Tagged: 西營盤

0

【全新意式餐廳隱身西營盤小巷 帶骨肉眼扒重磅登場】LucAle

依家難得出街食飯,想揀間性價比高又有氣氛嘅餐廳食好啲?最近新開嘅意式酒吧餐廳LucAle由兩位意大利名廚主理,喺度就可以合理價錢食到一系列正宗意菜,感受吓異國風情。由大大份巴馬火腿芝士拼盤,去到重量級帶骨肉眼牛扒,一啲都冇欺場。呢間酒吧餐廳隱身喺西營盤第三街嘅巷弄入面,私隱度高,喺度Chill吓放鬆心情都唔錯㗎! 打頭陣嘅係巴馬火腿芝士拼盤(HKD288),成盤滿滿嘅巴馬火腿中間放上一大嚿布拉塔水牛芝士,分量多到起碼夠3-4個人開心share! 有別於一般凱撒沙律,呢道反傳統凱撒沙律Caesar Salad Revisited(HKD168)係以原個羅馬生菜上碟㗎。面頭特製嘅鵝肝碎入口即融,非常creamy!而生菜配上意大利葡萄黑醋珍珠同榛子醬,味道夠晒獨特喎。 黑松露芝士手工意粉Cappelletti Di Bolognese(HKD158)都係呢度必食嘅招牌菜,所用嘅意粉係餐廳每日新鮮自家製嘅結他麵,口感煙韌有咬口。配上黑松露同意大利產羊奶芝士,再加啲核桃麵包碎,素食意粉都可以好吸引㗎。 成1kg嘅重量級Fassona帶骨肉眼牛扒(HKD988)出場喇!成塊扒真係大得誇張,食肉獸必試!而且旁邊配上三款配菜,兩、三個朋友share嚟食都夠晒飽。 牛扒選用上等帶骨肉眼部位,所以肉質係非一般咁軟嫩,牛味亦都係特别濃嘅。牛扒無特別調味,只係簡單灑上鹽嚟提味,咁就可以歎到佢本身嘅原汁原味喇。另外都有附上牛扒醬汁照顧埋重口味嘅朋友仔。 最後梗係要食埋個甜品至圓滿啦!呢款創意甜品Nutella Broken Pie(HKD88)擺盤精緻,賣相好似藝術品咁靚呀。以士多啤梨同荔枝配上Nutell同脆片,而中間嘅荔枝味自家製雪糕入口清新,仲食到果肉添。   LucAle 地址:西營盤第三街100號A舖 電話:3611 1842 營業時間:星期二至日:18:00-23:00

