Tagged: 西班牙菜

0

【西班牙菜新推春日menu 花系菜式refresh味蕾】Espuma

踏入春天你會聯想到咩呢?西班牙餐廳Espuma就推出一系列以花做主題嘅春日菜式,今次小編精選其中兩款頭盤、兩款主菜同兩款甜品俾大家,即刻睇吓呢啲新菜式有幾春天啦! 花,全部都係花!餐廳入面用唔同嘅花做佈置,中環店仲整咗一道花牆,春天氣氛爆發之餘,喺度打卡仲充滿仙氣添。 睇吓頭盤先,平時清酒煮蜆就食得多,西班牙果酒醉蜆(HKD118)又食過未呢?先用白酒灼熟啲蜆,再用Sangria果酒浸足三個鐘,令啲蜆吸收晒果酒嘅香味,唔怪得叫「醉蜆」啦! 而呢道賣相咁精緻嘅就係慢煮花椒口水牛面頰(HKD135),喺西瓜片上面嘅牛面頰用四個鐘低溫慢煮,仲要冰凍一晚先上枱,果然係心機菜呀!再加入芒果沙沙醬,酸酸甜甜又幾開胃喎! 籠裡雞作飯(HKD318)以成隻走地雞上枱,有1.6kg咁重,係咪夠晒霸氣呢?!連旁邊碗飯都大有來頭,係用煮完走地雞滴出嚟嘅油,加煙肉同粟米煮成嘅炒飯,配埋肉質鮮嫩嘅雞一齊食就最match! 想再特別啲?試吓呢道用港式蝦醬炒嘅啫啫蝦醬櫻花鮮蝦意大利麵(HKD178),仲唔係最有香港味嘅西班牙fusion菜?! 呢道咁色彩繽紗嘅朝思「慕」想(HKD128)其實係士多啤梨雪糕同乳酪嚟嘅,面頭嘅脆片增加咗成道甜品嘅口感添! 新推出嘅玫瑰烏龍茶窩夫(半份HKD98/全份HKD148)加咗玫瑰花瓣同玫瑰糖漿,啱晒鍾意花香嘅朋友仔!而窩夫下面啲吉士醬都特別用烏龍茶煮過,有淡淡嘅烏龍茶香!   Espuma(灣仔分店) 地址:香港灣仔皇后大道東202號QRE Plaza 25樓 電話:2151 9126 營業時間:星期一至日:11:30-23:00 Espuma(中環分店) 地址:中環威靈頓街2-8號威靈頓廣場M88 17樓 電話:2973 6088 營業時間:星期一至日:11:30-23:00 Espuma(尖沙咀分店) 地址:尖沙咀厚福街 H8 2樓 電話:2739 2080 營業時間:星期一至日:12:00-23:30

0

【望住山景歎西班牙菜 新Menu必試酥皮意大利麵】Espuma

Espuma嘅中環店啱啱粉飾完,唔單止環境再靚咗,仲有新Meun俾大家試新菜,今次加入咗唔少西班牙菜,口味幾清新,分量大得嚟唔會膩! 小編就幾鍾意山景位喇,眺望翠綠嘅風景,再歎唔同嘅美食,人都醒神啲。 沙律就一定好齋?錯喇!油封鴨腿中東米沙律(HKD108/中環及灣仔店限定)聽個名以為好heavy,原隻油封鴨腿雖然外層煎得香脆,但肉質仍然好嫩滑亦唔油;加埋幼細嘅中東米、提子乾同清甜生果,口感層次豐富之餘完全冇罪惡感。 鍾意冷盤就可以試西班牙式慢煮八爪魚(HKD98)口感幾爽,淋咗少少柚子醋同欖油令味道更清香。 酥皮香辣橄欖蒜片意大利麵(HKD118/中環及灣仔店;HKD108/尖沙咀店)未見到真身已經聞到佢陣香味,到上枱仲俾佢嘅分量嚇死你!切開層酥皮就會見到用指天椒、蒜片、欖油、西班牙辣肉腸同香葉連炒香嘅意大利麵,麵條吸晒啲汁亦幾彈牙。提提大家要撈撈啲麵,因為有少少辣汁喺底㗎。 雪莉紅酒慢燉牛臉頰(HKD208/中環及灣仔店限定)用8小時慢煮牛臉頰,啲肉腍到同薯蓉一樣,刀都可以唔用,一叉落去就分開到嚿肉!用雪莉紅酒煮,味道有啲甜,但亦算清清哋。 Espuma嘅甜品一向都好出色,今次流心軟芝士麻糬厚鬆餅(HKD108)令小編食到心心眼添!呢個係小編見過最大個嘅鬆餅,3個人食都仍然大滿足!最好嘅係佢用咗淡芝士,甜甜哋,食多啲都唔膩。鬆軟嘅口感加上清香蛋味,食完成個人都refresh晒! 三色西班牙油條(HKD68)係傳統西班牙小食,一定要趁熱食呀!外脆內軟嘅口感一流,仲有朱古力、雲喱拿同草莓醬俾你按個人口味配搭,真係要幾甜有幾甜。   Espuma 地址:中環威靈頓街2-8號威靈頓廣場M88 17樓 電話:2973 6088 營業時間:星期一至日:11:30-23:00

