細個成日食嘅可樂糖、士的朱古力、BB糖等等,都係兩蚊起咋! 康樂部仲有好多舊式鐵皮玩具、火車、飛機等等。聽到有啲客人同小朋友講「爸爸媽媽細個就係玩呢啲喇。」,仲忍唔住會買返一、兩件添。 行入啲就係茶庭喇,有埋圍欄、雀籠、同本地插畫家畫嘅六、七十年代香港環境,食嘢之前要再打卡囉。不過小編影到有啲餓,真係要開餐喇! 先嚟個咖喱牛腩(HKD68),可以配飯、意粉或者蒜蓉包。平時見到餸同飯分開上,都會感覺碟餸細咗,不過呢碟食落係拮極都仲有牛腩,唔係薯仔多過肉㗎。而重點嘅咖喱汁好有梛香味,咖喱味會慢慢滲出嚟,質感好滑唔會杰晒。牛肉亦燜得夠腍同仍然有咬口。 呢個蕃茄燴炸髀(HKD52)都好驚喜,炸雞髀唔上大隻,炸漿嘅質感就係舊式嘅感覺,鹹度啱啱好。外脆脾肉嫩,仲有少少肉汁流出嚟添。而估佢唔到嘅係蕃茄汁燴意粉都做到舊式嘅酸甜味,原來呢度真係請返當年喺茶座嘅人嚟做大廚,用返蕃膏,唔怪得味道可以咁傳神啦。 如果想食個下午茶簡簡單單,加料邪惡西多士(HKD30)就啱晒喇。面頭放咗塊牛油之外,仲灑咗勁多糖霜!切開入面發現,原來有3層麵包,即係用嘅醬都多啲。不過邪惡嘅嘢喺核心地帶,因為入面再夾咗芝士!令士身炸到鬆軟香甜嘅西多士,增加一份鹹香味。 豬仔包唔一定夾豬扒嘅,咸牛肉蛋豬仔包(HKD26)都一樣咁掂。豬仔包鬆軟又有空氣感,加埋厚厚嘅咸牛肉蛋,唔埋朝早定下午茶食都咁滿足囉。 而無敵風火輪(HKD98)有五款大家鍾意嘅港式小食,炸雞翼、煙伕腸仔卷、炸墨魚餅、炸幼薯條同雞肉串燒。睇落唔多,食落幾飽,因為好多肉呀!跟埋必點嘅茄汁、沙律醬同酸甜醬,惹味同滋味程度極高囉。 門口嘅小食檔好似道具咁?真係有嘢賣㗎!下午茶時段會推出師傅每日新鮮製嘅撻(HKD7/件),會視乎材料決定當日整咩,當日小編就試到蛋撻同椰撻。呢兩款都好驚喜,蛋撻酥皮薄到咬落去唔會feel到一層層,蛋仲滑到好似水蛋咁。椰撻中間冇咗粒紅色車厘子差啲唔認得佢,焗到面頭香脆,入口係滿滿香軟嘅椰絲,唔會太甜,直得再食呀! 但平日嚟食嘢就要注意喇,因為餐廳做到六點就截單,不過出面零售嘅位置會繼續開俾大家買糖果同玩具㗎。   九五茶座 – 放宮樂園 地址:九龍灣宏照道38號企業廣場5期Megabox 9樓23號舖 電話:2458 6032 營業時間:星期一至五:08:00 – 21:00,星期六、日:08:00 – 22:00

0

【樽仔奶茶名震上環街市 必食瑞記蛋牛包+西多】街霸

今集街霸帶大家嚟到上環街市入面好出名嘅瑞記,平日晏晝嘅熟食中心整體人流唔算多,但瑞記呢度竟然都坐到爆喎,可想而知有幾堅啦! 呢度仲用緊舊式花碼字所寫嘅餐牌,夠晒港式味道呀真係!唔知點解小編真係好鍾意呢塊餐牌呀,又有味道、字又寫得靚,希望呢間小店長做長有啦。依家仲寫呢類花碼嘅餐牌真係買少見少喇!(當然舖頭亦提供寫阿拉伯數目字嘅餐牌方便食客參考)因為其實……連小編都唔係好記得點睇喇。小編又考考大家,如圖中餐牌所示,蛋牛包係幾多錢呢?依家俾啲時間大家諗吓,陣間開估! 瑞記其中一個名物就係,登登登凳,樽仔奶茶喇!樽仔奶茶其實一早已經沖好咗,一支支棟晒喺度咁俾大家落柯打嘅。小編有啲八卦於是問吓伙記點解奶茶好哋哋要入落樽仔啦,係咪同普通奶茶有咩唔同?點知佢淨係話樽仔得凍同埋冇得走甜嘅,因為一早已經加咗糖落去咁話喎。雖然最後佢都冇話我知點解要用樽仔裝住,不過經過小編嘅明查暗訪下得知原來係因為好耐以前冇紙杯,電車司機好鍾意攞啲樽仔去買外賣奶茶,久而久之就成為咗呢度嘅一個特色喇。 呢支樽仔奶茶(HKD16)都唔係淨係得個樣㗎,奶同茶嘅比例控制得啱啱好,飲落又香又滑,係茶味有少少略嫌不足咁。 除咗馳名樽仔奶茶之外,西多士(HKD25)亦非常出名!小編聽朋友講,星期六、日嚟叫西多要等好耐㗎,事關個個嚟到都起碼會嗌一份。咁小編梗係要試吓呢份咁巴閉嘅「神級西多」啦!同我哋平時認知嘅西多有啲唔同,有啲似法式吐司嘅造法,麵包沾滿蛋漿再落鑊煎,好香口。夾層冇花生醬,取而代之嘅係落重手嘅牛油同埋淋面嘅煉奶。睇落好似有啲漏,不過食咗第一啖之後就停唔到喇,煉奶同牛油完美咁同西多融為一體,超match! 另外蛋牛包(HKD16)亦係好多地膽推介嘅必食之選,入面係煎蛋碎牛,仲有少少蔥花咁。麵包微微烘過,外脆內軟!唔好睇佢好似薄切切咁,咬落都好juicy㗎!16蚊大大個包,小編覺得性價比幾高喇!   街霸最愛:哎吔,今集好難揀得落手呀,事關蛋牛包同西多士小編都超鍾意呀!不過好似都係西多士略勝一籌,包住滿滿煉奶嘅多士食落口嘅感覺真係滿足到筆墨難以形容呀!超,正,呀!如果你未試就一定要試吓喇。溫馨提示,星期日係唔開嘅,唔好摸門釘呀! 瑞記咖啡奶茶 地址:上環皇后大道中345號上環市政大廈2樓熟食中心17號舖 電話:2850 8643 營業時間:星期一至六:07:30-17:00