0

【飲飽食醉西式啤酒宴 沙律薄餅甜品加料手工啤】掌門精釀啤酒

掌門精釀啤酒係台灣幾出名嘅手工啤酒品牌,香港店嘅酒都由台灣運嚟以保持一致品質。繼尖沙咀店之後,上月喺西營盤開分店,用酒煮嘅菜式多咗,星期六、日仲有Brunch食添,等小編帶大家睇吓新店有咩好食啦! 餐廳位置喺西營盤高街小斜坡之上,餐廳環境就好開揚。 沙律都可以落酒?掌門四款沙律之中有兩款加咗酒,火箭菜意大利火腿無花果沙律(HKD108)仲係廚師推介添!廚師喺沙律汁落咗精釀啤酒「酸酸」,酒味比較薄,但味道酸啲,撈埋新鮮嘅無花果、火箭菜、Parma Ham好開胃又夠fresh!最鍾意佢加埋核桃,有咬口,感覺更加健康。 意式辣肉腸薄餅(HKD118)喺搓薄餅底嘅時候以招牌精釀啤酒「55%小麥」代替水,令薄餅口感煙韌啲,不過一樣焗得好香脆。餅底搓得算薄,意式辣肉腸同車打芝士海量式鋪滿喺面,食肉獸最愛呀! 海鮮意粉(HKD148),大廚喺炒意粉時,加入以大量美式啤酒花為風味特色的暢銷酒款「柒拾肆-加強版」,務求強調香氣,襯托海鮮鮮美。 安安檸檬芝士蛋糕(HKD58)用咗啤酒花能增加果香,質地好順滑同厚實。芝士味同檸檬味都好出,配埋雲尼拿果仁有多重享受添。 試完用酒煮嘅菜,輪到新店星期六、日嘅Brunch喇,一樣好足料囉!三杯雞多士盒(HKD78)外形有啲似台灣小食「棺材板」。嫩滑嘅雞髀肉用薑片、蒜頭、辣椒同葱爆香,惹味又有少少辣,再回鍋落埋「三杯」,即係黑麻油、生抽、老抽同冰糖一齊炒。收乾之後再加埋九層塔,肉有少少焦又好鬼香。不過最點睛係溫泉蛋喇!篤爆佢,將蛋汁同雞肉撈勻更香滑。加埋即烘脆口多士盒,真係飽到上心口。 仲有將蛋漿加入蘑菇、雞肉粒、薯仔粒、紅椒、青椒、菜同肉腸,煎成厚厚嘅香腸淡色艾爾意大利蛋餅(HKD68)。口感好豐富,因為落咗勁多料。蛋餅煎到啱啱好,仲有啲蛋汁添。 當然要飲杯酒落肚啦,新款Cocktail之中,小編幾鍾意狂野烏梅(左:HKD68/杯)。以味道辛辣嘅Tequila龍舌蘭酒同Cherry Brandy櫻桃白蘭地做基酒,加上重口味的烏梅汁同清新嘅青檸汁。入口即刻feel到酒精濃度高,酸中帶甜都啱夜晚飲。 仲有炭燒西柚(中:HKD68/杯),相比之下感覺好清爽,lunch飲都好舒服。以Gin酒做基酒,簡單配上西柚汁同炭燒烏龍茶,口感順滑,同時加入西柚粉紅色糖漿都唔會覺得甜,反而餘韻有種果茶嘅香氣添。 如果都係鍾意啤酒,大吉大利(右:HKD49/250ml)都唔錯,以科隆Kolsch啤酒加入大量新鮮金桔製成,因為「吉」同「桔」係同音字,所以攞個好意頭叫做「大吉大利」。味道清新但有啲酸甜果香,反而冇咩啤酒花嘅苦味。   掌門精釀啤酒 地址:西環西營盤高街53-65號地下富裕大廈地庫 電話:2650 0511 營業時間:星期一至日:12:00-23:00

0

【高質潮州自助餐推介 歎住海景食惹味滷水鵝】港島太平洋酒店

食自助餐成日都食西式嘢好悶?西營盤嘅港島太平洋酒店就推出潮州菜自助餐,等大家轉吓口味。 今次自助餐以傳統潮州菜為主,有凍蟹、滷水鵝片、滷水墨魚、大眼雞等廿多款潮州菜。前菜推薦大家花雕水晶龍蝦鵝肝凍,呢個冷盤打開味蕾同胃口!果凍充滿花雕酒香,凍食鵝肝唔會太腥,龍蝦都幾彈牙。 滷水汁食得出用咗好多香料熬製,唔會過鹹,師傅過濾咗好多次,所以無雜質。滷水鵝掌嘅皮吸晒滷水汁精髓,滷水鵝肉滷到好腍添!滷水大腸同滷水墨魚就幾爽口。滷水腩肉肉脂比例平均,食落唔肥,皮都幾脆身,有驚喜! 滷水和牛臉頰算係fusion菜,用咗澳洲M5和牛臉頰,肉質軟腍,入口即溶,估唔到配滷水汁都幾夾。 潮州蠔餅炸至金黃色,好酥脆!一般自助餐嘅炸物,放出嚟一段時間好快就腍,但呢個依然香脆。 其他菜式仲有胡椒鹹菜豬肚湯、蠔仔粥、鱈場蟹腳、波士頓龍蝦、青口、蝦、蜆等等。食材新鮮,性價比高。 甜品幾特別,以茶入饌,有潮州單欉水仙朱古力蛋糕、鐵觀音奶凍,有淡淡茶香,唔會超甜。但mui mui最喜鍾意就係養生豆花,自家製,豆味勁濃,比坊間嘅更滑更軟,誇張到唔落糖都好好味! 逢星期六晚仲有茶藝高手即沖潮汕功夫茶,鍾意歎茶嘅朋友要留意喇。   「潮」飲「潮」食主題自助晚餐 供應日期:即日至2018年3月31日  供應時間:18:15-21:30 星期日至四: 成人:HKD398;小童及長者:HKD278,設加一收費 星期五、六、公眾假期及其前夕: 成人:HKD438;小童及長者:HKD318,設加一收費   港島太平洋酒店 – 中西∙環Centre Street Kitchen 地址:香港西營盤干諾道西 152 號 電話:2131 5908 營業時間:星期一至日:06:45-21:30