0

【銅鑼灣黑毛豬盛宴 帶你走入西班牙大地】Gusto Restaurant & Bar

黑毛豬出名肉質軟腍,令一眾豬迷為之瘋狂,但係要搵到一間餐廳食到唔同部位嘅黑毛豬就一啲都唔易,依家去銅鑼灣嘅Gusto Restaurant & Bar就有計喇!Menu 7-8成都係黑毛豬,差不多將成隻豬由頭到腳,起皮拆骨俾你試多啲唔同花款。大廚Angelo話為咗更了解西班牙菜,佢去咗當地一個月試唔同餐廳煮嘅菜色添。 餐廳走簡約高雅路線,要情調有情調,要氣氛有氣氛,二人世界定成班人開餐,一啲都唔失禮。 前菜可以點煙燻生蠔(HKD88),一開蓋就好似仙境咁。咪以為兩隻一樣,係唔同款㗎!餐廳會按時節挑選生蠔,一般都以法國蠔為主,例如法國泡泡蠔。兩款以一隻淡味(放有豌豆苗做標記),一隻濃味去配搭。提提大家,新鮮生蠔唔使加茄汁㗎,咁你諗到佢幾新鮮啦! 另一款前菜黑毛豬肩肉沙律(HKD98)比想像中清新,肩肉燒到裡面仲係粉紅色,啱啱熟夠晒腍,好易咬開。水果同沙律菜都好新鮮,全部都勁清甜。 黑毛豬豬仔骨(HKD168)大火燒完再入焗爐,外皮脆脆哋,骨肉都幾易分離。最鍾意佢嘅炭香味,而秘製凍BBQ汁又唔會太甜,仲有微微辣味,勁香口。配埋沙律菜同脆炸薯條,佐酒一流! 風乾黑毛豬火腿5J(HKD98)選用24個月嘅黑毛豬,肉味夠濃又夠嫩,最神奇嘅係唔會好油,黠解?因為好多餐廳連埋肥膏俾你食,但Gusto Restaurant & Bar會片走佢,等食客真係品嚐黑毛豬嘅肉香。 黑毛豬豬腸拼盤(HKD198)都有分淡味至濃味,由幼食到粗就啱喇。配上烤薯仔、烤蕃茄、沙律、酸瓜同洋蔥BB,唔怕肉食太多啦。 鍾意食羊嘅朋友不妨試試伊比利亞無骨羊扒(HKD178),肉質鬆軟又唔會好羶,平時勁怕羶味嘅小編都接受到。   Gusto Restaurant & Bar 地址:銅鑼灣登龍街18號V Point 2樓 電話:3188 5002 營業時間:星期一至日:星期一至日:12:00-15:00;18:00-23:00

