Tagged: 西環

土瓜灣嘅人氣小館楚撚記大排檔開分店喇！今次打入西環石塘咀連同火鍋撚一舖兩店，仲推出幾款新店限定嘅菜式添。如果想食宵夜，依家10點後入座有88折優惠㗎！ 想食抵啲就要食宵夜時段喇。 呢度嘅菜式非常多，呢兩幅菜牌只係其中一部分咋，不過睇咗邊3款菜係西環店限定先。 首先有西楚霸王雞(HKD128/半隻，HKD256/隻)，全隻的話都幾大隻。有大量蔥同炸蒜做配料，食落肉質嫩滑有雞汁，而且唔多脂肪，食多幾件都Okay。 小菜之中又點少得地道港式煎蠔餅(HKD65)呢？！炸漿非常脆口亦唔厚粉，蠔肉分量足，加上本身已灑上椒鹹，唔蘸醬汁都好惹味喇。 仲有楚撚記黑栢葉爆炒雞腎花(HKD82)都係呢度嘅限定菜式，黑栢葉同雞腎炒得幾爽口，而且沾滿香辣嘅醬料，餸酒一流！ 食得辣嘅朋友又點可以用一味餸滿足你呢！其他特色小菜之中，麻辣韭菜鴨血煲(HKD79)就啱晒撈飯喇！呢道煲仔菜多啲湯汁，所以感覺冇楚撚記黑栢葉爆炒雞腎花咁辣，但麻香味十足。鴨血雖然比唔上台灣嘅地質素，但係都算滑身。成煲大約有8塊左右，2-3人分量啦。 激椒避風塘水魷(HKD89)係嗜辣嘅朋友必點菜式，亦係呢３道辣菜之中最辣嘅一款！開頭食落覺得係中等辣度，但連埋嗦晒汁嘅粉絲同芽菜一齊食，後起嘅辣勁就令小編即刻飲水喇！ 而楚撚原隻脆皮炸豬手(HKD125)就啱晒食肉獸，雖然炸到豬皮脆身，但肉依然有彈牙嘅口感。本身鹹味相對平時食到嘅淡口少少，重口味朋友可以點芥末或甜酸醬。 食咗咁多熱氣嘢，當然要飲個足料靚湯潤返吓。呢個細煲嘅老火菜乾煲豬肺湯(HKD92/小，HKD145)都分到4大碗，濃郁程度有老火湯嘅感覺㗎。   楚撚記大排檔 地址：西環石塘咀皇后大道西554-560號日富里百好大廈地下1號舖 電話：2878 1118 / 6680 9197 (WhatsApp) 營業時間：星期一至日：17:30-03:00

自從有Partyroom加打邊爐聚餐後集體感染武漢肺炎，火鍋店嘅生意真係一落千丈，但就演變出外賣火鍋嘅模式。不過堅尼地城嘅阿元菜市場就完全停賣火鍋玩轉型，阿元就話：「如果你已經病了，在家吃火鍋還是容易感染呀，所以不賣比較好。其實外賣火鍋在台灣很流行，我們在疫情過後會考慮。」。雖然依家轉型，但仍然做台菜，仲推出本店限定嘅牛肉麵、手工餃子、酸辣湯等款式，即刻試吓先！ 講返依呢阿元菜市場嘅限定菜式先，必食嘅就有呢款牛三寶麵(HKD85)，有煮到軟腍嘅牛肋條、牛筋同牛肚，肉量都幾多添。湯底就梗係紅燒湯底啦，將分開熬煮嘅牛骨湯同蔬菜湯最後合併一齊，起碼要煮6-8個鐘，味道好濃又有少少辣，啱晒重口味嘅朋友。 呢款外表似清湯腩嘅其實係藥膳牛肉麵(HKD69)，配咗4大嚿厚肉又腍身嘅牛肋條。湯底都係以牛骨湯做底，再加入藥材熬煮，入口濃味唔苦，感覺好暖胃㗎。 提提大家醬料區有兩款特別配備牛肉麵嘅醬料，牛油配紅燒牛肉麵會更加香辣惹味；而酸菜就令麵嘅味道更酸爽，台灣人都會加落牛肉麵㗎。 