0

【素食Bagel 激真肉感呃曬你】 the cotti

食得肉多想食返啲素菜,俾腸胃休息下。可能你會諗緊酸齋,不過素食絕對唔係中餐專利,西餐都可以玩到不一樣嘅變化,位於西營盤嘅the cotti就俾到我呢種驚喜啦!唔講唔知,原來”cotti”係意大利文意思指”cook”,真係開餐長知識呀。 店面黑白色簡約風格,又望到少少廚房空間,用仿磁磚做裝飾牆,有種紐約街頭coffee shop嘅感覺——快捷、輕鬆,同佢哋主要做外賣嘅路線好一致,星期六、日就可以俾人包場開小派對。 如果你本身係食肉獸,小編推薦Tofu Burger (HKD68/Mini HKD38),中間塊疑似「漢堡」完全會迷惑你!佢其實用豆腐、甜薯仔、洋蔥、藜麥、西芹等等嘅蔬菜製成,食落都幾滑幾甜又幾飽肚㗎。 沙律都係小編必食之選,因為口感清新又多菜,The Green Sunday Salads(HKD68)仲加咗大量營養價值非常高嘅藜麥、好流心嘅溫泉蛋、多汁爽口勁新鮮嘅車厘茄、牛油果、豆腐,配埋柚子汁酸酸甜甜好開胃,啱曬夏天食。 唔好以為一早就食咁大份,其實仲有The Basic Bagel (HKD36)俾你做早餐,另外仲有Chocolate、Blueberry、Onion同Honey Wheat幾款味任君選擇,全部都係每日新鮮即製,絕不欺場。 歎埋杯Yin & Yang(HKD38)鴛鴦,加咗海鹽鹹鹹地幾有趣,一早就係回味中渡過,正!   the cotti 電話:3952 7399 地址:香港西營盤干諾道西158A號 營業時間:星期一至日及公眾假期:07:00-19:00

0

【潮食Fusion車仔麵】Noodies

西營盤一帶尤其係第三街真係宇愈來愈旺,想搵到好野食真係好容易!一向覺得食車仔麵都係頹頹地,油麵米線米粉咁樣,menu上面更加唔會見到英文。除左例牌中式麵之外,仲有齊星馬泰日韓越嘅麵同湯底,想點配搭都得,係咪好新奇呢。門面仲大大隻字標榜無加味精添! 麵店細細間,但座位尚算舒適。 話得係車仔麵就當然有得俾你自由配搭點剔都得啦!基本兩餸麵$46碗,如果再追加標準餸就$6,升級餸好似廣島蠔,帆立貝,糖心蛋就加$12款 留意黑板上面會有每日精選。 如果著住淺色衫驚自己食得太興奮彈烏糟件衫,可以用餐廳提供嘅紙圍巾,好貼心嫁! 有選擇困難症嘅你都唔洗怕!餐牌都有已經set好左嘅麵,唔洗慢慢揀。 由於我都係有選擇選難,一於試個人氣之選!有芝士嘅叻沙湯底你食過未?原來都夾到嫁播! 天氣咁熱,食返個夏日冰之選就perfect啦!有冰鎮薯粉同冷麵醬油做湯底,食落好refreshing!可能我食得慢,d冰一融左醬油味道變得比較淡。如果要食依款麵唔好食得太慢呀! Noodies 西環西營盤第三街56號福滿大廈地下E舖 星期一至日: 11:00-21:30