0

【蛋糕造型海鮮飯 西班牙傳統蛋餅層層疊】La Postre

食唔同地方嘅傳統菜式,可以順便了解嗰個地方嘅文化,而西班牙菜會出現好多醃菜,口味濃郁嘅燉、燴同炸嘅菜式。上環有間樓上餐廳La Postre就對傳統西班牙菜烹調方式有份堅持,俾大家更容易感受到當地嘅異國風情。 餐廳以藍色,啡色做主調,有種揚帆出海嘅感覺。如果想居高臨下望下街,可以坐窗邊吧檯位,都好舒服㗎。 伊利比亞你可能唔識,但依度出產嘅黑毛豬一定要識,佢地真係淨食松果無溝其他雜糧,蜜瓜黑毛豬(HKD198)嘅肉果香味濃,肉質好滑,因為佢地揀咗24個月大嘅伊利比亞黑毛豬,件蜜瓜仲大到小編差啲一啖放唔入口。佢地自家炒嘅合桃必須激讚添,入口鬆化唔會硬,人手炒完再人手逐粒分開,絕對係心機之作。 如果你超鍾意芥末,小編推介你挑戰芥末雞翼(HKD78/3隻)。食雞翼尖嘅時候可能你會笑一聲點解咁都要挑戰,但係一食到中翼嗰度,辣到小編差啲飆眼淚,不過用芥茉醃過嘅雞肉堅係滑。 唔好話小編唔提你,去西班牙唔食醃菜就好似食炸雞走皮一樣咁失色。西班牙人好鍾意飲兩杯配多款小碟醃菜,如果點任何一枝紅酒或白酒(HKD398-1588)就會附送西班牙拼盤一份。以前小編諗油浸嘅肉一定食到成口油,今次發現原來口感係0油㗎!餐廳自家浸嘅沙丁魚係小編食過之中最滑嘅一次,如果連食10條都願意呀!另外,浸蕃茄、浸橄欖、藍芝士配多士都一樣好夾。 登登登登!最震撼嘅海鮮蛋餅飯(HKD238)出場啦!一上枱小編嘩咗聲,因為靚到成個蛋糕咁。蛋餅飯都係西班牙必食菜式之一,為咗令口感層次更豐富,喺薯仔、洋蔥同蛋嘅傳統餡料之中,再加入煙肉、蘑菇、芝士同飯。蛋皮煎到金黃香口,再淋上由3種芝士調成嘅微鹹醬汁,配埋海鮮,出奇地唔會勁重味,切開蛋餅仲見到裡面一層層添,口感好分明。 食完可以問下大廚咩名,因為再去食可以預約返同一位大廚再為你效勞添。   La Postre 電話:2668 5802 地址:上環永樂街50號昌盛大廈3樓 營業時間:星期一至日:12:00-23:00

0

【黑毛豬聖地!荃灣尊貴氣派西班牙菜】El Cerdo

荃灣大壩街附近多數都係一啲平民食店,再唔係就係商場熟口熟面嘅舖頭。小編喺呢啲食肆附近,發現了一間氣派尊貴嘅餐廳 ── El Cerdo。一行入去,就睇到餐廳裝潢十分講究高雅,格調甚高。其中一邊仲放滿咗由世界各地搜購返嚟嘅紅白酒。El Cerdo呢個名喺西班牙文中解作「豬」嘅意思,餐廳除咗主打多款慢煮黑毛豬嘅菜式,亦都以多種海鮮入饌,鍾情西班牙菜或者黑毛豬嘅朋友有食神啦。 西班牙海鮮炒飯(HKD168) 西班牙著名菜式。首先底下嘅炒飯用咗雞同蔬菜湯烹調而成,再加上海鮮同其他配料一齊烤焗,令到每粒飯都滲入海鮮、雞同蔬菜嘅精華。炒飯入面海鮮種類十分多,包括青口、大蝦,墨魚等等,鮮味突出。難怪會係餐廳最好賣菜式之一。 香辣脆炸大蝦(HKD48)每一日大廚都會親身挑選大蝦,確保每隻蝦都新鮮多膏。大蝦經過脆炸,香脆到連蝦殻亦可以進食。加埋辣醬,味道微辛略帶刺激,加埋大蝦鮮味,一試難忘。 脆皮豬腩肉配蜂蜜蛋黃醬(HKD48)經過三小時慢煮,然後油炸,豬味不但濃郁,而且入口香脆,有一種中式燒腩仔嘅感覺。加上蛋黃醬同甜椒,令味道中和而且更有層次感! El Cerdo 地址:荃灣大壩街77號地舖 電話:2882 3811 營業時間:星期一至日:11:30-23:00