呢度仲有5款手工水餃，可以買走生嘅高麗菜、水蓮、韭菜、素菜(各HKD50/一打)同三鮮水餃(HKD60/一打)，堂食(每款5隻)又得。除咗傳統嘅高麗菜口味，配上蝦仁、帶子同木耳嘅三鮮餃(HKD30/上圖)同埋冇肉嘅碧綠素菜餃(HKD25/下圖)都唔錯㗎，餡料都幾飽滿。 想特別啲就有酸辣湯餃(HKD58/6隻)，可以喺水蓮、高麗菜同韭菜3款手工餃之中自選1款，小編就試咗罕見嘅水蓮餃，爽口又有蔬菜嘅甜味。如果唔想配手工餃，亦可以點酸辣湯麵(HKD45)，味道酸中帶辣都幾開胃㗎。 雖然轉型，但店內仍然保留「菜市場區」，食客可以自選蔬菜俾店員整成肉燥青菜(時價)，甚至買走返屋企自己煮。呢度八成嘅菜都來自台灣，以後想試唔同品種可以嚟買菜喎。 小編就試咗台灣嚟嘅紅鳳菜(HKD29)，口感有啲似莧菜。而肉燥青菜同香菇肉燥乾麵(HKD39)一樣，各有一勺香菇肉燥俾你拌勻嚟食。 除咗香菇肉燥味，仲有用台灣麻醬整成嘅麻醬拌麵，味道濃到有啲似花生醬添。   阿元菜市場 地址：西環堅尼地城科士街40號聯安新樓地舖 電話：9220 9785 營業時間：星期一至日：11:00-22:00

鍾意打邊爐嘅朋友，就算未食過都會聽過火鍋撚，因為個名盞鬼之餘，食物質素都唔錯。最近西環店推出唔少限定款式，即刻睇吓有咩正嘢啦！ 店名盞鬼，連店內嘅牆畫都跟返店名意思嚟設計。 等緊個鍋嘅時候最好有小食咬吓，依定西環店限定嘅惹味小食之中就有落足鹹蛋嘅黃金椒鹽粟米(HKD56)同黃金雞皮(HKD56)，炒到粟米同雞皮都俾起砂嘅鹹蛋黃包住㗎！簡單啲亦有脆炸土豆片(HKD45)呢類同樣惹味嘅小食。 冬天打邊爐都係想暖吓身，呢度就有季節限定推出嘅招牌胡椒豬肚雞鍋(HKD298)。上鍋時店員會即刻剪開已煮咗嘅豬肚，同藏喺入面嘅原隻雞，分量好足！湯底滾返熱就食得，最好先飲碗胡椒雞肚湯，辣得嚟幾爽㗎。食埋爽口嘅豬肚同嫩滑雞件就開始淥其他嘢啦！ 新出嘅點心火鍋系列全線分店都有，水晶叉燒包(HKD39)、水晶奶黃包(HKD39)、黑松露什菌餃(HKD55)都幾受歡迎，小編就覺得水晶叉燒包有驚喜，滿滿嘅叉燒餡好香又唔膩。經理教路最好用200-400度火慢慢浸熟，如果唔係好易滾爛。 如果想試返熱門湯底，咁就一定要試用牛奶煮成嘅蜂巢豆腐白湯鍋(HKD138)同有十幾種香料嘅祖傳秘製麻辣鍋(HKD138)。白湯滾起20分鐘左右就可以先食呢條韓國人參，都已經好出味㗎喇。而麻辣鍋除咗有滑嘟嘟嘅鴨血，亦同樣佢哋自家製嘅蜂巢豆腐，大件又唔易爛。 打仲有打邊爐必食嘅火鍋撚御用手切肥牛(HKD299)，呢份大size絕對夠食肉獸醫肚呀！大火滾起湯底淥8秘就食得，肉味好濃添。 創意午餐肉菜甫餃(HKD59/左)大隻飽滿，鹹香又唔覺膩，而酒糟五花肉(HKD78/右)就煮完都仲有好濃嘅酒香。 唔打邊邊只係想同朋友吹水？西環店仲有新推嘅特色Cocktail同ShiSha(HKD200)。其中竹葉青酒(HKD68)帶椰香，夠薑就點我(HKD68)微辣得嚟幾清爽喎。   火鍋撚 地址：西環石塘咀皇后大道西554-560號日富里百好大廈地下1號舖 電話：2878 8001 / 5565 8850(WhatsApp) 營業時間：星期一至日：17:30-03:00

阿元來了五歲喇，西營盤總店搬咗去堅尼地城，舖頭大咗可以食得舒服啲。香港人對阿元來了嘅熱情咁多年都冇減退，小編三點幾去到都不斷有食客到。舖頭雖然多人幫手，但阿元都會落場，佢話：「五年來都是自己主力研究菜式，也需要人幫忙衝擊一下，所以找來新的台灣廚師阿耀加入。因為我是住台灣的南部、他是住台東，就有台灣不同地方的小吃可以融合在一起，也創作更多菜式出來，每半年他都會研究新的菜單。」。今個月唔止有新menu，依家仲會搞埋到會添，想訂你心目中嘅台菜都可以啦。唔講咁遠，睇吓新場環境同新廚阿耀嘅新菜先啦！ 新場好大，除咗掛天燈增加台灣風味，部分牆身仲有掛啲兒時遊戲嘅擺設，同時又營造到夜市感覺，全部加埋又幾爽喎。 新地方可以喺食客面前整埋夜市檔口，更加食慾大開呀。 阿元魯肉飯(HKD39)嘅魯肉配方同之前一樣，但想大家食飽啲就加大咗分量同落埋魯蛋。又想健康啲，所以加埋魯菜，唔係白烚㗎！大大啖魯肉入口依然好香軟有肉汁，雖然睇到有肥肉，但食落唔多覺，汁嘅鹹度餸飯一流添。初時以為加咗量都唔係好大碗，但女仔食可能飽咗啲，除非你唔叫其他食物啦。 台灣唔同地區都有自己特色小食，今次新menu都加咗幾款唔同地區嘅傳統菜色。先講彰化肉圓(HKD39)，分四份先勉強可以逐份啪入口。外皮似厚身粉果，但好軟腍同好Q彈。入面包住嘅肉仲溝入鮮筍同香菇乾，點埋湯汁一齊食，感覺好滿足。 跟住就係四神湯(HKD30)，咪睇個樣好清，一潷係勁多湯料囉！入口有香濃嘅藥材味，但飲完感覺好清爽。雖然有豬大腸，但一啲都唔油，冬天飲仲幾暖身添。 仲有經典地瓜球(HKD30)，每個台灣人都實食過。不過呢個係改良版，包咗餡料唔做傳統嘅空心版。黃色嘅入面包咗地瓜蓉、紫色就包咗紅豆蓉。外脆內煙韌，仲有灑咗梅粉喺面，口感同味道都好豐富。 屏東嘅萬巒豬腳(HKD45)就用台灣直送嘅無骨豬腳肉，好似燻蹄咁，不過呢款係熱食。即叫即煎再淋醬汁，所以上菜嘅時候隻碟仲係熱㗎！肉質好滑同爽口，絕對可以回頭呀！ 新飲品就由阿元主理，右邊紅棗桂圓奶茶(HKD28)感覺清香，厚度似英式奶茶嘅感覺；而左邊嘅龍眼蜂蜜綠茶(HKD30)好得意，聞落有陣花香味，相對紅棗桂圓奶茶會甜啲。不過台灣口味都係比香港甜，所以店員會細心問你有冇需要少甜㗎。 想試吓舊嘅菜式都仲有大把選擇，小編推介土魠魚焿(HKD40)，土魠魚都係台灣直送㗎。四、五條炸過嘅魚條淋上湯羨，一咬魚肉嘅感覺好似食緊肉鬆味嘅肉條咁，極度滿足；湯羨係佢哋平時賣嘅肉羨湯，不過令小編諗起碗仔翅，因為有冬菇條同筍絲等材料，口味好啱香港人食。   阿元來了 地址：西環堅尼地城北街31號地舖 電話：3579 2460 營業時間：星期二至日：11:00-23:00(逢星期一休息)